TI HERMANA láʼ Lisa * guníʼ xi guyuulaʼdxiʼ ora guniʼné ca Testigu: «Guizáʼ bidxagayaaʼ guendanachaʼhuiʼ stiʼ ca hermanu que». Zacá gá nga ni bizaaca Anne. Laa guníʼ: «Dxi binebiaʼyaʼ ca Testigu, ni jma guyuuladxeʼ nga modo biʼniʼ tratárcabe naa qué ni bisiidicabe naa». Neca yanna ruundaʼ ca hermana riʼ Biblia ne riníʼ íquecaʼ de laani, guendanachaʼhuiʼ stiʼ ca hermanu que ne modo biʼniʼ tratarcaʼ laacabe, guizáʼ gucané ni laacabe.

¿Ximodo zanda gácanu nachaʼhuiʼ né xcaadxi ne gacanenu laacaʼ yaʼ? Chupa modo zanda gúninu ni nga, pur modo guininu, ne pur ca ni gúninu. Despué zadúʼyanu tuné naquiiñeʼ gácanu nachaʼhuiʼ ne guni tratarnu galán.

Lu capítulo 31 stiʼ Proverbios caníʼ de ti gunaa ni maʼ bichaganáʼ ni nuu xpiaaniʼ «ne ora rusiidibe la? rúnibe ni né guendanachaʼhuiʼ» (Prov. 31:26). Rúnibe stipa gácabe nachaʼhuiʼ ne ruyúbibe guiniʼbe né diidxaʼ nadóʼ. Laaca naquiiñeʼ gusihuinni ca padre ca nácacaʼ nachaʼhuiʼ. Stale de laacabe nanna, pa gaca naduxhuʼ ora guiniʼné ca xiiñiʼ la? zanda guninacaʼ laacabe. Pa qué guizaaláʼdxicabe ne qué gulábicabe ca xiiñicabe, zándaca qué zucaadiágacaʼ laacabe ora guiníʼcabe. Peru pa guiníʼcabe né diidxaʼ nadóʼ ne gácacabe nachaʼhuiʼ, zándaca zucaadiaga ca xiiñicabe laacabe ne zuzuubacaʼ stiidxacabe.

Pa nácanu padre o coʼ, ¿ximodo gusihuínninu nácanu binni nachaʼhuiʼ pur ca ni rininu? Primé ndaa stiʼ Proverbios 31:26 zacané laanu gánnanu ximodo. Raqué ná: «Riniʼbe né guendabiaaniʼ». Ndiʼ rusiidiʼ laanu naquiiñeʼ guiníʼ íquenu xi diidxaʼ guininu ne ximodo guininu ni. Ora nápanu guendanagana né sti binni, galán guiníʼ íquenu ndiʼ: «¿Ñee zuchiichiʼ ni chiguiniéʼ riʼ la? O zaguudxini laabe» (Prov. 15:1). Binni nuu xpiaaniʼ, riníʼ ique ante guiníʼ.

Sti proverbio ná sicaríʼ: «Zeeda gaca ca diidxaʼ ni riníʼ ti binni sin guiníʼ ique casi ora ridaabi ti espada» (Prov. 12:18). Pa guiníʼ íquenu xi zazaaca pur ca diidxaʼ ni guininu o modo guininu ni, zándaca ziuʼnu cuidadu ora guyúbinu xi guininu. Ora gúninu stipa gácanu ti binni nachaʼhuiʼ, qué zaquiiñenu diidxaʼ ni guniná stobi (Efes. 4:31, 32). Zanda guchaʼnu modo riníʼ íquenu ne cadi iquiiñenu diidxaʼ ni runiná, sínuque iquiiñenu diidxaʼ nadóʼ ne ni cuʼ gana. Rudii Jehová laanu ti ejemplu galán. Casi dxi cadxibi profeta Elías, biseendaʼ Jehová ti ángel para uguu gana laabe. Guniʼné ángel que laabe chaahuiʼ né diidxaʼ nadóʼ (1 Rey. 19:12). Peru cadi pur si ni riníʼ binni nga rihuinni nachaʼhuiʼ. Laaca rihuinni nachaʼhuiʼ tobi pur ca ni runi. Guidúʼyanu ximodo.

Chinándanu ejemplu stiʼ Jehová, riniʼni guininu né diidxaʼ nadóʼ ne gácanu nachaʼhuiʼ (Efes. 4:32; 5:1, 2). Lisa, hermana bizéʼtenu lu primé párrafo que, biiyabe  pabiáʼ nachaʼhuiʼ ca Testigu. Sicaríʼ guniʼbe: «Dxi yendesaniáʼ familia stinneʼ sti lugar, gucané chupa guendaxheelaʼ de Testigu laadu. Guleecabe permisu ra dxiiñaʼ stícabe para gucanécabe laadu guidopa ca cosa stidu. Tiempu que, caʼruʼ guzuluáʼ guundaʼ Biblia». Ni biʼniʼ ca hermanu que, bicaacani Lisa chuulaʼdxiʼ guiziidiʼ.

Laaca biiyaʼ Anne, hermana ni bizéʼtenu lu primé párrafo que, pabiáʼ nachaʼhuiʼ ca Testigu. Sicaríʼ guniʼbe: «Guca nagana para naa gapaʼ confianza binni, purtiʼ nabé stale cosa malu rizaaca». Laaca guniʼbe: «Dxi binebiaʼyaʼ ca Testigu la? huaxiéʼ gupaʼ confianza laacaʼ. Guníʼ iqueʼ xiñee nabé nacháʼhuicabe né naa. Peru pur guendanachaʼhuiʼ stiʼ hermana ni bidii estudiu naa, gupaʼ confianza laa». ¿Ximodo gucané ndiʼ Anne yaʼ? Laabe guniʼbe: «Gudiʼdiʼ si tiempu, jma bicaaʼ iqueʼ ni caziideʼ que».

Ni jma bidxagayaa ca hermana riʼ nga guendanachaʼhuiʼ stiʼ ca Testigu ne modo biʼniʼ tratarcaʼ laacabe. Ne ndiʼ bicaani laacabe guiziidicabe jma de lu Biblia. Guendanachaʼhuiʼ stiʼ ca hermanu ndaaniʼ  congregación, bicaani ca hermana riʼ gápacaʼ confianza Jehová ne ca xpinni.

Nuu tu laa qué raca nagana para laa guxidxi ne gaca nachaʼhuiʼ né stobi, purtiʼ zacá ca binni ra biniisi. Ne galán ni. Peru pa gúninu ni pur nga si la? zándaca cadi cusihuínninu guendanachaʼhuiʼ stiʼ Dios (bichaaga ni né Hechos 28:2).

Para gusihuínninu dxandíʼ nácanu binni nachaʼhuiʼ, naquiiñeʼ gápanu espíritu santu stiʼ Dios (Gál. 5:22, 23). Nga runi, para gápanu ca cualidad riʼ ne gácanu casi Jehová ne Jesús, naquiiñeʼ gudiʼnu lugar guni espíritu stiʼ Jehová dxiiñaʼ lu ca ni riníʼ íquenu ne ni rúninu. Ne cumu nácanu xpinni Cristu, dxandíʼ peʼ rizaaláʼdxinu binni purtiʼ nadxiinu Dios ne nadxiinu laacaʼ. Ora ruluinu guendarannaxhii, rácanu nachaʼhuiʼ ne runi tratarnu xcaadxi galán, riechené Jehová laanu.

Qué raca nagana para laanu gácanu nachaʼhuiʼ né sti binni ni guca nachaʼhuiʼ né laanu o ca ni runibiaʼnu (2 Sam. 2:6). Ti modo zanda guluinu nacháʼhuinu nga ora rudiʼnu xquixe peʼ laacabe pur ni rúnicabe pur laanu (Col. 3:15). Peru ¿xi rizaaca ora riníʼ íquenu qué runi merecer ti binni gácanu nachaʼhuiʼ né laa yaʼ?

Guiníʼ íquenu ndiʼ: Nachaʼhuiʼ Jehová né ca binni ni qué runi merecer ni, ne laasibe rúnibe zacá. Rusiidiʼ Biblia laanu ti cosa risaca de ni caninu riʼ. Lu Escrituras Griegas Cristianas stale biaje riete diidxaʼ guendanachaʼhuiʼ stiʼ Dios ni qué runi merecernu. ¿Ximodo ruluíʼ Dios cualidad riʼ yaʼ?

Guiníʼ íquenu guiráʼ xixé binni ni rusihuinni Jehová guendanachaʼhuiʼ stiʼ ra rudiibe laacaʼ ni caquiiñecaʼ para guibánicaʼ (Mat. 5:45). Ne dede ante gunibiaʼnu laabe, maʼ bisihuínnibe guendanachaʼhuiʼ stibe luguianu (Efes. 2:4, 5, 8). Bisihuínnibe ni ra bidiibe ni jma risaca nápabe, guendanabani stiʼ tobi lucha Xiiñibe pur laanu. Apóstol Pablo bicaa zanda gaca perdonar ca pecadu stinu purtiʼ «nabé nachaʼhuiʼ» Dios né laanu (Efes. 1:7). Ne neca nácanu binni ruchee ne riguʼnu triste Jehová, qué rusaana de gacané laanu. Guiráʼ ni rusiidibe laanu lu Stiidxabe, zeeda gácacani «casi nisaguiéʼ dé» purtiʼ rúnibe ni né guendanachaʼhuiʼ (Deut. 32:2). Qué zanda quíxenu guiráʼ guendanachaʼhuiʼ stiʼ Dios. Ne pur guendanachaʼhuiʼ stibe, zanda guibáninu galán despué (bichaaga ni né 1 Pedro 1:13).

¿Cadi dxandíʼ ridxíñanu Jehová purtiʼ guizáʼ nachaʼhuiʼ ne rucaani laanu gácanu casi laabe la? Nga runi, cadi gácanu nachaʼhuiʼ né caadxi si binni, sínuque gúninu stipa guni tratarnu guiráʼ binni casi runi Jehová ni (1 Tes. 5:15). Pa gácanu nachaʼhuiʼ guiráʼ ora la? zeeda gácanu casi ti bele ora nananda, ne ziuulaʼdxiʼ guiráʼ binni guidxaaga laanu.

¿Nuu tuuxa ndaaniʼ familia stinu o ndaaniʼ congregación ni ñecheʼ pa ñábinu laa xiixa diidxaʼ ni uguu gana laa la? Zándaca nuu tuuxa hermanu caquiiñeʼ gacanenu laa guiá patiu stiʼ, chisinu xiixa ni caquiiñeʼ o gúninu ti mandadu stiʼ. ¿Ximodo zanda gácanu nachaʼhuiʼ ra cayuni predicarnu yaʼ? Ra gacanenu tuuxa ni caquiiñeʼ ni.

Chinándanu ejemplu stiʼ Jehová ne gusihuínninu nácanu binni nachaʼhuiʼ pur ca ni gúninu ne ni guininu.