LISA * okwa ti: “Olukeno lwaamwatate naamwameme olwo unene lwa li lwa gumu ndje.” Okwa li ta popi kombinga yaashoka she mu nanene koshili. Anne okwa popi oshinima sha faathana a ti: “Olukeno lwOonzapo olwo unene lwa li lwa nanene ndje koshili, ihe hamalongo gadho.” Aamwameme ayehe mboka yaali ngashingeyi ohaya nyanyukilwa okulesha Ombiimbeli nokutedhatedha kuyo, ihe olukeno ndwoka ya li yu ulukilwa olwo lwa li lela lwe ya gumu.

Ongiini tatu vulu okuulikila yalwe olukeno ndwoka talu ya gumu komutima? Natu ka tale komikalo mbali: mokupopya kwetu, nomiilonga yetu. Opo nduno otatu ka tala kutya oolye tu na okukala hatu ulukile olukeno.

Omukiintu omwaanawa ngoka a popiwa mOmayeletumbulo 31 oha popi aluhe “nolukeno.” (Omayel. 31:26, NW) Ohe shi ulike momutono gwewi lye, nomoohapu ndhoka ta popi. Aasamane nayo oshi li nawa ya kale haya popi noyana ‘nolukeno.’ Aavali oyendji oye shi nawa kutya omalaka ga honga ohaga vulu okuguma nayi oyana. Ngele aavali ohaya popi omalaka omakukutu gomagandambadhi, aanona yawo ohashi vulika ya kale lela inaaya pulakena kuyo. Onkee opo ya popye oohapu oombwanawa notadhi kwathele oyana, aavali oya pumbwa okupopya nolukeno.

Kutya nduno otu li aavali nenge hasho, oshike tashi vulu oku tu kwathela tu popye nolukeno? Uuyelele otatu wu adha moshitopolwa shotango shOmayeletumbulo 31:26, ndjoka tayi ti: “Okana ke ote ka makulile oohapu dhowino.” Shono osha kwatela mo okuhogolola iitya yetu pandunge nosho wo omutono gwewi lyetu. Oshi li nawa tu ipule epulo ndika: ‘Mbela shono ndi li pokupopya otashi ningitha aapulakeni yandje ya geye nenge otashi ya ngungumaneke?’ (Omayel. 15:1) Oshi li lela pandunge tu kale hatu dhiladhila manga inaatu popya.

Eyeletumbulo limwe otali ti: “Aanamalaka omadhigu otayu ulula nge egongamwele.” (Omayel. 12:18) Uuna hatu dhiladhila kombinga yankene oohapu dhetu nomutono gwetu gwewi tagu ka guma yalwe, otashi ke tu ningitha tu dhiladhile manga inaatu popya. Ngele otwa tula miilonga ekotampango lyokupopya ‘nolukeno,’ otashi ke tu kwathela kaatu popye oohapu oombwinayi nonomagandambadhi. (Ef. 4:31, 32) Otatu ka pingena po omadhiladhilo omawinayi nosho wo oohapu oonkunkutu niitya iiwanawa notayi tungu, notatu ka popya nengungumano. Jehova okwe tu tulila po oshiholelwa oshiwanawa moshinima shika, ngele otwa tala komukalo mono a li a popi nomupiya gwe Elia ngoka a li a tila. Omuyengeli ngoka a li e lile po Jehova okwa popi naye “newi lyopevi, etalala.” (1 Aak. 19:12, NW) Ihe katu na owala okuulika olukeno mwaashono hatu popi. Otu na wo oku li ulika miilonga yetu. Ngiini mbela?

Ohatu holele Jehova mokupopya oohapu dholukeno nokuulukila yalwe olukeno. (Ef. 4:32; 5:1, 2) Lisa, ngoka a popiwa petameko, okwa hokolola kombinga yolukeno ndwoka a li a ulukilwa kOonzapo dhaJehova, a ti: “Sho uukwanegumbo wetu wa li wa lombwelwa wu tembuke mo meendelelo megumbo moka twa li hatu zi, aaihokani yaali yomegongalo lyetu oya tula mo efudho kiilonga ye ye ye tu kwathele  tu pakele iinima yetu. Pethimbo ndyono, kanda li nokuli nda tameka okukonakona Ombiimbeli!” Olukeno ndwoka ya li ya ulukilwa olwi inyengitha Lisa a konakone oshili muule.

Anne, ngono a tumbulwa petameko naye okwa li a pandula olukeno ndwoka a li a ulukilwa kOonzapo. Okwa ti: “Omolwiikala yaantu muuyuni, onda tameke okukala ndi na omalimbililo. Onda li handi mono oshidhigu okwiinekela aantu.” Okwa tsikile ko a ti: “Sho nda tsakanene nOonzapo, onda li ndi ipula kutya elalakano lyadho olya shike. Ondi ipula nda ti: ‘Omolwashike taya ulike ohokwe mungame?’ Ihe molwaashono ngono a li ha konakona nangame Ombiimbeli okwa li lela e na olukeno, oshi inyengitha ndje ndi mu inekele.” Oshizemo osha li shini? Okwa ti: “Konima yethimbo onda tameke okudhiladhila muule kwaashoka nda li tandi ilongo.”

Ndhindhilika kutya Lisa naAnne oya li ya gumwa noonkondo kolukeno ndwoka ya li ya ulukilwa kuyamwe megongalo, naashono oshe ya kwathele ya kale ya hala okwiilonga oshili. Olukeno ndwoka ya li ya ulukilwa megongalo olwe ya kwathele ya tameke okukala yi inekela Jehova noshigwana she.

Aantu yamwe otashi vulika ya kale haya popi oohapu dholukeno nohayi imemeha omolweputuko lyawo. Okuulukila aantu olukeno omolweputuko lyetu nenge osho twa shitwa oshinima shi shi okupandulwa. Ihe ngele ohatu shi ningi owala molwaashono osho tu li, otashi vulika kaashi ulike kutya otatu holele olukeno lwopakalunga. — Yelekanitha Iilonga 28:2.

Olukeno lwashili nenge tu tye uukuume, owu li oshiyimati shombepo yaKalunga. (Gal. 5:22, 23) Onkee ano, opo tu kale tu na olukeno lwashili, otwa pumbwa okweetha ombepo yaKalunga yi nwethe mo omadhiladhilo noonkatu dhetu. Nongele otwe shi ningi, kungawo otatu holele Jehova naJesus. Shimwe ishewe, tu li Aakriste, ohatu kala tu na ko nasha lela naantu. Onkee otwa pumbwa okwiinyengithwa kohole yokuhola Jehova Kalunga nosho wo aantu oyakwetu. Olukeno lwetu ohalu kala uukwatya wi ikalekelwa mbono hawu zi komutima mbono wo Kalunga a hokwa.

Otashi vulika shi kale oshipu okuulukila aantu olukeno mbono ye tu ulukila olukeno, nenge mbono tu shi. (2 Sam. 2:6) Omukalo gumwe tatu vulu oku shi ninga, omoku ya pandula. (Kol. 3:15) Ihe ongiini ngele otu uvite kutya omuntu gwontumba ina pumbwa oku ulukilwa olukeno?

Tala kwaashika: Jehova okwe tu tulila po oshiholelwa sha dhenga mbanda ngele tashi ya pokuulukila aantu olukeno, nOohapu dhe otadhi tu longo oshiilongomwa sha simana kombinga yokuulika uukwatya mbuka. Uutumbulilo “esilohenda” owa longithwa iikando oyindji mOmanyolo gOshigreka. Jehova ohe tu ulukile ngiini olukeno?

Dhiladhila kaantu omamiliyona mboka Jehova a kala nokuulukila olukeno moku ya pa shoka ya pumbwa, opo ya kale ye na omwenyo. (Mat. 5:45) Nokuli manga inaatu mu tseya, Jehova okwa adhika nale e tu ulukila olukeno. (Ef. 2:4, 5, 8) Pashiholelwa, okwa li a gandja Omwana awike a se pehala lyaantu ayehe. Omuyapostoli Paulus okwa nyola kutya Jehova okwa gandja ekulilo ‘omolwesilohenda Lye.’ (Ef. 1:7) Shimwe ishewe, nonando ohatu yono nohatu yemateke Jehova, oha tsikile oku tu wilika noku tu longa. Elongo lye nosho wo oohapu dhe odha fa ‘omata gomvula.’ (Deut. 32:2) Osha yela kutya itatu vulu okufuta Jehova omolwolukeno ndoka he tu ulukile. Otu shi wo kutya andola Jehova okwa li inee tu ulukila olukeno, ando katu na etegameno lyonakuyiwa. — Yelekanitha 1 Petrus 1:13.

Kapu na omalimbililo kutya ohenda yaJehova ohayi tu nanene kuye nohayi tu tsu omukumo. Onkee ano, pehala lyokukala owala hatu ulukile aantu yamwe ohenda, otu na aluhe okukambadhala okuholela Jehova mokuulikila aantu yalwe ohenda kehe esiku. (1 Tes. 5:15) Ngele ohatu ulukile aantu ohenda aluhe, ohatu kala twa fa omulilo gwa pupyala nawa esiku ku na uutalala. Ohatu kala ehekeleko enene kaakwanezimo yetu, kooitaali ooyakwetu, kaanasikola oyakwetu nokaashiinda yetu.

Dhiladhila kaakwanezimo yoye nenge kaamwatate naamwameme mboka taya ka mona mo uuwanawa ngele owe yu ulukile olukeno okupitila moohapu nomiilonga yoye. Otashi vulika pu kale pu na gumwe megongalo lyeni ngono a pumbwa unene ekwatho megumbo nomoshikunino she, nenge a pumbwa oku ka landelwa iinima. Shimwe ishewe, ngele owa tsakanene nomuntu gwontumba miilonga yokuuvitha ngono a pumbwa ekwatho, mbela ito vulu oku mu kwathela?

Natu tsikileni okuholela Jehova mokuulukila aluhe aantu ‘olukeno’ moohapu nomiilonga.