1. ¿Kuna toqetsa jan payachasktan, ukat kunatsa?

 KUNA jan walinakatï akapachan pasaski ukanak uñjasajja, jutïrin ukanakajj askichasjjaniwa sasin creyiñajj ¿jumatak chʼamakiti? Walja familianakajj janiw nayrjam munasjjapjjeti. Jilaparte jaqenakajj jukʼamp nuwasiri, jupanak pachpatak llakisiri, chʼajjwiri ukhamäjjapjjewa. Waljanitakejja autoridadanïpki ukanakar confiyañajj chʼamawa. Ukampis taqe ukanakajja, jutïrin taqe kunas askichasjjaniwa sasin confiyañatakiw yanaptʼistaspa. ¿Kunatsa ukham sistanjja? ‘Qhepa urunakat’ Biblian parlki uka profeciarjamaw jaqenakajj sarnaqasipki (2 Tim. 3:1-5). Uka profecian phoqasitapajja, Jesucristojj Diosan Reinopan Reyjam apnaqjjatapwa uñachtʼayistu. Suma chuyman jaqenakat janiw khitis “ukajj janiw phoqaskiti” sasin siskaspati. Ukampis Reino toqet parlir jukʼamp profecianakaw utji. Jichhajja aka qhepa tiemponakan phoqasiwayki uka yaqha profecianakatwa yatjjataskañäni, ukanakaw Diosar jukʼamp confiyañatak yanaptʼistani.

2. ¿Kunanakatsa aka yatichäwin yatjjataskañäni, ukat kunatsa? (Nayrïr paginankir dibujot qhanañchtʼam).

² Aka yatichäwinjja, aka kimsa toqenakatwa yatjjataskañäni: maya, mä profeciaw kunapachas Diosan Reinopajj apnaqañ qalltjje uk amuytʼañatakejj yanaptʼistu. Paya, mä qhawqha profecianakaw Jesusajj Diosan Reinopan Reyjam alajjpachan apnaqjjatap amuytʼañatak yanaptʼistu. Kimsa, Diosan Reinopan enemigonakapajj kunjam tʼunjatäpjjanisa uk qhanañchir profecianaka. Taqe uka profecianakajja, mä rompecabezan partenakapjamaw armthapisi, ukanakaw Jehová Diosan horariopan kuna tiemponsa jakasktan uk amuyañatak yanaptʼistani.

3. Daniel 7:13, 14 textonkir profeciajja, ¿Diosan Reinopan apnaqeri Reyit kamsistusa?

³ Daniel 7:13, 14 ukan jikjjataski uka profeciajja, Jesucristojj Diosan Reinopan wali suma apnaqerïniwa sasaw qhanañchi. Taqe markanakankir jaqenakajj taqe chuymaw jupar servipjjani, jupa lanti apnaqerejj janiw yaqhajj utjkaniti sasaw qhanañcharaki. ¿Kunapachas Jesusajj apnaqañ qalltañapäna? Daniel libron yaqha profeciaparjamajja, paqallq tiemponakat parlir profecía tukuyaruw Jesusajj apnaqañ qalltañapäna. Kunapachas uka profeciajj phoqasïna uk jichhajj yatjjatañäni.

4. Kuna maransa Jesusajj apnaqañ qalltañapäna uk yatiñatakejja, ¿kunjamsa Daniel 4:10-17 textojj yanaptʼistu? (Nota liytʼarakïta).

⁴ (Daniel 4:10-17 liytʼäta). ‘Paqallqo tiemponakajja’, 2.520 maranakamp sasiwa. Uka tiemponakajj 607 antes de Cristo maranwa qalltäna. Uka maranwa Jehová Diosan tronopajj Jerusalén markankkäna, uka tronon qontʼatäkarakïna uka qhepïr reyirojj babilonionakajj reyïñat apaqapjjäna. Ukatjja ‘paqallqo tiemponakajj’ 1914 maranwa tukuyjjäna, uka maranwa Diosajj Reinopan Reyïñapatak Jesusar uttʼayäna, jupaw ‘gobernañatak derechoni’ (Ezeq. 21:25-27). b

5. ¿‘Paqallqo tiemponakat’ parlir profeciat sum amuyañajj kunjamsa yanaptʼistu?

⁵ ¿Kunjamsa uka profeciajj yanaptʼistu? ‘Paqallqo tiemponakat’ parlir profeciat sum amuyañajja, Jehová Diosajj promesanakap horasarupuniw phoqe sasin confiyañatakiw yanaptʼistu. Kuna horasas Reinop uttʼayañapäna uk jupaw sum amtjjäna. Uka horasajj purinjjäna ukhasti, amtaparjamapuniw luräna. Phoqasiñapajj faltki uka mayni profecianakjja, amtawayki uka horasaruw phoqasiyarakini. Ukhamajj Jehová Diosan urupajj “janiw qheptʼankaniti” (Hab. 2:3).

6. 1) ¿Jesucristojj alajjpachan apnaqjjatap kunjamatsa yattanjja? 2) Apocalipsis 6:2-8 texton parlki uka profeciajj ¿kunjamsa uk uñachtʼayi?

⁶ Jesusajj aka oraqen qhep qhepa urunak yatiykäna ukhajja, alajjpachan apnaqañ qalltjjañapäna ukhajj kunanakatï oraqpachan pasañapäkäna ukanakatwa discipulonakapar parläna, ukhamatwa Jesusan apnaqjjatap yatipjjaspäna. Jupajj guerranakata, manqʼat pistʼañanakata, terremotonakatwa parläna. Jan wali usunakas ‘ukjan akjanwa’ utjani sarakïnwa, ukanakat mayajj COVID-19 usuwa. Taqe ukanakajja, Cristojj kuttʼankani ukhajj kuna señalanakatï pasañapäkäna ukanakawa, ukanakat Biblianwa parli (Mat. 24:3, 7; Luc. 21:7, 10, 11). Jiwatapatsa alajjpachar kuttʼatapats 60 jila maranak pasjjäna ukhajja, taqe ukanakan pasañapätapwa Jesusajj apóstol Juanar yatiyäna (Apocalipsis 6:2-8 liytʼäta). Taqe uka jan walinakajja, Jesusajj 1914 maran alajjpachan Reyit uttʼayatäjjäna ukhat aksaruw utjawayi.

7. Jesusajj alajjpachan apnaqañ qalltjjäna ukhajja, ¿kunatsa aka oraqen walja jan walinakajj utjawayi?

⁷ Jesusajj alajjpachan Reyjam apnaqañ qalltjjäna ukhajja, ¿kunatsa aka oraqen jan walinakajj jukʼamp jiljjattawayi? Apocalipsis 6:2 textow uk amuytʼañatak yanaptʼistu. Machaq Reyjamajja, Jesusajj mä guerranwa nuwasïna. Jupajj Supayampi demonionakapampiw nuwasïna. Apocalipsis 12 capitulorjamajja, Supayajj atipjataw uñjasïna. Jupasa demonionakapas oraqer jaqoqanitäpjjarakïnwa. Niyakejjay ukajj Supayar wal coleraychïnjja, jaqenakar jan  waltʼayañwa qalltäna. Ukatwa Bibliajj akham sasin qhanañchi: “Oraqetsa lamar qotatsa ¡ay kunakïkani!” sasa (Apoc. 12:7-12).

8. ¿Reino toqet parlir profecianak phoqasiskatap uñjañajj kunjamsa yanaptʼistu?

⁸ ¿Kunjamsa uka profecianakajj yanaptʼistu? Kunanakatï akapachan pasaski ukanakasa, jichha tiempon jaqenakajj kunjamäjjapjjesa ukasa, Jesusajj Reyëjjatapwa uñachtʼayistu. Ukatwa wali uñisiri, jupanakan askipak thaqeri jaqenakar uñjasajj jan llakisktanti. Jaqenakan ukhamäpjjatapajja, Biblian profeciap phoqasitapwa amuyayistu. Ukhamajja Diosan Reinopan apnaqjjatapajj qhanaw amuyasi (Sal. 37:1). Armagedón uru jakʼachasinkipanjja, aka oraqen jukʼamp jan walinakaw utjani (Mar. 13:8; 2 Tim. 3:13). Alajjpachankir Awkisajj wal munasistu, kunatsa aka jan wali tiempon jakasktan uk amuyañatakis yanaptʼarakistuwa, ukatwa Diosar wal yuspärtanjja.

9. Daniel 2:28, 31-35 textonkir profeciajja, ¿kamsis qhepïr potencia mundialatjja, ukat kunapachas ukajj uñstäna?

⁹ (Daniel 2:28, 31-35 liytʼäta). Jichha tiemponjja uka profecía phoqasirwa uñjasktanjja. Nabucodonosor reyejja, kunatï “tukuy urunakan” pasañapäkäna ukwa mä samkan uñjäna, mä arunjja Jesusajj apnaqañ qalltjjañapäna uka qhepat kunas pasañapäna ukwa uñjäna. Jesusan aka oraqenkir enemigonakapat maynejj Biblian parlki uka qhep qhepa potencia mundialäñapänwa. Uka potenciajja, jachʼa estatuan ‘hierrompit ñeqʼempit lurat kayunakapampi’ sasiwa, ukajj jichha tiempon utj-jjewa. Primera Guerra Mundialan Reino Unido ukat Estados Unidos markanakajj mayachtʼasipjjäna ukhaw uka potencia mundialajj uñstäna. Nabucodonosor reyejj samkan  uñjkäna uka estatuajja, uka potencia mundialajj kunansa nayra potencia mundialanakat sipans mayjäñapäna ukwa pä toqet qhanañchi.

10. 1) Danielan profeciaparjamajja, ¿Reino Unido ukat Estados Unidos mayachtʼat potencia mundialajj kunjamasa? 2) ¿Kuna toqetsa amuyasiñasa? (“ ¡Ñeqʼet amuyasipjjam!” sat recuadro liytʼäta).

¹⁰ Reino Unido ukat Estados Unidos mayachtʼat potencia mundialajj kunansa mayni potencia mundialanakat mayjäna uk mä toqet uñjañäni. Nabucodonosor reyejj samkapan uñjkäna uka mayni potencia mundialanakat sipansa, aka qhepïr potencia mundialajj janiw qori mayataksa ni qollqe mayataksa luratäkänti, jan ukasti hierrompit ñeqʼempit luratänwa. Ñeqʼejja “jaqenakan wawanakapamp” sasiwa, mä arunjja jilaparte jaqenakamp sasiwa (Dan. 2:43, nota). Uka potencia mundialajj kunanaktï lurañ amtki ukanak janiw phoqañ puedkiti. Kuna laykutejj jaqenakajj eleccionanak lurasa, derechos humanos uk utjañapatak campañanak lurasa, jan ukajj marchasaw jarkʼapjje. Sindicatonak toqes jarkʼapjjarakiwa.

11. Qhep qhepa urunakanwa jakasktanjja sasin sañatakejj ¿kun yatiñas yanaptʼistu?

¹¹ Payïr toqetjja uka potencia mundialajj jachʼa estatuan kayunakapampi sasiwa. Reino Unido ukat Estados Unidos mayachtʼat potencia mundialajj Biblian parlki uka qhep qhepa potencia mundialawa. Ukhamasti uka potencia mundial qhepat janiw yaqhajj utj-jjaniti. Uka potencia mundialarusa, jaqenakan gobiernonakaparus Diosan Reinopaw Armagedonan jankʼaki qʼal tukjani (Apoc. 16:13, 14, 16; 19:19, 20). c

12. ¿Kunanakampsa Danielan profeciapajj qhanañchistu, ukat kunatsa ukajj chuymachtʼistu mä suytʼäwi churarakistu?

¹² ¿Kunjamsa uka profeciajj yanaptʼistu? Danielan profeciapajja, qhep qhepa urunakan jakaskataswa jukʼamp qhanañchistu. 2.500 jila maranak nayrajja, Babilonia markajj tʼunjatäjjani uka qhepat yaqha pusi potencia mundialanakaw Diosan markapar jan waltʼayapjjani sasaw Danielajj mä profecian arsüna. Ukatjja Reino Unido ukat Estados Unidos mayachtʼat markanakaw qhepïri potencia mundialäni sasaw qhanañchäna. Uk yatiñajj wal chuymachtʼistu, mä suytʼäwi churarakistu, kuna laykutejj Diosan Reinopajj niyaw jaqenakan gobiernonakapar jan mayampitak tʼunjani, ukat Diosan Reinopakiw aka oraq apnaqjjani (Dan. 2:44).

13. ¿Apocalipsis 17:9-12 texton parlki uka ‘kimsaqallqöri reyisa’ ‘tunka reyinakas’ khitinakäpjjesa, ukat kunjamsa uka profeciajj phoqasiwayi?

¹³ (Apocalipsis 17:9-12 liytʼäta). Primera Guerra Mundialajj jan walinakwa utjayawayi. Uk pasipanjja, qhep qhepa urunakat parlir yaqha profeciaw phoqasïna. Niyakejjay oraqpachankir pʼeqtʼirinakajj taqe markanakan suma jakasiñ utjañap munapjjchïnjja, enero 1920 maran Sociedad de Naciones ukwa uttʼayapjjäna. Octubre 1945 maransti, Sociedad de Naciones lantejj Naciones Unidas organizacionwa uttʼayapjjäna. Bibliarjamajja uka organizacionajj ‘kimsaqallqöri reyiwa’. Ukampis janiw mä potencia mundialäkiti. Chʼamanïñapatakejj gobiernonakaw apoyapjje. Biblianjja uka gobiernonakarojj ‘tunka reyinaka’ sasaw uñtʼasi.

14, 15. 1) ¿Apocalipsis 17:3-5 textojj ‘Jachʼa Babiloniat kamsisa’? 2) ¿Falso religionanakar apoyirinakajj kunsa lurasipki?

¹⁴ (Apocalipsis 17:3-5 liytʼäta). Jehová Diosajja apóstol Juanarojj mä visionanwa “Jachʼa Babilonia” sat mä prostituta warmir uñjayäna. Uka warmejja, oraqpachankir taqe falso religionanakamp sasiwa. ¿Kunjamsa uka visionajj phoqasïna? Falso religionanakajja, walja  maranakaw oraqpachankir gobiernonakamp chik trabajiwayapjje, yanaptʼawayapjjaraki. Ukampis Diosajj niyaw uka gobiernonakan chuymanakapar ‘amuyup uchani, ukhamat jupan amtap phoqapjjañapataki’. ¿Kunas ukjjarojj pasani? ‘Tunka reyinakajja’, mä arunjja gobiernonakajj falso religionanakaruw atacapjjani, qʼal tʼunjapjjarakini (Apoc. 17:1, 2, 16, 17).

¹⁵ ¿Jachʼa Babiloniajj niyaw tʼunjatäni sasajj kunatsa sistanjja? Ukar qhanañchañatakejj ak amtañaw yanaptʼistaspa. Nayra Babilonia markarojj Éufrates jachʼa jawiran umanakapaw jarkʼaqäna. Apocalipsis librorjamajja, Jachʼa Babiloniar apoyapki uka walja millón jaqenakajj jupar jarkʼaqer ‘umanakamp’ sasiwa (Apoc. 17:15). Ukampis uka umanakajj wañtʼjjaniwa sasaw Apocalipsis librojj qhanañcharaki. ¿Ukajj kamsañsa muni? Oraqpachankir falso religionanakarojj janiw walja jaqenakajj apoyjjapjjaniti (Apoc. 16:12). Uka profeciajj phoqasiskiwa. Walja jaqenakaw falso religionanakat mistjjapjje, problemanakap askichañatakis yaqha cheqaruw yanaptʼayasir sarjjapjje.

16. Naciones Unidas ukan uñstatapata, Jachʼa Babiloniar tukjasitapat parlir profecianakat amuyañajj ¿kunjamsa yanaptʼistu?

 ¹⁶ ¿Kunjamsa uka profecianakajj yanaptʼistu? Naciones Unidas ukan uñstatapasa, falso religionanakar jaqenakajj jan apoyjjapjjatapas qhep qhepa urunakan jakaskataswa uñachtʼayistu. Jachʼa Babiloniar jarkʼaqer ‘umanakajj’ wañtʼaskchisa, janiw jupanakajj Jachʼa Babiloniar tukjapkaniti. Kunjamtï yatjjataniwayktanjja, Jehová Diosaw ‘tunka reyinakan’ chuymaparojj ‘amuyup uchani, ukhamat jupan amtap phoqapjjañapataki’, mä arunjja Naciones Unidas organizacionar apoyiri gobiernonakan chuymanakaparuw amuyup uchani. Markanakajj mä akatjamatwa falso religionanakar tukjapjjani. Ukajja oraqpachankir jaqenakatakejj jan piensatatwa pasani (Apoc. 18:8-10). d Jachʼa Babilonian tukjasitapajj oraqpachankir jaqenakaruw sustjani, inas jan waltʼäwinaksa utjayarakchini. Ukampis Jehová Diosan servirinakapajj aka razonanakatwa kusisiñäni: maya, Jehová Diosan uka nayra enemigopajj wiñayatak chhaqtayatäniwa. Paya, aka jan wali pachat salvasiñasajj wali jakʼankjjaniwa (Luc. 21:28).

17, 18. 1) ¿Jehová Diosar jukʼamp confiyañatakejj kunsa lurañasa? 2) ¿Kuna toqenakatsa jutïr yatichäwin yatjjataskañäni?

¹⁷ Daniel profetajj akham sänwa: “Kunatï cheqäki uk uñtʼañajj waljarakïniwa” sasa. Ukajj ukhamapuniw phoqasiski. Jichhürunak toqet parlir profecianak sumwa jichhajj amuyjjtanjja (Dan. 12:4, 9, 10). Uka profecianakan cheqapapunïtap yatiñajja, Jehová Diosampiru jupan amuytʼayat Arupampir wal respetañatakiw yanaptʼistu (Is. 46:10; 55:11). Ukhamajj Bibliat taqe chuyma yatjjatasa, Jehová Diosan amigopäpjjañapatak mayninakar yanaptʼasa Diosar jukʼamp confiyañatak chʼamachasisipkakiñäni. Jehová Diosajja, jupar taqe chuyma confiyirinakar jarkʼaqaniwa, ‘sumankañs churapuniniwa’ (Is. 26:3).

¹⁸ Jutïr yatichäwinjja, qhepa urunakan cristiano congregacionampejj kunas pasani uka toqet parlir yaqhep profecianakatwa yatjjataskañäni. Uka profecianakajj kunjamsa qhepa urunakan jakaskatas uñachtʼayistu ukwa yatjjataskarakiñäni. Alajjpachankiri Jesucristo Reyisajj jupat jan jitheqtiri arkirinakapar irpaskatap kunanakas uñachtʼayaraki ukanakatwa yatjjataskarakiñäni.