1. Mɛni nɔ mi mami nɛ wa ngɛ, nɛ mɛni he je?

 KE O hyɛ níhi nɛ ngɛ nɔ yae ngɛ je ɔ mi mwɔnɛ ɔ, anɛ e peeɔ mo kaa níhi be hie ligbi ko lo? Wa naa kaa suɔmi be weku li a kpɛti kaa be ko nɛ be ɔ. Nihi foɔ mɛ pɛ a nɔ́ mi, nɛ a peeɔ basabasa. E yeɔ ha nihi babauu kaa a maa ngɔ a hɛ kɛ fɔ nihi nɛ a hɛɛ blɔ nya a, a nɔ. Se ngɛ ní nɛ ɔmɛ nɛ ngɛ nɔ yae ɔ tsuo se ɔ, o ma nyɛ ma ná nɔ mi mami kaa níhi maa hi. Mɛni he je? Ejakaa bɔ nɛ Baiblo gbami ko nɛ sa kadimi ɔ tsɔɔ kaa nihi maa pee a ní ngɛ “nyagbe ligbi ɔmɛ” a mi ɔ, jã pɛpɛɛpɛ lɛ ngɛ nɔ yae ɔ nɛ. (2 Tim. 3:1-5) Ngɛ anɔkuale mi ɔ, nɔ ko nɔ ko be nɛ e ma de ke gbami nɛ ɔ bɛ mi lolo. Gbami nɛ ɔ nɛ ngɛ mi bae ɔ ji odase nɛ tsɔɔ kaa Kristo Yesu bɔni nɔ yemi kaa Mawu Matsɛ Yemi ɔ nya Matsɛ. Se gbamihi fuu nɛ kɔɔ Matsɛ Yemi ɔ he ɔ, a kpɛti kake pɛ ji nɛ ɔ nɛ. Ke wa susu gbami kpahi nɛ a ba mi lingmi nɛ ɔ he ɔ, e ma ha nɛ wa hemi kɛ yemi ɔ mi nɛ wa wawɛɛ.

2. Mɛni he wa ma susu ngɛ ní kasemi nɛ ɔ mi, nɛ mɛni he je? (Moo tu foni nɛ ngɛ womi ɔ hɛ mi ɔ he munyu.)

² Ngɛ ní kasemi nɛ ɔ mi ɔ, wa maa kase (1) gbami ko nɛ maa ye bua wɔ konɛ waa le be nɛ Matsɛ Yemi ɔ bɔni nɔ yemi, (2) gbamihi nɛ maa ye bua wɔ konɛ wa yɔse kaa Yesu ba pee Mawu Matsɛ Yemi ɔ nya Matsɛ ngɛ hiɔwe, kɛ (3) gbamihi nɛ tsɔɔ bɔ nɛ a ma kpata Mawu Matsɛ Yemi ɔ he nyɛli a hɛ mi ha. Kaa bɔ nɛ ke a poo foni ko mi tsɔwitsɔwi nɛ o to nya a,  o naa foni mluku ɔ saminya a, jã kɛ̃ nɛ gbami slɔɔtoslɔɔto nɛ ɔmɛ nɛ wa ma susu he ɔ maa ye bua wɔ konɛ waa na heii kaa e be kɛe nɛ nyagbe ɔ maa ba kaa bɔ nɛ Yehowa wo si ɔ.

3. Mɛni nɔ mi mami nɛ gbami nɛ ngɛ Daniel 7:13, 14 ɔ haa nɛ wa náa kɛ kɔ Mawu Matsɛ Yemi ɔ nya Matsɛ ɔ he?

³ Gbami nɛ ngɛ Daniel 7:13, 14 ɔ ha nɛ wa náa nɔ mi mami kaa Kristo Yesu ji nɔ nɛ sa kaa e peeɔ Mawu Matsɛ Yemi ɔ nya Matsɛ. Nihi nɛ a je je ma amɛ tsuo a mi ɔ kɛ bua jɔmi ma “sɔmɔ lɛ,” nɛ nɔ yelɔ kpa ko be e nane mi dae. Gbami kpa ko nɛ ngɛ Daniel womi ɔ mi ɔ tu be kpaago ko he munyu. Gbami nɛ ɔ tsɔɔ kaa ke jamɛ a be kpaago ɔ ba nyagbe ɔ, Yesu ma bɔni matsɛ yemi. Anɛ wa ma nyɛ maa le be nɛ Yesu ba pee Matsɛ ɔ lo?

4. Moo tsɔɔ bɔ nɛ Daniel 4:10-17 ɔ ha nɛ wa le jeha nɛ Kristo ba pee Matsɛ ɔ. (Hyɛ sisi ningma a hulɔ.)

⁴ Kane Daniel 4:10-17. ‘Be kpaago’ ɔ daa si kɛ ha jeha 2,520. Be nɛ ɔ je sisi ngɛ jeha 607 loko a fɔ Kristo. Jamɛ a jeha a nɛ Babilon bi ɔmɛ je nyagbe matsɛ nɛ e hi Yerusalem ɔ kɛ je Yehowa matsɛ sɛ ɔ nɔ ɔ nɛ. Be nɛ ɔ ba nyagbe ngɛ jeha 1914 ngɛ Kristo fɔmi se, benɛ Yehowa wo “nɔ nɛ e sa,” nɛ ji Yesu matsɛ ngɛ Mawu Matsɛ Yemi ɔ nya. *​—Eze. 21:25-27.

5. Kɛ gbami nɛ kɔɔ ‘be kpaago’ ɔ he ɔ maa ye bua wɔ ha kɛɛ?

⁵ Kɛ gbami nɛ ɔ maa ye bua wɔ ha kɛɛ? Ke wa nu gbami nɛ kɔɔ ‘be kpaago’ ɔ he ɔ sisi ɔ, e maa ye bua wɔ konɛ wa ná nɔ mi mami kaa Yehowa yeɔ e si womi ɔmɛ a nɔ ngɛ be nya. Yehowa to kaa e maa wo Yesu Matsɛ ngɛ be pɔtɛɛ ko mi. Nɛ benɛ jamɛ a a be ɔ su ɔ, e pee jã. Enɛ ɔ he ɔ, wa ngɛ nɔ mi mami kaa e ma ha e gbami kpahi nɛ piɛ ɔ hu maa ba mi ngɛ be nɛ e to ɔ nya. Ngɛ anɔkuale mi ɔ, Yehowa ligbi ɔ ‘be se kpɛe!’​—Hab. 2:3.

6. (a) Mɛni ngɛ nɔ yae ngɛ zugba a nɔ nɛ tsɔɔ kaa Kristo ngɛ matsɛ yee ngɛ hiɔwe? (b) Kɛ gbami nɛ ngɛ Kpo Jemi 6:2-8 ɔ maa enɛ ɔ nɔ mi ha kɛɛ?

⁶ Benɛ e piɛ bɔɔ nɛ Yesu maa gbe e sɔmɔmi ní tsumi ɔ nya ngɛ zugba a nɔ ɔ, e de e se nyɛɛli ɔmɛ ní komɛ nɛ maa ya nɔ nɛ maa ye bua mɛ konɛ a yɔse kaa e bɔni matsɛ yemi ngɛ hiɔwe. Níhi nɛ e wo ta a ekomɛ ji tahi nɛ maa ba, hwɔ kɛ zugba mimiɛmi. Yesu gba kɛ fɔ si hu kaa gbenɔ hiɔhi nɛ sãa nɔ “maa ba ngɛ he slɔɔtohi,” nɛ eko ji COVID-19 hiɔ ɔ nɛ e ba lingmi nɛ ɔ nɛ. Ní nɛ ɔmɛ nɛ ngɛ nɔ yae ɔ piɛɛ nɔ́ nɛ Baiblo ɔ tsɛɛ ke Kristo bami ɔ he “okadi” ɔ he. (Mat. 24:3, 7; Luka 21:7, 10, 11) Benɛ Yesu gbo nɛ e kpale kɛ ho hiɔwe ya a, maa pee jeha 60 se ɔ, e tsɔɔ bɔfo Yohane ní komɛ hu nɛ maa nɔ mi kaa ní nɛ ɔmɛ maa ba mi. (Kane Kpo Jemi 6:2-8.) Ní nɛ ɔmɛ tsuo ba mi kɛ je benɛ Yesu bɔni matsɛ yemi ngɛ jeha 1914 ɔ mi ɔ.

7. Mɛni he je nɛ ní yayamihi ngɛ nɔ yae ngɛ zugba a nɔ kɛ je benɛ Yesu bɔni matsɛ yemi ɔ?

⁷ Mɛni he je nɛ kɛ je benɛ Yesu bɔni matsɛ yemi ɔ, níhi puɛ kulaa ngɛ je ɔ mi ɔ? Kpo Jemi 6:2 ɔ tsɔɔ nɔ́ he je. Nɔ́ nɛ Yesu pee kekleekle be nɛ e ba pee Matsɛ ɔ ji kaa e hwu ta. E kɛ mɛnɔmɛ lɛ hwu ta a? E hwu ta kɛ si Abosiami kɛ e daimonio ɔmɛ. Kpo Jemi yi 12 ɔ bɔ amaniɛ kaa Yesu ye Satan kɛ  e daimonio ɔmɛ a nɔ kunimi ngɛ jamɛ a ta a mi, nɛ e sake mɛ kɛ fɔ zugba a nɔ. “Musu tloo je ɔ,” ejakaa Satan mi mi fu wawɛɛ, nɛ e kɛ e we abofu ɔ kple adesahi a nɔ.​—Kpoj. 12:7-12.

8. Kɛ gbamihi nɛ kɔɔ Matsɛ Yemi ɔ he nɛ wa na kaa a ngɛ mi bae ɔ maa ye bua wɔ ha kɛɛ?

⁸ Kɛ gbami nɛ ɔmɛ maa ye bua wɔ ha kɛɛ? Níhi nɛ ngɛ nɔ yae ngɛ je ɔ mi, kɛ su yayahi nɛ́ nihi ngɛ kpo jee ɔ ma ha nɛ wa yɔse kaa Yesu ba pee Matsɛ. E sɛ nɛ wa ha nɛ nihi nɛ a yi kpɛti wa, kɛ nihi nɛ a foɔ mɛ pɛ a nɔ́ mi ɔ a ní peepee nɛ wo wa mi mi la. Mohu ɔ, e sa nɛ lɔ ɔ nɛ kai wɔ kaa Baiblo gbami ngɛ mi bae. Amlɔ nɛ ɔ, Mawu Matsɛ Yemi ɔ ngɛ nɔ yee! (La 37:1) Benɛ wa ngɛ Hamagedɔn ta a he sue ɔ, e sa nɛ waa hyɛ blɔ kaa níhi ma puɛ ngɛ je ɔ mi pe bɔ nɛ e ngɛ amlɔ nɛ ɔ. (Maak. 13:8; 2 Tim. 3:13) Wa bua ja kaa wa hiɔwe Tsɛ nɛ e suɔ wɔ ɔ ye bua wɔ nɛ wa na nɔ́ he je nɛ nyagbahi fuu ngɛ je ɔ mi ɔ.

9. Kɛ gbami nɛ ngɛ Daniel 2:28, 31-35 ɔ kale nyagbe nɔ yemi ɔ ha kɛɛ, nɛ mɛni be nɛ e bɔni nɔ yemi?

⁹ Kane Daniel 2:28, 31-35. Wa na kaa gbami nɛ ɔ hu ngɛ mi bae mwɔnɛ ɔ. Nebukadnezar nlami ɔ tsɔɔ nɔ́ nɛ maa ba ngɛ ‘nyagbe be ɔ mi’ ke Kristo bɔni nɔ yemi ɔ se. Nyagbe nɔ yemi nɛ he wa wawɛɛ ngɛ je ɔ mi tsuo nɛ Baiblo ɔ gba kɛ fɔ si kaa e maa ba, nɛ ji amaga a “nanewɛɛhi nɛ a kɛ dade kɛ zu pee” ɔ piɛɛ Yesu he nyɛli ɔmɛ a he. Je ɔ mi nɔ yemi nɛ he wa nɛ ɔ lɛ ngɛ nɔ yee amlɔ nɛ ɔ nɛ. E bɔni nɔ yemi benɛ Britain kɛ United States pee kake ngɛ kekleekle je mi ta a mi ɔ. A tsɛɛ Britain kɛ United States a kake peemi ɔ ke Anglo-Amerika. Ke  e hí kulaa a, Nebukadnezar nlami nɛ kɔɔ amaga a he ɔ tsɔɔ níhi enyɔ nɛ ma ha nɛ je ɔ mi nɔ yemi nɛ he wa nɛ ɔ maa je ekpa ngɛ je ɔ mi nɔ yemihi nɛ a sɛ e hlami ɔ he.

10. (a) Mɛni wa naa ngɛ Anglo-Amerika nɔ yemi ɔ he nɛ Daniel gba kɛ fɔ si? (b) Mɛni e sa nɛ waa hyɛ saminya ngɛ he? (Hyɛ daka nɛ ji “ Moo Hyɛ O He Saminya Ngɛ Zu ɔ He!”)

¹⁰ Kekleekle ɔ, Anglo-Amerika nɔ yemi ɔ be kaa nɔ yemi nguahi nɛ a sɛ e hlami nɛ a kɛ sika tsu, sika hiɔ, akɔblee aloo dade sɔuu lɛ da si kɛ ha mɛ ɔ. Mohu ɔ, dade nɛ zu futu mi lɛ kadiɔ Anglo-Amerika nɔ yemi ɔ. Zu ɔ daa si kɛ ha “nimli gu ɔmɛ.” (Dan. 2:43, NW sisi ningma) Mwɔnɛ ɔ, wa na heii kaa Anglo-Amerika nɔ yemi ɔ nyɛ we nɛ e tsu e yi mi tomihi a he ní. Nɔ́ he je ji kaa nihi suɔ kaa a ma fã he blɔhi nɛ a ngɛ ɔ he, nɛ nihi babauu teɔ si kɛ woɔ blɔ nya tomi komɛ. Jehanɛ hu ɔ, ní tsuli peeɔ kake kɛ teɔ si kɛ woɔ ní tsumi blɔ nya tomihi nɛ́ a bua jɔɛ he, nɛ bɔ nɛ nihi peeɔ a ní ha ngɛ sɔ fɔmi he ɔ hu ha we nɛ e nyɛ nɛ e tsu e yi mi tomi ɔ he ní.

11. Ngɛ mɛni blɔ nɔ nɛ Anglo-Amerika nɛ ngɛ je ɔ nɔ yee amlɔ nɛ ɔ ha nɛ wa ná nɔ mi mami kaa wa ngɛ nyagbe be ɔ mi?

¹¹ Enyɔne, Anglo-Amerika nɔ yemi ɔ nɛ e daa si kɛ ha amaga kpetekpleenyɛ ɔ nane ɔ ji nyagbe nɔ yemi nɛ he wa wawɛɛ ngɛ je ɔ mi tsuo nɛ Baiblo ɔ gba kɛ fɔ si kaa e maa ba. Adesa nɔ yemi kpa ko be bae ngɛ e se. Mohu ɔ, e nyagbe maa ba ngɛ Hamagedɔn ta a mi benɛ Mawu Matsɛ Yemi ɔ ma kpata e kɛ adesahi nɔ yemi kpahi tsuo a hɛ mi ɔ. *​—Kpoj. 16:13, 14, 16; 19:19, 20.

12. Mɛni odase kpa lɛ ngɛ Daniel gbami ɔ mi nɛ woɔ wa bua nɛ e haa wa náa hɛ kɛ nɔ fɔmi?

¹² Kɛ gbami nɛ ɔ maa ye bua wɔ ha kɛɛ? Daniel gbami ɔ haa nɛ wa naa odase kpa nɛ maa nɔ mi kaa wa ngɛ nyagbe be ɔ mi. Daniel gba kɛ fɔ si jeha 2,500 kɛ se ji nɛ ɔ kaa ngɛ Babilon nɔ yemi ɔ se ɔ, je ɔ nɔ yemi kpahi eywiɛ nɛ a ngɛ he wami wawɛɛ maa pee níhi nɛ maa sa Mawu we bi a he. Jehanɛ hu ɔ, Daniel gbami ɔ tsɔɔ kaa ngɛ nɔ yemi nɛ ɔmɛ a kpɛti ɔ, Anglo-Amerika nɔ yemi ɔ lɛ maa pee nyagbe nɔ́. Enɛ ɔ woɔ wa bua nɛ wa náa hɛ kɛ nɔ fɔmi kaa e be kɛe nɛ Mawu Matsɛ Yemi ɔ ma ba kpata adesa nɔ yemihi tsuo a hɛ mi pɛsɛpɛsɛ, nɛ e maa ye zugba a tsuo nɔ.​—Dan. 2:44.

13. Mɛni nɛ “matsɛ kpaanyɔne” ɔ kɛ “matsɛmɛ nyɔngma” amɛ nɛ Kpo Jemi 17:9-12 ɔ tu a he munyu ɔ daa si kɛ ha, nɛ kɛ gbami nɛ ɔ ba mi ha kɛɛ?

¹³ Kane Kpo Jemi 17:9-12. Kekleekle je mi ta a puɛ ní wawɛɛ. Enɛ ɔ ha nɛ Baiblo gbami kpa ko hu nɛ kɔɔ nyagbe ligbi ɔmɛ a he ɔ ba mi. Je ɔ mi nɔ yeli ɔmɛ ngɛ a he mɔde bɔe kaa a ma ha nɛ tue mi jɔmi nɛ ba je ɔ mi tsuo. Enɛ ɔ he ɔ, a to Je Ma Amɛ A Somi ɔ sisi ngɛ January 1920 ɔ mi. Pee se ngɛ October 1945 ɔ mi ɔ, a ngɔ Je Ma Amɛ A Kake Peemi Kuu ɔ kɛ ba da Je Ma Amɛ A Somi ɔ nane mi. A tsɛɛ kuu nɛ ɔ ke “matsɛ kpaanyɔne.” Se tsa pi je ɔ mi nɔ yemihi nɛ a ngɛ he wami ɔ eko ji lɛ. E náa e he wami ɔ kɛ jeɔ je ɔ mi nɔ yemihi nɛ a fĩɔ e se ɔ a ngɔ. Baiblo ɔ tsɛɔ ma kudɔmi blɔ nya tomi nɛ ɔmɛ ke “matsɛmɛ nyɔngma.”

14-15. (a) Mɛni nɛ Kpo Jemi 17:3-5 ɔ ha nɛ wa le kɛ kɔ “Babilon Ngua a” he? (b) Mwɔnɛ ɔ, kɛ nihi nɛ a fĩɔ lakpa jami se ɔ peeɔ a ní ha kɛɛ?

¹⁴ Kane Kpo Jemi 17:3-5. Ngɛ nina ko nɛ Mawu je kɛ tsɔɔ bɔfo Yohane ɔ mi ɔ, e na tuutuu yo ko nɛ ji “Babilon Ngua a” nɛ daa si kɛ ha je ɔ mi lakpa jami ɔmɛ tsuo. Mɛni nɛ nina nɛ ɔ ha nɛ wa le? E ha nɛ wa le kaa lakpa jamihi kɛ je ɔ mi nɔ yemi ɔmɛ pee kake jehahi babauu jinɛ ɔ, nɛ a fĩɔ a se. Se e be kɛe nɛ Yehowa maa ngɔ kɛ wo nɔ  yeli ɔmɛ a tsui mi konɛ “a tsu e susumi ɔ he ní.” Mɛni maa je mi kɛ ba? Nɔ yeli ɔmɛ, nɛ ji “matsɛmɛ nyɔngma” amɛ ma tua lakpa jamihi tsuo nɛ ngɛ je ɔ mi ɔ, nɛ a ma kpata a hɛ mi.​—Kpoj. 17:1, 2, 16, 17.

¹⁵ Kɛ wa plɛ kɛ le kaa Babilon Ngua a nyagbe su si ta kɛɛ? Loko wa maa na sane bimi nɛ ɔ heto ɔ, e he hia nɛ wa kai kaa Yufrate Pa a bɔle blema Babilon ma a, nɛ e po ma a he piɛ ngɛ blɔ ko nɔ. Kpo Jemi womi ɔ ngɔ nihi ayɔhi abɔ nɛ a fĩɔ Babilon Ngua a se ɔ kɛ to “nyu” nɛ poɔ nɔ he piɛ he. (Kpoj. 17:15) Jehanɛ se hu gbami ɔ ha nɛ wa náa kaa nyu ɔ ‘maa mii,’ nɛ tsɔɔ kaa nihi fuu nɛ a fiɔ je ɔ lakpa jami tsuo se ɔ ma kpa a se fĩmi. (Kpoj. 16:12) Mwɔnɛ ɔ, gbami nɛ ɔ ngɛ mi bae ejakaa nihi babauu je lakpa jami mi, nɛ a ngɔ a hɛ kɛ tsɔɔ he kpahi kɛ ha a nyagba amɛ a nya tsaba.

16. Ke wa nu gbamihi nɛ kɔɔ be nɛ a to Je Ma Amɛ A Kake Peemi Kuu ɔ sisi kɛ Babilon Ngua a hɛ mi kpatami ɔ sisi saminya a, kɛ e maa ye bua wɔ ha kɛɛ?

¹⁶ Kɛ gbami nɛ ɔmɛ maa ye bua wɔ ha kɛɛ? Kɛ je benɛ a to Je Ma Amɛ A Kake Peemi Kuu ɔ sisi ɔ, nihi babauu fĩ we lakpa jami se hu nɛ lɔ ɔ ha nɛ wa náa odase nɛ tsɔɔ kaa wa ngɛ nyagbe ligbi ɔmɛ a mi. E ngɛ mi kaa  nihi babauu fĩ we Babilon Ngua a se mohu lɛɛ, se tsa pi lɔ ɔ nɛ ma ha nɛ lakpa jami blɔ nya tomi ɔ maa ba nyagbe. Kaa bɔ nɛ wa na kɛ sɛ hlami ɔ, Yehowa kɛ maa wo “matsɛmɛ nyɔgma” amɛ nɛ a daa si kɛ ha je ɔ mi nɔ yemi ɔmɛ nɛ a fĩɔ Je Ma Amɛ A Kake Peemi Kuu ɔ se ɔ nɛ “a tsu e susumi ɔ he ní.” Lakpa jami ɔmɛ a hɛ mi kpatami ɔ maa ba tlukaa, nɛ lɔ ɔ maa pee je ɔ nyakpɛ. * (Kpoj. 18:8-10) Babilon Ngua a hɛ mi kpatami ɔ maa sa je ɔ tsuo he, nɛ lɔ ɔ ma ha nɛ níhi a mi maa wa, se Mawu we bi lɛɛ, yi mi tomi enyɔ komɛ a he je ɔ, a bua maa jɔ. Babilon Ngua a, nɛ ji Yehowa Mawu he nyɛlɔ nɛ ngɛ kɛ je blema a be si hie hu, se wɔ lɛɛ, e be kɛe nɛ a ma he wa yi wami ngɛ je yaya nɛ ɔ mi!​—Luka 21:28.

17-18. (a) Mɛni wa ma nyɛ maa pee konɛ wa hemi kɛ yemi ɔ mi nɛ wa daa? (b) Mɛni he wa ma susu ngɛ ní kasemi nɛ nyɛɛ se ɔ mi?

¹⁷ Daniel gba kɛ fɔ si kaa “anɔkuale nile ɔ maa hiɛ,” nɛ e ba mi jã hulɔ! Amlɔ nɛ ɔ, wa nu gbamihi nɛ kɔɔ be nɛ wa ngɛ mi ɔ he ɔ sisi saminya. (Dan. 12:4, 9, 10) Gbami nɛ ɔmɛ nɛ a ba mi pɛpɛɛpɛ ɔ ha nɛ wa na bumi nɛ mi kuɔ kɛ ha Yehowa kɛ e Munyu nɛ e je mumi mi ɔ. (Yes. 46:10; 55:11) Lɔ ɔ he ɔ, yaa nɔ nɛ o kase Ngmami ɔ, nɛ o ye bua nihi konɛ a kɛ Yehowa nɛ ná huɛ bɔmi kpakpa. Enɛ ɔ ma ha nɛ o hemi kɛ yemi ɔ mi maa wa. Yehowa maa po nihi tsuo nɛ a ngɔɔ a hɛ kɛ fɔɔ e nɔ kulaa a, a he piɛ, nɛ e ma ha nɛ a ná ‘tue mi jɔmi daa.’​—Yes. 26:3.

¹⁸ Ngɛ ní kasemi nɛ nyɛɛ se ɔ mi ɔ, wa ma susu gbamihi nɛ kɔɔ Kristofohi asafo ɔ he nɛ maa ba mi ngɛ nyagbe be nɛ ɔ mi ɔ he. Wa maa kase kaa gbami nɛ ɔmɛ hu maa nɔ mi kaa wa ngɛ nyagbe ligbi ɔmɛ a mi. Jehanɛ hu ɔ, wa maa na odase kpahi nɛ tsɔɔ kaa Yesu nɛ amlɔ nɛ ɔ, e ji wa Matsɛ ɔ ngɛ e se nyɛɛli anɔkualetsɛmɛ a hɛ mi nyɛɛe.