“HERMANUCUNA ali shongulanwan yanapämashganta ricar almiracurgä”. Chayno nin Lisa * jutiyoj canan panilanchi, chayshi yanapargan Bibliapita yachacuyta galaycunanpaj. Anne panilanchipis cayno wilacun: “Testigucunata reguiycuptë shacya shacyala parlapämashganmi más gustamaj Bibliapita yachachimashgancunapitapis”. Cay ishcay cristianacuna canan Bibliata cushi cushila leipäcuptin y chaycunaman yarpachacäriptinpis, hermanucuna yanapashgan y shacya shacyala parlapashganmi yanapargan paycuna Testiguman ticrananpaj.

¿Imanotaj ali shongu cashun, y chayga imanotaj waquincunata yanaparcunman? Ishcaylata ricärishun: parlayninchicho y rurayninchichopis. Nircur yachacushun pïcunawan chayno canapaj.

Proverbios 31 caj capituluchoga wilacun juc yachaj warmipita y payga “alli shimillanwanmi” parlan (Prov. 31:26). Payga ali shonguyoj car shumaj yarpachacun imata parlananpäpis. Taytacunapis shumaj yachacärinman ali shimilapa wamrancunata parlapänanpaj. Taytacunaga musyapäcunmi wamrancunata gayapayparaj parlapaptenga paycunaga laquicunmanmi. Jina mana cuyapaypa y toscuypa parlapaptenga wamrancunapis piñacur cutichinmanmi. Ichanga cuyapaylapa y ali shimilapa parlapaptenga wamrancunapis wiyacunga y cäsucungami.

Chauraga tayta car o manapis, ¿imatataj rurashwan imaypis ali shimilapa parlapänapaj? Proverbios 31:26 galaycunancho nin: “Sumaj yarpachacurcurmi alli tantiyaj cayninwan parlan”. Cayga ninanmi shumaj yarpachacunapaj imano y imapita parlanapaj. Pilawanpis rabiachinacushga carga y parlanapaj captenga cayno tapucunanchi: “¿Canan nishgäga payta masraj rabiachingachuraj, o rabiaynin pasananpaj yanapangachuraj?” nir (Prov. 15:1). Tantiaj runa carga shumaj yarpachacunanchirämi imata ninapaj.

Bibliaga caytapis ninmi: “Mana tantiyakuq runakuna rimashqanqa cuchilluwan tuksishqanömi shonqunman chayaykun” (Prov. 12:18). Chauraga waquincunaman yarpachacuptinchi imano y imapita parlashganchi chasquinanpaj, yanapämäshun shumaj yarpachacur-raj imatapis parlanapaj. Ali shonguyoj runa carga calpachacushunmi pitapis gayapayparaj ni toscuypa mana parlanapaj (Efes. 4:31, 32). Aumi, manacaj palabracunaman y mana alicunaman yarparänapaj trucan, ali cajcunaman yarpäshun y ali shimilapa parlashun. Y chay lapancho Jehová yachachimanchi imano ruranapaj. Sirvejnin Elías pasaypa manchacashga caycaptin Jehová juc angelninta cachamurgan Eliasta yachaylapa parlapar shacyächinanpaj (1 Rey. 19:12). Pero ali shongu cashganchega manami ricacämunmanchu parlayninchilachochu, sinoga rurayninchicunachopis. Mä ricärishun imanotaj chayga canman.

Jehová imano cashganga yachachimanchi waquincunata ali shimilapa parlapänapaj y yanaparcunapaj (Efes. 4:32; 5:1, 2). Galaycunancho Lisa paninchipita parlashganchi wilacun Testigucuna imano yanapashganta. Cayno wilacun: “Ilajpita familiäwan juc sitiuman aywacärinäpaj caycaptëmi, ishcay majachacashga Testigucuna aruynincho permisuta  mañacurgan imaycäcunata alistacur yanapämänanpaj. Bibliapita yachacuyta manaraj galaycuptëpis chayta rurapäcurgan”. Chayshi Lisata yanapargan Bibliapita yachacur galaycunanpaj.

Galaycunancho Anne paninchipitapis parlashganchi, paypis mana gonganchu Testigucuna shacya shacyala parlapashganta. Cayno wilacun: “Pasaypa mana ali runacuna captinmi manchacojman ticracurirgä, sasarämi cashga pïmanpis yäracunäpaj”. Caytapis nin: “Testigucunata reguiycurga, ¿paycunaga ali runacunachuraj capäcun? nir tapucoj cä. Pero Bibliapita yachachimaj nana shongupita cuyapaylapa tratamashganta ricarga, ichic ichiclapa payman confiacur galaycurgä”. Chayshi Anne paninchita yanapargan Bibliapita yachacushganman yarpachacunanpaj y más yachacunanpaj.

Chauraga hermanucuna ali shongulanwan yanapacushgan y ali shimilapa parlapashganmi cay ishcay cristianacunata yanapargan Bibliapita más yachacuyta galaycärinanpaj. Hermanucuna ruraynincunawan y parlaynincunawan ali shongu cashganta ricar paycunapa shonguncunaman chayargan.

Waquincunaga marcanraycur imano winashganraycur juccunawan cushishga capäcun o shacya shacyala parlapäcun. Chaycuna alino captinpis, cayga manami ninanchu shongupita chayno capäcushganta ni Dios yanapacushganno rurashganta (Hechos 28:2 textuwan tincuchiy).

Shongupita yanapacoj canapaj y waquincunatapis ali trataycunapäga Diospa espiritun yanapämaptinchirämi canga (Gál. 5:22, 23). Chauraga Jehovawan Jesús cashganno canapäga, alapa alimi caycan Jehovata mañacunapaj espiritunwan yanapämänanchipaj yarpayninchicuna y rurayninchicuna ali cananpaj. Jina Jesuspa gatejnincuna car, Diosninchita y runa masinchita cuyashpanchimi paycunaman shongupita yarpachacushun. Chauraga yanapacoj captinchi y shacya shacyala pitapis parlapaptinchega alapa alimi caycan, chaywanmi Jehovata cushichinchi.

Rasunpa cajchoga manami sasachu ali tratamajninchicunata y reguishganchicunata ali trataycunapaj (2 Sam. 2:6). Chaymi paycunawan agradecido canchi (Col. 3:15). Pero, ¿imaraj pasanman ricayninchipaj pitapis ali trataycunapaj mana mereciptin?

Cayman yarpachacushun: Jehovaga cuyapäcunmi mana merecejcunatapis, y paynoga manami pipis canchu. Chaypita Biblia parlarmi Escrituras Griegas Cristianas nishgancho achca cutimi nin Jehová cuyapämashpanchi yanapämashganchita. ¿Imanotaj Diosninchi chayta ruran?

Yarparcushun imano Jehová ali runacunapaj y mana ali runacunapäpis tamyachimun y intitapis jegachimun (Mat. 5:45). Y mana chaylachu, payta manaraj reguiptinchipis payga mayna cuyamashganchita ricächimashcanchi (Efes. 2:4, 5, 8). ¿Imanirtaj chayta ninchi? Japalan cuyashga Wamranta cachamurgan lapan runacunaraycur wanunanpaj. Apóstol Pabluga nergan: Jehová “kuyapäkuq karmi Tsurinpa yawarninwan rantimashpantsi lapan jutsantsikunata” perdunamänanchipaj (Efes. 1:7). Jina juchasapa cashpanchi Jehovata laquichiptinchipis payga jinala pushaycämanchi. Paypa yachachicuynincuna y consejuncunaga “jachaman chirapa chayajnömi” caycan (Deut. 32:2). Jehová cuyapämashpanchimi lapan gomashganchicunataga imawanpis pagayta camäpacunchichu. Y mushoj Pachacho cawanapäpis manami noganchipitachu caycan, sinoga Jehová cuyapäcoj cashganpitami canga (1 Pedro 1:13 textuwan tincuchiy).

¿Manachu Jehová chayno cashganta musyarga payman más witichimanchi y payno canapaj yanapämanchi? Aumi, chaymi manami juc ishcajcunalawanchu yanapacoj cashun, ni ali shimilapa paycunalatachu parlapashun. Chaypa trucanga calpachacushun Jehovano lapancunawan ali shongu canapaj (1 Tes. 5:15). Imanomi gasaycho goñoj tulpaman witiycuptinchi goñu goñula caycanchi, chaynolami castanchicunapis, hermanunchicunapis y aroj masinchicunapis ladunchicho cushi cushila caycanga paycunawan imaypis ali shongu captinchi.

¿Familianchicho o congregaciunninchicho pilapis caycanchuraj imalawanpis yanaparcunapaj o shacya shacyala parlar shacyächinapaj? Capazchi maygan hermanulapis yanaparcunapaj caycan wasinta pichapacur, huertanta uryar pargunapaj, mercadumanpis aywanapaj. Y Diospita yachachicushganchi horapis juccunata yanaparcunapaj caycanchi.

Chauraga Jehová cashganno canapaj calpachacushun y ali shongu cashganchega ricacämunman rurayninchicunacho y parlayninchichopis.