1. Бис неге алаҥзыбас аргалу? Нениҥ учун?

 БӰГӰНГИ телекейдеги айалганы кӧрзӧӧр, удабас јӱрӱм јакшы јанындӧӧн солынар деп сананарга кӱч болот по? Улустыҥ кылык-јаҥы там ла ӱрелип барат. Билелердиҥ кӱчтери оноҥ кӧп болуп калган. Кезик улуска ороонныҥ јаҥдарына бӱдерге кӱч. Је мындый айалга јӱрӱм удабас ла јакшы јанындӧӧн солынар деп, биске кере болот. Нениҥ учун? Нениҥ учун дезе улустыҥ кылык-јаҥы «калганчы кӱндер» керегинде судурга сӱреен келижет (2 Тим. 3:1—5). Бӱгӱнги айалганы јазап сананган кижи бис шак ла калганчы кӱндер керегинде бӱдӱп јаткан судурлардыҥ ӧйинде јадып турганыска јӧпсинбес аргазы јок. Айдарда, бу судурлар бӱдӱп турган болордо, бӱгӱнги ле кӱнде Иисус Христос Кудайдыҥ Каандыгыныҥ Кааны болуп калганына алаҥзыбай јадыс. Бис бу јӧрмӧлдӧ калганчы јылдарда база кандый судурлар бӱткенин кӧрӧлӧ, бӱдӱмјибисти тыҥыдып аларыс.

2. Бу јӧрмӧлдӧ бис нени кӧрӧрис, нениҥ учун? (Кадарындагы јурукты кӧрӱгер.)

² Бу јӧрмӧлдӧ кӧрӱлетен судурлар мындый сурактардыҥ карууларын билип аларга болужар: 1) Кудайдыҥ Каандыгы качан башкарып баштаган? 2) Иисус эм тургуза теҥериде башкарып турган ба? 3) Кудайдыҥ ӧштӱлери уйатка канайып тӱжӱп калар? Бу судурлар пазл чылап  бир јурук этире јуула берзе, бис Кудайдыҥ кӧзинде, тӱӱкиликтиҥ кандый ӧйинде јадып турганысты билип аларыс.

3. Даниил 7:13, 14-тӧ кандый судур айдылган?

³ Даниил 7:13, 14-тӧги судурла болзо, Кудайдыҥ Каандыгында Каан болуп јӱк ле Иисус Христос башкарар аргалу. Ого «ончо албатылар» сӱӱнип иштеер. Оны кем де солыбас. Даниилдиҥ ӧскӧ судурларын кӧрзӧӧс, Иисус Христос Каан болуп, јети ӧй ӧткӧн кийнинде отурар. Бу судур качан бӱдер учурлу болгонын билип алатан арга бар ба?

4. Даниил 4:10—17-деги судур Иисус кандый јылда Каан болуп отурганын чотоп аларга канайып болужат? (Сносканы база кӧрӱгер.)

⁴ Даниил 4:10—17 кычырыгар. «Јети ӧй» 2 520 јылдаҥ турат. Бу ӧй дезе б. э. озо 607 јылда башталган. Качан Иегованыҥ јердеги тургускан калганчы каанын Вавилонныҥ черӱзи јуулап аларда. А божогон ӧйи дезе, б. э. 1914 јылы, качан Иегова бойыныҥ Каандыгына Каан болуп отуратан јаҥду Иисусты тургузарда (Иез. 21:25—27) *.

5. «Јети ӧй» керегинде судурды нениҥ учун оҥдоор керек?

⁵ Бу судурды биске нениҥ учун оҥдоор керек? Бис «јети ӧй» керегинде судурдаҥ Иегова айткан сӧзин ӧйи-ӧйинде бӱдӱрип салар деп бӱдӱмјиленип јадыс. Кудай Каандыктыҥ башкарар ӧйин тургузып саларда, оныҥ ӧскӧ дӧ судурлары ӧйинде бӱдӱп калар. Бис алаҥзыбай јадыс: Иегованыҥ ӧйи бир де «оройтыбас» (Авв. 2:3).

6. а) Иисус теҥериде башкарып турганыныҥ кандый керелерин кӧрӧдис? б) Ачылта 6:2—8-теги судур Иисустыҥ озогы айткан судурлары бӱдӱп калар деп канайып кӧргӱзет?

⁶ Иисус јердеги ижин божодордоҥ озо сӱрекей аҥылу судурлар айдып салган. Бу судурлардыҥ болужыла Иисустыҥ ӱренчиктери Иисус теҥериде каан болуп башкарганын оҥдоп ийер эди. Иисус башкарып баштаза, јердиҥ ӱстинде, темдектезе, јуу-согуштар, торолош, јер-силкиништер болор керек болгон. Анайда ок эпидемиялар болор деген. Бис мыны COVID-19-таҥ јакшы кӧрдис. Бу судурлардыҥ бӱдӱп турганынаҥ Иисус эмдиги ӧйдӧ теҥериде башкарып турганын јарт кӧрӱп јадыс (Матф. 24:3, 7; Лука 21:7, 10, 11). Бу судурлар ӱзе бӱдер деп, Иисус бойыныҥ божогонынаҥ ала 60 јыл кире ӧдӧрдӧ, апостол Иоаннга кӧрӱлте кӧргӱскен. (Ачылта 6:2—8 кычырыгар.) Мыны бис 1914 јылдаҥ ала, Иисус Каан болуп башкарганынаҥ ала, кӧрӧдис.

7. Нениҥ учун Иисус башкарып баштаарда ла јердиҥ ӱстинде шыра болуп јат?

⁷ Нениҥ учун Иисус Каан болуп каларда јердиҥ ӱстинде айалга коркышту коомойтый берген? Нениҥ учун дезе Ачылта 6:2-де јаан јетирӱ бар. Иисус Каан болуп отура берерде, озо ло баштап Сатана ла оныҥ кӧрмӧстӧриле јуулашкан. Оноҥ ары Ачылтаныҥ 12-чи бажалыгында Иисус Сатананы ла оныҥ кӧрмӧстӧрин јеҥип, јердӧӧн таштап ийген. Оноҥ улам Сатана Дьявол оноҥ тыҥ атыйланып, бастыра ачу-коронын улуска тӱжӱрген. Оныҥ учун бастыра јердиҥ ӱстинде албаты-јон кыйын-шырага ла ачу-коронго алдырткан (Ачыл. 12:7—12).

8. Каандык керегинде судурлар бистиҥ ӧйдӧ бӱдӱп турган деп, нениҥ учун оҥдоп турар керек?

 ⁸ Бу судурларды биске нениҥ учун оҥдоор керек? Јердеги айалга там ла коомойтыганынаҥ ла улустыҥ кылык-јаҥы чек ӱрелгенинеҥ Иисус Каан болуп отурганын јарт кӧрӱп јадыс. Је улус јаҥыс бойын сӱӱп, кату-калју болуп калганынаҥ улам кезикте санааркай бередис. Кандый да болзо, јакшы солун бар — улус андый керектериле библиялык судурларды бӱдӱрет! Кудайдыҥ Каандыгы шак ла эмдиги ӧйдӧ башкарып турган! (Сар. 37:1). Оныҥ учун Армагеддон јууктаган сайын, јердиҥ ӱстиндеги айалга там ла катуланып барар (Марк 13:8; 2 Тим. 3:13). Је теҥеридеги Адабыс, јердиҥ ӱстинде айалга там ла нениҥ учун коомойтып баратканын оҥдоп турарга болужып бергенине јаан быйанысты айдадыс.

9. Даниил 2:28, 31—35 калганчы телекейлик держава керегинде нени айдат? Бу держава качан чыгып келген?

⁹ Даниил 2:28, 31—35 кычырыгар. Бу судурдыҥ бӱдӱп јатканын бис кӧрӱп јадыс. «Кудай Навуходоносор каанга калганчы кӱндерде не болорын ачып берген». А калганчы кӱндер дезе, Иисус Христос Каан болуп баштаганынаҥ ала башталган. Иисустыҥ ӧштӱлериниҥ бирӱзи — Агару Бичикте судурлалган калганчы телекейлик держава болот. Бу держава бӱгӱнги ле кӱнде башкарып јат. Ол јаан чалуныҥ шагайынаҥ ала таманына јетире «темирдеҥ ле той балкаштаҥ» турган этире кӧргӱзилген. Бу держава, Великобритания ла США. Ол баштапкы телекейлик јуу-согуштаҥ чыгып келген. Нениҥ учун дезе олор ол ӧйдӧ јуук колбуларлу  болгон. Навуходоносордыҥ тӱжин кӧрзӧӧс, бу держава озогы державалардаҥ эки немеде аҥыланып турганын кӧрӧдис.

10. а) Даниилдиҥ судурында чике ле Великобритания ла США-ныҥ державазы айдылган деп, нениҥ учун айдарга јараар? б) Бис неде ајарыҥкай болор учурлу? ( «Ајарыҥкай болугар: той балкаш!» деген рамканы кӧрӱгер.)

¹⁰ Баштапкызында, калганчы телекейлик держава, Великобритания ла США, озогы телекейлик державаларга кӧрӧ, ару мӧҥӱннеҥ ле алтыннаҥ эмес, је кошмоктоп салган темир ле той балкаштаҥ турган. Той балкаш — тегин ле албаты-јон (Дан. 2:43). Олор талдаштарда туружат, профсоюзтар тӧзӧйт, тӱймеен кӧдӱргилейт, анайда ок гражданский праволор учун тартыжат. Оноҥ улам бу телекейлик державаныҥ ийде-кӱчи ас болуп, политиказын јетире бӱдӱрип болбой јат.

11. Великобритания ла США калганчы телекейлик держава болуп башкарып турганы, бис калганчы ӧйлӧрдӧ јадып турганыс деп канай керелейт?

¹¹ Экинчизинде, Великобритания ла США бу јаан чалуныҥ шагайынаҥ ала таманына јетире тужын темдектеп турган болордо, Агару Бичикте айдылганыла болзо, бу калганчы держава. Олордыҥ кийнинеҥ кижиниҥ башкарузы база болбос. Удабас ла Иегова Кудай бу державаны ла оноҥ до ӧскӧ башкаруларды Армагеддондо бир ле уунда јоголтып койор (Ачыл. 16:13, 14, 16; 19:19, 20) *.

12. Даниилдиҥ судуры бис калганчы ӧйдӧ јадып турганыс деп канайып керелейт? Бу биске нениҥ учун токунал ла ижемји берет?

¹² Бу судурды биске нениҥ учун оҥдоор керек? Даниилдиҥ судурыла болзо, бис калганчы кӱндерде јадып турганыс деп кӧргӱзип турган, база бир кере бар. 2 500 јыл кире кайра судурлалганыла, Кудайдыҥ албатызы база да тӧрт телекейлик державаныҥ башкарган ӧйинде јадар. Калганчызы — Англо-Американыҥ телекейлик державазы. Оныҥ учун Кудайдыҥ Каандыгы улустыҥ бастыра башкаруларын јоголтып, бастыра јаҥды бойыныҥ колына алар деп, бир де алаҥзыбай бӱдӱп јадыс (Дан. 2:44).

13. Ачылта 17:9—12-де «сегизинчи каан» ла «он каан» нени темдектейт? Ондо айдылган судур канайып бӱдӱп јат?

¹³ Ачылта 17:9—12 кычырыгар, ЈТ. Баштапкы телекейлик јууныҥ јайрадузы калганчы кӱндер керегинде база бир судурдыҥ бӱткенине экелген. Политиканыҥ башчылары бастыра телекейдиҥ ӱстине амыр-энчӱ эдерге кӱӱнзеген. Оныҥ учун чаган айда, 1920 јылда Лига Наций тӧзӧгилеген. Бу 1945 јылдыҥ ӱлӱрген айында Организация Объединённых Наций боло берген. Бу организация Агару Бичикте «сегизинчи каан» деп адалат. Је бу телекейлик держава эмес. Бу организация башкарулардыҥ јӧмӧлтӧзинеҥ улам турган. Бу башкарулар Агару Бичикте «он каан» деп сӱрлеп адалат.

14, 15. а) Ачылта 17:3—5-те «Улу Вавилон» керегинде не айдылат? б) Тӧгӱн кудай јаҥныҥ улузы нени эдет?

¹⁴ Ачылта 17:3—5 кычырыгар, ЈТ. Кудай апостол Иоаннга кӧрӱлтеде балыр ӱй кижи кӧргӱскен. Ол ӱй кижи «Улу Вавилон» болот. «Улу Вавилон» дезе бастыра телекейлик тӧгӱн кудай јаҥдардыҥ империязын темдектейт. Бу судур канайып бӱдет? Тӧгӱн кудай јаҥ алдынаҥ ла бери телекейлик политический башчыларла кожо бир санаалу јӱрет. Ол дезе олордыҥ сананып тапкан кандый ла керектерине алкыжын берет. Је удабас  Иегова олорго «Бойыныҥ табын бӱдӱрер кӱӱн» салар. Бу ӱзе неме неге экелер? Ол башкарулар эмезе «он каан», тӧгӱн кудай јаҥга табару эдип, оны јоголтып салар (Ачыл. 17:1, 2, 16, 17).

¹⁵ Улу Вавилонныҥ учы јууктап келген деп, бис кайдаҥ билерис? Бу керегинде тӱӱкини эске алып ийектер. Јебрен Вавилонныҥ кезик јерлерин Евфрат суу корулап турган болгон. Ачылта деп бичикте канча миллион улус Улу Вавилонго кирип турганын корулап турган сууга тӱҥейлештирилет (Ачыл. 17:15). Је бу суу соолып калар деп судурлалган. Ӧскӧртӧ айтса, бастыра телекейлик тӧгӱн кудай јаҥныҥ империязы кӧп улузын јылыйтар дегени (Ачыл. 16:12). Бӱгӱнги кӱнде бу судур бӱдӱп јат. Нениҥ учун дезе кӧп улус бойлорыныҥ сурактарыныҥ каруузын таппай, бу тӧгӱн кудай јаҥнаҥ чыгып јадылар.

16. ООН-ныҥ тӧзӧлгӧни керегинде ле Улу Вавилонныҥ јоголоры керегинде судурларды биске нениҥ учун билип турар керек?

¹⁶ Бу судурларды биске нениҥ учун оҥдоор керек? ООН-ныҥ тӧзӧлгӧнинеҥ ле тӧгӱн кудай јаҥнаҥ кӧп улус јӱрӱп турганынаҥ бис калганчы кӱндерде јададыс  деп, база ла катап кӧрӱп јадыс. Је Вавилонды корулап турган сӱрлеп айдылган суулар кургап та турган болзо, тӧгӱн кудай јаҥ ӧскӧ шылтактаҥ улам јоголор. Байа кӧргӧнисле ол дезе Иегова ООН-го јӧмӧжип турган «он каанга», ӧскӧртӧ айтса политический башчыларга, «Бойыныҥ табын бӱдӱрер кӱӱн» берер. Мынаҥ улам олор тӧгӱн кудай јаҥды јоголтып салар. Андый јоголтыш бастыра јердиҥ ӱстинде улуска сакыбаган јанынаҥ болор. Бу јердиҥ ӱстине кӧп кыйын-шыра экелер (Ачыл. 18:8—10) *. Је Кудайдыҥ албатызында, ас ла салза, сӱӱнетен эки шылтак бар. Баштапкызы — Кудайдыҥ алдынаҥ ла бери болгон ӧштӱзи јоголтылар. Экинчизи — бу калју телекейдеҥ аргаданатан кӱнге јетире узак артпаган! (Лука 21:28).

17, 18. а) Бис оноҥ ло ары бӱдӱмјибисти канайып тыҥыдарыс? б) Келер јӧрмӧлдӧ нени кӧрӧрис?

¹⁷ Даниил озолондыра: «Чындык оноҥ јарт ачылар» — деп айткан. Бис мыны бойыстыҥ кӧзисле кӧрӱп јадыс. Бу судурлар сыраҥай ла бистиҥ ӧйдӧ бӱдӱп турганын оҥдоп јадыс (Дан. 12:4, 9, 10). Бу судурлардыҥ чике бӱдӱп турганын кӧрӱп, Иегова Кудайысты ла оныҥ Сӧзин макка чыгарар кӱӱнис келет (Иса. 46:10; 55:11). Оныҥ учун биске оноҥ ло ары бӱдӱмјибисти тыҥыдар керек! Мыны канайып эдер? Биске Агару Бичикти тереҥжиде шиҥдеер керек. Анайда ок улусты Кудайга најы болзын деп, јууктада таныштырарга болужарыс. Ол бастыра јӱрегинеҥ ого иженип турган улусты корулаар да, «бир де тӱгенбейтен амыр-энчӱ» де берер (Иса. 26:3).

¹⁸ Келер јӧрмӧлдӧ христиан јуунныҥ калганчы кӱндерде эдип турган ижи керегинде судурлар кӧрӱп ийерис. Бу судурлар ла калганчы кӱндер керегинде судурлар бир јурук боло бергенин кӧрӧрис. Анайда ок Иисус, бистиҥ башкарып турган Кааныбыс, бойыныҥ чындык ишчилерин апарып јаткан деп, оноҥ кӧп керелер билип аларыс.