ULISA * wathi: “Umusa wabafowethu nabodadwethu abamaKrestu bewungikho koke kimi.” Bekaqalisela kilokho okwamdosela eqinisweni. Kwenzeka okufanako naku-Anne, owavuma wathi, “Ngatjheja khulu izenzo zabo zomusa kuneemfundiso zabo.” Abodadwethu ababilaba nje bathabela ukufunda iBhayibheli bebazindle ngalo kodwana umusa, ngiwo owabathinta khulu.

Nasinomusa, singazithinta njani iinhliziyo zabantu abasibhodileko? Akhesicoce ngeendlela ezimbili: ngelimu nangezenzo zethu. Ngemva kwalokho sizokucoca ngokuthi bobani ekufuze sibe nomusa kibo.

Umfazi onekghono okukhulunywa ngaye encwadini yezAga isahluko 31 ‘unomyalo othembekileko’ elimini lakhe. (IzA. 31:26) Uvumela “umyalo” lo unqophise amezwakhe nendlela akhuluma ngayo. Abobaba benza kuhle ngokuba “nomyalo” lo elimini labo. Ababelethi abanengi bazi kuhle ukuthi amezwi ahlabako angabalimaza abantwababo begodu lokho kungabangela bona abantwababo bangakulaleli abakutjhoko. Ababelethi nabakhuluma ngendlela enomusa, kuzokuba bulula ngabantwababo ukuthi babalalele.

Akunandaba ukuthi umbelethi namkha awa, ungakhuluma njani ngendlela enomusa? Singafumana ipendulo engcenyeni yokuthoma yezAga 31:26, ethi: “Ukhuluma ngokuhlakanipha.” Lokho kuhlanganisa ukukhetha kuhle amezwethu nendlela esiwatjho ngayo. Kuzosisiza ukuzibuza ukuthi, ‘Kghani engizokutjho kuzokuvusa ilaka namkha kuzokudambisa itukuthelo?’ (IzA. 15:1) Iye, kukuhlakanipha ukucabanga ngaphambi kokukhuluma.

Esinye isaga sithi: “Kunabantu abanamezwi ahlaba njengesabula.” (IzA. 12:18) Ukucabanga ngokuthi amezwethu nendlela esiwatjho ngayo kuyabathinta abanye kuzosisiza silawule lokho esikutjhoko. Liqiniso, nasisebenzisa ‘umyalo othembekileko’ angekhe sikhulume amezwi ahlabako namkha ngendlela enganamusa. (Efe. 4:31, 32) Sizokujamiselela imicabango namezwi angakhiko ngekulumo eyakhako nenomusa, ngelizwi eliphasi. UJehova usibekele isibonelo endabeni le lokha nakaqinisekisa incekwakhe ethukiweko u-Eliya. Ingilozi ebeyijamele uJehova yakhuluma ngelizwi ‘elizothileko.’ (1 Kho. 19:12) Ukuba nomusa kutjho okungaphezu kokuba namezwi anomusa. Kufuze senze izinto ngendlela enomusa. Singakwenza njani lokho?

Nasilingisa uJehova, amezwethu anomusa azokukhambisana nezenzo ezinomusa. (Efe. 4:32; 5:1, 2) ULisa esikhulume ngaye ngaphambilini nakakhuluma ngomusa awubona kiboFakazi, wathi: “Umndenethu nawukatelelwa bona ufuduke kungakalindeleki, abatjhadikazi  ababili ebandleni akhenge baye emsebenzini ukwenzela bona basisize sipake. Ngesikhatheso bengingakathomi nokufunda iBhayibheli.” Izenzo ezinomusezo zakhuthaza uLisa ukuthi afune ukufunda iqiniso.

U-Anne, esikhulume ngaye ekuthomeni naye wawuthabela umusa awubona kiboFakazi. Uthi: “Ngebanga lendlela iphasi elingayo namhlanjesi, bekubudisi ukuthi ngithembe abantu. Nangihlangana naboFakazi, bengingabathembi. Ngazibuza ngathi, ‘Kubayini abantwaba banendaba nami?’ Umusa odephileko engawubona emuntwini ebengifunda naye iBhayibheli wangenza ngamthemba.” Waba yini umphumela? Uthi: “Ngokukhamba kwesikhathi, ngathoma ukudzimelela kilokho ebengikufunda.”

Tjheja ukuthi uLisa no-Anne bathinteka khulu ngebanga lezenzo ezinomusa abazibona emalungeni webandla begodu lokho kwabenza bafuna ukufunda iqiniso. Umusa abawubona ebandleni wabasiza bavula iinhliziyo zabo.

Kungenzeka abanye bakhuluma ngendlela enomusa namkha bayamomotheka ngebanga lendlela abakhuliswe ngayo nendawo abahlala kiyo. Yintwehle ukuthi abanye abantu banomusa ngebanga lobuntu babo namkha indlela abakhule ngayo. Nange sinomusa ngebanga lezintwezo kwaphela lokho akutjho ukuthi silingisa uZimu ngokuba nomusa.—Madanisa nezEnzo 28:2.

Umusa kaZimu yingcenye yeenthelo zommoya ocwengileko kaZimu. (Gal. 5:22, 23) Lokhu kutjho ukuthi sitlhoga ummoya ocwengileko kaZimu usisize bona sibe nomusa. Lokho kuvumelana nesifiso sethu sokulingisa uJehova noJesu. Njengombana simaKrestu, sinekareko kwabanye. Yeke sikhuthazwa lithando esinalo ngoJehova uZimethu nangabantu. Umusethu uba bubuntu obunamandla obuvela ehliziyweni nalobo obamukelwa nguZimethu.

Kungaba bulula ukuba nomusa kilabo abanomusa kithi namkha ebantwini esibaziko. (2 Sam. 2:6) Okhunye esingakwenza kubathokoza. (Kol. 3:15) Kuthiwani nange sizizwa ngasuthi umuntu othileko akumfaneli ukuphathwa ngomusa?

Cabanga ngalokhu: UJehova usibekela isibonelo esiphuma phambili ekubeni nomusa, eliZwini lakhe usifundisa isifundo esiqakathekileko sokuba nobuntobu. Igama elithi ‘umusa omkhulu’ lisetjenziswe kanengi emiTlolweni yamaKrestu yesiGirigi. UZimu usitjengisa njani ukuthi unomusa?

Cabanga ngeengidi zabantu uJehova abatjengise ukuthi unomusa ngokubanikela lokho abakutlhogako bona baphile. (Mat. 5:45) Kuhlekuhle, ngaphambi kokuthi abantu bamazi uJehova, bekanomusa kibo. (Efe. 2:4, 5, 8) Ngokwesibonelo, wanikela ngeNdodanakhe ebelethwe yodwa ngebanga labantu. Umpostoli uPowula watlola ukuthi uJehova wasihlenga “ngokuvumelana nokunotha komusa omkhulu kaZimu.” (Efe. 1:7) Ukungezelela kilokho, nanyana senza imitjhapho besidanise uJehova, uragela phambili nokusinqophisa abe asifundise. Iinqophiso namezwakhe ‘kunjengemvula.’ (Dut. 32:2) Kuliqiniso ukuthi angeze sambhadela ngomusakhe. Kuhlekuhle, ingomuso lethu lisame emuseni kaJehova.—Madanisa neyoku-1 kaPitrosi 1:13.

Akunakuzaza ukuthi umusa kaJehova uphuma phambili begodu uyasikhuthaza. Lokho kusenza ukuthi singakhethi abantu esizokuba nomusa kibo kodwana kufuze silwele ukulingisa uJehova ngokuba nomusa qobe langa. (1 Thes. 5:15) Nasihlala sinomusa, sifana nomlilo ngelanga elimakhaza. Sizokududuza amalunga wemindenethu, webandla, abantu esisebenza nabo, esifunda nabo nabomakhelwana bethu.

Cabanga ngamalunga womndeni namkha webandla azokuthaba ngebanga lamezwi nezenzo zakho ezinomusa. Kungenzeka kunomuntu othileko ebandleni otlhoga isizo bona atlhogomele umuzakhe nesivande namkha otlhoga isizo ngokuthenga izinto azitlhogako. Ukungezelela kilokho, nawuhlangana nomuntu othileko nawutjhumayelako otlhoga isizo, kghani ungamsiza?

Njengombana silingisa uJehova, kwanga amezwi nezenzo zethu kungahlala kulawulwa ‘myalo othembekileko.’