“MELAK onikuelitak ijkuak onikitak kenon notlasojtlaj iteixpantijkauan Jehová”. Ijkon okijto tokniuj Lisa a ijkuak opeuj nomachtia Biblia. Tokniuj Anne noijki kijtoua: “Onikuelitak tlen temachtiayaj tokniuan, san ika, más onikuelitak kenon notlasojtlayaj”. Ken tikitaj, yejuin tokniuan opeujkej nomachtiaj pampa okuelitakej kenon notlasojtlaj tokniuan. Aman yejuamej kuelitaj kiamapouaskej Biblia niman itech tlanemiliskej.

Tejuamej noijki uelis yakaj tikpaleuiskej, tla tikteititiaj ika titetlasojtlaj. Amantsin tikitaskej kenon uelis tikteititiskej ika titetlasojtlaj: ika tlen tikijtouaj niman ika tlen tikchiuaj. Sakin tikitaskej akinomej noneki tikintlasojtlaskej niman tikinpaleuiskej.

Proverbios capítulo 31 tlajtoua itech se kuajli tesiuauj akin “nochipa tlajtoua ikan tetlajsojtlalistli” (Prov. 31:26). Ijkon ken se kuajli tesiuauj akin kiteititia ika tetlasojtla ijkuak tlajtoua, tajtin noijki ijkon noneki kichiuaskej. Miyekej tajtin kuajli kimatstokej ika, tla xkuajli kinnotsaj inkoneuan noso tla kintlaueltsatsiliaj, uelis kimijtlakoskej. Tla tajtin xkualtsin kiminotsaj inkoneuan, yejuamej noijki xkualtsin kinnankiliskej. San ika, tla tajtin kuajli kiminotsaj inkoneuan niman kimititiaj ika kintlasojtlaj, yejuamej noijki kuajli kinkakiskej niman kintlakamatiskej.

Tinochimej noneki tikteititiskej ika titetlasojtlaj ijkuak titlajtoskej maski tla titajtin noso ka. San ika ¿kenon uelis tikchiuaskej yejuin? Proverbios 31:26 techijlia ika noneki titlajtoskej “ikan tlamatkilistli”. Yejuin kijtosneki ika noneki kuajli tiknemiliskej tlen tikijtoskej niman kuajli tikitaskej kenon tikijtoskej. Ijkuak onias se tlauejli, matotlajtoltikan: “Tlen nikijtos, ¿teyolseuis noso más tlakualanis?” (Prov. 15:1). Ken tikitaj, akin kinemilia tlen kijtos kiteititia ika tlamachilise.

Okse proverbio kijtoua: “Tlen se kijtoua yejuan xachtoj kinemilia, ueli tekokoua ken itlaj cuchillo” (Prov. 12:18). ¿Tlenon techmachtia yejuin? Ika tla xtiknekij titeyolkokoskej, kachtopa noneki kuajli tiknemiliskej tlen tikijtoskej niman kuajli tikitaskej kenon tikijtoskej. Tla titetlasojtlaj, kuakon xtitetlauelnotsaskej nion xtikijtoskej tlen teyolkokos (Efes. 4:31, 32). Tla tikitaj ika tlen tiknekij tikijtoskej uelis teyolkokos maka matikijtokan, yej matiknemilikan tlen kema uelis teyolseuis. Niman Jehová techititia kenon uelis tikchiuaskej yejuin. Ijkuak Elías nomojtitoya, Jehová okuajtitlan se ángel para makiyolchikauaki niman yejua “san yolik niman yemanki” okinots (1 Rey. 19:12) San ika, tlasojtlalistli xsan noteititia ijkuak titlajtouaj. Yejuin noijki noteititia ika tlen tikchiuaj. Matikitakan kenon.

Matikteititikan ika titetlasojtlaj ijkon ken Jehová, kualtsin matitenotsakan niman matitepaleuikan (Efes. 4:32; 5:1, 2). Lisa, akin otikteneujkej ipan kachtopa párrafo, okitak ika iteixpantijkauan Jehová melak notlasojtlaj pampa okipaleuijkej. Yejua kijtoua: “Ijkuak nofamilia niman nejua otochanpatlakej,  omemej tokniuan niman insiuauan xotekititoj pampa otechpaleuitoj ototlatlatlalilijkej. Ijkuak otechpaleuitoj nejua nion xninomachtiaya Biblia”. Yejon tlasojtlalistli tlen okiteititijkej tokniuan okipaleui Lisa mapeua manomachti Biblia.

Anne akin noijki otikteneujkej ipan kachtopa párrafo, noijki okitak kenon tokniuan melak tetlasojtlaj. Yejua kijtoua: “Pampa aman melak nochiua tlen xkuajli, nejua xok yakaj itech nitlaneltokaya”. Noijki kijtoua: “Ijkuak onikimixmat iteixpantijkauan Jehová, xintech nitlaneltokaya. Niman nikijtouaya: ‘¿Tlenon kinekij? ¿Tleka melak kuajli nechnotsaj?’. San ika, onikitak ika akin nechmachtijtoya Biblia yemelak kinekiya nechpaleuis”. ¿Kenon okipaleui Anne tlen okichiujkej tokniuan? Yejua kijtoua: “Sakin, opeuj nikchiua tlen ninomachtijtoya ipan Biblia”.

Ken tikitaj, yejuin omemej tokniuan opeujkej nomachtiaj pampa okitakej ika tokniuan melak kintlasojtlaj. Niman tokniuan akin nemiyaj ipan intlanechikol kualtsin kinnotsayaj niman okimititijkej ika yemelak kintlasojtlayaj.

Miyekej melak kualtsin tenotsaj pampa ijkon okinmachtijkej noso pampa niman ijkomej noso pampa ijkon intekiuj. Niman melak kuajli tlen kichiuaj. San ika, maski ijkon kichiuaj, xkijtosneki ika kiteititijtokej ika tetlasojtlaj ijkon ken Jehová tetlasojtla (uelis tikitas Hechos 28:2).

Ipan Gálatas 5:22, 23 Jehová techijlia ika noneki titetlasojtlaskej, titepaleuiskej, niman kuajli titenotsaskej. Tla tiknekij tikchiuaskej ijkon ken Jehová niman Jesús, noneki tokauiliskej ika espíritu santo matechyekana, niman ijkon kuajli titlanemiliskej niman tikchiuaskej tlen kuajli. Noijki, pampa tiktlasojtlaj toTajtsin tiknekij tikinpaleuiskej oksekimej, Jehová melak yolpaki ijkuak kita ika tejuamej titetlasojtlaj, titepaleuiyaj, niman kuajli titenotsaj.

¿Xmelak ika kuajli tikinnotsaj akin kuajli technotsaj niman techtlasojtlaj niman akin kuajli tikimixmatij? (2 Sam. 2:6). Kema, niman tikimititiaj ika tikintlasojtlaj ijkuak tikimijliaj ika tiktlasojkamatij nochi tlen kichiuaj topampa (Col. 3:15). San ika, kanaj kemantika uelis tiknemiliskej ika yakaj xkinamiki matiktlasojtlakan noso matikpaleuikan. Tla ijkon topan nochiua, ¿tlenon uelis tikchiuaskej?

Matiknemilikan tlen kichiua Jehová. Yejua kintlasojtla niman kinpaleuiya hasta akin xkimelaua makintlasojtlakan. Ipan Tlajkuiloltin ika Griego miyekpa notekitiltia yejuin tlajtoltin: “Iueyitetlajsojtlalis yejuan xtechtocarouaya tikseliskej”. Kuakon, Jehová melak tetlasojtlani. ¿Niman kenon kiteititia?

Jehová nochimej kinpaleuiya niman kinmaka tlen kinpoloua (Mat. 5:45). Maski xitikixmatiyaj, yejua yotechititijka ika techtlasojtla (Efes. 2:4, 5, 8). Pampa yejua kineki ika nochimej mamakisakan okitemakak tlen melak kitlasojtla, isenteKonetsin. Niman apóstol Pablo okijto: “ItlajsojkaKonetsin okitlaxtlau ikan iyesyo totlajtlakoluan, niman aman Dios yotechtlapojpoluilij ikan iueyitetlajsotlalis” (Efes. 1:7). Niman noijki, maski kemantika tikchiuaj tlen xkuajli niman tikyolkokouaj Jehová, yejua xkeman techkaua. Yejua nochipa techijlia tlen noneki tikchiuaskej, niman tlen techijlia yeskia “ken tlapayautli” (Deut. 32:2). Xkeman uelis tiktlaxtlauiliskej nochi tlen yokichiuj topampa. Niman kuajli tikmatstokej ika san pampa iueyitlasojtlalis uelis tikpiyaskej se nemilistli tlen xkeman tlamis (uelis tikitas 1 Pedro 1:13).

Ijkuak tikitaj kenon Jehová melak techtlasojtla, tiknekij más itech tonisiuiskej niman techpaleuiya matikintlasojtlakan niman matikinpaleuikan oksekimej. Kuakon, matikchiuakan ijkon ken Jehová. Nochimej matikintlasojtlakan niman maka san sekimej. Mojmostla matitepaleuikan niman kuajli matitenotsakan (1 Tes. 5:15). Tla nochimej tikimititiaj ika tikintlasojtlaj, kuajli nomachiliskej. Kimachiliskej ijkon ken ijkuak kinisiuiyaj tlitl ijkuak melak seua. Tochanejkauan, tokniuan, akin imiuan titekitij, akin imiuan tomachtiaj niman tovecinos, melak kuajli nomachiliskej.

¿Tikixmati yakaj akin noneki makipaleuikan? Kanaj se mochanejkauj noso se tokniuj kineki makiyolchikauakan, noso kanaj noneki makipaleuitij ichan, noso noneki makuikakan kampa ontlakouas, noso kampa noneki yas. Niman tla tikitaj ika yakaj akin otiknojnots kineki makipaleuikan, tla tiueli xpaleui.

Kuakon, matikchiuakan ijkon ken Jehová, nochipa matikteititikan tlasojtlalistli.