„O ŠUKARIPE e phralengoro hem e phenjengoro sine adava so privlečingja man“ vakergja i Lisa. * Oj kergja lafi bašo adava so najviše privlečingja la ko početok ko čačipe. Nešto slično vakergja i En: „Ko početok poviše privlečingja man adava so e Jehovaskere svedokija ponašingje pe mancar šukar, nego adava so šunava sine“. Adaleske so o šukar postapke but vlijajngje upri lende, o solduj uživinena akana te čitinen i Biblija hem hor te razmislinen baši late.

Sar šaj te sikava šukaripe kova so ka ohrabrinel e javeren? Ka kera lafi bašo duj načinija: amare lafencar hem amare postapkencar. A palo adava ka dikha kaske valjani te sikava šukaripe.

I romni soj opišimi ko Izreki 31 poglavje isi la ki pli čhib „o zakoni e šukaripaskoro“ (Izr. 31:26). Oj dozvolinela akava „zakoni“ te vlijajnel upro adava so vakerela hem sar vakerela adava. E daden isto agjaar valjani te ovel len akava „zakoni“ ki čhib. But roditelija tane svesna kaj keda kerena ko grubo način lafi ple čhavencar adava šaj te vlijajnel negativno upri lende. O čhave šaj but polokhe te oven poslušna pumare roditelenge keda o roditelija kerena lafi ko jekh ljubezno način.

Bizi razlika dali sian roditeli ili na, sar šaj te sikljove te kere lafi ko ljubezno način? O prvo delo taro Izreki 31:26 šaj te pomožinel tut ko adava. Athe pišinela: „Keda kerela lafi, kerela lafi ko mudro način“. Ko adava tano vklučimo mudro te birina amare lafija hem sar vakeraja adava. Ka ovel šukar te puča amen: „Dali adava so vakerava ka holjankerel okole so šunela man ili ka smirinel i situacija?“ (Izr. 15:1). Oja, mudro tano te razmislina angleder te kera lafi.

Jekh javer izreka vakerela: „O lafija soj vakerde bizo te mislinel pe posavena sar mači“ (Izr. 12:18). Keda razmislinaja bašo adava sar amare lafija hem o način sar vakeraja len vlijajnena upro javera, tegani verojatno ka pazina so ikljola taro amaro muj. Keda primeninaja „o zakoni e šukaripaskoro“ nane te koristina lafija kolencar so šaj te povredina e javeren hem ka pazina sar keraja lafi (Ef. 4:31, 32). Adava ka pomožinel amen te čhinava te razmislina hem te kera lafi ko negativno način hem ka počmina te kera pozitivno hem ljubezno lafi. O Jehova postapingja agjaar keda ohrabringja ple sluga e Ilija kova so darala sine. O angeli kova so pretstavinela sine e Jehova kergja „smireno hem ljubezno“ lafi (1. Car. 19:12). Te ovel pe šukar tano nešto poviše nego samo te kerel pe ljubezno lafi. Amen mora isto agjaar amare postapkencar te sikava šukaripe. Sar?

Džaja palo e Jehovaskoro primer, agjaar so keraja ljubezno lafi hem postapinaja šukar (Ef. 4:32; 5:1, 2). I Lisa kola so spomningjem la angleder, vakerela kobor šukaripe sikavgje lake e Jehovaskere svedokija: „Keda me hem mi familija mora sine sigate te  selina amen, duj bračna parija taro sobranie oslobodingje pe tari buti te šaj te pomožinen amen te kheda amare bukja. Ko adava vreme ni na proučinava sine i Biblija!“ Adaja šukar postapka pottikningja e Lisa te doznajnel nešto poviše bašo čačipe.

I En kola so spomningjem la ko početok, isto agjaar sine blagodarno bašo šukaripe so sikavgje lake o Svedokija. Oj vakerela: „O način sar postapinena o manuša ko sveto, kergja te na dikhav šukar ko javera. Pharo sine mange te ovel man doverba ko manuša“. Oj ponadari vakerela: „Keda zapoznajngjum e Jehovaskere svedokon, ko početok na verujnava len sine. Pučava man sine soske tane ljubezna mancar? Ama o šukaripe so sikavgja mange i phen so proučinela sine mancar pottikningja man te ovel man doverba ki late. Adaleske, palo nesavo vreme počmingjum poviše te koncentririnav man ko adava so sikljovava sine“.

Šaj te primetina kaj upri i Lisa hem i En but vlijajngja adava so nesave taro sobranie postapingje lencar šukar hem adava pottikningja len te mangen te sikljoven poviše bašo čačipe. O šukaripe so sikavgje  lenge o phralja hem o phenja, pomožingja lenge te ovel len doverba ko Jehova hem ko leskoro narodo.

O način sar sine vospitime ili kote barile vlijajngja upro nesave te šaj te ovel lenge polokhe te keren ljubezno lafi ili te asan. Šukar tano keda nesave manuša tane prirodno ljubezna ili tari kultura kerena adava, ama ako mangaja te sikava e Devleskoro šukaripe nane dovolno te ova ljubezna samo adaleske so adava tano kulturno ili soske prirodno avela amenge te kera adava. (Sporedin Dela 28:2.)

E Devleskoro šukaripe tani osobina so avela taro sveti duh (Gal. 5:22, 23). Znači, te šaj te ova čače šukar valjani te dozvolina e Devleskoro sveti duh te vlijajnel upro amaro razmisluvanje hem postapke. Keda ka kera adava, ka dža palo e Jehovaskoro hem e Isuseskoro primer. Hem sar hristijanja sikavaja interes e javerenge. Ko adava pottikninela amen o mangipe so isi amen sprema o Jehova hem o mangipe sprema amare phralja. Agjaar, amaro šukaripe ovela jekh silno osobina koja so avela taro vilo hem kerela e Devle bahtalo.

Šaj tano lokho te sikava šukaripe okolenge soj tane ljubezna amencar ili okolenge so džanaja len (2. Sam. 2:6). Jekh način sar šaj te kera adava tano ako siem blagodarna (Kol. 3:15). Ama so ako mislinaja kaj nekoj na zaslužinela te ova lea šukar?

Razmislin bašo akava: o Jehova tano o najbaro primer so sikavela šukaripe so na zaslužinela pe hem preku plo Lafi sikavela amen kobor tano važno te sikava adaja osobina. O izraz „šukaripe so na zaslužinela pe“ tano but puti koristimo ko Hristijanska grčka spisija. Sar sikavela amenge o Devel šukaripe?

O Jehova sikavela sa e manušenge šukaripe agjaar so dela amen sa soj amenge potrebno te šaj te ačhova ko životo (Mat. 5:45). Ustvari ov sikavgja amenge šukaripe panda angleder te džana le (Ef. 2:4, 5, 8). Na primer, ov dengja plo najskapoceno sa e manušenge — ple najmangle Čhave. O apostol Pavle pišingja kaj o Jehova obezbedingja i otkupnina soske leskoro šukaripe tano but baro (Ef. 1:7). Iako grešinaja hem razočarinaja e Jehova, ov ponadari da vodinela amen hem sikavela amen. Leskere pouke hem lafija tane sar „sitno bršim“ (5. Moj. 32:2). Amen našti celosno te irana leske o šukaripe so sikavela le amenge. Ustvari, ako o Jehova na bi sikavela amenge sine šukaripe so na zaslužinela pe, nane te ovel amen sine nadež baši pošukar idnina. (Sporedin 1. Petrovo 1:13.)

Čače, e Jehovaskoro šukaripe tano privlečno hem ohrabruvačko. Adaleske, namesto te birina kaske ka sikava šukaripe valjani te dža palo e Jehovaskoro primer agjaar so ka sikava šukaripe sekova dive (1. Sol. 5:15). Ako na čhinavaja te sikava šukaripe, tegani ka ova sar jag so takjarela amen ko šudro dive. Adalea ka kera šukaripe amare familijake, e phralenge hem e phenjenge, amare kolegenge, e součenikonge hem e komšienge.

Razmislin ki nekaste tari tli familija ili taro sobranie kole so ka ovel le korist ako kerea lafi hem postapinea ko ljubezno način. Šaj isi nekoj ko sobranie kaske so valjani posebno pomoš okolu plo kher, dvoro ili pazaribe. Ili keda dikhea nekas ki služba kaske so valjani pomoš, dali ko nesavo način šaj te pomožine leske?

Adaleske te ova sar o Jehova, amare lafija hem postapke sekogaš neka oven vodime taro „zakoni e šukaripaskoro“.