„O LAȘIMOS cai sicade-les le phrala hai le pheia zuriardea-ma o mai but”, phenel i Lisa. * Cadaia si so țârdea-la co ciacimos. Sa cadaia dichlea vi i Anne. Voi phenel: „So arăslea mai anglal ande mânro ilo sas o lașimos le phralengo hai le pheiango, na o sicaimos”. O lașimos sas so țârdea cadale pheian co ciacimos, chiar cana aghies, i citirea andai Biblia hai i meditarea ca so citisaren si zurales cuci anda lende.

Mai dur, va avela te dichas sar daisaras te arăsas co ilo le coaverengo cana sicavas lașimos prin: so phenas hai so cheras. Pala codoia, va avela te dichas caring caste trebul te sicavas lașimos.

Andel Proverbe, o capitolo 31, phenel-pe anda iech lași rromni: „Pe lachi șib si i legea le lașimaschi”. (Prov. 31:26) Voi mechel ca cadai legea te lașiarel o modo sar del duma hai so phenel. Vi o dad trebul te încărel conto catar cadai legea cana del duma. Le mai but dada jianen că dacă den duma holiaia hai den cingar, ci va cherela mișto le șiavesche. Mai but, daștil-pe că lengo șiavo ci va camela te așunel so sas lesche phendo. Tha, cana den duma lașimaia, va avela mai ușoro anda lengo șiavo te așunel lendar.

Chiar cana sam dada sau nici, sar daisaras te sicavas lașimos cana das duma? Arachas iech lașio sicaimos andi iechto partea le versotoschi andal Proverbe 31:26: „Pâtrel pesco mui goghiaverimaia”. Cadaia sicavel că trebul te avas goghiaver cana alosaras so phenas hai te las sama te na vazdas amaro glaso. Si mișto te pușas-ame: „Va avela te holiarav averen prin so phenav sau va avela te rodav i pacea ande iech situația phari?”. (Prov. 15:1) Sam goghiaver cana șioas amenghe cado pușimos mai anglal te das duma.

Iech aver proverbo phenel: „Cana varecon del duma bi te gândil si sar cana pusavel-tu iech sabia”. (Prov. 12:18) Cana gândisaras-ame so daștin te cheren amare cuvintea sau cana vazdas amaro glaso, das amari sama că trebul te avas mai atento sar das duma. Si ciaces, cana încăras „i legea le lașimaschi”, ci va avela te duchavas averen prin so phenas hai prin o modo sar das duma. (Ef. 4:31, 32) Cadaia va ajutil-ame te încăras-ame parpale catar le gânduri hai cuvintea nasul. Mai but, camas te pheras amari goghi gândurența lașe cai va cherena-ame te das duma șucar averența. Te dichas sar dea duma o Iehova caring o Ilie caște zuriarel-les cana cado sas-lo astardo daratar. O îngero, cai reprezentilas le Iehovas, dea duma prin „iech glaso liniștime hai gulo”. (1 Regi 19:12) Cu sea cadala, sicavas lașimos na numai cana das duma șucar. Vo trebul te dichiol-pe vi ande so cheras. Sar?

Las-ame pala o exemplo le Iehovasco na numai cana das duma șucar, tha vi cana sicavas lașimos caring aver prin le buchia cai cheras-le. (Ef. 4:32; 5:1, 2) I Lisa, anda savi deam duma mai anglal, phendea anda iech situația ande savi simțosardea pe peschi morci o lașimos le phralengo. „Cana me hai mânri familia trebuisardea te paruvas sigo o than cai beșleam, dui familii Martorenghe line penghe libero  catar i buchi caște ajutin-ame te chidas amare buchia. Ande codo timpo, me ci studiisardemas i Biblia.” O lașimos cai sicade-les le phrala arăslea ande laco ilo hai cărdea la Lisa te camel te prinjianel mai mișto o ciacimos.

Vi i Anne, anda savi deam duma mai anglal, dichlea zurales cuci o lașimos cai sicade-les lache le Martori. Voi phendea: „Anda codoia că jianglem sar si le manușa andai lumea, sas manghe pharo te pachiav-ma andel manușa. . . . Cana prinjiandem le Martoren, ci hachiardem sostar phiraven-pe cadea de șucar manța. Tha, o lașimos la pheiaco cai studiilas manța cărdea-ma te pașioav latar hai te pachiav-ma ande late”. So lași buchi avilea pala codoia? Voi phenel: „Astardem te dichav avere iachența so sichilem”.

Cadea sar dichleam, o lașimos cai sicade-les le phrala hai le pheia caring i Lisa hai i Anne cărdea-le te camen te prinjianen mai but buchia anda o ciacimos. O lașimos codolengo andai congregația ajutisardea-le te pâtren pengo ilo.

Chichiva manușenghe si lenghe ușoro te den duma șucar, te asan hai te phiraven-pe  amalicanes averența, anda codoia că cadea sile von sau cadea barile. Hai cadaia si zurales mișto. Tha cado lașimos ci si sar o lașimos cai avel catar o Del. (Dich vi le Fapte 28:2.)

O ciacio lașimos cai avel catar o Del si iech aspecto cai cherel partea anda o rodo le spiritosco sfânto. (Gal. 5:22, 23) Caște sicavas ciacio lașimos trebul te mechas ca o spirito sfânto te cherel buchi ca amari goghi hai phiraimos. Cana cheras cadea, sicavas că camas anda sea o ilo te las-ame pala o Iehova hai o Isus. Hai, sar creștini, rodas te sicavas lașimos caring aver sea o timpo. Cadea că, i iubirea anda o Iehova hai andal manușa, cherel ca amaro lașimos te avel iech calitatea zurali, jiuvindi, cai avel anda ilo hai cai si cuci andel iacha le Iehovasche.

Daștil-pe că na-i amenghe pharo te phiravas-ame lașimaia caring codola cas prinjianas sau caring codola cai sas-le lașe amența. (2 Sam. 2:6) Iech modo simplo si te mulțumisaras lenghe. (Col. 3:15) Tha so daisaras te cheras cana pachias că iech manuș ci meritil te sicavas lesche lașimos?

Te gândisaras-ame ca iech buchi: o Iehova si o mai baro exemplo cai sicavel lașimos nemeritime. Lesco Cuvânto scriime sicavel-ame vareso zurales importanto anda sar te sicavas cadai calitatea. I expresia „lașimos nemeritime” sili folosime butivar andel Scripturi grecisco creștino. Sar sicavel o Del lașimos caring amende?

O Iehova sicavel lașimos caring sea le manușa pa i phuv hai del-le le buchia cai trebun-le caște train. (Mat. 5:45) Mai but, vo sicadea lașimos le manușenghe mai anglal ca von te prinjianen-les. (Ef. 2:4, 5, 8) Sar exemplo, vo dea anda o miștimos le manușengo so sas-les o mai lașio: i viața lesche Șiaveschi unico-năștime. O apostolo Pavel scriisardea că o Iehova dea i răscumpărarea „pala o barvalimos lesche lașimasco nemeritime”. (Ef. 1:7) Sa cadea, vo sicavel amenghe mai dur o lașio drom pe savo trebul te phiras hai sicavel-ame, chiar cana cheras păcatea hai duchavas-les. Lesco sicaimos hai lesche cuvintea si „sar o hurdo brâșând”. (Deut. 32:2) Si ciaces, ci daisaras niciechdata te pochinas parpale le Iehovas anda sea lesco baro lașimos cai sicavel-les caring amende. Mai but, amen jianas că amaro viitorii încărel catar o lașimos le Iehovasco, anda codoia că bi lesco ci si amen niciech speranța. (Dich vi 1 Petru 1:13.)

O baro lașimos le Iehovasco arăsăl ande amaro ilo hai cherel vi amen te sicavas cadai șucar calitatea. Cadea că, ando than te sicavas lașimos numai caring codola cai sile lașe amența, te das amari zor te las-ame pala o Iehova hai te cheras ca o lașimos te avel sea o timpo ande amende. (1 Tes. 5:15) Cana o lașimos pherel amaro ilo hai sam lașe savorența, sam sar iech iag ande iech ghies zurales șudro. Amaro lașimos va anela but miștimata amara familiache, le phralenghe, codolenghe casa cheras buchi, amare colegenghe catar i școala sau codolenghe cai beșen pașa amende.

Te gândisaras-ame chichi de but va bariola o ilo codolengo anda amari familia sau congregația, cana va dichena că amen sicavas lenghe lașimos prin so phenas hai so cheras. Daștil-pe că varecas andai congregația siles nevoia te des-les iech vast caște ajutis-les te lel sama po chăr sau pi bar sau te chinel haben. Mai but, dacă andi predicarea araches ieche manușes cai trebul ajutime practico, de chi zor te sicaves lașimos caring leste.

Cadea că, te las-ame pala o exemplo le Iehovasco hai te mechas ca ando modo sar das duma hai phiravas-ame te dichiol-pe sea o timpo „i legea le lașimaschi”.