MANJI Lisa * wa popa hati: “Ocisola ca vamanji oco ca mbetiya calua.” Eye wa popia olondaka evi eci a yeva onjanja yatete olondaka viwa. Olondaka evi vimuamue levi via manji Anne wa popia hati: “Eci nda sola vali poku yeva olondaka viwa, ceci okuti, akundi ka va ndongisile lika, pole, va lekisavo ohenda kokuange.” Cilo, vamanji ava vavali akãi, va sanjukila oku tanga Embimbiliya, loku sokolola kueci va tanga, pole, ohenda oyo ya va vetiya vali calua.

Tu pondola oku lekisa ndati ohenda yina yi vetiya vana tu lisungue lavo? Tu konomuisi olonjila vivali okuti: tu ci lekisa kupopi wetu kuenda kovilinga. Kuenje tu konomuisavo ku velie tu sukila oku lekisa ohenda.

Ukãi ukuavituwa viwa wa tukuiwa Kolosapo ocipama 31, o kuete “ocihandeleko cohenda” kelimi liaye. (Olo 31:26) Eye ecelela okuti “ocihandeleko” caco, cu kuatisa kovina a popia, lonjila ndomo a vi popia. Olonjali vi sukilavo oku kuata “ocihandeleko” caco, kupopi wavo. Valua pokati kavo va limbuka okuti olondaka viukãlu vi pondola oku sumuisa omãla. Nda olonjali vi vangula lukãlu ka ci ka vetiya omãla. Nda olonjali vi likolisilako oku vangula lohenda, ci ka leluka komãla vavo oku va yevelela kuenda oku va pokola.

Nda unjali ale sio, o lilongisa ndati oku vangula lohenda? Olondaka viatete Kolosapo 31:26, vi popia hati: “Eye asama omẽla waye lolondunge.” Omu mua kongela oku nõla olondaka kuenda ndomo vi popiwa lolondunge. Eci ci tu kuatisa oku lipula ndoco: ‘Anga hẽ olondaka viange vi wengula onyeño, ale vi tu lumula onyeño?’ (Olo 15:1) Ciwa oku sokolola osimbu ka tua vanguile.

Kolosapo vikuavo hati: “Olondaka ka via sokoluiwile vi kasi ndoku toma kuosipata.” (Olo 12:18) Eci tu sokolola ndomo olondaka vietu vi pondola oku sumuisa ale oku vetiya vakuetu, ci tu vetiya oku lekisa utate ndomo tu vangula. Eci tu kapako “ocihandeleko cohenda,” ci tu kuatisa oku yuvula olondaka vioku pembula kuenda vina ka via sungulukile. (Efs 4:31, 32) Tu ka piñainya ovisimĩlo ka via sungulukile lolondaka viohenda haivio vi vetiya. Yehova wa eca ongangu konepa eyi, eci a lembeleka ufendeli waye Eliya wa kala lusumba. Ungelo umue wa tumiwa la Yehova wa vangula ‘londaka yimue yetulumũho, yoku loñola.’ (1Ol 19:12) Omo liaco, oku kala ukuahenda mua kongela ovina vialua okuti oku vangula lika lohenda ci sule. Tu sukilavo oku lekisa ovilinga viohenda. Ndamupi?

Tu pondola oku setukula Yehova poku vangula olondaka viohenda loku lekisa ovilinga viohenda. (Efs 4:32; 5:1, 2) Manji Lisa wa tukuiwa kefetikilo wa lombolola ohenda ya lekisiwa Lolombangi Via Yehova. “Eci epata lietu lia kisikiwa oku iluka lonjanga, olohueli vivali vekongelo via lieca olumue oku tu kuatisa. Kotembo yaco handi sia kaile oku lilongisa Embimbiliya!” Ovituwa viaco viohenda via vetiya manji Lisa oku linga akonomuiso asuapo atiamẽla koku kũlĩha ocili.

 Manji Anne wa tukuiwa kefetikilo, wa solavo ohenda Olombangi via Yehova via lekisa kokuaye. Eye hati: “Omo liekalo li sangiwa voluali, sia kaile ukuahenda. Ame sia kolelele omanu.” Eye wamisako hati: “Eci nda lisanga Lolombangi Via Yehova sia kolelele kokuavo. Nda lipula ndoco: ‘Momo lie ovo va ndi kapelako?’ Pole, ohenda ya lekisiwa la manji wa kala oku ndongisa Embimbiliya, ya mbetiya oku kolela kokuaye.” Onima yipi yiwa yeyililako? “Noke nda fetika oku sokolola lutate kovina nda kala oku lilongisa.”

Sokolola okuti manji Lisa kuenda Anne va vetiyiwa calua lovilinga viohenda via lekisiwa la vamanji vekongelo kuenje eci ca va vetiya oku lilongisa ocili. Ohenda ya lekisiwa lavamanji ya va kuatisa oku kolela ku Yehova kuenda kafendeli vaye.

Omanu vamue pamue va likolisilako oku vangula lohenda kuenda vakuavo va ci linga omo liocitumãlo va kulila. Ci kuete esilivilo nda omanu vamue va vetiyiwa oku kapako ovituwa viocitumãlo va kulila kuenda ekalo  liavo. Nda tu vetiyiwa oku lekisa ovituwa viaco omo liocitumãlo tua kulila kuenda omo liekalo lietu, eci ka ci lekisa okuti tu kasi oku setukula ohenda ya Suku.—Sokisa Lovilinga 28:2.

Ohenda yocili yi panga onepa kepako liespiritu lia Suku. (Gal 5:22, 23) Eci ci lomboloka okuti tu sukila ekuatiso liespiritu sandu lia Suku oco tu lekise ohenda yocili. Eci tu ci linga tu setukula Yehova kuenda Yesu. Omo okuti Tuakristão tu sukila oku lekisa ohenda komanu vakuavo. Kuenje tu vetiyiwa locisola ca Yehova Suku kuenda ca vamanji. Ohenda yetu yi pondola oku kala ocituwa cimue ca pama okuti ci tunda vutima kuenda ci taviwa la Suku.

Pamue ci leluka calua oku lekisa ohenda ku vana va lekisavo ohenda kokuetu, ale ku vana etu tua kũlĩha. (2Sa 2:6) Onjila yimue yoku cilinga, oku eca olopandu kokuavo. (Kol 3:15) Pole, tu liyeva ndati nda umue ka lekisa ohenda?

Tu kũlĩhĩsi ndoco: Yehova eye ongangu ya velapo yoku lekisa ohenda ya piãla kuenda Vondaka yaye o tu longisa ocina cimue ca velapo catiamẽla koku lekisa ocituwa caco. Ondaka “ohenda ya piãla” ya tukuiwa olonjanja vialua Vovisonehua vio Helasi. Suku wa lekisa ndati ohenda yaco kokuetu?

Sokolola kolohuluwa violohuluwa viomanu Yehova a siata oku lekisa ohenda yaye, poku va ĩha eci va sukila oco va kale lomuenyo. (Mat 5:45) Ocili okuti eci handi omanu ka va kũlĩhĩle Yehova, eye wa lekisile ale ohenda kokuavo. (Efs 2:4, 5, 8) Ndeci, eye wa eca Omõlaye wongunga komanu vosi. Upostolo Paulu wa soneha hati, Yehova wa eca ocisembi “omo liohenda yaye ya piãla.” (Efs 1:7) Kuenje ndaño okuti tuakuakandu kuenda tua siata oku sumuisa Yehova, eye amamako oku tu songuila loku tu longisa. Olonumbi viaye kuenda olondaka vi kasi “ndombela yi loka.” (Esn 32:2) Etu ka tu tẽla oku tiula kokuaye ohenda yosi eye a siata oku lekisa kokuetu. Handi vali, elavoko lietu liokovaso yoloneke li ka tẽlisiwa lika omo liohenda ya Yehova.—Sokisa 1 Petulu 1:13.

Ocili okuti ohenda ya Yehova yiwa kuenda yi vetiya. Omo liaco, tu sukila oku yuvula oku lekisa ohenda komanu vamue lika, pole, tu sukila oku likolisilako oku setukula Yehova okuti ocituwa cohenda ci panga onepa komuenyo wetu weteke leteke. (1Te 5:15) Eci tu lekisa ohenda olonjanja viosi, tu kala ndondalu yeca owuya kotembo yombambi. Tu pondola oku kala elembeleko kepata lietu, ku vamanji vekongelo, ku vana tu talavayela kumosi, kuvana tu tangela kumosi kuenda vana va lisungue letu.

Sokolola kuvakuepata liove kuenda vamanji vekongelo ndomo va pondola oku kuatisiwa omo liolondaka viove viohenda kuenda ovilinga. Citava okuti manji umue vekongelo o sukila ekuatiso lioku yelisa onjo yaye, ale oku tata oloneleho kuenda oku linga ovopange akuavo ndeci oku enda pocitanda. Handi vali, kupange woku kunda nda wa sanga umue o sukila ekuatiso, anga hẽ citava okuti u kuatisa?

Poku setukula Yehova olondaka vietu kuenda ovilinga olonjanja viosi vi songuiwe ‘locihandeleko cohenda.’