LISA atene: * “So aita asara ye lani na nzoni bê andu bê ti mbi mingi.” Lo yeke sara tënë ti ye so na tongo nda ni agboto lo na yâ ti tâ tënë. Ti Anne nga kue ayeke tongaso, lo tene: “Ye so agboto mbi lani na yâ ti tâ tënë ayeke nzoni bê ti aita, me pëpe aye so ala fa.” Fadeso, a nzere na aita-wali so use kue ti diko Bible nga ti gbu li na ndö ni, me nzoni bê ti aita la andu lani bê ti ala mingi.

Tongana nyen la e peut ti sara ye na nzoni bê ti ndu bê ti azo so ayeke na terê ti e? Zia e bâ alege use so e peut ti sara na ni: na lege ti tënë ti yanga ti e nga na sarango ye ti e. Na pekoni, e yeke bâ azo so a yeke nzoni e sara nzoni bê na ala.

Nzoni wali so a sara tënë ti lo na aProverbe chapitre 31 ayeke na “ndia ti nzoni bê” na yanga ti lo (aProv. 31:26). Lo zia lege na “ndia” so ti fa lege na tënë so lo tene nga na fason so lo tënë na ni. A yeke nzoni “ndia” so aduti nga na yanga ti ababâ. Mingi ti ababâ na amama ahinga so dengo kongo na li ti molenge ayeke sara nzoni na lo ape, na peut-être molenge ni ayeke mä tënë so ala tene ape. Tongana ababâ na amama asara tënë na nzoni bê, a yeke duti ngangu na amolenge ti ala ape ti mä ala nga ti sara ye so ala hunda.

Atâa mo yeke babâ wala mama wala pëpe, tongana nyen la mo peut ti manda ti sara tënë na nzoni bê? Mbeni ye so apeut ti aidé mo ayeke na yâ ti kozo mbage ti aProverbe 31:26, so atene: “Lo sara tënë na ndara.” So aye ti tene a yeke nzoni e soro atënë ti e nga e tene ni na ndara. Mingi ni, a yeke nzoni e hunda terê ti e, e tene: ‘Eskê tënë so mbi yeke tene ayeke sara si bê ti azo ason wala ayeke maï siriri?’ (aProv. 15:1). Biani, a yeke nzoni e gbu li ti e kozo si e sara tënë.

Mbeni proverbe ni nde atene: “Tënë so zo atene sân ti gbu li ayeke kpo zo tongana épée.” (aProv. 12:18). Tongana e gbu li na ndö ti ye so atënë so e yeke tene nga na fason so e yeke tene na ni apeut ti sara na amba ti e, a peut ti pusu e ti sara hange na atënë so e yeke tene. Tongana “ndia ti nzoni bê” ayeke na yanga ti e, a yeke aidé e ti tene asioni tënë ape nga ti sara tënë na ngonzo ape (aÉph. 4:31, 32). E yeke zia na place ti asioni pensé nga na asioni tënë, atënë so a tene ni na nzoni bê nga na ndoye. Jéhovah azia na e nzoni tapande ni na ngoi so lo dë bê ti wakua ti lo, Élie, so mbeto asara lo. Ange so Jéhovah atokua lo asara tënë na lo na “mbeni go so [atoto] yeke nga na ngangu pëpe.” (1 aGbia 19:12). Ye oko, ti duti zo ti nzoni bê angbâ gï na tënë ti yanga ape. E doit nga ti sara ye na nzoni bê. E yeke sara ni tongana nyen?

E yeke mû tapande ti Jéhovah tongana e sara tënë nga e sara ye na nzoni bê (aÉph. 4:32; 5:1, 2). Lisa, so e sara tënë ti lo fade, afa nzoni bê so aTémoin asara na lo. Lo tene: “Na ngoi so a hunda na sewa ti e ti quitté hio da so e lango dä, acouple use so ayeke aTémoin amû congé ti ga ti aidé e ti leke akungba ti e. Na ngoi ni so, ade mbi komanse même ti manda Bible ape.” So ala sara ye na nzoni bê, a pusu Lisa ti gi ti hinga ye nzoni na ndö ti tâ tënë.

 Anne, so e sara tënë ti lo na tongo nda ti article so, a kiri nga singila ndali ti nzoni bê so aTémoin asara na lo. Lo tene: “Sarango ye ti azo ti dunia na mbage ti mbi asara si a yeke lani ngangu na mbi ti sara confiance na azo.” Lo kiri lo tene: “Na ngoi so mbi wara terê na aTémoin, mbi sara confiance na ala ape. Mbi hunda terê ti mbi, mbi tene: ‘Ngbanga ti nyen la ala yeke pensé na mbi?’ Me so ita-wali so ayeke manda Bible na mbi asara ye na nzoni bê, a pusu mbi ti sara confiance na lo.” Nzoni ye wa la aga na pekoni? Lo tene: “Ambeni ngoi na pekoni, mbi komanse ti gbu li nzoni mingi na ndö ti aye so mbi yeke manda.”

So aita ti congrégation asara nzoni bê na Lisa na Anne, a ndu bê ti ala mingi nga a aidé ala ti ye ti hinga ye na ndö ti tâ tënë. Nzoni bê so aita ti congrégation asara na ala a-aidé ala ti komanse ti sara confiance na Jéhovah nga na azo ti lo.

Peut-être ambeni zo ayeke sara tënë na nzoni bê nga ala yeke he ngia ndali ti so a yeke sara ka tongaso na ndo so ala kono dä. A yeke nzoni so ngobo wala sarango ye ti ambeni zo  apusu ala ti ne azo. Me tongana a yeke gï aye so la apusu e ti sara ye na nzoni bê, peut-être e yeke sara ye na nzoni bê tongana ti Nzapa ape.— Bâ nga Kusala 28:2.

Sarango nzoni na zo tongana ti Nzapa ayeke mbeni mbage ti lengo ti yingo vulu ti Nzapa (aGal. 5:22, 23). Tongaso, e bezoin yingo vulu ti Nzapa ti aidé e ti sara ye biani na nzoni bê. Ye so ague oko na nzara so e yeke na ni ti sara ye tongana Jéhovah nga na Jésus. Nga, so e yeke aChrétien, e yeke pensé biani na azo. Tongaso, ye so ayeke pusu e ti sara ye na nzoni bê ayeke yengo so e ye na Jéhovah Nzapa nga na amba ti e. Ye so asara si sarango nzoni na zo aga mbeni pendere sarango ye so alondo na bê nga so azia ngia na bê ti Nzapa.

Peut-être a yeke ngangu na e ape ti sara nzoni bê na azo so asara nzoni bê na e wala azo so e hinga ala (2 Sam. 2:6). Mbeni lege ti sara ni ayeke ti kiri singila na ala (aCol. 3:15). Me ka tongana e bâ so mbeni zo alingbi ape ti tene e sara ye na lo na nzoni bê?

Gbu li na ndö ti ye so: Jéhovah azia na e tâ nzoni tapande ti kota nzobe, nga Mbeti ti lo, Bible, afa na e mbeni kpengba ye ti manda na ndö ti sarango ye so. A sara kua na tënë “kota nzobe” fani mingi na yâ ti Mbeti ti Nzapa so aChrétien asû ândö na Grec. Nzapa asara nzoni bê na e tongana nyen?

Gbu li na ndö ti azo kutu mingi so Jéhovah asara nzoni bê na ala na lege so lo mû na ala aye so ala bezoin ni ti ngbâ na fini (Mat. 5:45). Ti vrai ni, même kozo si azo ahinga Jéhovah, lo sara nzoni bê na ala (aÉph. 2:4, 5, 8). Na tapande, lo mû ye ti lo so ayeke tâ nzoni mingi, oko Molenge ti lo, ndali ti azo kue. Bazengele Paul atene so Jéhovah amû ye so a futa ti zi azo “alingbi na mosoro ti kota nzobe ti lo.” (aÉph. 1:7). Na ndö ni, atâa so e yeke sara siokpari nga e yeke zia vundu na bê ti Jéhovah, lo ngbâ ti fa lege na e nga ti fa ye na e. Fango lege ti lo nga na atënë ti lo ayeke tongana “ngu-nzapa so atï kete kete”. (Deut. 32:2). E lingbi pëpe ti futa lo ndali ti aye kue so lo sara na e na nzoni bê. Nga, ti vrai ni, e yeke na beku ndali ti kekereke grâce na nzoni bê ti Jéhovah.—Bâ nga 1 Pierre 1:13.

Kite ayeke dä ape so nzoni bê ti Jéhovah asara si e ye lo nga apusu e ti sara ye. Ye so asara si e yeke soro yâ ti azo sorongo ape si e sara nzoni bê na ala, me e yeke sara ngangu ti mû tapande ti Jéhovah ti sara nzoni bê na azo kue lâ na lâ (1 aThes. 5:15). Tongana e sara ye na nzoni bê lakue, e yeke duti tongana mbeni wâ so asara si terê ti zo achauffé na ngoi ti dê. E yeke dë bê ti azo ti sewa ti e, amba ti e aChrétien, amba ti e ti place ti kue, amba ti e ti ekole nga na avoizin ti e.

Gbu li na ndö ti azo ti sewa ti mo wala ti congrégation ti mo so ayeke bâ nzoni ndali ti so mo sara tënë nga mo sara ye na nzoni bê. Peut-être mbeni zo ayeke dä na yâ ti congrégation ti mo so abezoin biani ti tene a aidé lo ti bâ lege ti akua ti da ti lo nga na yâ ti gbagba ti lo wala mbeni ye so lo yeke sara lakue, na tapande vongo ye. Na ndö ni, tongana mo wara mbeni zo na fango tënë so abezoin mungo maboko, mo peut ti sara mbeni ye ti aidé lo?

Na mungo tapande ti Jéhovah, zia si “ndia ti nzoni bê” afa lege lakue na atënë ti yanga ti mo nga na aye so mo yeke sara.