“SAPANOUA onechtlajtlachialti tokniuan techchiuiliaj tlen kuali”. Ijkon okijto se tokni tlen itoka Lisa * ijkuak okinmixmatki iTlaixpantijkauan Jehová. Anne noijki ijkon okitak, ye okijto: “Ijkuak onikinmixmatki iTlaixpantijkauan Jehová amo onechtlajtlachialti tlen yejuan otlamachtiayaj, onechpakti nikitas yejuan techchiuiliaj tlen kuali”. Axkan nonmej tokniuan yolpakij kitlajtoltiaj Biblia uan mokuayejyekouaj tlen ompa kijtoua. Noijki okinpaleui, tokniuan okinchiuilijkej tlen kuali uan okitakej tetlasojtlaj.

¿Ken uelis tikinchiuiliskej tlen kuali oksekimej uan ken kinpaleuis? Uelis tikteititiskej ika ome tlamantli: ika tlen tikijtouaj uan ika tlen tikchiuaj. Satepan tikitaskej ken tikteititiskej tikintlasojtlaj oksekimej uan tikinchiuiliaj tlen kuali.

Siuatl tlen kijtoua Proverbios capítulo 31 kiteititia melauak tetlasojtla ika tlen kijtoua (Prov. 31:26). Tlen kijtoua uan ken kijtoua, kiteititia yolkuali. Tetajmej noijki moneki ijkon kichiuaskej. Tla yejuan amo kinmititiaj inkoneuan kintlasojtlaj ijkuak kintlapouiaj, xamo kinyolkokoskej uan amo kichiuaskej tlen kinmiluiaj. Pero tla kinmititiaj kintlasojtlaj ijkuak kintlapouiaj, yejuan kinkakiskej uan kichiuaskej tlen kinmiluiaj.

Tla tikinpiaj tokoneuan noso amo, ijkuak itlaj tikijtoskej, ¿ken uelis tikteititiskej melauak titetlasojtlaj? Kanin peua Proverbios 31:26 kiteititia ika tlen tikijtouaj tikteititiskej kox tiixtlamatkej. Non kijtosneki kuali timokuayejyekoskej tlen uan ken itlaj tikijtoskej. Ijkuak ikaj touan kineki kualanis, moneki ma timotlajtlanikan: “¿Tlen nikijtos kiyolseuis noso okachi kikualanis?” (Prov. 15:1). Tikteititiskej tiixtlamatkej tla achto timokuayejyekouaj tlen tikijtoskej.

Okse proverbio kijtoua: “Akin amo mokuayejyekoua ijkuak tlajtoua tetsopitia ken se espada” (Prov. 12:18). Tla timokuayejyekouaj ken momachiliskej oksekimej ijkuak itlaj tikinmiluiskej, kuali timokuayejyekoskej tlen tikijtoskej. Ijkuak itlaj tikijtoskej ma kiteititi titetlasojtlaj ijkon amo tikinyolkokoskej oksekimej (Efes. 4:31, 32). Amo ma tikijtokan tlen kinyolkokos oksekimej, san ma tikijtokan itlaj tlen kinyolchikauas. Jehová ijkon kichiua. Ijkuak Elías omomojtiaya iángel Jehová okiyolchika uan amo chikauak okitlapoui (1 Rey. 19:12). Amo san ma tikijtokan titetlasojtlaj noijki moneki tikteititiskej titetlasojtlaj ika tlen tikchiuaj. Ma tikitakan ken uelis tikchiuaskej.

Ma tikchiuakan ken Jehová, tlen tikijtouaj ma kiteititi tikintlasojtlaj oksekimej uan ma tikinchiuilikan tlen kuali (Efes. 4:32; 5:1, 2). Lisa tlen yotikijtojkej itech párrafo se, okitak iTlaixpantijkauan Jehová melauak tetlasojtlaj porque okipaleuijkej. Ye okijto: “Ijkuak nofamilia uan ne otichantiskiaj oksekan,  ome iTlaixpantijkauan Jehová uan innamik, se tonal amo otekipanojkej uan otechpaleuijkej otikololojkej tlen otikpiayaj, maski ayamo onimomachtiaya”. Tlen okichijkej tokniuan okipaleui Lisa ma kineki momachtis.

Anne tlen noijki yotikijtojkej itech párrafo se, noijki okitak iTlaixpantijkauan Jehová kinchiuiliaj tlen kuali oksekimej. Ye okijto: “Amo onikinneltokiliaya sekimej porque akinmej amo iTlaixpantijkauan Jehová onechchiuilijkej tlen amo kuali”. Noijki okijto: “Ijkuak onikinmixmatki iTlaixpantijkauan Jehová amo onikneltokaya kox melauak okinekiayaj nechpaleuiskej. Pero ijkuak onikitak melauak okinekiaya nechpaleuis akin onechmachtiaya, onechyolini ma nikneltokili”. ¿Uan non ken okipaleui? Anne okijto: “Satepan opejki nimokuayejyekoua melauak tlen onimomachtijtoka”.

Ijkuak Lisa uan Anne okitakej ken okinpaleuijkej tokniuan, non okichi ma kinekikan okachi momachtiskej. Noijki okinpaleui ma kineltokakan Jehová uan ialtepe.

Sekimej amo kitaj oui uetskaskej uan kiteititiaj tetlasojtlaj ijkuak itlaj kijtouaj porque ijkon okinmiskaltijkej. Kuali tlen yejuan kichiuaj pero tla kichiuaj san porque ijkon okinmiskaltijkej amo kiteititiskej melauak tetlasojtlaj ken Jehová tetlasojtla (noijki xikita Hechos 28:2).

Akin kiyekana iespíritu santo toTajtsin Dios tetlasojtla uan kitechiuilia tlen kuali (Gál. 5:22, 23). Ik non, tla tiknekij tikteititiskej melauak tikintlasojtlaj oksekimej uan tikinchiuiliaj tlen kuali ijkon ken Jehová uan Jesús, moneki tikkauaskej iespíritu santo Jehová ma techyekana. Noijki akinmej tikchiuaj ken Cristo tiknekij tikinpaleuiskej oksekimej porque tikintlasojtlaj uan tiktlasojtlaj Jehová. Ye yolpaki ijkuak kita titetlasojtlaj uan non techyolinia ma tikinchiuilikan tlen kuali oksekimej.

Amo oui tikinchiuiliskej tlen kuali akinmej tikinmixmatij uan techchiuiliaj tlen kuali (2 Sam. 2:6). Tla yejuan ijkon kichiuaj moneki tikintlasojkamatiliskej (Col. 3:15). Pero ¿tlen uelis panos tla timokuayejyekouaj ikaj amo kinamiki ma tiktlasojtlakan?

Ma tikilnamikikan Jehová kintlasojtla maski sekimej amo kinnamiki. Biblia techmachtia Jehová ijkon kichiua. Itech Escrituras Griegas Cristianas miak uelta kijtoua Jehová techtlasojtla maski amo technamiki. ¿Ken kiteititia ye techtlasojtla maski amo technamiki?

Ma timokuayejyekokan Jehová kinmititia kintlasojtla sapanoua miakej uan kinmaka tlen moneki (Mat. 5:45). Uan ye yotechtlasojtlaya maski ayamo otikixmatiayaj (Efes. 2:4, 5, 8). Ma tikilnamikikan ye okitemakak topatka iKone akin sapanoua kitlasojtla. Apóstol Pablo okijto toTajtsin Dios techmakixtis “por itlasojtlalis non saikpanoa” (Efes. 1:7). Noijki maski ualeua titlajtlakolchiuaj uan tikyolkokouaj ye ok techyekana. Jehová kiteititia techtlasojtla ika tlen techmachtia uan tlen techiluia, yetoskia ken ijkuak kiaui (Deut. 32:2). Maski Jehová sapanoua techtlasojtla, amo uelis tiktlaxtlauiliskej. Satepan nochipa tiyoltoskej porque ye techtlasojtla (noijki xikita 1 Pedro 1:13).

Ijkuak tikitaj Jehová techtlasojtla, non techyolinia ma tiknekikan okachi tikixmatiskej uan ma tikchiuakan tlen ye kineki. Ik non, nochtin ma tikinchiuilikan tlen kuali uan ma tikintlasojtlakan. Nochipa ma timochijchikauakan ma tikchiuakan ken Jehová (1 Tes. 5:15). Tla melauak tikintlasojtlaj oksekimej tiyetoskej ken tlitl tlen kintotonia ijkuak seua. Ijkon nochtin kuali momachiliskej touan.

¿Tikixmati ikaj akin iuan timonechikoua noso se mofamiliar tlen uelis tikchiuilis tlen kuali noso tikiluis tlen kiyolchikauas? Xamo se tokni tlen iuan timonechikouaj amo kipia akin ma kipaleui para kichiuas seki tlamantli ikalijtik, ikaj ma kitlakouiti noso xamo kineki oksekan ma kiuikakan. ¿Ken uelis tikinmititiskej tikintlasojtlaj akinmej tikintlapouiaj? Ma tikinpaleuikan ijkuak moneki.

Ma tikchiuakan ken Jehová, ma tikteititikan melauak titetlasojtlaj ika tlen tikijtouaj uan ika tlen tikchiuaj.