1. Mɛni wɔbaanyɛ wɔwie kɛ nɔmimaa akɛ Kristo Yesu miifee bianɛ? Ni mɛni hewɔ wɔkɛɔ nakai?

 KƐ́ OKWƐ nibii ni yaa nɔ yɛ je lɛ mli lɛ, ani ewa kɛhã bo akɛ obaahe oye akɛ nibii baahi? Ŋmɛnɛ lɛ, mɛi kɛ amɛweku lɛ mli bii yeee jogbaŋŋ, awuiyeli kɛ basabasafeemɔ efa, ni mɛi pii susuuu mɛi krokomɛi ahe. Agbɛnɛ hu, mɛi babaoo heee amralofoi lɛ kɛ mɛi krokomɛi ni yɔɔ gbɛnai wuji lɛ amɛyeee. Shi nibii gbohii ni yaa nɔ nɛɛ nɔŋŋ baanyɛ ahã oná nɔmimaa akɛ nibii baahi. Mɛni hewɔ wɔkɛɔ nakai? Nɔ hewɔ lɛ ji akɛ, mɛi miifee amɛnii tamɔ bɔ ni gbalɛ ko ni yɔɔ Biblia lɛ mli lɛ tsɔɔ akɛ mɛi baafee amɛnii yɛ “naagbee gbii lɛ” amli lɛ pɛpɛɛpɛ. (2 Tim. 3:1-5) Bɔ ni gbalɛ nɛɛ eba mli ehã lɛ yɛ faŋŋ bɔ ni mɔ ko mɔ ko nyɛŋ aje he ŋwane. Ni bɔ ni eba mli lɛ yeɔ odase hu akɛ, Kristo Yesu miiye nɔ akɛ Nyɔŋmɔ Maŋtsɛyeli lɛ nɔ Maŋtsɛ. Shi gbalɛ nɛɛ ji gbalɛi pii ni kɔɔ Maŋtsɛyeli lɛ he lɛ ateŋ ekome pɛ. Kɛ́ wɔsusu gbalɛi krokomɛi ni eba mli yɛ wɔbei nɛɛ amli lɛ ahe lɛ, ebaahã wɔhemɔkɛyeli lɛ mli awa.

2. Mɛni he wɔbaasusu yɛ nikasemɔ nɛɛ mli? Ni mɛni hewɔ? (Wiemɔ mfoniri ni yɔɔ wolo lɛ hiɛ lɛ he.)

² Yɛ nikasemɔ nɛɛ mli lɛ, wɔbaakwɛ (1) gbalɛ ko ni yeɔ ebuaa wɔ ni wɔle be ni awó Yesu Kristo Nyɔŋmɔ Maŋtsɛyeli lɛ  nɔ Maŋtsɛ, (2) gbalɛi komɛi ni yeɔ amɛbuaa wɔ ni wɔna akɛ Yesu Kristo ebɔi nɔyeli yɛ ŋwɛi akɛ Nyɔŋmɔ Maŋtsɛyeli lɛ nɔ Maŋtsɛ, kɛ (3) gbalɛi ni tsɔɔ nɔ ni baaba mɛi ni teɔ shi amɛwoɔ Nyɔŋmɔ Maŋtsɛyeli lɛ anɔ. Bɔ ni kɛ́ akɛ mfoniri ko fãi srɔtoi tsara lɛ ehãa anaa mfoniri muu lɛ fɛɛ jogbaŋŋ lɛ, nakai nɔŋŋ kɛ́ wɔsusu gbalɛi nɛɛ ahe lɛ ebaaye ebua wɔ ni wɔle nibii ni Yehowa miifee bianɛ kɛ nibii ni ebaafee wɔsɛɛ.

3. Mɛni gbalɛ ni yɔɔ Daniel 7:13, 14 lɛ hãa wɔleɔ yɛ Nyɔŋmɔ Maŋtsɛyeli lɛ nɔ Maŋtsɛ lɛ he?

³ Gbalɛ ni yɔɔ Daniel 7:13, 14 lɛ hãa wɔleɔ akɛ Kristo Yesu ji mɔ ni sa jogbaŋŋ akɛ eyeɔ nɔ akɛ Nyɔŋmɔ Maŋtsɛyeli lɛ nɔ Maŋtsɛ. Gbalɛ lɛ hãa wɔleɔ hu akɛ jeŋmaŋ fɛɛ jeŋmaŋ ‘baasɔmɔ’ lɛ, ni enɔyeli lɛ naanɔ nɔyeli ni hoŋ eyaŋ ni. Gbalɛ kroko ni yɔɔ Daniel wolo lɛ mli lɛ hãa wɔleɔ akɛ, abaawó Yesu maŋtsɛ yɛ be ko ni atsɛ lɛ akɛ bei kpawo yɛ gbalɛ lɛ mli lɛ sɛɛ. Ani wɔbaanyɛ wɔle be tuuntu ni awó Yesu maŋtsɛ?

4. Tsɔɔmɔ bɔ ni Daniel 4:10-17 lɛ yeɔ ebuaa wɔ ni wɔleɔ afi nɔ ni awó Kristo Nyɔŋmɔ Maŋtsɛyeli lɛ nɔ Maŋtsɛ. (Kwɛmɔ shishigbɛ niŋmaa lɛ hu.)

⁴ Kanemɔ Daniel 4:10-17. “Bei kpawo” lɛ feɔ afii 2,520. Abɔi bei nɛɛ kanemɔ be ni Babilonbii lɛ hã naagbee maŋtsɛ ni ta Yehowa maŋtsɛ sɛi lɛ nɔ yɛ Yerusalem lɛ kpa maŋtsɛ lɛ yeli yɛ afi 607 D. Ŋ. B. lɛ. Ni eba naagbee yɛ afi 1914 Ŋ. B. be ni Yehowa wó “mɔ ni yɔɔ hegbɛ yɛ mla naa lɛ,” ni ji Yesu Nyɔŋmɔ Maŋtsɛyeli lɛ nɔ Maŋtsɛ lɛ. b​—Eze. 21:25-27.

5. Tsɔɔmɔ gbɛ kome ni wɔnáa gbalɛ ni kɔɔ “bei kpawo” lɛ he lɛ he sɛɛ.

⁵ Mɛɛ gbɛ nɔ wɔnáa gbalɛ nɛɛ he sɛɛ? Gbalɛ ni kɔɔ “bei kpawo” lɛ he lɛ hãa hemɔkɛyeli ni wɔyɔɔ akɛ Yehowa yeɔ eshiwoi anɔ yɛ be naa pɛpɛɛpɛ lɛ mli waa. Yehowa gba akɛ ebaawó Yesu maŋtsɛ yɛ be pɔtɛɛ ko mli. Nakai pɛpɛɛpɛ eba lɛ. No hewɔ lɛ, wɔheɔ wɔyeɔ akɛ ebaahã egbalɛi krokomɛi fɛɛ aba mli yɛ be naa pɛpɛɛpɛ, ni tsɔɔ akɛ, Yehowa gbi lɛ hu “ekpeŋ sɛɛ!”​—Hab. 2:3.

6. (a) Mɛɛ nibii yaa nɔ yɛ je lɛ mli ni tsɔɔ akɛ Yesu ebɔi nɔyeli yɛ ŋwɛi? (b) Mɛɛ gbɛ nɔ gbalɛ ni yɔɔ Kpojiemɔ 6:2-8 lɛ maa enɛ nɔ mi?

⁶ Be ni eshwɛ fioo ni Yesu baagbo lɛ, etsɔɔ esɛɛnyiɛlɔi lɛ nibii komɛi ni baaya nɔ yɛ je lɛ mli ni baahã amɛna akɛ ebɔi nɔyeli akɛ Maŋtsɛ yɛ ŋwɛi. Nibii ni egba akɛ ebaaba lɛ ekomɛi ji, tai, hɔmɔ, kɛ shikpɔŋhosomɔi. Egba hu akɛ tsɛŋemɔ helai ni gbeɔ mɔ baaba yɛ “heihei.” Ni emli eko ji COVID-19 ni ba nyɛsɛɛ nɛɛ. Nibii nɛɛ kɛ ekrokomɛi ji nɔ ni Biblia lɛ tsɛɔ lɛ ba ni Kristo eba lɛ he “okadi” lɛ. (Mat. 24:3, 7; Luka 21:7, 10, 11) Be ni Yesu gbo ni atee lɛ shi ni etee ŋwɛi lɛ sɛɛ nɔ ni fa fe afii 60 lɛ, ejie ninaa ko kpo etsɔɔ bɔfo Yohane kɛma nɔ mi ehã lɛ akɛ nibii ni egba akɛ no baatsɔɔ akɛ ebɔi nɔyeli lɛ baaba mli. (Kanemɔ Kpojiemɔ 6:2-8.) Ni kɛjɛ be ni awó Yesu maŋtsɛ yɛ afi 1914 lɛ, nibii nɛɛ fɛɛ eba mli.

7. Mɛni hewɔ kɛjɛ be ni Yesu bɔi nɔyeli lɛ nibii gbohii pii etee nɔ yɛ shikpɔŋ lɛ nɔ lɛ?

⁷ Mɛni hewɔ be ni awó Yesu maŋtsɛ lɛ, je lɛ shihilɛ fite kwraa nakai? Nɔ ko ni sa kadimɔ waa ni awie yɛ Kpojiemɔ 6:2 lɛ yeɔ ebuaa wɔ ni wɔnaa nɔ hewɔ. Awie yɛ jɛmɛ akɛ, nɔ  klɛŋklɛŋ ni Yesu fee be ni awó lɛ Maŋtsɛ lɛ ji, ewu ta. Namɛi ekɛwu ta lɛ? Ekɛ Abonsam kɛ edaimonioi lɛ ni wu ta lɛ. Kpojiemɔ yitso 12 lɛ bɔɔ amaniɛ akɛ, aye Satan nɔ kunim ni ashɛrɛ lɛ kɛ edaimonioi lɛ ashwie shikpɔŋ. Enɛ hewɔ lɛ, ‘ahã shikpɔŋ lɛ kpoo’ ejaakɛ Satan mli efu waa ni ekɛ emlifu lɛ ebato adesai anɔ.​—Kpo. 12:7-12.

8. Kɛ́ wɔna bɔ ni gbalɛi ni kɔɔ Maŋtsɛyeli lɛ he lɛ eba mli ehã lɛ, mɛɛ gbɛ nɔ wɔnáa he sɛɛ?

⁸ Mɛɛ gbɛ nɔ wɔnáa gbalɛi nɛɛ ahe sɛɛ? Nibii ni yaa nɔ yɛ je lɛ mli kɛ bɔ ni mɛi asubaŋ efite kwraa lɛ fata nibii ni baahã wɔna akɛ Yesu ebɔi nɔyeli lɛ ahe. No hewɔ lɛ, kɛ́ wɔna ni mɛi miifee yiwalɛ nii loo amɛsusuuu mɛi krokomɛi ahe lɛ, esaaa akɛ wɔhãa egbaa wɔnaa tsɔ. Moŋ lɛ, esa akɛ wɔkai akɛ amɛnifeemɔi lɛ miiwo Biblia mli gbalɛ obɔ. Eehã wɔmiina akɛ, Yesu miiye nɔ. (Lala 37:1) Wɔle akɛ be ni Harmagedon bɛŋkɛɔ lɛ, nibii baafite kwraa fe nɛkɛ po yɛ je lɛ mli. (Mar. 13:8; 2 Tim. 3:13) Ani eŋɔɔɔ onaa akɛ Yehowa, wɔ-Tsɛ ni yɔɔ ŋwɛi ni sumɔɔ wɔ lɛ, eye ebua wɔ ni wɔna nɔ hewɔ ni naagbai pii yɔɔ je lɛ mli nakai lɛ?

9. Mɛni gbalɛ ni yɔɔ Daniel 2:28, 31-35 lɛ wieɔ yɛ naagbee jeŋ hewalɛ lɛ he? Ni mɛɛ be jeŋ hewalɛ nɛɛ ba shihilɛ mli?

⁹ Kanemɔ Daniel 2:28, 31-35. Gbalɛ nɛɛ hu miiba mli ŋmɛnɛ. Nebukadnezar lamɔ lɛ tsɔɔ nɔ ni baaya nɔ “yɛ gbii lɛ anaagbee lɛ mli” kɛ́ Kristo bɔi nɔyeli akɛ maŋtsɛ. Naagbee jeŋ hewalɛ ni Biblia lɛ gba akɛ ebaaba, ni ji jeŋ hewalɛ ni “nanetokotai lɛ fã dade ni fã hu sũ” lɛ damɔ shi kɛhã lɛ, fata mɛi ni teɔ shi amɛwoɔ Yesu Maŋtsɛyeli lɛ ahe. Jeŋ hewalɛ nɛɛ ni yeɔ nɔ bianɛ. Aná Anglo-Amerika jeŋ  hewalɛ lɛ be ni United Kingdom kɛ United States fee ekome be ni awuɔ Jeŋ Ta I lɛ. Amaga lɛ ni Nebukadnezar na yɛ elamɔ lɛ mli lɛ hãa wɔleɔ kɛhooo kwraa nibii enyɔ ni hãa esoroɔ jeŋ hewalɛ nɛɛ yɛ jeŋ hewalɛi ni tsɔ ehiɛ lɛ ahe.

10. (a) Ŋmɛnɛ lɛ, mɛni wɔnaa yɛ Anglo-Amerika jeŋ hewalɛ lɛ ni Daniel gbalɛ lɛ wie he lɛ he? (b) Ni mɛni esa akɛ wɔkwɛ jogbaŋŋ ni wɔkafee? (Kwɛmɔ akrabatsa ni yitso ji, “ Kwɛmɔ Ohe Nɔ Jogbaŋŋ Yɛ Sũ Lɛ He!”)

¹⁰ Klɛŋklɛŋ lɛ, wɔna akɛ yɛ jeŋ hewalɛi ni tsɔ hiɛ lɛ fɛɛ amli lɛ, sũ futuuu nibii ni akɛfee amɛhe mfoniri lɛ mli. Shi yɛ Anglo-Amerika jeŋ hewalɛ lɛ pɛ gbɛfaŋ lɛ, akɛ dade ni akɛ sũ efutu ni fee he mfoniri. Sũ lɛ damɔ shi kɛhã “gbɔmɛi adesai aseshibii” loo maŋbii lɛ. (Dan. 2:43, shn.) Ŋmɛnɛ lɛ, maŋbii lɛ wieɔ amɛshiɔ yiŋ ni amralo lɛ kpɛɔ lɛ. Amɛtsetsee kui ni fãa hegbɛi ni maŋbii lɛ yɔɔ lɛ ahe, kɛ kui ni kwɛɔ ni akɛ nitsulɔi aye jogbaŋŋ, ni bɔ ni amɛfeɔ amɛnii amɛhãa lɛ saa bɔ ni nibii yaa lɛ kɛ afɔ̃ oshiki lɛ he. Amɛnifeemɔi nɛɛ ahewɔ lɛ, Anglo-Amerika jeŋ hewalɛ lɛ nyɛɛɛ atsu eyiŋtoi fɛɛ ahe nii.

11. Akɛni Anglo-Amerika jeŋ hewalɛ lɛ ni yeɔ nɔ hewɔ lɛ, mɛɛ gbɛ nɔ ehãa hemɔkɛyeli ni wɔyɔɔ akɛ wɔyɛ naagbee gbii lɛ amli lɛ mli waa?

¹¹ Nɔ ni ji enyɔ lɛ, amaga wulu lɛ nanetokotai lɛ ni damɔ shi kɛhã Anglo-Amerika lɛ ji naagbee jeŋ hewalɛ ni Biblia lɛ gba akɛ ebaahi shi. Adesai anɔyeli ko baŋ yɛ esɛɛ dɔŋŋ, shi moŋ Nyɔŋmɔ Maŋtsɛyeli lɛ baakpãtã lɛ kɛ adesai anɔyelii fɛɛ ahiɛ yɛ Harmagedon. c​—Kpo. 16:13, 14, 16; 19:19, 20.

12. Mɛɛ gbɛ nɔ Daniel gbalɛ lɛ shɛjeɔ wɔmii ni ehãa wɔnáa hiɛnɔkamɔ?

¹² Mɛɛ gbɛ nɔ wɔnáa gbalɛ nɛɛ he sɛɛ? Daniel gbalɛ lɛ hãa wɔleɔ akɛ wɔyɛ naagbee gbii lɛ amli. Daniel gba nɔ ni fe afii 2,500 ni eho nɛ akɛ, yɛ Babilon sɛɛ lɛ, jeŋ hewalɛi ejwɛ krokomɛi baate shi ni amɛbaafee nibii ni baasa Nyɔŋmɔ webii lɛ ahe tɛ̃ɛ. Kɛfata he lɛ, etsɔɔ mli akɛ yɛ jeŋ hewalɛi nɛɛ ateŋ lɛ, Anglo-Amerika baafee naagbee jeŋ hewalɛ. Enɛ shɛjeɔ wɔmii ni ehãa wɔnaa akɛ etsɛŋ Nyɔŋmɔ Maŋtsɛyeli lɛ baakpãtã adesai anɔyelii fɛɛ ahiɛ ni ebaaye shikpɔŋ muu lɛ fɛɛ nɔ.​—Dan. 2:44.

13. Mɛni “maŋtsɛ ni ji kpaanyɔ” lɛ kɛ “maŋtsɛmɛi nyɔŋma” lɛ ni atsĩ amɛtã yɛ gbalɛ ni yɔɔ Kpojiemɔ 17:9-12 lɛ damɔ shi kɛhã? Ni mɛɛ gbɛ nɔ gbalɛ nɛɛ eba mli?

¹³ Kanemɔ Kpojiemɔ 17:9-12. Bɔ ni akpãtã nii ahiɛ yɛ Jeŋ Ta I lɛ mli lɛ hã je lɛŋ hiɛnyiɛlɔi lɛ fee nɔ ko ni hã gbalɛ kroko ni kɔɔ naagbee gbii lɛ ahe lɛ ba mli. Akɛni amɛsumɔɔɔ ni ta ni tamɔ nɛkɛ teɔ shi dɔŋŋ hewɔ lɛ, yɛ January 1920 lɛ, amɛto Jeŋmaji Akpaŋmɔ lɛ shishi. Kɛkɛ ni yɛ October 1945 lɛ, akɛ Jeŋmaji Ekomefeemɔ lɛ baye najiaŋ. Biblia lɛ tsɛ Jeŋmaji Ekomefeemɔ lɛ akɛ “maŋtsɛ ni ji kpaanyɔ,” shi ejeee jeŋ hewalɛ. Enáa ehewalɛ lɛ kɛjɛɔ maŋkwramɔ gbɛjianɔtoi ni fiɔ esɛɛ lɛ adɛŋ. Biblia lɛ tsɛɔ maŋkwramɔ gbɛjianɔtoi nɛɛ akɛ “maŋtsɛmɛi nyɔŋma.”

14-15. (a) Mɛni Kpojiemɔ 17:3-5 lɛ wieɔ yɛ “Babilon Kpeteŋkpele lɛ” he? (b) Mɛni mɛi pii ni kulɛ amɛfiɔ Babilon Kpeteŋkpele lɛ sɛɛ lɛ efee?

¹⁴ Kanemɔ Kpojiemɔ 17:3-5. Yɛ ninaa ko ni Yehowa jie lɛ kpo etsɔɔ Yohane lɛ mli lɛ, ena ashawo yoo ko ni atsɛɔ lɛ “Babilon Kpeteŋkpele lɛ.” Ashawo yoo nɛɛ damɔ shi kɛhã amale jamɔi fɛɛ ni yɔɔ je lɛ mli lɛ. Te ninaa nɛɛ eba mli ehã tɛŋŋ? Kɛjɛ blema tɔ̃ɔ lɛ, amale jamɔi efi je lɛŋ nɔyelii lɛ asɛɛ ni amɛkɛ amɛ efee ekome. Shi etsɛŋ, Yehowa kɛbaawo nɔyelɔi nɛɛ atsui mli ni amɛtsu “eyiŋtoo he nii.” Mɛni nɔyelɔi nɛɛ, ni ji “maŋtsɛmɛi nyɔŋma” lɛ baafee? Amɛbaatutua amale jamɔi  fɛɛ ni amɛbaakpãtã amɛhiɛ.​—Kpo. 17:1, 2, 16, 17.

¹⁵ Te wɔfeɔ tɛŋŋ wɔleɔ akɛ Babilon Kpeteŋkpele lɛ naagbee eshɛ? Nɔ kome ni baaye abua wɔ ni wɔhã sanebimɔ nɛɛ hetoo ji, ni wɔbaakai akɛ no mli lɛ Yufrate Faa lɛ ebɔle Babilon maŋ lɛ he ni ebuɔ maŋ lɛ he. Mɛi akpekpei abɔ ni fiɔ Babilon Kpeteŋkpele lɛ sɛɛ lɛ buɔ ehe, ni Kpojiemɔ wolo lɛ kɛ amɛ to “nui” ahe. (Kpo. 17:15) Shi Kpojiemɔ wolo lɛ wie hu akɛ nui nɛɛ baamii, ni tsɔɔ akɛ, mɛi babaoo ni fiɔ Babilon Kpeteŋkpele lɛ sɛɛ lɛ baaje esɛɛ. (Kpo. 16:12) Ŋmɛnɛ lɛ, gbalɛ nɛɛ eba mli. Mɛi babaoo ni kulɛ amɛyɔɔ amale jamɔ mli lɛ eshi, ejaakɛ amɛnáaa amɛnaagbai lɛ anaa tsabaa.

16. Bianɛ ni wɔnu gbalɛi ni kɔɔ be ni ato Jeŋmaji Ekomefeemɔ lɛ shishi kɛ be ni abaakpãtã Babilon Kpeteŋkpele lɛ hiɛ lɛ he lɛ ashishi lɛ, mɛɛ gbɛ nɔ wɔnáa he sɛɛ?

¹⁶ Mɛɛ gbɛ nɔ wɔnáa gbalɛi nɛɛ ahe sɛɛ? Jeŋmaji Ekomefeemɔ lɛ ni ato shishi lɛ kɛ bɔ ni mɛi pii shiɔ amale jamɔi amli lɛ fɛɛ tsɔɔ lɛɛlɛŋ akɛ wɔyɛ naagbee gbii lɛ amli. Eyɛ mli akɛ Babilon Kpeteŋkpele lɛ mli bii babaoo miije esɛɛ moŋ, shi jeee no kɛ enaagbee baaba. Tamɔ bɔ ni awie kɛtsɔ hiɛ lɛ, Yehowa kɛbaawo  “maŋtsɛmɛi nyɔŋma” lɛ, ni ji nɔyelɔi ni fiɔ Jeŋmaji Ekomefeemɔ lɛ sɛɛ lɛ atsui mli koni amɛtsu “eyiŋtoo he nii.” Amale jamɔi ahiɛ ni nɔyelɔi nɛɛ baakpãtã lɛ baafee mɛi pii naakpɛɛ waa. d (Kpo. 18:8-10) Kɛ́ akpãtã Babilon Kpeteŋkpele lɛ hiɛ lɛ, ebaasa nibii pii ahe yɛ je lɛ mli, ni ebaanyɛ ehã nibii amli awa. Shi wɔ, ni ji Nyɔŋmɔ webii lɛ baaná miishɛɛ, kɛhooo kwraa lɛ yɛ yiŋtoi enyɔ ahewɔ. Klɛŋklɛŋ nɔ lɛ ji, akpãtã amale jamɔ ni ji Nyɔŋmɔ henyɛlɔ kɛjɛ blema beebe lɛ hiɛ kwraa. Ni nɔ ni ji enyɔ lɛ, wɔyiwalaheremɔ ebɛŋkɛ.​—Luka 21:28.

17-18. (a) Mɛni wɔbaanyɛ wɔfee koni wɔhemɔkɛyeli lɛ mli aya nɔ awa? (b) Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁷ Daniel gba akɛ “anɔkwa nilee baafa babaoo.” Ni lɛɛlɛŋ nakai eba lɛ ŋmɛnɛ. Wɔbanu gbalɛi ni kɔɔ be ni wɔyɔɔ mli nɛɛ he lɛ ashishi. (Dan. 12:4, 9, 10) Bɔ ni gbalɛi nɛɛ eba mli pɛpɛɛpɛ lɛ ehã hemɔkɛyeli ni wɔyɔɔ yɛ Yehowa kɛ e-Wiemɔ lɛ mli lɛ mli ewa waa. (Yes. 46:10; 55:11) No hewɔ lɛ, yaa nɔ okase Ŋmalɛ lɛ jogbaŋŋ koni ohemɔkɛyeli lɛ mli awa, ni oye obua mɛi krokomɛi ni amɛbatsɔmɔ Yehowa nanemɛi. Yehowa baakwɛ mɛi ni kɛ amɛhiɛ fɔ̃ɔ enɔ kwraa lɛ anɔ, ni ebaahã “amɛná toiŋjɔlɛ daa.”​—Yes. 26:3.

¹⁸ Yɛ nikasemɔ ni nyiɛ sɛɛ lɛ mli lɛ, wɔbaasusu gbalɛi ni kɔɔ Kristofoi asafo lɛ he ni baaba mli yɛ naagbee gbii nɛɛ amli lɛ ahe. Wɔbaana akɛ, gbalɛi nɛɛ hu hãa wɔnaa lɛɛlɛŋ akɛ wɔyɛ naagbee gbii lɛ amli. Wɔbaana nibii krokomɛi ni tsɔɔ faŋŋ akɛ, Yesu, wɔ-Maŋtsɛ lɛ ji mɔ ni nyiɛ wɔhiɛ ŋmɛnɛ.