NKAZI Lisa * watiile: “Natemilwe sana vino aina na ya nkazi yali ni cikuuku.” Walandanga pali cino calenzile asambilile icumi. Vikwene avino cali na kuli nkazi Anne, watiile: “Pa kutandika natemilwe ukusambilila icumi pa mulandu wakuti ya Nte yali ni cikuuku asi pa mulandu na vino yasambilizyanga.” Ndakai lyene ya nkazi yonsi yoili yakaipakizya ukubelenga Baibo nu kwelenganyapo sana, nomba icikuuku cino aina na ya nkazi yayalanzile i calenzile yasambilile icumi.

Tungalanga uli icikuuku icingalenga antu yauze ukukomeleziwa? Lekini tulande pa nzila ziili muno tungalanga icikuuku. Kuli kuti muli vino tukalanda na muli vino tukacita. Lyene tumalanda na pali yano tulinzile ukulanga icikuuku.

Umuci wa mano uwalondololwa umu Mapinda cipande 31 lyonsi “akalanda ni cikuuku.” (Mapi. 31:26) Akalenga “icikuuku” ukumwazwa ukumanya vino alinzile ukulanda na vino angavilanda. Ya isi nayo kwene yalinzile lyonsi ukulalanda ni cikuuku. Avyazi aingi yamanya ukuti amazwi aipe yangalenga umwana ukulaelenganya pa viipe. Nupya kuomvya amazwi ya musango uwo kungalenga umwana ukukanakutika kuli vino yakumunena. Fwandi ndi cakuti avyazi yakulanda ni cikuuku cingalenga umwana ukukutika nu kuyuvwila.

Mungacita uli pakuti lyonsi mwalanda ni cikuuku asi mulandu mwemwe yavyazi nanti foo. Tungazana icasuko pa ciputulwa ca kutandikilako ica Mapinda 31:26, pakati: “Wene akalanda na mano.” Mukucita vivyo mwaya nu kusoolola ningo amazwi alino na vino izwi lilinzile ukuya pa kulanda. Cingatwazwa sana ndi cakuti twayuzya sweineco ukuti: ‘Uzye vino namalanda vimaleka yano nkulandako ukusoka nanti vimalenga paye umutende?’ (Mapi. 15:1) I ca mano ukwelenganyapo sana lino tutatala twalanda.

Ipinda na lyuze likalanda ukuti: “Akacincila ukuvwanga, ivivwangwa vyakwe vikatota wa mupeni.” (Mapi. 12:18) Ndi cakuti twelenganya pali vino yauze yamauvwa pa mulandu na mazwi yano tumaomvya nanti vino izwi limaya lino tukulanda nayo, cilalenga twasoolola ningo amazwi ya kulanda. Ndi cakuti lyonsi tukulanda ni cikuuku tutalalanda amazwi aipe nanti umu nzila iipe. (Efes. 4:31, 32) Tulalanda amazwi aasuma nupya akukomelezya. Yeova watulangilile ningo ivya kucita lino walandanga na Eliya umuomvi wakwe uwali sana ni ntete. Malaika uwimililangako Yeova walanzile ni “izwi liteekele.” (1 Yamw. 19:12, NWT.) Nomba ukuya ni cikuuku kusipiliula sile ukulanda ni cikuuku. Tulinzile nu kucita ivintu ivingalanga ukuti twaya ni cikuuku. Tungacita uli vivyo?

Tukakolanya Yeova nga tukulanda amazwi asuma nu kucita ivintu ivisuma. (Efes. 4:32; 5:1, 2) Nkazi Lisa wino itulandapo mpiti walondolwile vino ya Nte yali ni cikuuku.  Watiile: “Lino yatuzinzile umu ng’anda ukwaula ukwenekela, atwalane yaili amu cilongano yaposile ulusa uku ncito pakuti sile ize yatwazwe ukulonga. Pa nsita iyo ala nsisambilila na Baibo.” Vino aina na ya nkazi yacisile vyalenzile nkazi Lisa ukutandika ukwelenganya sana pa cumi.

Nkazi Anne wino itulandapo pa kutandika, nawe kwene wataizye ya Nte pali vino yamulanzile icikuuku. Watiile: “Pa mulandu na vino antu umu nsi yonsi yaya, calenzile natwisika sana antu. Cantalilanga ukuyataila.” Nupya watiile: “Lino nakomenkine na ya Nte Yakwe Yeova, ntayataile. Nelenganyanga ukuti, ‘U mulandu ci uno iyanjikilako sana mano?’ Nomba vino aansambilizyanga Baibo yali sana ni cikuuku, calenzile njataile.” I visuma ci ivyacitiike? Nkazi watiile: “Lino papisile insita natandike ukwika sana mano kuli vino nasambililanga.”

Nkazi Lisa na nkazi Anne yakomeleziwe sana pali vino amu cilongano yayalanganga icikuuku na cico calenzile yasambilile icumi. Vino amu cilongano yayalanganga icikuuku calenzile ukuti yantandike ukutaila Yeova na antu yakwe.

Antu yamwi yakalanda amazwi aasuma nu kumwentula pa mulandu na kuno yakuliile. I cisuma sana umuntu ukuya ni cikuuku uku yantu yauze pa mulandu na kuno wakuliile nanti vino waya. Nomba ndi cakuti tuli ni cikuuku ku yantu yauze pa mulandu sile na kuno twakuliile nanti vino twaya ala tusikukolanya Leza.—Loliniko na Milimo 28:2.

Cikuuku caya pa miyele ino umupasi wa muzilo ukatulenga ukukwata. (Gala. 5:22, 23) Fwandi cii cikupiliula ukuti tukalondekwa umupasi wa muzilo ukutwazwa ukulanga icikuuku ca cumi cumi. Nga tukucita vivyo ala tukukolanya Yeova na Yesu. Nupya pa mulandu wakuti sweswe ina Klistu tukaika sana mano uku yantu yauze. Ukutemwa kuno twatemwa Yeova na antu yauze u kukalenga twacita vivyo. Fwandi ukuya ni cikuuku i miyele imwi isuma sana ino tukalanga ukufuma pansi ya mwenzo nupya ino Leza akalonda tukwate.

Cingatwangukila ukulanga icikuuku kuli yano yakatulanga icikuuku nanti yano twamanya. (2 Sam. 2:6) Inzila yonga ino tukacitilamo vivyo u kuyataizya. (Kolo. 3:15) Nomba nga ndi cakuti tukuyuvwa ukuti umwi atalinzile ukumulanga icikuuku, tungacita uli?

Elenganyini pali cii: Yeova watulangilila ningo ivya kucita, akatulanga icikuuku icikulu nupya Izwi lyakwe likatusambilizya isambililo ilicindame sana pa miyele ii. Mazwi yakuti “cikuuku icikulu” yayaomvya imiku iingi umu Malembo ya Cigiliki Aa ina Klistu. Uzye Leza akatulanga uli icikuuku?

Yeova akalanga icikuuku ku antu imintapendwa lino akayapeela vyonsi vino yakalondekwa pakuti yatwalilile ukuya nu umi. (Mate. 5:45) Nupya na lino tutali tumumanye watulanganga icikuuku. (Efes. 2:4, 5, 8) Conga cino wacitiile antu, u kupeela Umwanakwe wenga sile wino watemwa sana kuti afwile antu yonsi. Umutumwa Paulo walemvile ukuti Yeova wapekinye ukuti tukululwe “pa mulandu ni cikuuku cakwe icikulu.” (Efes. 1:7) Nupya nanti cakuti tukayembuka nu kumusosya, akatwalilila ukututungulula nu kutusambilizya. Vino akatusambilizya vyaya “wa kutonya kwa mvula.” (Malan. 32:2) Tutange tukwanisye ukulipila Yeova pa visuma vyonsi vino akatucitila. Nupya icisinka i cakuti ndi cakuti Yeova atatulanga icikuuku cakwe icikulu nga tutakwata upalilo wa kuya nu umi wa pe uku nkoleelo.—Loliniko na 1 Petulo 1:13.

Ukwaula nu kutwisika icikuuku cino Yeova akatulanga cikatukomelezya. Fwandi ukucila ukulanga sile icikuuku uku yantu yamwi, tulinzile ukukolanya Yeova ukulanga icikuuku uku yantu yonsi nupya cila wanda. (1 Tesa. 5:15) Nga tuli ni cikuuku lyonsi, tukaya wa moto uukalenga antu ukuvwa ukukaya lino ikuzuka. Tukateekezya ya lupwa itu, ya kapepa yanji, yano tukaomba nayo, yano tukasambilila nayo alino na inamupalamano.

Elenganyini pali ya lupwa inu nanti amu cilongano cinu yano mungazwa pa mulandu na mazwi aasuma nanti kucita ivintu ivisuma. Limwi umu cilongano mungaya umwina nanti nkazi aakulondekwa uwazwilizyo ukusakamala ing’anda yakwe nanti calo nanti ukumwazwako kukala vimwi. Nupya ndi cakuti mwakomenkanya umwi umu mulimo wa kusimikila aakulondekwa uwazwilizyo, uzye mungamwazwako?

Lekini lyonsi twakolanya Yeova, twalanda ni cikuuku nu kucitila antu yauze ivisuma.