ТАНИ мар вера Лайза a со сярысь, кызьы со Иеговалэн Адӟись-Ивортӥсьёсыныз тодматскиз: «Соослэн лякыт сямзы мынам сюлмам ик пыриз». Та выллем ик шӧдонъёсыз вал Анналэн но: «Мыным кельшизы Библиысь дышетонъёс. Нош тужгес но мыным кельшиз Адӟись-Ивортӥсьёслэн лякыт луэмзы». Али та сузэръёс туж ярато Библиез лыдӟыны но со вылын малпаськыны. Но нырысь ик соослы туж кельшиз, Иеговалэн Адӟись-Ивортӥсьёсыз асьсэды лякытэн возё шуыса.

Милям туж потэ, лякыт сяммы адямиослэн сюлмазы ик мед пыроз шуыса. Ойдолэ эскеромы, кызьы лякыт сямез кылъёсын но ужъёсын возьматоно. Озьы ик тодомы, кинлы лякыт сяммес возьматыны кулэ.

Мадёнъёсын 31:26 умой кышно сярысь тазьы гожтэмын: «Визьлыкен со ымзэ усьтэ, лякыт кылъёсын визь-кенеш сётэ». Та возетэз лыдэ басьтыса, со чакла, мае со вера но кызьы со вера. Атайёслы но «лякыт кылъёсын» вераськыны кулэ. Тросэз анай-атайёс тодо, чурыт кылъёс нылпиосты вӧсь каро шуыса. Нош лякыт кылъёс соослы кельшо но мылкыдзэс ӝуто анай-атайзылэсь кылзӥськыны.

Вань-а нылпиосмы, ӧвӧл-а, милемлы ваньмылы лякыт кылъёсын вераськыны кулэ. Кызьы талы дышетсконо? Валэктон гожтэмын Мадёнъёсын 31:26: «Визьлыкен со ымзэ усьтэ». Соин ик малпаськыны кулэ, кыӵе кылъёсын но кыӵе куараен вераломы. Кылсярысь, аслэсьтыд юаны луоз: «Верам кылъёсы адямиез буйгатозы яке йыркурзэ ӝуатозы?» (Мад. 15:1). Зэм но, мае ке верамлэсь азьло умой-умой малпаськыны кулэ.

Мукет мадёнын гожтэмын: «Юнме кыл тэкшерись пуртэн кадь вандэ» (Мад. 12:18). Ми малпаськимы ке, мае шӧдозы адямиос, верам кылъёсмес кылыса, милемлы капчигес луоз чакланы, мае но кызьы ми вераськомы. Ми лякытэн вераськыны тыршимы ке, соку лек но чурыт кылъёсын ум вераське (Еф. 4:31, 32). Лякытэн вераськыны дышетскон понна, ми адӟем карыны быгатӥськомы Иеговалэсь. Тодамы ваёмы, кызьы со буйгатӥз Илия пророкез, кудӥз туж кышкамын вал. Иегова лэзиз кылчинзэ, кудӥзлэн «ыркыт тӧл» кадь небыт куараез вал (3 Экс. 19:12). Но лякыт кылъёсын вераськыны гинэ тырмыт ӧвӧл, лякыт сяммы ужъёсысьтымы но адӟиськыны кулэ.

Иеговалэсь адӟем каримы ке, лякыт кылъёсын вераськем сяна, ми ӟеч ужъёс но лэсьтомы (Еф. 4:32; 5:1, 2). Лайза тодаз вае: «Куке милемлы улон интымес воштоно луиз, кенешысь кык семья уж дорысьтызы куриськизы но юрттӥзы милемлы улэм-вылэммес бичаны. Нош соку мон Библиез уг но дышетӥськы вал али!» Адӟись-Ивортӥсьёслэн асьсэды лякыт воземзы Лайзалэсь мылкыдзэ ӝутӥз Библиез дышетыны.

 Анна но тау каре Адӟись-Ивортӥсьёслэн лякыт луэмзы понна. Со вера: «Та дуннеын адямиослы оскыны туж секыт. Соин ик мон Адӟись-Ивортӥсьёслы но уг оскиськы вал. Мон уг валаськы вал, малы соос мыным сомында саклыксэс висъяло. Но сузэр, кудӥз монэн Библиез дышетӥз, ассэ туж лякыт возиз. Соин ик мон солы оскыны кутски». Мар луиз собере? Анна вера: «Мон эшшо но мургес малпаськыны кутски со сярысь, мар гожтэмын Библиын».

Адӟиды-а тӥ, вын-агайёслэн но сузэр-апайёслэн ӟеч ужъёссы Лайзалэн но Анналэн сюлмазы ик пыризы шуыса? Соин ик та кышномуртъёслэн мылкыдзы ӝутскиз эшшо умойгес зэмлыкен тодматскыны. Адӟись-Ивортӥсьёслэн лякыт сямзы Лайзалы но Анналы юрттӥз Иеговалы но солэн ужась-тыршисьёсызлы оскыны.

Куд-огъёсызлы асьсэды лякытэн возьыны но пальпотыса улыны секыт ӧвӧл, малы ке шуоно соос пичи  дырысенызы ик озьы будэтэмын вал. Но Инмар кадь ик лякыт сямо луон понна, со гинэ тырмыт ӧвӧл. (Ӵошатэ Апостолъёслэсь ужъёссэс 28:2.)

Зэмос лякытлык святой духлэн емышез пӧлы пыре (Гал. 5:22, 23). Соин ик, лякыт сямо луон понна, милемлы святой духлэн юрттэмез кулэ. Куке ми асьмеды лякытэн возиськомы, ми Иеговалэсь но Иисуслэсь адӟем кариськомы. Озьы ми возьматӥськомы, Иеговаез яратӥськомы шуыса. Иисуслэсь адӟем карон понна, ми мукетъёсызлы саклыкмес висъяны кулэ. Нош со возьматоз, ми матысь адямиосмес яратӥськомы шуыса. Озьыен, Иеговаез но матысь адямиосмес яратон милесьтым мылкыдмес ӝутэ лякытэсь луыны. Соку асьмеды лякытэн воземмы адямиослэн сюлмазы ик пыроз но Инмарез шумпоттоз.

Куке адямиос милемлы яке эшъёсмылы ӟеч ужъёс лэсьто, милемлы секыт ӧвӧл асьмеды лякытэн возьыны (2 Экс. 2:6). Кылсярысь, ӟеч ужъёссы понна милям соослы тау кареммы потэ (Кол. 3:15). Нош кулэ-а асьмеды лякытэн возьыны, куке адямиос, ми малпамъя, асьсэды умойтэм возё?

Иегова туж умой адӟем карон возьматэ, кызьы лякыт сямо луоно. Солэн Кылыз дышетэ милемыз та сямез возьматыны. Лякыт сямо луон сярысь Христиан Грек Гожтэмъёсын туж трос пол вераське. Кызьы Инмар возьматэ милемлы та сямзэ?

Малпаське трос миллиард адямиос сярысь, кудъёсыныз Иегова ассэ лякытэн возе но кудъёсызлы со улон понна ваньзэ кулэзэ сётэ (Матф. 5:45). Иеговаез тодэммылэсь азьло ик ини со милемлы ӟеч ужъёс лэсьтӥз (Еф. 2:4, 5, 8). Кылсярысь, Инмар вань адямиос понна аслэсьтыз Пизэ сётӥз. Апостол Павел гожтӥз, Иеговалэн «туж бадӟым гажан-жалянэз» вань шуыса (Еф. 1:7). Соин ик со милемыз сьӧлыкъёсмылэсь мозмытӥз. Ми сьӧлыкаськомы ке но, озьы ик инмысь Атаймес ӝоже уськытӥськомы ке но, со милемыз дышетэмысь уг дугды. Солэн дышетэмез «зорлэн возь вылэ кисьтӥськемез кадь» (К. Зак. 32:2). Ӟеч ужъёсыз понна ми Иеговалы номыр но сётыны ум быгатӥське. Со милемлы лякыт сямзэ ӧз возьматысал ке, милям вуоноезлы осконмы ӧй луысал. (Ӵошатэ 1 Пётрлэсь 1:13.)

Иеговалэн лякыт луэмез милям сюлмамы ик пыре но мылкыдмес ӝутэ асьмеды озьы ик возьыны. Соин ик ми ум малпаське, кинэн асьмеды лякытэн возёно, нош кинэн ӧвӧл. Иеговалэсь адӟем карыса, ми тыршиськомы котьку но котькинэн асьмеды лякытэн возьыны (1 Фес. 5:15). Соку ми вӧзын, тылскем вӧзын кадь, адямиослы шуныт луоз. Ми быгатомы семьямес, вын-агайёсмес но сузэр-апайёсмес, ӵош ужасьёсмес, ӵош дышетскисьёсмес но бускельёсмес буйгатыны.

Малпаське, кинлы тӥ быгатӥськоды ӟеч кыл вераны но ӟеч уж лэсьтыны. Оло нош, ӵыжы-выжыдылы яке кенешысь агайлы корка котыраз яке бакчаяз юрттӥськыны кулэ? Яке сузэрлы магазинысь мае ке басьтыны кулэ? Нош тодытыкуды кинлы ке юрттэт кулэ луиз ке, быгатоды-а тӥ солы но мар ке карыны?

Иеговалэсь адӟем карыса, лякыт кылъёсын вераське но ӟеч ужъёс лэсьтэ.