LISA * utsi: “Umusa bazalwane nabodzadze labangikhombisa wona wangitsintsa kakhulu.” Nguloko lokwamenta walitsandza kakhulu liciniso. Kwenteka lokufanako naku-Anne, utsi: “Ngatsandza kakhulu umusa lebebangikhombisa wona kunaloko lebebakufundzisa.” Bobabili labodzadze nyalo bayakutsandza kufundza liBhayibheli nekuzindla ngalo, kodvwa umusa nguwo lowabatsintsa kakhulu.

Singabakhombisa njani labanye umusa ngendlela letabatsintsa inhlitiyo? Asesicoce ngetindlela letimbili lesingakhombisa ngato umusa: ngaloko lesikukhulumako nangaloko lesikwentako. Sitawubese sicoca ngekutsi bobani lokufanele sibakhombise umusa.

Umfati lokhutsele lochazwa kuTaga sehluko 31 ‘unemtsetfo wemusa’ elulwimini lwakhe. (Taga 31:26, umbhalo longentansi) Uvumela ‘lomtsetfo’ kutsi ulawule indlela lakhuluma ngayo naloko lakushoko. Nabobabe kufanele babe nawo ‘lomtsetfo’ elulwimini lwabo. Batali labanyenti bayati kutsi kusebentisa lulwimi loluhlabako kungaba nemiphumela lemibi kumntfwana wabo futsi kungenteka lomntfwana angakulaleli loko labakushoko. Nangabe batali bakhuluma ngendlela lenemusa, kutawuba melula ngebantfwana kutsi babalalele.

Ungafundza njani kukhuluma ngemusa ngisho ungumtali nobe ungasuye? Imphendvulo siyitfola encenyeni yekucala yeTaga 31:26 letitsi: “Emlonyeni wakhe kuphuma emavi ekuhlakanipha.” Loko kufaka ekhatsi kuwakhetsa kahle emagama nendlela lokhuluma ngayo. Kuyasita kutibuta: ‘Loku lengifuna kukusho kutawubatfukutselisa yini labo labangilalele nobe kutawenta kube nekuthula?’ (Taga 15:1) Kukuhlakanipha kucabanga ngaphambi kwekutsi ukhulume.

Lesinye saga sitsi: “Emavi lakhulunywe angakacatjangwa ahlaba njengenkemba.” (Taga 12:18) Nasicabanga ngekutsi loko lesikushoko nendlela lesikusho ngayo kutabatsintsa njani labanye, kungasisita kutsi silawule lulwimi lwetfu. Kusebentisa “umtsetfo wemusa” kutasisita kutsi singakhulumi kabi nangendlela lete umusa. (Ef. 4:31, 32) Kunekutsi sisebentise emagama lahlabako, sitawukhuluma ngendlela lenemusa nangendlela lekahle. Jehova wasibekela sibonelo kulendzaba ngesikhatsi acinisekisa Elija lebekesaba. Ingilosi yakhuluma naye ‘ngelivi lelipholile, lelikhulumela phansi.’ (1 Khos. 19:12) Nanobe kunjalo, nangabe umuntfu anemusa, akagcini nje ngekukhuluma kahle. Kufanele siwukhombise nangetento. Kanjani?

Sisuke silingisa Jehova nasikhuluma ngemusa futsi sente tento letikhombisa kutsi sinemusa. (Ef. 4:32; 5:1, 2) Lisa, lesike sacoca ngaye uchaza umusa labawukhonjiswa boFakazi, utsi: “Ngesikhatsi kudzingeka umndeni wakitsi utfutse ngekushesha,  labashadene labane lebebasebandleni bacela sikhatsi emsebentini kuze basisite sipakishe. Ngaleso sikhatsi, bengisengakacali ngisho nekudadisha liBhayibheli!” Letento letikhombisa umusa tenta Lisa wafuna kulati liciniso.

Anne, lesikhulume ngaye ekucaleni naye wajabula ngemusa lawukhonjiswa boFakazi. Utsi: “Indlela bantfu labangamkhonti Jehova lebebangiphatsa ngayo yangenta ngangabetsembi bantfu.” Uchubeka utsi: “Nangihlangana naboFakazi bengingabetsembi, bengitibuta kutsi, ‘Yini leyenta banginake?’ Kodvwa umusa sibili lengawukhonjiswa ngulona lebekadadisha nami liBhayibheli wangenta ngametsemba.” Waba yini umphumela? Utsi: “Ngekuhamba kwesikhatsi, ngacala kunaka kakhulu loku lebengikufundza.”

Naka kutsi Lisa na-Anne batsintfwa kakhulu tento letikhombisa umusa letentiwa ngulabanye ebandleni futsi loko kwabenta bafuna kufundza liciniso. Umusa labakhonjiswa wona ebandleni wenta kutsi bametsembe Jehova kanye nebantfu bakhe.

Kungulokuvamile kutsi labanye basebentise emagama lanemusa futsi bamamatseke ngenca yendlela labakhule ngayo nobe lapho bakhulele khona. Kuhle kutsi bantfu babe nemusa ngenca yebuntfu babo nobe emasiko abo. Kodvwa nangabe sinemusa ngenca nje yebuntfu betfu nobe emasiko etfu, sitawube singamlingisi Nkulunkulu.—Catsanisa neMisebenti 28:2.

Umusa lovela kuNkulunkulu usitselo semoya wakhe longcwele. (Gal. 5:22, 23) Ngako sidzinga umoya wakhe kutsi usisite sikhombise umusa. Loko kuvumelana nesifiso setfu sekulingisa Jehova naJesu. Ngetulu kwaloko, njengobe singemaKhristu, sinendzaba nalabanye bantfu. Ngako sisitwa kutsandza Jehova Nkulunkulu kanye nalabanye bantfu. Umusa wetfu ubese uba buntfu lobusuka enhlitiyweni nalobemukelwa nguNkulunkulu.

Kungahle kube melula kubakhombisa umusa labo labasikhombise umusa nobe labo lesibatiko. (2 Sam. 2:6) Lenye indlela lesikwenta ngayo loko kubabonga. (Khol. 3:15) Kodvwa yini lokufanele siyente nangabe sibona shengatsi lotsite akumfaneli kukhonjiswa umusa?

Cabanga nganaku: Jehova usibekele sibonelo lesihle sekukhombisa umusa lomkhulu futsi liVi lakhe lisifundzisa ngekubaluleka kwekukhombisa lobuntfu. Emavi latsi “umusa lomkhulu” avela tikhatsi letinyenti emiBhalweni yemaKhristu yesiGriki. Nkulunkulu usikhombisa njani umusa?

Jehova ukhombise tigidzigidzi tebantfu umusa ngekutsi atinikete loko letikudzingako kuze tichubeke tiphila. (Mat. 5:45) Jehova usikhombise umusa nangaphambi kwekutsi simati. (Ef. 2:4, 5, 8) Sibonelo nje, unikete bonkhe bantfu iNdvodzana yakhe layitsandzako nalekuphela kwayo. Umphostoli Pawula wabhala kutsi Jehova wasiniketa inhlawulo “ngekuvumelana nekuphuphuma kwemusa lomkhulu waNkulunkulu.” (Ef. 1:7) Ngetulu kwaloko, nanobe sona, Jehova uyachubeka asicondzisa futsi asifundzisa. Sicondziso sakhe nemavi akhe kufana ‘nemvula lemelula.’ (Dut. 32:2) Angeke sikhone kumbuyisela ngalokuphelele ngemusa wakhe lasikhombisa wona. Siyati nekutsi kube Jehova akasikhombisi umusa wakhe lomkhulu, ngabe site litsemba ngelikusasa.—Catsanisa na-1 Phetro 1:13.

Kusebaleni kutsi umusa waJehova uyasijabulisa futsi uyasikhutsata. Ngako kunekutsi sikhetse kutsi bobani lesitawubakhombisa umusa, kufanele setame kulingisa Jehova ngekutsi sibe nemusa onkhe malanga. (1 Thes. 5:15) Nangabe sichubeka sikhombisa umusa, sitawufana nemlilo nakubandza. Sitawadvudvuta emalunga emndeni, bazalwane betfu nabodzadze, lesisebenta nabo, lesifundza nabo nabomakhelwane betfu.

Cabanga ngalabo labasemndenini wakho nobe labasebandleni labatawuzuza ngenca yemavi akho lanemusa nobe tento takho letikhombisa umusa. Kungenteka kunalotsite ebandleni lokulo lodzinga lusito ekunakekeleni likhaya lakhe nobe ingadze, nobe lodzinga lusito ekwenteni letinye tintfo njengekuyotsenga etitolo. Ngetulu kwaloko, nangabe uhlangana nalotsite emsebentini wekushumayela lodzinga lusito, kukhona yini longamsita ngako?

Shengatsi emavi etfu naloko lesikwentako kungahlala kucondziswa ‘ngumtsetfo wemusa,’ silingise Jehova.