LOKO Lisa a vulavula hi leswi swi nga mu yentxa a tsakela ntiyiso a te: “Wunene leli vamakwerhu va nga ni komba lona li ni khumbe hintamu.” * Anne na yena a te: “Leswi swi nga ni pfuna swaku ni za ni va Mboni ya Yehovha, a hi leswi va nga ni djondzisa ntsena, kambe ni wunene leli va nga ni komba lona.” Vamakwerhu lava vavambirhi swoswi va tikhorisa hi ku djondza Bibele ni ku pimisa hi lona, kambe wunene leli va nga kombiwa lona, hi lona li nga va khumba hintamu.

Impsini swi nga hi pfunaka ku va komba wunene vanhu van’wana? A hi buleni hi swilo swimbirhi: Ku nga leswi hi swi vulaka ni leswi hi swi yentxaka. Hi ta gama hi bula hi leswaku i vamani lava hi nga va kombaka wunene.

Wansati lweyi ku vulavuliwaka hi yena ka buku la Swivuriso ndzima 31 a “a kombisa wunene hi nomo wa yena.” (Swi. 31:26) A wunene li mu pfunile ku tiva ku langa leswi a swi vulaka ni leswi a swi vulisaka xiswona. Vapapayi na vona va fanele va kombisa wunene hi leswi va swi vulaka. Vapsali va vanyingi va swi tiva swaku ku tshamela ku bongela vana va vona, swi nga va vavisa swi tlhela swi va yentxa va nga va yingisi. Kambe loko vapsali va vulavula hi ndlela ya wunene, swi ta va vevukela vana va vona ku va yingisa.

Ku nga na mhaka swaku hi vapsali kumbe ihim, hinkwerhu hi fanele hi kombisa wunene hi leswi hi swi vulaka. Hi nga swi yentxisa ku yini leswo? Buku la Swivuriso 31:26 li nga hi pfuna. Loko li sungula li li: “A humesa wutlharhi hi nomo wa yena”. Leswo swi patsa ku swi langa kahle leswi hi nga ta swi vula ni leswi hi nga ta swi vulisa xiswona. Swi ta va kahle loko hi tivutisa leswi: ‘Leswi ni nga ta swi vula, swi ta va kwatisa lava va nga ta swi twa kumbe swi ta yentxa swaku ku va ni ku rhula?’ (Swi. 15:1) Ina, i wutlharhi ku pimisa hi leswi.

Buku la swivuriso li tlhela li ku: “Marito lawa ma kalaka ma nga pimisiwanga kahle ma tlhava ku fana ni xipada”. (Swi. 12:18) Ku pimisa hi swaku leswi hi nga ta swi vula swi ta va khumbisa ku yini van’wana, swi ta hi pfuna ku langa kahle marito. Ina, ku “kombisa wunene” swi ta hi pfuna ku kala hi nga tirhisi marito lama tlhavaka ni lawa ma nga vavisaka van’wana. (Efe. 4:31, 32) Hambiloko van’wana va hi khoma hi ndlela ya ku biha, hi fanele hi hlamula hi ndlela ya yinene hi tlhela hi vulavula kahle. Yehovha a hi vekele xikombiso xa xinene nkama a nga vulavula na Eliya lweyi a a chava. Ntsumi leyi a yi nyimela Yehovha yi vulavule hi “rito la ku rhula naswona a li twalela hansi.” (1 Tiho. 19:12) Hambileswo, ku kombisa wunene a swi gameli ka marito ntsena, hi fanele hi li kombisa hi leswi hi swi yentxaka. Hi nga swi yentxisa ku yini leswo?

Hi tekelela Yehovha loko hi kombisa wunene nkama hi vulavulaka ni hi leswi hi swi yentxaka. (Efe. 4:32; 5:1, 2) Lisa lweyi se hi nga bula hi yena, a vule leswi hi wunene leli a nga kombiwa lona hi Timboni ta Yehovha: “Nkama ndjangu wa hina wu nga sindzisiwa ku rhurha swa kola na kola, vamakwerhu vambirhi vavanuna ni vasati va vona, va tinyike nkama swaku va ta hi pfuna ku pakela. Hi nkama wolowo a ni nga se sungula ku djondza  Bibele.” Wunene leli, li pfune Lisa swaku a lava ku djondza ntiyiso.

Anne lweyi se hi nga bula hi yena, a li khensa hintamu wunene leli a nga kombiwa lona hi Timboni ta Yehovha, a li: “Leswi vanhu lava a ni hanya na vona a va nga ni yentxeli minchumu ya yinene, a swi ni karhatela ku tshemba vanhu van’wana. Hi mhaka leyo, khambi la ku sungula ni nga kumana ni Timboni ta Yehovha a ni nga ti tshembi. Kambe wunene leli va nga ni komba lona li ni hlamalisile, leswo swi yentxe swaku ni va tshemba. Se hi ku famba ka nkama, ni sungule ku swi rhandza leswi a ni swi djondza.”

Vona swaku wunene leli Lisa na Anne va nga kombiwa lona li va khumbe hintamu naswona li va pfunile swaku va sungula ku djondza ntiyiso. Li tlhele li va pfuna ku tshemba Yehovha ni vanhu va yena.

Van’wana swa va vevukela ku kombisa wunene ni ku hlekelelanyana hi mhaka ya leswi va nga wundlisiwa xiswona ni lomu va tshamaka kona. Phela swa tsakisa leswo. Kambe ku kombisa wunene ntsena hi mhaka ya  leswi hi nga wundlisiwa xiswona kumbe lomu hi tshamaka kona, a swi vuli swaku hi tekelela wunene la Xikwembu. — Vona ni Mintirho 28:2.

Phela wunene i wun’we wa mihandzu ya moya wa ku kwetsima wa Yehovha. (Gal. 5:22, 23) Se, leswaku hi li kombisa, swi lava hi pfuniwa hi moya wa ku kwetsima wa Yehovha. Loko hi yentxa leswo, hi ta va hi tekelela Yehovha na Yesu. Leswi hi nga Vakreste, hi ni mhaka ni vanhu van’wana, hi mhaka leyo, lexi hi yentxaka hi kombisa wunene i ku rhandza Yehovha ni ku rhandza vanhu van’wana. Loko hi kombisa wunene na swi suka mbilwini, swi ta yentxa swaku Yehovha a hi yamukela.

Swi vevukile ku komba wunene ka vanhu lava va nga tshama va hi komba wunene kumbe ka vanhu lava hi va tivaka. (2 Sam. 2:6) Hi nga ha va komba wunene hi ku va khensa. (Kol. 3:15) Kambe hi nga yentxa yini loko ku ni munhu lweyi hi pimisaka swaku a swi mu faneli ku kombiwa wunene?

A ku na munhu a kombisaka wunene ku fana na Yehovha. Funtshi Bibele li hi djondzisa lisima la ku va ni wunene. Rito leli nge: “Timpsalu ta tikulu”, li tirhisiwa hintamu ka Matsalwa ya Xigriki. Kasi Xikwembu xi li kombisisa ku yini wunene?

Pimisa hi wunene leli Yehovha a li kombaka vanhu va vanyingi hi ku va nyika leswi va swi lavaka swaku va hanya. (Mat. 5:45) Phela Yehovha a komba vanhu wunene hambiloko va nga mu tivi. (Efe. 2:4, 5, 8) Hi xikombiso, a nyikele hi N’wana wa yena Yesu swaku a fela vanhu hinkwavu. Mupostolo Pawulo a vule swaku Yehovha a nyikele hi N’wana wa yena Yesu swaku a hi fela hi mhaka ya ‘timpsalu ta ku hlamalisa ta yena.’ (Efe. 1:7) Hambileswi hi djohaka hi tlhela hi mu kwatisa, Yehovha a tama a hi kongomisa a tlhela a hi djondzisa. Marito ya yena ma fana ni “mpfula leyi naka.” (Det. 32:2) A hi nge swi koti ku hakela wunene hinkwalu leli Yehovha a hi kombaka lona, funtshi ha swi tiva swaku loko Yehovha a a nga hi kombi wunene a swi nga ta koteka swaku hi tikhorisa hi minkateko leyi a hi tshembisaka yona ka nkama lowu taka. — Vona ni 1 Pedru 1:13.

A swi kanakanisi swaku wunene la Yehovha la hi pfuna naswona ha li rhandza. Hi mhaka leyo, na hina hi fanele hi tekelela Yehovha hi ku kombisa wunene siku ni siku ka vanhu hinkwavu. (1 Tes. 5:15) Loko hi kombisa wunene siku ni siku, hi ta fana ni ndzilu hi siku la xirhami. Leswo swi ta pfuna maxaka ya hina, vamakwerhu, lava hi tirhaka na vona, lava hi djondzaka na vona ni vanhu van’wana.

Hi nga pimisa hi vamakwerhu ni maxaka ya wena lama nga tsakaka loko u kombisa wunene hi marito ni mintirho ya wena. Swi nga yentxeka ku ni makwerhu ka bandla la wena lweyi a lavaka swaku u ya mu pfuna hi ku mu yentxela mintirho ya kaya, kumbe u mu pfuna hi ku ya mu xavela minchumu. Loko hi kuma munhu ka ntirho wa ku chumayela lweyi a lavaka ku pfuniwa, ku ni leswi hi nga swi yentxaka swaku hi mu pfuna?

A hi tekeleleni Yehovha hi ku “kombisa wunene hi leswi hi swi vulaka ni leswi hi swi yentxaka.”