1. Ngaa sigurado kita nga nagagahom na si Cristo Jesus bilang Hari sang Ginharian sang Dios?

 BANGOD sa tanan nga problema subong sa kalibutan, daw nagakadulaan ka bala sing paglaum nga magaayo pa ang aton kahimtangan? Halimbawa, ang mga miembro sang pamilya wala na nagapalanggaanay. Mas ginauna sang mga tawo ang ila kaugalingon kag nangin mas mapintas na gid sila. Madamo nga tawo ang wala na nagasalig sa mga ara sa posisyon. Pero ining mga nagakatabo subong sa kalibutan makahatag sa imo sing paglaum. Ngaa masiling naton ini? Bangod ginahimo sini nga mga tawo ang gintagna sang Biblia nga tanda sang “katapusan nga mga adlaw.” (2 Tim. 3:1-5) Ini nga tagna nagakatuman gid subong kag indi ini mapanghiwala sang mapainubuson nga mga tawo. Ang katumanan sini nga tagna nagapamatuod nga nagagahom na si Cristo Jesus bilang Hari sang Ginharian sang Dios. Pero isa lang ini sa madamo pa nga tagna parte sa Ginharian. Gani binagbinagon naton ang iban pa nga tagna nga natuman sining nagligad nga tinuig. Makapabakod ini sang aton pagtuo.

2. Ano ang binagbinagon naton sa sini nga artikulo, kag ngaa? (Komentuhi ang piktyur sa kober.)

² Sa sini nga artikulo, binagbinagon naton (1) ang isa ka tagna nga makabulig sa aton nga mabal-an kon san-o nagsugod sa paggahom ang Ginharian, (2) ang mga tagna nga makabulig sa aton nga mabal-an nga nangin Hari na si Jesus sang Ginharian sang Dios sa langit, kag (3) ang mga tagna nga nagasugid sa aton kon paano malaglag ang mga kaaway sang Ginharian sang Dios. Makabulig sa aton ini nga mga tagna nga mabal-an kon diin na kita dampi sa gintalana nga tion ni Jehova. Daw pareho ini sa mga bahin sang isa ka puzzle.  Kinahanglan ang kada bahin para makita naton kon ano gid ang hitsura sini.

3. Ano ang ginapasalig sa aton sang ginasiling sang Daniel 7:13, 14 parte sa Hari sang Ginharian sang Dios?

³ Ginapasalig kita sang ginasiling sang Daniel 7:13, 14 nga si Cristo Jesus ang pinakakalipikado nga Manuggahom sang Ginharian sang Dios. Ang mga tawo halin sa tanan nga pungsod ‘magaalagad sa iya’ sing kinabubut-on, kag wala na gid sing iban nga manuggahom nga magabulos sa iya. Ang isa pa ka tagna sa libro sang Daniel nagsiling nga magasugod si Jesus sa paggahom sa Ginharian pagkatapos sang ginatawag nga pito ka tion. Posible gid bala nga mabal-an naton kon san-o nagsugod sa paggahom si Jesus bilang Hari?

4. Paano ang Daniel 4:10-17 nakabulig sa aton nga mabal-an ang tuig nga nagsugod sa paggahom ang Cristo sa Ginharian? (Tan-awa man ang footnote.)

⁴ Basaha ang Daniel 4:10-17. Ang “pito ka tion” nagalawig sang 2,520 ka tuig. Nagsugod ini sang 607 B.C.E. sang ginpahalin sang mga taga-Babilonia ang katapusan nga hari nga nagapungko sa trono ni Jehova sa Jerusalem. Natapos ini sang 1914 C.E. sang ginhimo ni Jehova si Jesus nga Hari sang Ginharian sang Dios. * Si Jesus “ang isa nga may legal nga kinamatarong sa sini.”—Ezeq. 21:25-27.

5. Ano ang isa ka benepisyo bangod nahangpan naton ang tagna parte sa “pito ka tion”?

⁵ Paano kita makabenepisyo sa sini nga tagna? Bangod nahangpan naton ang tagna parte sa “pito ka tion,” nagapabakod pa gid ini sang aton pagsalig nga tumanon gid ni Jehova ang iya mga promisa sa husto nga tion. Ginhimo ni Jehova si Jesus nga Hari sa Iya gintalana nga tion. Gani makasigurado kita nga tumanon man niya ang tanan niya nga gintagna sa iya gintalana nga tion. ‘Indi gid maulihi’ ang adlaw ni Jehova.—Hab. 2:3.

6. (a) Ano nga mga hitabo sa kalibutan ang nagapamatuod nga nagagahom na ang Cristo sa langit? (b) Ano ang ginasiling sang Bugna 6:2-8 nga dugang nga pamatuod nga matabo gid ang gintagna ni Jesus?

⁶ Sang malapit na lang matapos ang ministeryo ni Jesus sa duta, may gintagna sia nga mga hitabo sa kalibutan nga makabulig sa iya mga sumulunod nga mabal-an nga nagsugod na sia sa paggahom sa langit. Nalakip sa sini ang mga inaway, gutom, mga linog, kag mga balatian “sa nagkalainlain nga mga lugar.” Ang isa ka halimbawa sini amo ang COVID-19 nga pandemic. Suno sa Biblia, nalakip ini nga mga hitabo sa “tanda” sang presensia sang Cristo. (Mat. 24:3, 7; Luc. 21:7, 10, 11) Sobra 60 ka tuig sa tapos mapatay si Jesus kag nagbalik sa langit, may ginpakita sia kay apostol Juan nga palanan-awon nga dugang nga pamatuod nga matabo gid ang iya gintagna. (Basaha ang Bugna 6:2-8.) Natabo ini tanan sugod sang nangin Hari si Jesus sang 1914.

7. Ngaa nangin makaluluoy ang duta sang nangin Hari si Jesus?

⁷ Kon Hari na si Jesus, ngaa naglala ang kahimtangan sa kalibutan? May ginasugid ang Bugna 6:2 parte sa sini. Sang nangin Hari si Jesus, ang una niya nga ginhimo amo ang pagpakig-away. Sin-o ang iya kaaway? Ang Yawa kag ang iya mga demonyo. Ginsugid sang Bugna kapitulo 12 nga napierde si Satanas kag gintagbong sia sa duta upod ang mga demonyo. Naakig gid si Satanas, gani  ginpaukpan niya ang mga tawo kag nangin “makaluluoy ang duta.”—Bug. 12:7-12.

8. Bangod nakita naton nga nagakatuman ang mga tagna parte sa Ginharian, ano ang benepisyo sini sa aton?

⁸ Paano kita makabenepisyo sa sini nga mga tagna? Ang mga nagakatabo sa kalibutan kag ang pagbag-o sang panimuot sang mga tawo makabulig sa aton nga mabal-an nga nangin Hari na si Jesus. Gani, indi kita dapat maluyahan sang buot kon ginauna sang mga tawo ang ila kaugalingon kag ginapintasan nila ang iban. Dapat naton dumdumon nga katumanan ini sang tagna sa Biblia. Ginapakita sini nga nagagahom na ang Ginharian. (Sal. 37:1) Kag bangod malapit na lang gid ang Armageddon, magalala pa gid ang kahimtangan sa kalibutan. (Mar. 13:8; 2 Tim. 3:13) Nagapasalamat gid kita sa aton mahigugmaon nga Amay sa langit kay ginbuligan niya kita nga mahangpan ang nagakatabo sa kalibutan.

9. Paano ginalaragway sang tagna sa Daniel 2:28, 31-35 ang katapusan nga kagamhanan sa kalibutan, kag san-o ini nagsugod sa paggahom?

⁹ Basaha ang Daniel 2:28, 31-35. Ini nga tagna nagakatuman subong. Ginapakita sang damgo ni Nabocodonosor kon ano ang matabo “sa hingapusan nga mga adlaw,” kon nagagahom na ang Cristo. Nalakip sa mangin mga kaaway ni Jesus sa duta amo ang katapusan nga kagamhanan sa kalibutan nga gintagna sa Biblia. Ginlaragway ini bilang “salsalon kag daga nga mga tiil.” Nagsugod ini sa paggahom sang Bug-os Kalibutan nga Inaway I sang nagbuligay ang Britain kag ang United States, kag gintawag ini nga Anglo-Amerikano nga Kagamhanan sa Kalibutan. Ginapakita man sang estatwa sa damgo ni Nabocodonosor ang duha ka kinatuhayan  sining kagamhanan sa kalibutan sa mga nauna sa sini.

10. (a) Ano ang makita naton nga nagakatabo sa Anglo-Amerikano nga Kagamhanan sa Kalibutan nga gintagna ni Daniel? (b) Sa ano kita dapat maghalong? (Tan-awa ang kahon nga “ Maghalong sa Ginasimbulo sang Daga!”)

¹⁰ Una, suno sa palanan-awon, ang Anglo-Amerikano nga Kagamhanan sa Kalibutan ginlaragway bilang salsalon nga may samo nga daga. Tuhay gid ini sa nauna nga mga kagamhanan nga ginlaragway bilang puro nga metal pareho sang bulawan ukon pilak. Ang daga nagasimbulo sa “kaliwat sang katawhan,” ukon sa ordinaryo nga mga tawo. (Dan. 2:43, footnote) Makita naton subong nga ginaimpluwensiahan sang mga tawo ang mga eleksion, ginapakigbato nila ang ila mga kinamatarong, nagaprotesta sila, kag nagaentra sila sa mga organisasyon sang mga trabahador. Bangod sini, nabudlayan ang nagagahom nga kagamhanan sa kalibutan nga himuon ang mga gusto sini ipatuman.

11. Paano ang paggahom sang Anglo-Amerikano nga Kagamhanan sa Kalibutan nagapasalig sa aton nga nagakabuhi na kita sa tion sang katapusan?

¹¹ Ikaduha, ang Anglo-Amerika, nga ginasimbulo sang mga tiil sang tuman kadaku nga estatwa, amo ang katapusan nga kagamhanan sa kalibutan suno sa tagna sa Biblia. Wala na sing iban pa nga gobierno sang tawo ang magabulos sa sini. Sa baylo, laglagon ini sang Ginharian sang Dios sa Armageddon, lakip ang iban pa nga mga gobierno sang tawo. *—Bug. 16:13, 14, 16; 19:19, 20.

12. Ano pa ang gintagna ni Daniel nga nagahatag sa aton sing paumpaw kag paglaum?

¹² Paano kita makabenepisyo sa sini nga tagna? Ang tagna ni Daniel nagapasalig pa gid sa aton nga nagakabuhi na kita sa tion sang katapusan. Sobra 2,500 ka tuig ang nagligad, gintagna ni Daniel nga pagkatapos sang Babilonia, may apat pa ka kagamhanan sa kalibutan nga magagahom nga may daku nga epekto sa katawhan sang Dios. Gintagna man niya nga ang Anglo-Amerikano nga Kagamhanan sa Kalibutan amo ang mangin katapusan nga kagamhanan. Nagahatag ini sa aton sing paumpaw kag paglaum nga malapit na lang laglagon sang Ginharian sang Dios ang tanan nga gobierno sang tawo kag gamhan sini ang bilog nga duta.—Dan. 2:44.

13. Ano ang ginasimbulo sang “ikawalo nga hari” kag sang “napulo ka hari” nga ginsambit sa Bugna 17:9-12, kag paano natuman ini nga tagna?

¹³ Basaha ang Bugna 17:9-12. Daku gid ang halit sang Bug-os Kalibutan nga Inaway I. Pero bangod sini, natuman ang isa pa ka tagna sa Biblia parte sa katapusan nga mga adlaw. Gusto sang mga manuggahom nga may paghidait sa kalibutan. Gani sang Enero 1920, ginporma nila ang League of Nations. Pero sang Oktubre 1945, ginbuslan ini sang United Nations. Ini nga organisasyon amo ang ginasimbulo sang “ikawalo nga hari.” Pero indi ini kagamhanan sa kalibutan. Kay man, ang gahom sini naghalin sa mga gobierno nga nagasuporta sa sini. Suno sa Biblia, ini nga mga gobierno amo ang ginasimbulo sang “napulo ka hari.”

14-15. (a) Ano ang ginasiling sang Bugna 17:3-5 parte sa “Babilonia nga Daku”? (b) Ano ang ginahimo sang mga nagasuporta sa butig nga relihion?

¹⁴ Basaha ang Bugna 17:3-5. May ginpakita nga palanan-awon ang Dios kay apostol Juan. Nakita ni Juan ang isa ka makihilawason nga babayi nga amo ang “Babilonia nga Daku,” kag nagasimbulo ini sa bug-os kalibutan nga emperyo sang butig nga  relihion. Paano natuman ini nga palanan-awon? Madugay na nga ginasuportahan sang butig nga mga relihion ang mga gobierno. Pero, malapit na lang nga ibutang ni Jehova sa tagipusuon sang mga gobierno “ang paghimo sang iya hunahuna.” Ano dayon ang matabo? Salakayon sang mga gobierno, nga amo ang “napulo ka hari,” ang butig nga mga relihion kag laglagon ini.—Bug. 17:1, 2, 16, 17.

¹⁵ Ngaa masiling naton nga malapit na lang malaglag ang Babilonia nga Daku? Para masabat ini, binagbinaga ang siudad sang Babilonia sang una. Naamligan ini sang mga tubig sang daku nga Suba Eufrates. Sa libro sang Bugna, ginpaanggid sa “mga tubig” ang minilyon ka tawo nga nagasuporta sa Babilonia nga Daku. (Bug. 17:15) Pero ginasugid man sini nga ang mga tubig ‘magahubas.’ Ginapakita sini nga madamo nga tawo ang indi na magsuporta sa bug-os kalibutan nga emperyo sang butig nga relihion. (Bug. 16:12) Nagakatuman gid ini nga tagna subong kay madamo nga tawo ang nagabiya sa butig nga relihion kag nangita sila sang iban nga paagi para masolbar ang ila mga problema.

16. Bangod nahangpan naton ang mga tagna parte sa pagporma sa United Nations kag kon san-o malaglag ang Babilonia nga Daku, ano ang benepisyo sini sa aton?

 ¹⁶ Paano kita makabenepisyo sa sini nga mga tagna? Ang pagporma sa United Nations kag ang pagdiutay sang mga nagasuporta sa butig nga relihion nagapamatuod nga nagakabuhi na kita sa katapusan nga mga adlaw. Pero bisan pa madamo nga tawo ang wala na nagasuporta sa Babilonia nga Daku, indi pa amo sini ang kalaglagan sang butig nga mga relihion. Ginbinagbinag naton kaina nga ibutang ni Jehova sa tagipusuon sang “napulo ka hari,” nga amo ang mga gobierno nga nagasuporta sa United Nations, “ang paghimo sang iya hunahuna.” Makibot gid ang mga tawo kay hinali lang nga laglagon sang mga gobierno ang Babilonia nga Daku. * (Bug. 18:8-10) Maapektuhan gid ang bilog nga kalibutan kon malaglag na ang Babilonia nga Daku, kag posible nga mangin mabudlay gid ang kahimtangan. Pero malipay gid ang katawhan sang Dios bangod sa duha ka rason. Malaglag na sing bug-os ang butig nga relihion nga madugay na nga kaaway ni Jehova nga Dios, kag malapit na lang niya laglagon ining malain nga kalibutan para luwason kita.—Luc. 21:28.

17-18. (a) Paano naton padayon nga mapabakod ang aton pagtuo? (b) Ano ang binagbinagon naton sa masunod nga artikulo?

¹⁷ Gintagna ni Daniel nga “ang matuod nga ihibalo magabugana.” Nagakatuman gid ini subong, kay nahangpan naton ang kahulugan sang mga tagna parte sa aton tion. (Dan. 12:4, 9, 10) Sibu gid nga natuman ini nga mga tagna amo nga mas nagadayaw pa gid kita kay Jehova kag sa iya Pulong. (Isa. 46:10; 55:11) Dapat gid nga mangin mapisan kita sa pagtuon sang Kasulatan kag sa pagbulig sa iban nga mangin suod kay Jehova. Magapabakod ini sang aton pagtuo sa iya. Dapat man kita magsalig sing bug-os sa iya, kay sigurado nga amligan niya kita kag hatagan sing “dayon nga paghidait.”—Isa. 26:3.

¹⁸ Sa masunod nga artikulo, binagbinagon naton ang mga tagna parte sa Cristianong kongregasyon sa tion sang katapusan. Matun-an naton nga ini nga mga tagna nagapamatuod man nga nagakabuhi na kita sa katapusan nga mga adlaw. Kag hibaluon naton ang dugang pa nga pamatuod nga ginapangunahan subong sang aton Hari nga si Jesus ang iya matutom nga mga sumulunod.