SE TOSIUAIKNI katli itoka Lisa * kiijtok: “Kema pejki nimomachtia, tlauel nimosentlachilik pampa nikitak toikniuaj kipiaj kuali ininyolo”. Anne nojkia kiijtoua: “Nechpaktik tlen melauak pampa Jehová itlajtoltemakauaj tlauel tetlasojtlaj”. Maske ni tosiuaikniuaj yolpakij pampa momachtiaj Biblia uan moyoliljuiaj ipan tlen kipouaj, tlauel kinpaleuik pampa toikniuaj kinextijkej kipiaj kuali ininyolo uan teikneliaj.

¿Kenijkatsa uelis tijnextisej tijpiaj kuali toyolo ika sekinok? Ma tikitakaj ome tlamantli: 1) ika tlen tikijtouaj, uan 2) ika tlen tijchiuaj. Nojkia, tikitasej ika ajkia inijuantij moneki tijnextisej tijpiaj kuali toyolo uan tikintlasojtlaj.

Ipan Proverbios capítulo 31 kamanalti tlen se kuali siuatl katli tlalnamiki uan “tlamachtia ika miak tlaiknelijkayotl” (Prov. 31:26). Kikaua nopa “tlaiknelijkayotl” ma kiyakana kema kamanaltis. Tetajmej tlauel kinpaleuis tlaj nojkia moyakanaj ika tlaiknelijkayotl. Inijuantij kimatij tlaj kinkualankanojnotsaj ininkoneuaj, uelis tlauel kinyolkokosej. Kema amo kinkamanaljuiaj ika tlaiknelili, uajka amo kichiuasej tlen kiniljuiaj. Yeka, tlaj tetajmej kinekij ma kintlakakilikaj uan ma kintlepanitakaj, moneki kinextisej kuali ininyolo uan kiniknelisej.

Tlaj titetajmej o amo, ¿tlake uelis tijchiuasej uan kiampa tijnextisej tijpiaj kuali toyolo kema tikamanaltij? Kampa peua Proverbios 31:26 kiijtoua: “Kamati ika miak tlalnamikilistli”. Ni kiijtosneki moneki kuali timoiljuisej tlake uan kenijkatsa tikijtosej. Kema sekij kinekij mokualanisej, uelis timotlatsintokisej: “Tlen nikijtos, ¿kichiuas nojua ma mokualanikaj, o kinyoltlalis?” (Prov. 15:1). Kema kuali timoiljuiaj tlake tikijtosej, tijnextiaj titlalnamikij.

Ipan Proverbios 12:18 kiijtoua: “Itstokej sekij tlakamej tlen tekokouaj ika inintlajtol keja eliskia se machete tlen tlateki”. Tlaj kuali timoiljuiaj kenijkatsa kiyolmatisej sekinok kema tikiniljuisej se tlenijki uan kenijkatsa tijchiuasej, techpaleuis nojua kuali ma timoiljuikaj tlen tikijtosej. Kema tijpiaj kuali toyolo, amo titeyolkokouaj ika tlen tikijtouaj yon titekualankanojnotsaj (Efes. 4:31, 32). Nojkia tijpatlaj tlen amo kinamiki timoiljuisej yon tikijtosej, ika tlajtoli tlen kinextia titetlasojtlaj. Jehová kuali kinextia kenijkatsa uelis tijchiuasej. Kema Elías tlauel momajmatijtoya, ya kititlanki se iluikaejketl ma kiyolchikaua ika yamanik tlajtoli (1 Rey. 19:12). Kema se akajya kipia iyolo, amo san kinextia ika tlen kiijtoua, nojkia ika tlen kichiua. Ma tikitakaj kenijkatsa.

Kema tikijtouaj tlen kinextia titetlasojtlaj uan tijnextiaj tijpiaj kuali toyolo, tijchiuaj sanse kej Jehová (Efes. 4:32; 5:1, 2). Lisa, katli tikijtojkej ipan achtoui párrafo, kiitak kenijkatsa toikniuaj kinextijkej kipiaj kuali ininyolo. Ya kiijtoua: “Kema monejki nima tiasej sejkanok, omej toikniuaj ininuaya ininsiuajuaj amo yajkej tekitij  pampa techpaleuijkej titlaajokuisej. Toikniuaj nechpaleuijkej maske ayamo nimomachtiyaya Biblia”. Tlen kichijkej, kipaleuik Lisa nojua ma kineki kimatis tlen melauak.

Anne, katli nojkia tikijtojkej ipan achtoui párrafo, tlauel kipaleuik kema toikniuaj kinextijkej kitlasojtlaj. Ya kiijtoua: “Ipan ni tonali itstokej miakej katli amo kualmej, nopa kichijtok ayokmo ma nimotemachi ipan yon se maseuali”. Nojkia kiijtoua: “Yeka, kema nikinixmatki Jehová itlajtoltemakauaj, nimoiljuiyaya kenke tlauel kinekiyayaj nechpaleuisej. Kema nikitak katli nechmachtiyaya Biblia nechikneliyaya, pejki nimotemachia ipan ya”. Uan, ¿kenijkatsa kipaleuik Anne? Ya kiijtoua: “Teipa pejki nimosentlalia ipan tlen nechmachtiyayaj”.

Kej tikitaj, ni omej tosiuaikniuaj tlauel kinpaleuik kema toikniuaj kinextijkej kipiaj kuali ininyolo uan tetlasojtlaj. Nojkia kichijki ma kinekikaj momachtisej Biblia. Kema kiitakej toikniuaj kinextiaj ni kuali tlamantli, kinpaleuik ma motemachikaj ipan Jehová uan ipan itlanechikol.

Miakej amo ouij kimatij ixuetskasej uan kuali tenojnotsasej pampa kiampa elij o kiampa momajtokej kichiuaj ipan ininaltepe. Maske amo kenijki tlaj kiampa tijchiuaj, moneki tikitasej tlaj nelia tijpiaj kuali toyolo kej Jehová (nojkia xikita Hechos 28:2).

Kema se akajya nelia kipia kuali iyolo uan tetlasojtla, kinextia nopa kuali tlamantli tlen toTeotsij itonal techpaleuia tijnextisej (Gál. 5:22, 23). Yeka, tlaj tijnekij tijnextisej ni kuajkuali tlamantli uan nojua tijchiuasej kej Jehová uan Jesús, moneki tijkauasej toTeotsij itonal ma techyakana ika tlen timoiljuiaj uan tlen tijchiuaj. Nojkia, sanse kej Jesús, tijnekij tikinpaleuisej maseualmej pampa tikinikneliaj uan nojkia tikikneliaj toTeotsij. Kej tikitaj, kema tijnextiaj tijpiaj kuali toyolo uan titetlasojtlaj, tlauel tijyolpakiltiaj Jehová.

Amo ouij tijnextiaj tikintlasojtlaj katli nojkia kiampa kinextijtokej ika tojuantij o katli kuali tikinixmatij (2 Sam. 2:6). Uan kemantika uelis nima tikintlaskamatiliaj tlen kichiuaj (Col. 3:15). Uan, ¿tlake panos tlaj timoiljuisej se akajya amo kinamiki tijtlasojtlasej?

Ma timoiljuikaj ipan ni tlamantli. San Jehová kinextia kipia kuali iyolo ika sekinok maske amo kinamiki kiampa kichiuas. Biblia techmachtia kenijkatsa uelis tijchiuasej kej ya. Ipan Escrituras Griegas Cristianas miakpa motekiuia nopa tlajtoli tlauel kuali iyolo. ¿Kenijkatsa kinextia Jehová?

Ma timoiljuikaj kenijkatsa Jehová kinextia kipia kuali iyolo kema kinmaka tlauel miakej maseualmej tlen ika itstosej (Mat. 5:45). Nojkia, maske ayamo tikixmatiyayaj, ya ipa kinextijtoya kipia kuali iyolo ika tojuantij (Efes. 2:4, 5, 8). Se neskayotl, ya temakak iKone iyojtsi katli tlauel kiiknelia uan kiampa techmakixtik. Apóstol Pablo kiijtok nama ueli techtlapojpoljuia totlajtlakoljuaj “pampa tlauel ueyi iyolo” (Efes. 1:7). Nojkia, maske nojua titlajtlakolejkej uan kemantika tijyolkokouaj Jehová, ya nojua techyakantok. Tlen techmachtia uan tlen kiijtoua kinextia kuali iyolo uan eli kej “pitsajatl” (Deut. 32:2). Amo kema uelis tijkuepilisej Jehová nochi tlen ya kichiua. Uan san ya uelis kichiuas kuali ma tiitstokaj teipa pampa kipia kuali iyolo (nojkia xikita 1 Pedro 1:13).

Tlen Jehová kichiua techyoltilana uan techpaleuia ma tijchiuakaj tlen technauatia. Yeka, nochipa ma tijnextikaj tijpiaj kuali toyolo uan tikintlasojtlaj nochi maseualmej. Ma tijchiuakaj kampeka mojmostla kuali tikinnojnotsasej sekinok kej Jehová kichiua (1 Tes. 5:15). Tlaj nochipa tijnextiaj tijpiaj kuali toyolo, tielisej kej tlitl tlen tetotonilia kema tlauel tlaseseya. Tochampoyouaj, toikniuaj tlen tlanechikoli, katli ininuaya titekitij o timomachtiaj uan tokalnechkauaj, tlauel kinpaktis itstosej touaya.

Ximoiljui ipan se tlen mochampoyouaj o se toikni tlen motlanechikol katli tlauel kipaleuis tlaj tijnextis tikiknelia uan tijtlasojtla. Uelis se toikni tlen totlanechikol moneki tijtlachpanitij, tijmokuitlauitij tlen kitojtok, tiasej tijtlakouitij o tiasej iuaya sejkanok. Uan tlaj kema titlajtolmoyauaj tikitaj se akajya kipoloua se tlamantli, ¿ueliskia tijpaleuisej?

Nochipa ma tijchiuakaj kej Jehová, uan ma tijnextikaj nelia tijpiaj kuali toyolo ika tlen tikijtouaj uan tlen tijchiuaj.