LISA a sajcht: “Daut de Breeda un Sestren soo leeftolich un frintlich wieren, wia sea besonda fa mie”. See wull doamet sajen, daut ar daut daut dolste no de Woarheit trock. Biejlikj soo wia daut bie Anne. See sajcht: “Daut de Zeijen soo leeftolich wieren, trock mie dolla no de Woarheit, aus waut dee lieeden.” Beid Sestren jleichen daut nu sea, de Schreft to läsen un doaräwa notodenkjen. De Frintlichkjeit deed sea väl aun dee.

Woo kjenn wie soo frintlich sennen, daut aundre doaderch Moot kjrieen? Well wie mol äwa twee Mäajlichkjeiten räden. Ieeschtens derch daut, waut wie sajen un tweedens derch onse Woakjen. Wie woaren uk seenen, to wäm wie sellen leeftolich un frintlich sennen.

De goode Fru, wua Spricha, Kapitel 31 von rät, haft “daut leeftolje Jesaz” opp äare Tung (Spr. 31:26, NW). Waut see sajcht un woo see daut sajcht, recht sikj no dit “Jesaz”. De Vodasch sellen uk dit “Jesaz” opp äare Tung haben. De mieeschte Elren weeten, daut äa Kjint daut schoden kaun, wan see hoade Wieed brucken. Daut Kjint woat dan veleicht nich wellen no siene Elren horchen. Oba wan de Elren leeftolich un frintlich to de Kjinja räden, dan woaren dee ea horchen wellen.

Woo kjenn wie daut aula lieren, leeftolich to räden, aus wie nu Elren sent ooda nich? Doatoo finj wie waut en Spricha 31:26. Doa sajcht daut: “See moakt äa Mul weislich op.” Doa es met en, daut wie onse Wieed weis utwälen motten. Ons kaun daut eene Help sennen, wan wie doaräwa nodenkjen: “Woat daut, waut ekj saj, aundre doll moaken ooda woat daut to Fräd fieren?” (Spr. 15:1). Soo, daut es weis, daut wie nodenkjen, ea wie räden.

Een aundra Bibelvarsch sajcht: “Onväasechtje Wieed spekjen aus een Schwieet” (Spr. 12:18). Wan wie doaräwa nodenkjen, waut onse Wieed un woo wie dee sajen, aun aundre doonen kjennen, dan kaun ons daut halpen, ons räden to kontrollen. Soo, wan wie ons no “daut leeftolje Jesaz” rechten, dan woa wie nich hoade Wieed brucken un nich soont räden, waut nich leeftolich es (Efs. 4:31-32). Wie woaren orrajchte Jedanken aufschaufen un opp eene leeftolje Wajch räden. Jehova jeef een sea goodet Biespel, aus hee met sienen Deena Elia räd, waut sea veenjst wia. De Enjel, waut fa Jehova räd, vetald met “eene nate, leise Stemm” (1. Kjen. 19:12). Oba leeftolich to sennen, bediet mea, aus bloos leeftolich to räden. Wie motten uk opp eene leeftolje Wajch haundlen. Woo kjenn wie daut?

Wan wie leeftolich räden un haundlen, dan doo wie Jehova no (Efs. 4:32; 5:1-2). Lisa, von dee wia ea aul räden, rät doavon, woo leeftolich de Zeijen to ar wieren.  See sajcht: “Aus onse Famielje haustich wajchtrakjen must, neemen twee Poa Lied von de Vesaumlunk sikj von de Oabeit auf, om ons to halpen. To dee Tiet deed ekj noch nich mol de Bibel studieren!” Daut dise Lied soo leeftolich wieren, brocht Lisa bat doa, daut see de Woarheit deepa unjasocht.

Anne, von dee wie ea aul räden, wia uk sea dankboa, daut de Zeijen soo leeftolich to ar wieren. See sajcht: “Wäajen daut, woo de Menschen vonne Welt to mie wieren, vetrud ekj nich opp aundre. Aus ekj de Zeijen troff, wia ekj sea mestrusch. Ekj docht bie mie soo: ‘Wuarom sent dee soo bekjemmat om mie?’ Oba wäajen mien Bibelliera soo leeftolich wia to mie, holp mie daut, opp ar to vetruen.” Waut fa goodet kjeem doabie rut? “Lota kjikjt ekj dan dolla doano, waut ekj lieed.”

Lisa un Anne jinkj daut sea to Hoaten, daut Breeda un Sestren von de Vesaumlunk soo leeftolich to an wieren. Daut holp dee, daut dee mea wullen äwa de Woarheit lieren, un daut see kunnen opp Jehova un siene Deena vetruen.

Fa eenje es daut veleicht leicht, leeftolich to sennen un schaftich to kjikjen, wäajen daut, woo dee oppjetrocken sent un wua dee wonden. Un daut es goot, wan eenje Menschen wäajen daut leeftolich un frintlich sent. Oba wan wie bloos doawäajen leeftolich sent, wäajen wie soo oppjetrocken worden ooda wäajen onse Perseenlichkjeit, dan doo wie nich werkjlich Gott no (see uk Aposteljeschicht 28:2).

Wan wie Gott nodoonen wellen, dan mott wie dee Frintlichkjeit haben, waut Poat von dän Jeist siene Frucht es (Gal. 5:22-23). Soo, daut bediet, daut wie de Help von Gott sienen Jeist brucken, om leeftolich, ooda frintlich, to sennen. Soo doo wie Jehova un Jesus no. Un soo aus Jesus sent wie uk om aundre bekjemmat. Daut doo wie aules, wäajen wie Jehova Gott un onsen näakjsten leewen. Leeftolich sennen es aulsoo eene besondre Ieejenschoft, waut von Hoaten kjemt un Gott jefelt.

Daut es veleicht leicht, to soone leeftolich to sennen un Dankboakjeit to wiesen, waut to ons ooda to dee, waut wie kjanen, leeftolich un frintlich wieren (2. Sam. 2:6; Kol. 3:15). Oba waut es, wan wie denkjen, daut et wäa goanich vedeent haft, daut wie leeftolich to dän sent?

Denkj mol aun dit: Jehova es daut baste Biespel doafäa, onvedeende Jnod to wiesen, ooda leeftolich to sennen. Un sien Wuat lieet ons gaunz kloa, woo wie aundre dise Ieejenschoft wiesen kjennen. De Wieed “onvedeende Jnod” woaren foaken en de christelje griechische Schreften jebrukt. Woo es Gott leeftolich to ons?

Denkj mol aun de millionende Menschen, to dee Jehova leeftolich wia, wäajen hee dee aules jeef, waut dee toom läwen brukten (Mat. 5:45). Jehova wia mau rajcht leeftolich to ons, ea wie am kjanen lieeden (Efs. 2:4-5, 8). Hee haft biejlikj sienen Sän fa de Menschheit hanjejäft, un daut wia daut baste, waut hee haud. De Apostel Paulus schreef, daut Jehova “derch de groote Jnod” fa daut Leesjelt sorjd (Efs. 1:7-8). Hee leit un lieet ons wieda, wan wie uk jäajen am sindjen un nich emma daut doonen, waut hee haben well. Sien Rot un siene Wieed sent soo aus “leisa Räajen” (5. Mo. 32:2). Fa ons es daut ommäajlich, am aul daut trigjtotolen, woo leeftolich hee to ons jewast es. Un wie wudden uk kjeene Hopninj haben, wan Jehova nich leeftolich to ons wia (see uk 1. Petrus 1:13).

Daut Jehova leeftolich es, es sea wieetvoll un secha well wie am nodoonen. Doawäajen woa wie nich bloos to eenje leeftolich sennen, oba to aulem un ons aunstrenjen, jieda Dach Jehova notodoonen (1. Tess. 5:15). Wan wie emma leeftolich sent, dan sent wie fa aundre soo aus een makeljet Fia aun eenen kolden Dach. Wie sent een Troost fa onse Famielje, Breeda, Oabeitspoatna, Schoolpoatna un onse Nobasch.

Denkj doaraun, daut diene Famielje ooda de Breeda en de Vesaumlunk daut woat togood komen, wan du leeftolje Wieed brukst un waut leeftoljet deist. Veleicht es doa en diene Vesaumlunk uk wäa, waut doa Help brukt met sien Hus un sienen Goaden besorjen ooda aundre Sachen soo aus enkjeepen. Wan du em Prädichtdeenst best un du sitst wäm, waut doa Help brukt, wurscht du dän dan opp irjenteene Wajch halpen kjennen?

Well wie Jehova nodoonen, un muchten onse Wieed un onse Woakjen sikj emma no “daut leeftolje Jesaz” rechten.