“SEMI nikmoujkaitak maj tokniuan kualtakamej”. Lisa * kijtoua ke yejua nejin tein okachi kiuelitak keman peuak momachtia Biblia. Se tokniuj siuat akin monotsa Anne no ijkon kipanok. Yejua kijtoua: “Keman nikinixmatik itaixpantijkauan Jiova nikuelitak tein tamachtiayaj, sayoj ke okachi nikuelitak ke semi kualtakamej”. Maski nejin tokniuan axkan kiuelitaj kiixtajtoltiskej Biblia uan itech tanemiliskej, semi kinpaleuij kiitaskej ke tokniuan kualtakamej.

¿Keniuj uelis tiyeskij tikualtakamej iniuan oksekin uan ika tikinyolchikauaskej? Maj tikitakan keniuj uelis tiknextiskej ika tein tikijtouaj uan ika tein tikchiuaj. Ompa, tikitaskej akonimej iniuan moneki tiyeskij tikualtakamej.

Proverbios capítulo 31 ika tajtoua se siuat akin semi kuali tekiti uan “ika tein kijtoua kinextia ke kualtakat” (Prov. 31:26). Yejua kinextia ke kualtakat ika tein kijtoua uan kemej kijtoua. Tetatmej no moneki kinextiskej ke kualtakamej ika tein kijtouaj. Miakej kimatij ke komo semi kinajuaj ininkoneuan uelis kinyolkokoskej uan xa amo kinekiskej kinkakiskej. Sayoj ke, komo kualtsin kinnojnotsaj, konemej xa okachi kinkakiskej uan kintakamatiskej.

Tiyeskij titetatmej oso amo, ¿toni techpaleuis maj tikualtakamej keman titajtoskej? Tein yekinika kijtoua Proverbios 31:26 kinextia se taman tein uelis techpaleuis. Ompa kijtoua: “Keman tajtoua kinextia ke tamatkej”. Nejin kijtosneki ke moneki kuali se kinemilis toni se kijtos uan keniuj. Achto ke tikijtoskej teisa, kuali yeskia maj timotajtanikan: “¿Tapaleuis tein nikijtoti oso kichiuas maj aksa kualani?” (Prov. 15:1). Komo achto tiknemiliaj toni tikijtoskej, tiknextiskej ke titamatinij.

Okse tajkuilol kijtoua: “Tajtolmej tein amo se kinemilia tamatij kemej ijkuak tetsoponiaj ika se espada” (Prov. 12:18). Xa okachi kuali tiknemiliskej tein tikijtoskej komo tiknemiliaj keniuj momachiliskej oksekin ika tein tikijtoskej uan kemej tikijtoskej. Keman timochikauaj tiyeskij tikualtakamej, amo tikijtouaj tein uelis teyolxokolis nion titeajuaj (Efes. 4:31, 32). Amo tiknemiliaj nion tikijtouaj tein amo tapaleuis, ta timochikauaj tiyeskij tikualtakamej uan tikijtoskej tein tapaleuis. Jiova technextilia keniuj uelis tikchiuaskej nejin. Keman itekitikauj Elías semi moujtoya, iángel Jiova kiyolchikauak ika “tajtol yemanik uan amo chikauak” (1 Rey. 19:12). Amo sayoj moneki tiknextiskej ke tikualtakamej ika tein tikijtouaj, ta no ika tein tikchiuaj. Maj tikitakan keniuj.

Uelis tikchiuaskej kemej Jiova komo tikualtakamej ika tein tikijtouaj uan ika tein tikchiuaj (Efes. 4:32; 5:1, 2). Lisa, akin ika titajtojkej itech párrafo 1, kiitak ke itaixpantijkauan Jiova kualtakamej. Yejua kijtoua: “Keman nochankauan uan nejua monekik timokalpataskej, ome takamej uan ininnamik akin katkaj itaixpantijkauan Jiova tajtankej amo tekitiskej para techpaleuiskej. Maski ijkuak ayamo nimomachtiaya Biblia”. Tein kichiujkej tokniuan kipaleuij Lisa maj kinekini momachtis.

Anne, akin no ika titajtojkej itech párrafo 1, no kiitak ke itaixpantijkauan  Jiova kualtakamej. Yejua kijtoua: “Kemej axkan miakej amo kualtakamej, ouij nechkisaya nitakuaujtamatis iuan aksa”. No kijtoua: “Keman nikinixmatik itaixpantijkauan Jiova, amo nikneltokaya ke yekmelauj kinekiaj tepaleuiskej. Nimotajtaniaya keyej katkaj kualtakamej nouan. Sayoj ke, nikitak ke akin nechmachtiaya ika Biblia yekmelauj kinekia nechpaleuis, yejua ika peuak iuan nitakuaujtamati”. ¿Uan keniuj kipaleuij nejon? Anne kijtoua: “Satepan peuak okachi itech nitanemilia tein nimomachtijtoya”.

Lisa uan Anne kiuelitakej keman kiitakej ke itaixpantijkauan Jiova kualtakamej. Nejon kinpaleuij maj kinekinij momachtiskej Biblia. Tein kichiujkej tokniuan kinpaleuij maj takuaujtamatikan iuan Jiova uan itekitikauan.

Sekin, amo ouij kinkisa ixuetskaskej uan yeskij kualtakamej porin ipa ijkon momattokej kampa nemij oso ijkon kiniskaltijkej. Uan nejon semi kuali. Sayoj ke, xa amo tikchiujtoskiaj kemej Dios komo sayoj  nejon techoliniskia maj tikualtakamej (no xikonita Hechos 28:2).

Iyektikatsin espíritu Dios techpaleuia maj yekmelauj tikualtakamej (Gál. 5:22, 23). Yejua ika, komo tiknekij tiyeskij tikualtakamej, moneki tikauaskej maj yektikatsin espíritu techpaleui itech tein tiknemiliaj uan tein tikchiuaj. Ijkon tikchiuaskej kemej Jiova uan Jesús. Uan no, kemej tiitatojtokakauan Cristo, yekmelauj ininka timotekipachouaj oksekin porin tiktasojtaj Dios uan no yejuan. Komo nejon netasojtalis techolinia maj tikualtakamej, tein tikchiuaskej semi tapaleuis uan kiyolpaktis Jiova.

Okachi amo ouij techkisa tiyeskij tikualtakamej iniuan akin no kualtakamej touan oso akin tikinixmatij (2 Sam. 2:6). Tiknextiaj ke tikualtakamej iniuan keman tikintasojkamatiliaj tein kichiuaj (Col. 3:15). Sayoj ke, ¿toni moneki tikchiuaskej komo tiknemiliaj ke amo moneki tiyeskij tikualtakamej iuan aksa?

Maj tiknemilikan nejin: sayoj Jiova senkis kinextia ke kualtakat iniuan nochin. Biblia techmachtia se taman tein semi moneki kemej uelis tiknextiskej nejin. Itech Escrituras Griegas Cristianas miakpa mokui tajtolmej tatiochiualis tein amo technamiki. ¿Keniuj kinextia Dios nejin?

Jiova kualtakat iniuan nochin porin kinmaka millones taltikpakneminij tein kinpaleuia maj yoltokan (Mat. 5:45). Uan hasta achto ke tikixmatiskiaj, Jiova kinextijkaya ke kualtakat touan (Efes. 2:4, 5, 8). Kemej neskayot, kitemakak iKonetsin akin okachi kitasojta maj toka momikiliki. Tatitanil Pablo kijkuiloj ke tein Jesús kichiuak uelis techpaleuis porin Dios “technextilia itatiochiualis tein amo technamiki” (Efes. 1:7, TNM). Uan maski titajtakolchiuaj uan tikyolkokouaj Jiova, yejuatsin kisentoka techpaleuia. Kinextia ke kualtakat ika tein techmachtia uan techiluia, uan nejon kemej yeskia “mixkiouit” (Deut. 32:2). Amo keman uelis tikixtauiliskej nochi tein toka kichiua. Uan komo Jiova amo technextiliskia itatiochiualis tein amo technamiki, amo ueliskia tikchiaskej tein kuali satepan (no xikonita 1 Pedro 1:13).

Kemej Jiova kualtakat kichiua maj tiknekikan iuan timotokiskej uan maj tiknekikan tikchiuaskej kemej yejuatsin. Yejua ika, maj amo sayoj tikualtakamej iniuan sekin, ta maj mojmostaj timochikauakan tiyeskij tikualtakamej iniuan nochin ijkon kemej Jiova (1 Tes. 5:15). Komo nochipa tikualtakamej, tiyeskij kemej tit tein takauantia keman taseseya. Komo tikualtakamej, tochankauan, tokniuan itech nechikol, akin iniuan titekitij, akin iniuan timomachtiaj uan akin nemij kampa ika tejuan tinemij kuali momachiliskej touan.

Itech xiontanemili semej mochankauan oso aksa itech monechikol akin moneki maj se kualtakat iuan oso maj se kilui tein kiyolchikauas. Xa se tokniuj itech monechikol moneki maj kipaleuikan ika teisa ikalijtik oso maj se kitakouiti oso maj se kichiua okse taman. Uan no uelis tiyeskij tikualtakamej iniuan akin tikinnojnotsaj ika Biblia komo tikinpaleuiaj ika teisa.

Maj tikchiuakan kemej Jiova uan maj nochipa tikualtakamej iniuan oksekin ika tein tikijtouaj uan ika tein tikchiuaj.