LISA o yitseri “Taba ya gore magageru ya Makreste ma yye ma nšupetsa go kwelana go baba ke yona yi ntikisiyeng ka matla.” * O bolabola ka so se yyeng sa mo tšhofa gore a yamogele nnete. Anne le yene o yi beya ka mokgonone o re, “Taba ya gore ba kwelana go baba yi yye ya njabodisa go phala tso ba di tšhutisang.” Magageru yawa gana byalo ma tikwisa ka go bala Bhayibele ma boya ma ghayela mara so se yyeng sa ba tikisa ka matla ke taba yonone ya go kwelana go baba.

Re ka šupetsa ba bangwana gore re ba kwela go baba ka mokgo mang? Tla re boneneng gore taba yowa ya go kwelana go baba re ka yi šupetsa ka mekgwa yifeng ka mmedi: re berekisa maleme ya rune le ka tso re di makang. Ke mokane re nyoko lebelela le gore ke bomang bo di nyakang re ba šupetsa gore re ba kwela go baba.

Mo Diyema 31 yi bolabola ka mosadi wa gore o maka dilo gabutši yi re, o na le “molawo wa go kwelana go baba” ho llemeng lage. (Diy. 31:26) O lisetsa “molawo” wone gore wo lawole tso a di bolabolang le ka mokgo a bolabolang. Bopapa le bona ba ko ba ba maka gabutši mo ba ka maka gore “molawo” wone wo be ho malemeng ya bona. Babelegi ba go tlala baa di tšiba gore mo ba ka fo bolabola ba kgwasolana tsotsone di ka kwisa ngwana bona go baba. Mo nkare babelegi ba fo bolabola ba sa nagane ba bolabola dilo tsa go hlaba tsotsone di nyoko maka ngwana gore a nape a womisa hlogo. Byalo, gore ngwana a di kwe a boye a tikise ke tso ba di bolabolang babelegi di nyaka ba bolabola ka mokgwa wa go šupetsa gore ba kwelana go baba.

Llemme la rune re ka le berekisa ka mokgo mang go šupetsa gore re kwelana go baba di sa yi ka gore re babelegi kela dho? Diyema 31:26 yi re neya phetolo mo yi re: “A fo lla go bula molomo.” Tsotsone di rela gore re nyoko kgeta tso re nyoko di bolabolang re boya re kgeta gore re nyoko di bolabola ka mokgo mang. Di ya gelepa gore re tiputsise gore, ‘Tso re nyakang go di bolabola ayitsano di nyoko kwatisa motho kela di nyoko gelepa gore seyemo se bebe?’ (Diy. 15:1) Di nyoko ba gabutši ka matla mo re ka thomisa ka go nagana.

Seyema se sengwana se re: “Mo motho a bolabola a sa nagana di tshwana le mo ba go hlaba ka lerumo.” (Diy. 12:18) Mo re ka thomisa ka go yemanyana re nagane gore tso re nyakang go di bolabola di nyoko yama ba bangwana ka mokgo mang tsotsone di nyoko re gelepa gore re lawole maleme ya rune. Nnete ke gore “molawo wo wa go kwelana go baba” wo nyoko re gelepa gore re titshware gore re sa berekisi mantsu ya go hlaba fote re sa kgwasolane. (Maef. 4:31, 32) Fote re nyoko di kgona go beyela ka thoko tsa go kekema tso re di naganang ke mokane re bolabole mantsu ya go šupetsa gore re kwelana go baba le ya gore fote maa yagisa. Jehova o re beyele mošupetso wa gabutši ga taba yonone nakwela a kgomoletsa lelata lage lo ba reng ke Eliya la gore ke mo le tšhugiye ka matla. Lengeloyi lo ne le bolabola le yemela Jehova le berekisiye lentsu “la go beba la gore le tlase.” (1 Mag. 19:12) Phela go kwelana go baba a di fo rela go bolabola mantsu ya gabutši. Di nyaka re make dilo tso di šupetsang gore nnete re kwelana go baba. Re nyoko di maka ka mokgo mang?

Mo re kopisela ga Jehova, mantsu ya rune ya re ma bolabolang ya gabutši ga wona re nyoko yeketsa le tso di šupetsang gore nnete re kwelana go baba. (Maef. 4:32; 5:1, 2) Lisa wa gore re bolabodiye ka yene ku mathomisong o yye a hlatolla ka mokgo Dihlatse di yyeng dya šupetsa gore di kwelana go baba. “Nakwela di nyaka gore ba mutši  wa geru ba rure ka go yakgoswa magageru ka phutegong ma yye ma tseya matšatši mmerekong gore ma thogo re gelepa go rura. Ka nako yonone ne ke soko thomisa go tšhuta Bhayibele!” Tso ba di makiyeng tsa go šupetsa gore nnete ba kwelana go baba di yye dya tšhofa Lisa gore a nyake go tšiba nnete.

Anne wa gore re bolabodiye ka yene ku mathomisong le yene o leboga taba ya gore Dihlatse di yye dya mo šupetsa gore di mo kwela go baba. O re: “Ka taba la gore lefase le ka mokgo le leng ne ke fo dulela go solasola. Ne di nthathafela tsa go tshepa batho.” Mo a ya mahlong o yitseri: “Mo ke gahlana le Dihlatse ne ke sa di tshepe. Ne ke fela ke tiputsisa gore, ‘Anthe ba nyaka ying mo gaka?’ Mara ye a ntšhutisang Bhayibele o nšupetsiye gore o nkwela go baba tsa mannete ke mokane tsotsone dya maka gore ke mo tshepe.” King so se makegiyeng ka nthago? “Ka nthago, ke yye ka thomisa go kenelela ga tso ke di tšhutang.”

O sa lebale gore Lisa le Anne ba yye ba tikisa ke taba ya gore bo ba leng ka ho phutegong ba yye ba šupetsa gore ba ba kwela go baba tsa mannete tsotsone di yye dya maka gore ba nyake go tšhuta nnete. Ka taba la gore bo ba leng ka phutegong ba yye ba ba šupetsa gore ba ba kwela go baba tsotsone di makiye gore ba thomise go tshepa Modimo le batho bage.

Bangwana ba tlwayele go fo bolabola mantsu ya gabutši le go ngwalangwala go le ka taba la setšo sa bona. Go maka ka mokgonone go le ka taba la gore re tlwayele kela go le hlago ya rune di gabutši. Mara mo nkare ke tsona fela tso di re tšhofang, tsotsone a di rele gore re kwelana go baba go tshwana le Modimo.—Tshwanisa le Mebereko 28:2.

Taba ya go šupetsa go kwelana go baba go tshwana le Modimo yi hlohletsela ke seyengwa sa moya wa go hlawolega wa Modimo. (Magal. 5:22, 23) Byalo, mo re karakara ka matla gore re šupetse gore re kwelana go baba tsotsone di rela gore re nyoko kutšetsela ke moya wa go hlawolega. Mo re maka ka mokgonone di rela gore a re keketlele kgole ga taba ya go nyaka go kopisela Jehova le Jeso. Fote ka taba la gore ke rune Makreste, re tihlupa ka matla ka batho ba bangwana. Byalo, tsotsone di rela gore taba ya go nyaka Jehova Modimo le batho ba bangwana ke yona yi re tšhofang. Fote di rela gore taba ya go šupetsa gore re kwelana go baba go nyoko ba mokgwa wa rune wa gore wo tšwa pelong fote Modimo wa wo yamogela.

Di lula go šupetsa gore re kwelana go baba ga batho ba gore le bona ba yye ba re šupetsa gore ba re kwela go baba kela mo nkare batho bone re ya ba tšiba. (2 Sam. 2:6) Mo o ka fo ba botsa gore ke ya leboga ke moka o fetsiye. (Makol. 3:15) Mara re nyoko re king mo re tseya gore motho yene a di mo tshwanele tsa gore ba mo kwele go baba?

Lebelela taba ke yowa: Jehova o re beyele mošupetso wa gabutši ga taba ya go kwelana go baba fote Lentsu lage le re tšhutisa selo se segolo ga taba ya go šupetsa mokgwa wowa. Lentsu la gore go “kwelana go baba” ba le berekisiye gatleletlele ga Mangwalo ya Sekreste ya Segerika. Modimo o nyaka re šupetsa ka mokgo mang gore re kwelana go baba?

O fo nagana ka batho ba go tlala bo Jehova a yyeng a ba šupetsa gore o ba kwela go baba ka go ba neya tso ba di gayelang gore ba thogo ya mahlong ba phela. (Mat. 5:45) Gabutšibutši, le nakwela batho ba soko bane ba tšiba Jehova yene ne a kene a ya mahlong a ba šupetsa gore o ba kwela go baba. (Maef. 2:4, 5, 8) Mo re beyisa, o yye a neyela ka Morwayi wage ye a mo nyakang ka matla gore a thogo gelepa batho ka mokana ga bona. Pawulo wa lepostola o yye a ngwala gore Jehova o makiye gore go be le sehlabelo sa go lepolla “ka taba la gore o re kwela go baba.” (Maef. 1:7) Fote le mo re sinya ga go tlala re boya re tšebisa Jehova yene o fo ya mahlong a re yetetsa a boya a re tšhutisa. Tso a re yetetsang ka tsona le lentsu lage di fo tshwana le “motšhawulelane.” (Dot. 32:2) Re ka sa yi gane taba ya gore le mo re ka tsoga re liketsiye go patela Jehova ka taba la gore o re šupetsiye gore o re kwela go baba re ka sa di kgone. Fote nnete ke gore, mo re nyaka go kraya tso di leng ku mahlong di nyaka re yi tshepe taba ya gore Jehova o kwelana go baba.—Tshwanisa le 1 Petro 1:13.

A re kamake le ka gonyana gore mo Jehova a šupetsa gore o kwelana go baba tsotsone le rune di ya re hlohletsela. Byalo, re sa yi make taba ya go hlawola batho mo re šupetsa gore re kwelana go baba, di nyaka re karakare gore re kopisele Jehova ga taba ya go šupetsa gore re kwelana go baba fote tsotsone go be maphelelo ya rune. (1 Mathes. 5:15) Mo re dula re šupetsa gore re kwelana go baba re nyoko tshwana le mollo wa gore wo re kwisa go belabela mo go bata. Fote re nyoko thogo kgomoletsa bo ba leng ka mutšing wa geru, bo re rapelang nabo, bo re berekang nabo, bo re kenang nabo sekolo le bayagelani.

O fo nagana ka bo ba leng ka mutšing wa genu kela ka phutegong ba gore ba ka gelepa ke mantsu yago ya gabutši kela tso o di makang. Go ka fo ba go na le ye mongwana ka phutegong wa gore o nyaka go gelepiwa ga taba ya go pasopa ba mutši wage, mašomo yage, nghate yage kela o nyaka o mo gelepa ka mmereko wa go tshwana le go ya ditolo. Go tokegela gana hone, mo o ka gahlana le motho tšhomong wa gore o nyaka go gelepiwa, ayitsano o ka maka se sengwana gore o thogo mo gelepa?

Mo re kopisela Jehova, nkare tso re di bolabolang le tso re di makang di ka dula di lawola ke “molawo wa go kwelana go baba.”