LISA wutuba: “Mamboti zikhomba bambonisa matsadisa beni.” * Nandi waba tomba kutuba ti mamboti amomo, mawu mansadisa kukikinina kiedika. Mawu mvandi Anne kamona bo katuba: “Mamboti ma zikhomba mawu maluta nhikuna ntim’ami kena na malongi yilonguka.” Zikhomba aziozio zi bakieto, banzolanga kutanga Kibibila ayi kuyindula mu mambu bantanga. Vayi mamboti baba monisa, mawu maluta nhikuna mabanza mawu.

Buidi tulenda monisina mamboti muingi kunhikuna mintima mi batu bankaka? Tuemmona ziphila wadi: Theti mu thubulu ayi yimuadi mu mavanga. Mvandi tunkuiza mona nani tufueti monisina mamboti.

Nkazi wunduenga bantubila mu buku yi Zingana 31, widi “nsiku wu mamboti” mu ludimi. (Zinga. 31:26) Nandi wumbikanga muingi “nsiku awowo” wutuadisa phila kankolukila ayi mambu kantuba. Matata mvandi bankuiza vanga dimboti ba kubika “nsiku awowo” wutuadisa mambu bantuba. Matata mawombo bazebi ti kukolukila mu nganzi kulendi tuadisa ko ndandu kuidi bana bawu. Mvandi ba kukolukila mu lukasu, ḿba bana bawu basinkuiza sadila ko mambu baba kamba. Diawu muingi kunhikuna mintima ayi kukindisa bana bawu, matata bafueti vanga mangolo muingi kuba thubulu yimboti.

Boti widi tata voti ndamba, buidi wulenda yadila mambu wuntuba? Tulenda baka lusadusu mu mambu madi mu Zingana 31:26: “Nandi wunkolukanga mu nduenga.” Mansundula kusola bikuma ayi kutubila mu phila yifuana. Diawu tufueti kuyikuvusa: ‘Bukiedika ti mambu yinkuiza tuba mankuiza dasula voti kuvumbika wunkaka?’ (Zinga. 15:1) Bukiedika, yidi mbonosono yinduenga kuyindula mambu malenda monika mu phila tuntubila.

Matangu mankaka ma Zingana mantuba: “Kukoluka mu khambu yindula kuidi buka kulueka mu mbedi.” (Zinga. 12:18) Bo tunyindula ti mambu tuntuba ayi phila tunkolukila yilenda lueka bankaka, tunkuiza vanga mangolo muingi kuyala thubulu’itu. Bukiedika, befu kusadila “nsiku wu mamboti” wala tusadisa tubika sadila thubulu yimbi. (Efe. 4:31, 32) Mu phila ayoyo tuala balula mayindu mitu mambi mu thubulu yimboti. Yave wuvana kifuani kimboti bo kavumbika mabanza ma Elia mu thangu kaba kuazuka. Mu nzila mbasi Yave wuyoluka yandi “mu mbembu yivumbama.” (1 Minti. 19:12) Kumonisa mamboti kuisinsundula ko to kusadila bikuma bimboti, vayi mvandi kumonisa mamboti mu mavanga. Buidi?

Befu kulandakana kifuani ki Yave, tuala vanga mangolo ma kumonisa mamboti mu mavanga mitu. (Efe. 4:32; 5:1, 2) Lisa tube tubila kumbusa, wutambula mamboti kuidi zikhomba ayi nandi wutuba: “Bo ba tubasisa mu kinzimbukulu ku nzo tuaba luganga, makanda muadi ma zimbangi zi Yave badinda ku kisalu muingi kuiza tusadisa kuzonzika zimala. Mu thangu beni minu yabasa longukanga  ko Kibibila!” Mavanga amomo mamboti ma zikhomba, masadisa Lisa kulonguka kiedika.

Anne, tube tubila mu lutangu lutheti mvandi wutambula mamboti ma Zimbangi zi Yave. Nandi wutuba: “Mu kutadila phila nza yimana wadila mambi, minu yaba monanga phazi kufiatila batu.” Nandi wubue tuba: “Vayi bo Zimbangi zi Yave bambonisa mamboti, minu yikiyuvusa kibila mbi bawu ba kumbonisina mamboti?’ Vayi mamboti nlongisi’ami wu Kibibila kambonisa matsadisa kumfiatila.” Ndandu mbi mawu matuadisa? “Buviokila thangu yitona kutsikika mayindu mu mambu yaba longuka.”

Bukiedika, mamboti Zimbangi zi Yave bamonisa kuidi Lisa ayi Anne ma nhikuna beni mabanza mawu ayi ma basadisa kuvitika kiedika. Mvandi maba sadisa kutona kufiatila Yave ayi kimvuka kiandi.

Bawombo badi beni basakadala ayi bannunganga kusadila buboti thubulu’awu, mu kibila ki kikhulu kiawu. Mvandi banunganga  kumonisa lukinzu ayi mamboti mu khambu lukuiku. Vayi kumonisa mamboti mu kibila akiokio kuisinsundula ko ti tuidi mu kumonisa mamboti ma Nzambi.—Dedikisa na Mava. 28:2.

Mamboti ma Nzambi madi mu ḿbutu phevi yilongo yi Nzambi. (Ngala. 5:22, 23) Diawu kumonisa mamboti kunsundula kubika phevi yilongo yi tutuadisa. Ayi bo tuidi Baklisto tumvuanga nkinza bankaka. Kibila luzolo luitu mu Yave ayi mu bankaka luawu lu tunatanga kuvanga mawu. Mu phila ayoyo befu tuala monisa mamboti mu ntim’itu woso ayi mu phila Yave kantombila.

Tumonanga ko phasi kumonisa mamboti kuidi bo ba tumonisanga mamboti ayi kuidi bo tuzebi. (2 Samu. 2:6) Phila yimueka tulenda vangila mawu yidi mu kuba tondanga. (Kolo. 3:15) Buabu befu kumona ti mutu beni kasa fuana ko kutambula mamboti?

Tala diambu adidi: Yave wummonisanga kifuani kilutidi mu kumonisa mamboti tukhambulu fuana kutambula. Ayi mu Diambu diandi nandi wutulonga malongi mankinza matedi phila yi kumonisina khadulu ayoyo. Kikuma “mamboti tukhambulu fuana kutambula” basadila kiawu zikhumbu ziwombo mu Masonoko ma Kingeleko. Vayi buidi Yave ka tumonisinanga mamboti?

Yindulabu mu bivevi na bivevi bi batu Yave kammonisanga mamboti mu kuba vana biabioso bintombolu muingi batatamana kuzinga. (Matai 5:45) Bukiedika, ava batu bazaba Yave nandi wuba monisanga mamboti. (Efe. 2:4, 5, 8) Dedi Nandi wuvana Muan’andi wumueka to muingi kafuila mu kibila ki batu boso. Mvuala Polo wusonika ti Yave wuvana khudulu “boso buididi kimvuama ki mamboti mandi tukhambu fuana kutambula.” (Efe. 1:7) Mvandi kheti tuidi bankua masumu ayi tunhongisanga ntim’andi, Yave wuntatamananga ku tutuadisa ayi kutulonga. Diambu diandi ayi Zituadusulu ziandi zidi buka “binoko voti bimi.” (Deute. 32:2) Tulendi nunga ko kuvutula mamboti moso Yave ka tumonisinanga. Bukiedika, vantombuluanga mamboti ma Nzambi muingi tutatamana kuzinga.—Dedikisa na 1 Pete. 1:13.

Tuisi ko divuda ti mamboti ma Yave ma tunhikunanga mintima ayi ma tukindisanga. Diawu, tubika sola banani tufueti monisina mamboti vayi tufueti vanga mangolo muingi kulandakana kifuani ki Yave, mu kumonisa mamboti kuidi batu boso kadika kilumbu. (1 Tesa. 5:15) Befu kutatamana kumonisa mamboti, tuala ba buka diamu di mbazu kuidi basi dikanda ditu, zikhomba mu kimvuka, batu bansalanga yitu, bankotanga yitu kikola ayi kuidi bankalanga yitu va nsengi.

Ḿba vadi mutu va dikanda voti mu kimvuka wuntomba lusalusu muingi kudiodisa nzo, voti kuvanga kioso kua kisalu dedi kusumba biuma. Mvandi ngie kudengana mutu mu kisalu ki kusamuna wuntomba lusalusu, bukiedika ti ngie wulenda kukivana muingi kunsadisa?

Bo tunlandakana kifuani ki Yave, bika mambu tuntuba ayi mavanga mitu matuadusulu mu “nsiku wu mamboti.”