LISA * enena kuti: “Kuwama ntima kwa abale na alongo a Chikhilisitu kwinikhuza ngako.” Pamene apa yove enzetanthauza za vinthu vimukopa kuti ayambe kuphunzila choonadi. Venzesoti chimozi-mozi na Anne wamene enena kuti: “Poyamba nikopeka ngako na choonadi chifukwa cha kuwama ntima kwenzeniwonesha a Mboni za Yehova osati chifukwa cha vinthu venzephunzisa.” Palipano, alongo aŵili amene aŵa osangalala ngako kuŵelenga Baibolo noganizila ngako mfundo zake koma kuwama ntima niye kwiŵayavya ngako.

Kansi tingachite tyani kuti tikowonesha nkhalidwe ya kuwama ntima yamene yukhuza ngako ŵanthu ŵatuchita nawo vinthu? Tiyeni tikambilane njila ziŵili: pa mwatulaŵilila komasoti vochita vasu. Pavuli pake, tikambilane kuti ni ŵani ŵatufunika kuwonesha kuwama ntima.

Vakulaŵila mwanakazi muweme otomolewa pa Miyambo 31 vuwonesha kuti okonkheja “lamulo ya kuwama ntima kosasila.” (Miy. 31:26) Yove olola kuti “lamulo” yamene iyi ikomusogolela pa vinthu vakulaŵila na mwakulaŵilila. Analume nawo volaŵila vawo vufunika kuwonesha kuti okonkheja “lamulo” yamene iyi. Makolo anyinji oziŵa kuti kulaŵila mwaukali kungawononge ŵana ŵawo komasoti kuti angoŵamvwilalini pa vinthu vakunena. Keno makolo olaŵila mowama ntima, vingankhale vosavuta kuti ŵana ŵawo akoŵamvwishila noŵamvwila.

Keno nimwe kolo olo yayi, kansi mungachite tyani kuti muphunzile kulaŵila mowama ntima. Tufwana mfundo yothandiza pa Miyambo 31:26 mu mbali yoyamba, yamene yunena kuti: “Osegula pakamwa pake mwanzelu.” Vamene ivi vupamikijapo kusankha mawu mwanzelu nolaŵila mwanzelu. Ndipo kanyinji-kanyinji, kungankhale kothandiza kulikonsha kuti, ‘Kansi vanufuna kulaŵila vichitishe kuti ayakine akalipe olo vichitishe kuti pankhale ntendele?’ (Miy. 15:1) Kulaŵila chendi, n’chinthu chanzelu ngako kuyamba taganiza tikaliyelaŵila.

Mwambi uyakine unena kuti: “Pali munthu wamene olaŵila mosaganizila na mawu olasa monga ni chibemba.” (Miy. 12:18) Keno tuganizila mwamene mawu ŵasu na kalaŵilidwe kasu mwavingakhuzile ŵanthu ayakine, vingatilimbikise kuti tikosamala na kalaŵilidwe kasu. Keno tulaŵila pokonkheja “lamulo ya kuwama ntima kosasila” tingokatishilalini ntchito mawu okhumudwisa olo onyoza. (Aef. 4:31, 32) Mmalo mokatishila ntchito mawu okhumudwisa na onyoza, tingolaŵila mowama ntima, mwachikondi komasoti molimbikisa. Yehova epeleka chisanzo pa nkhani yamene iyi pechilimbikisa ntumiki wake Eliya wamene enzechita wowa. Mngelo wamene enzepanamila Yehova, elaŵila “mawu a zii komasoti a pansi-pansi.” (1 Maf. 19:12) Kulaŵila chendi, kunkhala muweme ntima kupamikijapo vinyini osati tyala kungolaŵila mowama ntima. Tufunikasoti kuchita vinthu mowama ntima. Kansi tingachite tyani vamene ivi?

Tumukonkheja Yehova mwa kulaŵila mowama ntima komasoti kuchita vinthu mowama ntima. (Aef. 4:32; 5:1, 2) Lisa, watatomolako kumayambililo, efotokoza mwamene a Mboni mwechiyavyila banja yake mowama ntima. Yove enena kuti: “Banja yasu peiujiwa mwazizizi kuti ifuluke,  mabanja aŵili a mumpingo mwasu esenga holide kuntchito kwawo na cholinga chakuti atiyavye kulongeza katundu. Panthawe yamene iyo nenze nikaliyeyamba kuphunzila Baibolo!” Kuchita vinthu mowama ntima kwamene uku, kwichitisha Lisa kuti aiganizile ngako nkhani yophunzila choonadi.

Anne, watatomolako kumayambililo etembejasoti kuwama ntima kwechimuwonesha a Mboni za Yehova. Yove enena kuti: “Chifukwa cha mwakuchitila vinthu ŵanthu na ayawo muli chino chalo, nenzekhulupililalini aliyense.” Yove epitilija kunena kuti: “Penikumana na a Mboni za Yehova, nenzeŵakaikila. Nenzelikonsha kuti, ‘Ndaŵa yanji ove ochita nane chidwi?’ Koma kuwama ntima ngako-ngako kwenzeniwonesha munthu enzeniphunzisa Baibolo, kwinichitisha kuti niyambe kumukhulupilila.” Kansi penkhala vokonkhapo votyani viweme? Yove enena kuti: “Niyamba kuchita chidwi ngako na vinthu venzeniphunzisa.”

Onani kuti Lisa na Anne ekhuziwa ngako chifukwa chochitiliwa vinthu mowama ntima na abale na alongo osiyana-siyana, ndipo vichitisha kuti ayambe kuphunzila choonadi. Kuwama ntima kwechiwoneshewa na ŵanthu a mumpingo, kwiŵayavya kuti ayambe kukhulupilila Yehova pamozi na ŵanthu ŵake.

Ŵanthu ayakine ovutikalini kulaŵila mowama ntima komasoti kumwetulila chifukwa cha chinkhalidwe chawo. N’viweme ngako kuti ŵanthu ayakine owonesha vamene ivi chifukwa cha chibadwa olo chinkhalidwe chawo. Koma keno tikungochita vinthu mowama ntima chifukwa cha vamene ivi, vutanthauzalini kuti tukonkheja Mulungu.—Yelekezelani na Machitidwe 28:2.

Kuwama ntima ngako-ngako ni chitwazi cha mzimu utuŵa wa Mulungu. (Aga. 5:22, 23) Tetyo, kuti tikwanishe kuwonesha kuwama ntima ngako-ngako tufunikila kulola kuti mzimu utuŵa wa Mulungu ukosogolela maganizo ŵasu na vochita vasu. Keno tuchita vamene ivi tingakwanishe kumukonkheja Yehova na Yesu. Komasoti, monga Akhilisitu, tuchita chidwi ngako na ŵanthu ayakine. Tetyo, kukonda Mulungu na ŵanthu ayakine kutilimbikisa kuti tikowonesha kuwama ntima. Keno tuchita tetyo, tuyamba kuwonesha nkhalidwe yamene iyi mofumila pansi pa ntima, vamene vukondwelesha Mulungu.

Payakine vingankhale vosavuta kuwonesha kuwama ntima kuli ŵanthu amene otiwamila ntima olo ŵatuziŵa. (2 Sam. 2:6) Njila imozi yatingachitile vamene ivi ni kuŵatembeja. (Akol. 3:15) Lomba tyani keno tuwona kuti munthu muyakine ni wosayenelela kumuwamila ntima?

Ganizilani ivi: Yehova ni chisanzo chiweme ngako pa nkhani yowonesha kuwama ntima kukulu, ndipo mawu ŵake olembewa otiphunzisa mfundo yofunika ngako yokhuza mwatingawoneshele nkhalidwe yamene iyi. Mawu akuti “kuwama ntima kukulu” opezeka mmalo osiyana-siyana m’Malemba a Chigiriki Achikhilisitu. Lomba kansi Mulungu otiwonesha tyani kuwama ntima?

Ganizilani za ŵanthu mamiliyoni anyinji ŵakuwonesha kuwama ntima kwake Yehova mwa kuŵapasa vakufunikila kuti apitilije kunkhala na moyo. (Mt. 5:45) Kulaŵila chendi, olo petenze tikaliyemuziŵa Yehova, yove enzetiwonesha kuwama ntima. (Aef. 2:4, 5, 8) Mwachisanzo, yove epeleka Mwana wake wovyalika yeka muweme ngako chifukwa cha ŵanthu wonse. Ntumwi Paulo elemba kuti Yehova epeleka dipo “mokatijana na kuwama ntima kwake kukulu.” (Aef. 1:7) Kuyangijila pamene apa, olo kuti tumuchimwila komasoti kumukhumudwisa Yehova, yove opitilija kutisogolela notiphunzisa. Ndipo malangizo na mawu ŵake vili monga ni “mvula yowaja.” (Deut. 32:2) Kulaŵila chendi, tingakwanishelini kumuwejela Yehova pa viweme vonse vakutichitila chifukwa cha kuwama ntima kwake. Ndipo kuti Yehova aliyetiwoneshe kuwama ntima kukulu, sembe tiliye chiyembekezo chakusogolo.—Yelekezelani na 1 Petulo 1:13.

N’vosakaikisha kuti tukopeka komasoti kulimbikisiwa na kuwama ntima kwa Yehova. Tetyo, mmalo mosalula ŵanthu ŵatufunikila kuŵawamila ntima, tufunika kuyeja-yeja kukonkheja Yehova powamila ntima ŵanthu onse nsiku iliyonse. (1 Ates. 5:15) Keno tuchita vinthu mowama ntima nthawe zonse, tunkhala monga ni mulilo wamene uthuma pa nthawe yozizila. Tulimbikisa achibale ŵasu, abale na alongo, ayasu akuntchito, ayasu akusikulu komasoti ŵanthu ŵatunkhala nawo pafupi.

Ganizilani za ŵanthu a m’banja mwanu olo a mumpingo mwanu amene angasangalale mukalaŵila olo kuŵachitila vinthu mowama ntima. Vingachitike kuti mumpingo mwanu pali muyakine wamene ofunikila thandizo yapadela yosamalila ng’anda yake, munda wake olo kuyamugulilako vinthu ku maketi. Kuyangijila pamene apa, mukafwana munthu mu utumiki wamene ofunikila thandizo mwa njila iyakine, kansi mungamuyavye?

Pokonkheja Yehova, tiyeni nthawe zonse tikoyeja-yeja kuti kalaŵilidwe kasu na vochita vasu vikosogolelewa na “lamulo ya kuwama ntima kosasila.”