1. Cosa kita puede asigura y porque?

 SI TA mira tu con el situacion del mundo ahora, tan dificil ba tu esta positivo? El amor entre na familia gendeh mas igual de antes. Mayoria del maga gente ta queda mas violente y canalla. Manada el quien tan dificil confia con aquellos na autoridad. Pero, este mismo maga cosas puede dale contigo confianza que hay queda mas bueno el situacion. Porque? Cay el cosa ta hace el maga gente amo exacto gayot na cosa ta habla el profecia acerca na “ultimo maga dia.” (2 Tim. 3:1-5) Nuay honesto persona quien puede nega que ta cumpli ya este profecia y ese cumplimiento ta dale prueba que ta rula ya si Cristo Jesus como Rey na Reino del Dios. Pero, uno lang este na manada profecia acerca na Reino. Puede queda mas fuerte el diaton fe si man repaso kita con el otro maga profecia que ya cumpli ya na este maga ya pasa año.

2. Cosa kita hay considera na este articulo y porque? (Dale comento acerca na letrato na cover.)

² Na este articulo, hay considera kita (1) un profecia que ta ayuda kanaton para entende si cuando ya principia rula el Reino, (2) maga profecia que ta ayuda kanaton para mira que ta rula ya si Jesus na cielo y (3) maga profecia que ta revela si paquemodo destroza con el maga enemigo del Reino del Dios. Puede kita mira que este maga profecia tiene coneccion  con uno y otro igual na maga pedazo de un puzzle. Ta hace este claro kanaton si cosa ya el tiempo que ta vivi kita na mirada de Jehova.

3. Cosa asiguranza ta dale kanaton el profecia na Daniel 7:13, 14 acerca na Rey del Reino del Dios?

³ El profecia na Daniel 7:13, 14 ta dale asiguranza que si Cristo Jesus amo el de con todo buen Rey para na Reino del Dios. Alegre “hay sirvi con ele” el maga gente de todo nacion y nuay quien hay cambia con ele como Rey. El otro profecia na libro de Daniel ya predicta que hay principia rula si Jesus na Reino na fin del “siete tiempo.” Posible ba para kanaton que sabe si cuando se ya sucede?

4. Explica si paquemodo el Daniel 4:10-17 ta ayuda kanaton para sabe si cuando ya principia rula como Rey el Cristo. (Mira tambien con el footnote.)

⁴ Le con el Daniel 4:10-17. El “siete tiempo” ta representa 2,520 año. Ya principia ese tiempo del 607 B.C.E. cuando ya quita el maga de Babilonia con el ultimo rey que ta representa con Jehova na Jerusalem. Ya termina este del 1914 C.E. cuando ya dale si Jehova el rulanza con Jesus​—“el uno quien tiene el legal derecho”​—como Rey del Reino del Dios. *​—Eze. 21:25-27.

5. Cosa el un manera que puede kita beneficia na profecia acerca na “siete tiempo”?

⁵ Na cosa manera kita puede beneficia na este profecia? Si ta entende kita con el profecia acerca na “siete tiempo,” ta tene kita confianza que ta cumpli si Jehova con el de suyu maga promesa na justo tiempo. Ya cumpli le na exacto tiempo con el de suyu plano que establicia con el de suyu Reino poreso sabe kita que hay cumpli tambien le con el todo otro maga profecia na exacto tiempo que ya decidi le. “Gendeh . . . hay atrasa” el dia de Jehova!​—Hab. 2:3.

6. (a) Cosa el claro evidencia que ta rula ya el Cristo na cielo? (b) Cosa el omento asiguranza na profecia na Revelacion 6:2-8?

⁶ Cuando cerca ya na fin del de suyu ministerio aqui na tierra, ya habla si Jesus el cuanto maga suceso na mundo que puede ayuda con el de suyu maga siguidores para sabe que ta principia ya le rula na cielo. Ya menciona le maga guerra, escasez de comida y temblor. Ya habla tambien le que hay tene maga epidemia o enfermedad “donde-donde”​—y el reciente COVID-19 pandemic amo un ejemplo de ese. Este maga suceso amo parte del cosa ta llama el Biblia “el señal” del presencia del Cristo. (Mat. 24:3, 7; Luc. 21:7, 10, 11) Mas de 60 año despues le muri y bira na cielo, ya dale si Jesus omento asiguranza con apostol Juan que sucede este maga cosas. (Le con el Revelacion 6:2-8.) Todo este ya sucede desde ya queda Rey si Jesus na Reino del 1914.

7. Porque ya queda mas umalin el situacion na mundo cuando ya principia rula si Jesus?

⁷ Porque ya queda mas umalin el situacion na mundo cuando ya queda Rey si Jesus? El Revelacion 6:2 ta dale un importante informacion​—el primer cosa que ya hace si Jesus despues le queda Rey amo que yan guerra ele. Contra con quien? Contra con el Diablo y con el de suyu maga demonio. Asegun na Revelacion capitulo 12, ya perde si Satanas na guerra y ya buta con ele y con el de suyu maga demonio na tierra. Ya principia le  hace sale el de suyu rabia na maga gente y como resulta, “macalastima con el tierra.”​—Rev. 12:7-12.

8. Na cosa manera kita ta beneficia si ta puede kita mira que ta cumpli el maga profecia acerca na Reino?

⁸ Na cosa manera kita puede beneficia na este maga profecia? El maga suceso na mundo y el claro cambio na custumbre del maga gente ta ayuda kanaton para sabe que ya queda ya Rey si Jesus. Poreso, en vez de man luya si ta puede kita mira que canalla y violente el maga gente, acorda que cumplimiento ese del profecia na Biblia. Ya establicia ya con el Reino! (Sal. 37:1) Y puede kita expecta que hay queda mas manada el problema na mundo mientras ta queda mas cerca el Armagedon. (Mar. 13:8; 2 Tim. 3:13) Ta rindi kita gracias con el diaton amable Tata na cielo cay ya ayuda le kanaton para entende si porque bien manada problema na mundo.

9. Cosa ya habla el profecia na Daniel 2:28, 31-35 acerca na ultimo poderoso gobierno y del cuando este ya principia rula?

⁹ Le con el Daniel 2:28, 31-35. Ta puede kita mira que ta cumpli este profecia ahora. El sueño de Nabucodonosor ya indica si cosa hay sucede “na ultimo parte del maga dia”​—despues principia rula el Cristo. Incluido na maga enemigo de Jesus na tierra el ultimo de con todo poderoso gobierno que ya menciona na Biblia​—con quien ta representa el “pies que hacido de hierro y lodo pandayan.” Ta rula ya ese gobierno ahora. Ya principia este rula durante el Guerra Mundial I cuando yan alianza el Britain y el United States, y ya llama con este Anglo-America. El sueño de Nabucodonosor acerca na imagen ta indica tambien dos cosas acerca na este gobierno  que ta hace con este diferente na otro maga poderoso gobierno de antes.

10. (a) Cosa kita ta puede mira na gobierno de Anglo-America ahora que ya predicta na profecia de Daniel? (b) Cosa peligro kita debe evita? (Mira con el cajon “ No Cae na Trampa!”)

¹⁰ Una, gendeh este gobierno igual na otro maga poderoso gobierno que ya menciona na vision que ya representa por medio de puro metal igual na oro o plata. Sino, ya representa con el alianza de Anglo-America por medio de pies que hacido de hierro y lodo pandayan. El lodo pandayan ta representa con el “descendiente del maga gente” o con el maga ordinario gente. (Dan. 2:43, ftn.) Como cosa claro puede mira ahora, tiene gayot sila grande influencia na eleccion, na maga campaña para na derecho del maga gente y na maga protesta. Y ta hace se dificil para con este gobierno que implementa con el diila maga palicia.

11. Cay ta rula ya ahora el Anglo-America, paquemodo se ta hace fuerte con el diaton confianza que ta vivi ya kita na tiempo del fin?

¹¹ Ika-dos, como cosa ta representa el pies del grande imagen, el Anglo-America amo el ultimo poderoso gobierno que ya predicta na Biblia. Nuay mas otro gobierno de gente despues con este. Hay destroza con este el Reino del Dios na Armagedon junto na otro maga gobierno del gente. *​—Rev. 16:13, 14, 16; 19:19, 20.

12. Cosa pa ya menciona el profecia de Daniel que ta dale kanaton comforta y esperanza?

¹² Na cosa manera kita puede beneficia na este profecia? El profecia de Daniel ta dale omento evidencia que ta vivi ya kita na tiempo del fin. Mas de 2,500 año ya el ya pasa, ya predicta si Daniel que despues del Babilonia, tiene pa cuatro maga poderoso gobierno quien hay tene grande efecto na maga siervo del Dios. Mas pa, ya revela le que el Anglo-America amo el ultimo de ese maga poderoso gobierno. Ta dale se kanaton comforta y esperanza que gendeh mas dura, el Reino del Dios hay destroza con el todo gobierno del gente y rula ya con el entero tierra.​—Dan. 2:44.

13. Na cosa ta refiri el “ica-ocho rey” y “dies rey” que ya menciona na Revelacion 17:9-12 y paquemodo ya cumpli este profecia?

¹³ Le con el Revelacion 17:9-12. Por causa na grande destruccion que ya causa el Guerra Mundial I, tiene cosa ya sucede que ya cumpli con el otro profecia na Biblia acerca na ultimo maga dia. Quierre el maga lider que tene paz na entero mundo. Poreso del Enero 1920, ya establicia sila con el League of Nations. Y del Octubre 1945, ya cambia con ese el United Nations. Ya llama con este organizacion como “el ica-ocho rey.” Pero, gendeh este un poderoso gobierno. Tiene lang se poder por causa na maga gobierno que ta suporta con ese. El Biblia ta refiri con ese maga gobierno como el “dies rey.”

14-15. (a) Cosa el Revelacion 17:3-5 ta revela acerca na “Grande Babilonia”? (b) Cosa ta sucede con el suporta del maga gente na falso religion?

¹⁴ Le con el Revelacion 17:3-5. Na un vision que estaba con Dios, ya mira si apostol Juan un mala mujer, “el Grande Babilonia” que ta representa con el imperio del falso religion na entero mundo. Cosa este vision ta revela? Por largo tiempo, el maga falso religion ta trabaja junto na maga gobierno y ta suporta kanila. Pero gendeh dura, si Jehova hay manda move con el maga gobierno “para cumpli sila el disuyo mismo plano.” Y cosa el resulta? Ese maga gobierno, el “dies rey,” hay man contra con el maga falso religion y destroza kanila.​—Rev. 17:1, 2, 16, 17.

 ¹⁵ Paquemodo kita ya sabe que cerca ya el fin del Grande Babilonia? Para contesta con ese pregunta, acorda kita que ta protege con el ciudad de Babilonia de antes el grande Rio de Eufrates. El libro de Revelacion ta compara con el millones quien ta suporta con el Grande Babilonia como el “agua” que ta protege con este. (Rev. 17:15) Pero, ta revela tambien este que hay “seca” el agua, quierre decir, manada kanila el deja con el imperio del falso religion. (Rev. 16:12) Como cumplimiento de ese profecia, manada na maga gente ahora el ya abandona con el falso religion y ya principia busca na otro con el solucion del diila maga problema.

16. Na cosa manera kita puede beneficia si ta entende kita con el profecia acerca na United Nations y na fin del Grande Babilonia?

¹⁶ Na cosa manera kita puede beneficia na este maga profecia? Ta existi el United Nations y gendeh mas ta suporta el manada gente con el maga falso religion. Ese ta dale omento prueba que ta vivi ya kita na ultimo maga dia. Maskin manada el gendeh mas ta suporta con el Grande Babilonia, gendeh se amo el causa del destrozo del maga falso religion.  Como ya menciona enante, hay manda move si Jehova con el “dies rey”​—el maga gobierno quien ta suporta con el United Nations—​“para cumpli sila el disuyo mismo plano.” Ese maga nacion derepente hay destroza con el Grande Babilonia y hay espanta gayot el maga gente. * (Rev. 18:8-10) El destruccion del Grande Babilonia hay tene grande efecto na entero mundo y posible causa maga dificultad pero el maga siervo del Dios hay tene maga razon para queda alegre. El falso religion que ya dura ya enemigo de Dios Jehova gendeh mas existi y gendeh mas dura, hay salva ya kanaton na este mal sistema del mundo!​—Luc. 21:28.

17-18. (a) Paquemodo kita puede continua hace fuerte con el diaton fe? (b) Cosa kita hay discuti na sunod articulo?

¹⁷ Ya predicta si Daniel que “el verdadero sabeduria hay queda abundancia.” Y amo gayot se el cosa ta sucede. Ta puede ya kita entende ahora con el maga profecia acerca na diaton tiempo. (Dan. 12:4, 9, 10) Bien exacto gayot este maga profecia y ta hace se mas hondo con el diaton respeto con Jehova y na de suyu inspirao Palabra. (Isa. 46:10; 55:11) Poreso, continua hace fuerte con el de tuyu fe por medio que estudia enbuenamente con el Escritura y ayuda con otro que tene buen relacion con Jehova. Hay guarda le con todo quien ta confia gayot con ele y ele “hay continua . . . dale paz” kanila.​—Isa. 26:3.

¹⁸ Na sunod articulo, hay discuti kita con el maga profecia acerca na Cristiano congregacion na tiempo del fin. Como cosa kita puede aprende, ese maga profecia hay dale tambien prueba que ta vivi ya kita na ultimo maga dia. Hay puede tambien kita mira maga omento evidencia que si Jesus​—el diaton Rey ahora—​ta guia con el de suyu maga siguidores.