MPANGI Lisa * wavova vo: “O wete yavangwa kwa ampangi, wasimba kikilu o ntim’ame.” Muna mvovo miami, mpangi Lisa wayika dina diamfila mu tambulwila e ludi. Mpangi Anne mpe i wau kamona yo vova vo: “Kuna lubantiku, e diambu diamfila mu tambulwila e ludi ke mana Mbangi za Yave balonganga ko, kansi i mu kuma kia wete bampanga.” Owau, e mpangi zole zazi za makento betoma yangalelanga tanga e Bibila yo badika mana betanganga, kansi e diambu ditoma simbanga e ntima miau i wete bavangwa kwa ampangi.

Aweyi tulenda vangila o wete yo simba e ntima mia awana batuzungidi? Yambula twavovela mpila zole: Mpila tusadilanga lubini lweto ye mavangu meto. I bosi, tuvovela kana aki nani tufwete vanganga o wete.

O nkento angangu oyikwanga muna Ngana kapu kia 31 wakala yo “nsiku a wete” vana lubini lwandi. (Nga. 31:26) O nkento wayambulanga vo o “nsiku” wau wansadisa mu zaya dina kafwete vova ye mpila kevovela dio. O yakala yovo se kafwete mpe sadilanga o “nsiku” wau vana lubini lwandi. Mase mayingi bazeye wo vo o vovela kuna makasi dilenda kendeleka wan’au yo kubafila mu lembi kubalemvokela. Ozevo, vava mase bevovelanga kuna ngemba, diasazu dikala muna kubalemvokela.

Kiakala vo u se yovo ve, nki kilenda kusadisa mu vovelanga kuna ngemba zawonso? Tulenda solola e mvutu muna mvovo miantete mia sono kia Ngana 31:26: “Oziwidi nu’andi muna ngangu.” Disongele vo tufwete toma solanga e mvovo mieto ye zú dia ndinga tusadila. Diambote twakiyuvulanga e kiuvu eki: ‘Mana ivova, nga wantu mefungisa makasi yovo luvuvamu mesiamisa?’ (Nga. 15:1) Kieleka, diangangu mu teka yindulanga vitila twavova.

Muna sono kiankaka kia Ngana tutanganga vo: “O vova lembi yindula dina nze muntu osukwanga nsosolo.” (Nga. 12:18) Vava tuyindulanga una e mvovo ye zú dieto dia ndinga dilenda vanga kwa akaka, ediadi dikutusadisanga mu toma sola mana tuvova. Kieleka, osadila “nsiku a wete” dikutusadisa mu lembi sadila mvovo yovo zú dia ndinga dilenda kendeleka akaka. (Efe. 4:31, 32) Vana fulu kiasadilanga mvovo miambi, tufwete sadilanga mvovo miangemba ye zú diambote dia ndinga. Yave mbandu ambote kasonga muna diambu diadi vava kakasakesa Eliya wa selo kiandi ona wakala yo wonga. E mbasi ina Yave kasadila, yavovela muna “ndinga yalembama, yakuluka.” (1 Nti. 19:12) Kansi, okala nkwa ngemba mayingi diaka mevavuanga ke vovela kaka kuna ngemba ko. Tufwete mpe songanga muna mavangu meto vo tu akwa ngemba. Mu nkia mpila?

Tulenda tanginina Yave muna sadilanga mvovo miangemba ye muna vanganga o wete kwa akaka. (Efe. 4:32; 5:1, 2) Mpangi Lisa ona tuyikidi kala, wavovela o wete kavangwa kwa Mbangi za Yave. Wavova vo: “Vava diavava vo mono ye esi nzo eto twayaluka vana vau, akazi wole ana bakala mfinangani zeto bayiza kutusadisa mu kanga e funda. Muna kolo kiakina, kialongokanga Bibila ko.” Mavangu mama mambote mafila mpangi Lisa mu tambulwila e ludi.

Mpangi Anne, ona tuyikidi kala, watoma yangalela mpe o wete kavangwa kwa Mbangi za  Yave. Wavova vo: “Mu kuma kia mpila ina wantu a nza bakadilanga yame, kiabundanga diaka vuvu kwa muntu ko. Ozevo, vava yawanana ye Mbangi za Yave, kiababunda mpe vuvu ko. Yakiyuvulanga: ‘Ekuma wantu awaya bekunsongelanga e ngemba?’ Kansi, o mambu mambote mana nlongi ame a Bibila kampanganga, mamfila mu kumbunda e vuvu.” Nkia nluta katambula? Mpangi Anne wavova diaka vo: “Kuna kwalanda, yayantika sadila mana yalongokanga.”

E diambu diatoma simba ntim’a mpangi Lisa yo Anne yo kubafila mu tambulwila e ludi i mavangu mambote ma ampangi muna nkutakani. Mambu mambote bavangwa kwa ampangi muna nkutakani mabasadisa mu yantika bunda Yave e vuvu kumosi yo nkangu andi.

Mu kuma kia fu ya kisi nsi ye mpila basansukila, diasazu dikalanga kwa akaka mu sadila mvovo miangemba yo kala ye fu kia seva. Dialusanisinu kikilu mu mona vo wantu ayingi besonganga luzitu mu kuma kia fu yau ya kisi nsi  ye kiwuntu kiau. Kansi, avo tusonganga kaka e fu yambote mu kuma kia kisi nsi yovo kiwuntu kieto, ke disongele ko vo wete wa Nzambi tutangininanga.—Tezanesa ye Mavangu 28:2.

O wete i kimosi muna fu kia mbongo a mwand’avelela a Nzambi. (Ngal. 5:22, 23) Muna kuma kiaki, muna yima e fu kiaki, tufwete yambula vo mwand’avelela a Nzambi wafilanga e ngindu ye mavangu meto. Avo tuvangidi wo, tutanginina Yave yo Yesu. Nze Yesu tuzolele songa kwa wantu vo wete diau tutokanenanga. Dianu vo, o zola kweto muna Yave wa Nzambi ye muna akweto i kwau kukutufilanga mu songa fu yambote. Muna mpila yayi, ovanga wete kwa akaka i fu kituka muna ntima ye tukala ye dienga dia Nzambi.

Dilenda kala diasazu mu vanga o wete kwa awana bekutuvanganga o wete yovo awana tuzeye. (2 Sam. 2:6) Imosi muna mpila tulenda wo vangila i kubavutulanga matondo. (Kol. 3:15) Kansi, adieyi tuvova avo tumwene vo muntu kingandi kafwanukinu vangwa wete ko?

Badika e diambu edi: Yave i mbandu isundidi ya muntu ovanganga o wete kwa awana ke bafwanukinu vangwa o wete ko. E mvovo “wete,” “nsambu” yovo “nkenda” mu fulu yayingi miasonama muna Sono ya Kingerekia ya Kikristu. Aweyi Nzambi ketuvangilanga o wete?

Yindula e mafunda ye mafunda ma wantu ana Yave kevanganga o wete muna kubavana ina bavuidi o mfunu mu zinga. (Mat. 5:45) Kieleka, kana nkutu vitila twazaya Yave, watuvanganga kala o wete. (Efe. 2:4, 5, 8) Kasikil’owu, dimosi muna mambu masundidi o wete katuvanga i vana Mwan’andi mosi kaka kafwa mu kuma kieto. Paulu wa ntumwa wasoneka vo Yave wakubika e kimenga kia lukûlu “mun’owu wa umvuama wa nsambu zandi.” (Efe. 1:7) Kana una vo tusumukinanga Yave yo kunkendeleka, okwamanananga kutuludika yo kutulonga. E malongi ye mvovo miandi mina nze “mawanga ma mvula.” (Nsi. 32:2) Dialudi vo, ke dilendakana ko mu futa Yave mu kuma kia wete wawonso kekutuvanganga. Tuzeye wo mpe vo kele vo Yave katusongi nkenda zandi ko, ke twadi kala ye vuvu ko mu kuma kia kusentu.—Tezanesa ye 1 Petelo 1:13.

Kalukatikisu ko vo, e nkenda yo wete wa Yave ukutufilanga yo kutukasakesa mu vanga diau dimosi. Muna kuma kiaki, vana fulu kia solanga ana tuvanga o wete yovo fwila e nkenda, tufwete tangininanga Yave muna songanga e fu kiaki kwa wantu awonso, e lumbu yawonso. (1 Tes. 5:15) Vava tuvanganga o wete yovo fwila akaka e nkenda, tukalanga nze tiya muna nsungi a kiozi. Tukala se nto ya lufiaulwisu kwa yitu yeto, mpangi zeto, akweto a salu, a sikola ye mfinangani zeto.

Yindula e yitu yovo mpangi muna nkutakani aku ana olenda songa e ngemba muna mvovo ye mavangu maku. Nanga muna nkutakani aku muna ye mpangi ovuidi lusadisu o mfunu muna lunga-lunga e nzo ye yanzala kiandi yovo sala e salu yankaka ya lumbu ke lumbu nze kwenda sumba madia. Vana ntandu, muna salu kia umbangi avo wanane yo muntu ovuidi lusadisu o mfunu, nga olenda kunsadisa avo dilendakana?

Ozevo, yambula twatanginina Yave muna sadilanga e “nsiku a wete” muna mvovo ye mavangu meto.