“NVARELE muteko nlamulo na oreera murima. Muhiye oreera murima opakelaka eparte ekumi anyu,” Oreera murima wa asinna ni asirokora waakeriha oxuttera ekhaikhai othalinhe Lisa. * Etthu ela tho yaaheereya ni murokora Anne, owo ohimme há: “Etthu yaakittuntthe murima waari oreera murima wa asinna ohiya ele kaaxutteraka.” Nto vano asirokora ala onnaasivela omusoma Biblya ni ophimelele ele awo ansomaaya. Mene oreera murima wa asinna wahaavara murima vantxipale asirokora ala.

Ninkela woonihera hayi oreera murima onaattuttha murima atthu akina? Ninkela woona mwa itthu piili: ele nimpakaahu ni ele nnulumahu. Woottharelana ninkela woona taani ninkelaahu owoonihera oreera murima.

Muthiyana oreera murima onhimmwa va Miruku ekapitulu 31 aakhalano nlamulo “nooreera murima” va nlumini vawe. (Mir. 31:26) Mene owo anahiya “nlamulo” nno weera nimukhavihereke ni etthu ahimaawe ni moota aapakaawe. Muhooleli a etthoko ontthuneya okhalano “nlamulo” nno vayanoni vawe. Asitithi antxipale aasuwela weera waanyemela anamwane aya pooti wanyonyiha ni pooti ohiwiwelela. Etempu asitithi analelaaya anamwane aya moohaanyemela ennaweriha anamwane aya owiwelela. Tivaavonto asitithi entthuneyaaya weera yiilipihereke wuuluma ni anamwaneya mooreera murima.

Munkela oxuttera hayi wuuluma moreerela murima? Miruku sa mwaha yoowo ori va Miruku 31:26, pooti onikhavihera. eversu ela eneera: “Onnahula mmwano mwawe ulumaka miruku.” Eyo enhela mpuwa masu nnulumahu ni moota nnulumahu. ‘Ele kinuulumaka enkela wawihera murettele atthu akina naari wanyonyiha?’ (Mir. 15:1) Mwekhaikhai ti wa miruku wuupuwela nihinaye wuuluma.

Miruku mikina sinera ha: “muhorahora onitha ntoko mwalo.” (Mir. 12:18) Vaavo nnuupuwelaahu moota masu ahu ni moota eneraaya yataphe atthu akina ninnikoosopa moota nneraahu nuulumeke. Aani, naahelaka mpuwa “nlamulo na oreera murima” khannuluma masu oonanara ni moota nneeraahu nuulumke kwaninrowaka waanyonyiha atthu akina. (Aef. 4:31, 32) Ninatxentxa masu oonanara, nnuluma masu oreera moreera murima. Yehova aapaka eyo vaavo uulumaawe ni Eliya ni “ahuuluma moomaleleya ni mooreera murima.” (1 Mam. 19:12) Oreera murima khohiyono paahi wuuluma mene onatthuneya opaka etthu. Moota heeni?

Hiyo ninnamutakiha Yehova ohiya paahi ni masu, mene-tho opaka itthu sooreera. (Aef. 4:32; 5:1, 2) Lisa, yoowo ohimmwale woopatxerani onnahima mwaha wooreera murima wa Anamoona a Yehova. “Vaavo amusi ahu yaathamaya veeli-veeli matheli meeli a omulokoni yaavekela efolka omutekoni waya weera enikhavihere othama. Etempu eyo miyo keera kihinaaye opatxera omusoma Biblya!” wooniheriwa oreera murima nno waamweeriha Lisa omuxuttera ekhaikhai.

 Anne, ohimmwale woopatxerani aattuttheya murima mwaha wooreereliwa murima ni Anamoona a Yehova. Owo ohimme ha: “Mwaha wa oonanara murima wa elapo ela ni oohiroromeleya, kaahoona ovila waaroromela atthu.” Owo onnavirelela othaliha eeraka: “Kaasuwelakaru Anamoona a Yehova, koona weera awo-tho khenroromeleya. Miyo kaaniikoha: “Mwaha wa heeni awo ankipwatthaaya? Mene mwaha wookoonihera oreera murima ole aakisomiha Biblya, waakeeriha omuroromela owo”. Muhoolo mwaya kaapatxera ohikuxera matheela etthu kaaxutteraaka.”

Mmuupuwele Lisa ni Anne yaawo yaattuttheñye murima mwaha wooreereliwa murima ni asinna a mmulokoni ni etthu eyo yaaweeriha ooxuttera ekhaikhai. Oreera murima muloko woonihenraaya, waahaavara murima.

Atthu akina pooti otheya ni wuuluma masu ooreera mwaha wa sookhovelela saya ni mwaha wa nipuro akhummaaya. Menento, itthu iyo ampakaaya ti sooreera. Mene naapakaka itthu iyo mwaha wa sookhovelela sahu paahi eyo  khenkela woonihera weera hiyo atthu ooreera murima.—Mulikanxere ni ele eri va Miteko 28:2.

Oreera murima weekhaikhai yoowiima ya munepa wootteela. (Agal. 5:22, 23) Mene weera nikhale ooreera murima mweekhaikhai nintthuneya okhaviheriwa ni munepa wootteela. Hiyo-tho pooti otakiha oreera murima wa Yehova wamoha ni Yesu. Nto makristu ninnaareerela murima atthu akina. Mweekhaikhai hiyo ninnamusivela Yehova nave-tho ninnaasivela atthu akina. Mukhalelo owo wooreera murima onrwa va murimani onnaneeriha waakhuleliwa ni Muluku.

Vannakhweya waareerela murima yaale annireerela ni ale naasuwenlaahu. (2 Sam. 2:6) Moota woopaka eyo ori oxukurela. (Akol. 3:15) Ankha wakhala weera ookhala mutthu ohimphwanela oreereliwa murima?

Muupuwele ela, Yehova onnanivaha ntakihero nooreera na oreera murima mBiblyani. Mukhalelo ola ti wootepa otthuneya. Masu ooweera oreera murima annavareliwa muteko ikwaha sintxipale mwa soolempwa sa eGreku sa ekristu. Moota heeni Muluku onooniheraawe oreera murima?

Nwuupuwele atthu imiliyawu sintxipale Yehova onwooniheraawe oreera murima aavahaka itthu sootthuneya weera ekhale akumi. (Math. 5:45) Hiyo nihinaaye omusuwela Yehova owo aanisuwela ni annanreerela murima. (Aef. 2:4, 5, 8) Mwa ntakihero, Owo oovaha mukuttho wa mwanawe Yesu kristu weera aavuluxe atthu ootheene. Murummwa Paulo aalepa weera Yehova oonivaha “mukuttho” muhakhu moowiiwanana ni mahlawe.” (Aef. 1:7) Nnaamweera nimutthekelaka Yehova owo onnavirelela onxuttiha ni oneettiha, sooxuttiha sawe siri ntoko “epula yoowatta.” (Ola. 32:2) Hiyo khaninwera omuliva Yehova itthu sootheene onipakenlaawe. Mpakano owo onnanilaihera onivaha elapo yooreera muhoolo.—Mulikanxere va 1 Pedru 1:13.

Moohihovela oreera murima wa Yehova onnanikhavihera. Mwa yeeyo ohiya paahi wuuluma mmasuni weera na mutthu ooreera murima nintthuneya omutakiha Yehova mahuku ootheene. (1 Ates. 5:15) Naawooniheraka oreera murima atthu akina ninkhala ntoko mooro nihuku nooriira. Ninnawoonihera amusi ahu, asikhwiihu a va murimani, makoleka oomutekoni, ooxikola ni ale naattamannaahuno.

Nwuupuwele atthu a emusi anyu naari a mmulokoni mwanyu yaakela oohakalala mwa wuulumela masu ooreera. Nyuwo-tho pooti omukhavihera munna a mmulokoni okwesa owannyawe, naari orehera ejardim, naari omukhavihera othuma itthu. Neereke pooti tho omukhavihera mutthu mwaalaleeraka vale ontthuna okhaviheriwa?

Nimutakihaka Yehova muulumo ahu ni miteko sahu seettihiweke ni “nlamulo nooreera murima.”