“MYAND yilengel ya biin Krist baan-balum ni baan-bakaj i bub bwaal bwaakady buuteng bikasakan,” ki muleebel Lisa. * Waakady uleeb bwaal bwa kuuhal bwaakady bumukok ku myand ya biin-biin. I bub bwaal bwaakaabumw bwaakady bukok Anne, wiitabil neey: “I myand yilengel ya Batemw yaakady yiikok kuhitok byaakadyobw baalongweesh.” Biin-kweet babidy baan-bakaj aab, baakady bakat kubal Bibl ni kulangiloh, ki bulengel bwaakady ni bwenzej buvul kudyobw.

I mushind kaay udy myand yiitut yilengel mwa kuteng micim ya baat bady bitunyunguluk? Twiisambilaay ha mishind yibidy: hakukal mudimw ni ludimy lwiitut ni bilong biitut. Kuunyim, twiiyiiy kukontonon bwa kumanyik baat batudy mwa kuleej lukat lwa bulamat.

Mwaan-mukaj wa buseeb udyobw baleej mu Tusumw shapitil 31 udy ni “may ma myand yilengel” ha ludimy lwindiy. (Tus. 31:26) Wiitaatab bwa “may” aam mamuleej cidyey mwa kuleeb ni mushind a kwiicileeb. Baataat byaab, baloolong bilengel ha kwiikal ni “may” aam ha ludimy lwaabab. Balel bavul i bamanyik mudy may makasakan mwa kulongel bibiih mwaan aabab. Bab biikal babolok, mwaan aabab oow kiin mwa kwiibakun misang yikwaabw mat bilengel ku bidyobw bamwambil. Nook, bwa baan kukun mat ni kukooyelobw bidyobw bibambil, bikaam balel biikashishomw bwa kwiisamb naabw mu mushind mulengel.

Uw mwiikal muledy eecy kuy muledy, i mushind kaay uwudy mwa kwiisamb ni bulengel? Tusaasangan mu cituh cya kuuhal cya Tusumw 31:26 baleejomw neey: “Uleeleeb myand teng ni meej.” Byumvumvwiij neey: bikaam tumanyik may matudy mwa kuleeb ni kwiimaleeb teng ni meej. Bikaakal teng bitwambulwiish tut twiiyihanguj neey: ‘Cinakaakaam kuleeb cidy mwa kukolomony cinj, eecy cidy mwa kukaamish diitalal?’ (Tus. 15:1) Ing, i bya meej bwa kwanj kulang kuuhal kwa kuleeb.

Kasumw kakwaabw kaleeleeb nook: “Muut uleeleebakan bituh myand, utaatah teng bu mweel a diiy.” (Tus. 12:18) Hatulaalangil ha mushind udy may miitut ni mushind iitut a kuleeb mwa kuteng bakwaabw, bidy mwa kwiitusak bwa kukontonon bituleeleeb. Cya biin, kukooyel kwiitut kwa “may ma myand yilengel” kwiiyiiy kwiitwambulwiish bwa kulek kwiikal ni may ma cizuj eecy mataatahangan ku micim. (Ef. 4:31, 32) Tuleelek meej mabiih ni twiisamb ni may malengel ni diiy didy ni musangal. Yehow i mwiitwaakish cileejel cilengel mu bwaal oobw hajaadikiley mwiin mudimw indiy Elih waakady ni mooy. Mwanjel, uleeleej Yehow waakady wiisamb ni “kadiiy kakeeh kumvwiikil.” (1 Bak 19:12) Nook, kwiikal mwiin myand yilengel i kuhitok kwiisamb teng myand yilengel. Bikaam twiikal cikwaabw ni bilong bya myand yilengel. I mushind kaay utudy mwa kwiikal naaby?

Twiidiidikij Yehow hatwiisaasamb ni may malengel ni hakwiikal ni bilong bya myand yilengel. (Ef. 4:32; 5:1, 2) Lisa, utukaady baman kuteel ku butambwiil, uleejel mwaakady Batemw ba Yehow biikal ni myand yilengel yaakadyey mutal kudy Batemw. “Haakadyobw bashushumuj cisak ciitut bwa kumwangalecy, biin maluw babidy ba mu cisumbw bimakijil mudimw aabab ni biiyil bwa kwiitwambulwiish bwa kuhayik biit bya mu nzubw. Ciisang aacy, cyaakady mwanj kutwaadij kulong Bibl!” Bilong bya myand yilengel aaby byaakady bisak Lisa bwa kukontononey menmen myand ya biin-biin.

Anne, udyobw baleej ku butambwiil, wanyishil myand yilengel yitadiley  kudy Batemw ba Yehow. Uleejel neey: “Bwa mushind unaakady natal myand yilongek ha bulab, nashaadil menmen mwiin miland. Biikasakeen bwa mim kuteekel baat micim.” Uleebel cikwaabw neey: “Hanaakady mutwiilangan ni Batemw ba Yehow, cyaakady mwiibateekel micim. Naakady niyihanguj neey: ‘Bwabingany bitaatacish bwa mim?’ Ki myand yilengel ya biin-biin yaakady naay mulongweesh aam wa Bibl yaakady yiisak bwa mim kumuteekel micim.” Bilong bindiy bihatwiil cihet kaay cilengel? “Hahicil mafuk, natwaadijil kulangil bikasakan ha myand yinaakady nalong.”

Manyik neey: micim ya Lisa ni Anne yaakady yiteng bikasakan ku bilong bya lukat bya myand yilengel bitadilobw kudy baat ba mu cisumbw, ni bibambulwiishil bwa kukatobw bwa kulong myand ya biin-biin. Myand yilengel ya biin mu cisumbw yibambulwiishil bwa kutwaadijobw kuteekel Yehow micim ni baat bindiy.

Baat bakwaabw bady mwa kukal mudimw ni may malengel ni mimweemw bilondeshel cyaab cidy baat bakasakeen eecy bashikat. Bilel bikwaabw bya kaneemw bidy baat baleej i bilengel bwaal i cilel cya kwaabab eecy i bub buumuut bwaabab. Ki tut biikal basak teng bwa kulong myand bilondeshel bilel bya ha cyaab citudy eecy buumuut, katwiinoh bend twiidikij bulengel bwa Mawej.​—Fwanyikij ni Myand yilongel Bapostol 28:2.

 Bulengel bwa Mawej bwa biin-biin i cimw cya ku biikadil bya diimum dya spirit mujilang a Mawej. (Kal. 5:22, 23) Nook, kwiikal ni bulengel kumvumvwiij kukal mudimw haakaabumw ni bwenzej bwa spirit mujilang a Mawej. Kulong nook kuheehetangan ni lukat lutudy naalw bwa kwiidikij Yehow ni Yeez. Ni, bu mutudy biin Krist, tutaatabaleel bikasakan baat bakwaabw. Nook, tudy basak kudy lukat lutudy naalw bwa Yehow Mawej ni muut neet. Bulengel bwiitut bushaashaal nook ciikadil cya bukash cyaalalukil mu micim ni i cidy Mawej wanyish.

Bidy mwa kwiikal biheehel bwiitut kulongel baat baakady biituleej lukat eecy batudy bamanyik myand yilengel. (2 Sam. 2:6) Umw mushind a kwiibaleej bulengel i kwiibafwiijok. (Kol. 3:15) Ki i biny bitudy mwa kulong iikaleby neey muut kiin mukumbanyin bwa kumulongel myand ni bulengel?

Tukontonon bwaal oobw: Yehow i cileejel cilengel cyeeh bwa kuleej baat bukish bwindiy [bulengel bukiish bwiitukumbanyin], ni Diiy dindiy didyey mufundish dituloolongweesh dilongweesh dya buseeb bwa kuleej ciikadil eecy. Mwaak “bukish” i bakal nend mudimw misang yivul mu Mifund ya mu Ciin Krek ya bwiin Krist. I mushind kaay udy Mawej wiituleej bukish bwindiy?

Langil a miliyo ni miliyo ya baat bady Yehow muleej bulengel bwindiy ha kwiibakish biit bidy ni buseeb bwaabab kwiikal ni buumy. (Mat. 5:45) Biin-biin, ning hatwaakady katuy banj kumanyik Yehow, wiituleejel bulengel bwindiy. (Ef. 2:4, 5, 8) Cileejel, waakady mwiitulongel bwaal bulengel bweeh, hakutwaaley Mwaan indiy a diimung, bwa kukuuloh baat boos. Mupostol Pool ufundil neey: Yehow utwaadil cya bukish bwa “kuvul kwa lus lwindiy.” (Ef. 1:7) Cikwaabw, ning tut balong mpekaat ni bumb Yehow mwanz ku makas, utuutungunuk ni kwiitulombol ni kwiitulongweesh. Malongweesh mindiy ni may mahweehweek bu “mvul.” (Mmu. 32:2) Biin-biin, katwiin mwa kumufut menmen bwa myand yoos yilengel yidyey mwiitulongel. Bwaal bwa biin-biin budy neey: iikaleby neey Yehow kiin mwiituleej bukish bwindiy, Katwaakady a kwiikal ni kutakamin kwa myand yiiyiiy kuuhal ook.​—Fwanyikij ni 1 Pyeel 1:13.

Kakuy kulandul, bulengel bwa Yehow bwiituteeteng ni bwiitusasak bwa kumwiidikij. Bu cihet, hamut a kusungul baat batudy mwa kulongel myand yilengel, bikaam twiikashishomw bwa kwiidikij Yehow ha kulongel teng baat bakwaabw myand yilengel diifuk dyoos. (1 Tes. 5:15) Hatudy ni ciibidil cya kulongelangan myand yilengel, tudy bu mudil uteetem bikasakan hadyok mashik. Tudyok bwa kukashish biin mu cisak ciitut, batuhaahambidil naabw Yehow, biin mudimw neet, balony neet, ni biin mutumb neet.

Langok bwa baat banudy naab mu cisak ciinun eecy mu cisumbw ciinun biiyiiy kuhet malongweesh ku may miibuh ni bilong biibuh bilengel. Kudy mwa kwiikal muut mu cisumbw ciinun ukaakaam dyambulwiish bwa kumukadilok midimw ya ku nzubw kwindiy, kumulongolweelok mu kabudimy ka byaakudy bya haanj eecy kwiikal ni ciibidil cya kwiikal kuyok kamusumbil biit. Bwaal bukwaabw, hawutwiitwiilangan ni muut mukwaabw mu mudimw a bukajaady ukaam dyambulwiish, udy mwa kumwambulwiish hakumuhok biit bidyey ukaam eeny?

Bwiitut kwiidikij Yehow, tudy mwa kulong bwa kuleeb kwiitut ni bilong biikal teng bya “may ma myand yilengel.”