1. Wa wi shuor se bout di taim we wi a liv iina, an wa mek?

 WEN yu luk pan wa a gwaan iina di worl tide, yu fain it aad fi tingk se tingz a-go get beta? Fambili no lov dem wan aneda agen laik wan taim. Piipl onggl a tingk bout demself an dem wikid tu dem wan aneda tu. An dem fain it aad fi chos di wan dem we a liid dem. Bot wen wi si dem tingz ya a gwaan wi nuo se tingz a-go get beta. Wi nuo dat kaa piipl a gwaan di siem wie laik ou di Baibl se dem wudaana gwaan “iina di laas die dem.” (2 Tim. 3:1-5) Enibadi kyan riili si se wa di Baibl se did a-go apm a dat a apm fi chuu. An dis mek wi si se Jiizas ton King an staat fi ruul iina Gad Kindom. Dis a jos wan a di wol iip a sitn dem we di Baibl tel wi bout Gad Kindom we a-go apm. It a-go elp wi fi chos iina Gad muor wen wi luk pan som a di ada sitn dem we di Baibl tel wi se a-go apm iina fi wi taim.

2. Wa wi a-go luk pan iina da lesn ya, an wa mek? (Tel wi bout di picha we de pan di kova.)

² Iina da lesn ya, wi a-go luk pan (1) wan a di sitn dem we di Baibl tel wi se a-go apm we elp wi fi nuo wen Gad Kindom staat fi ruul, (2) wa elp wi fi si se Jiizas staat fi ruul iina Gad Kindom iina evn aredi, an (3) wi a-go get fi si ou dem a-go get rid a di wan dem we a fait gens Gad Kindom. Wi a-go si se dem sitn ya we di Baibl se a-go apm, dem lain op laik ou di paat dem fi wan pozl lain op fi mek wi si se wi a liv iina di taim we Jeuova se wi wudaana liv iina ya nou.

3. Di sitn dem we Daniyel 7:13, 14 tel wi bout Gad Kindom, wa dem mek wi shuor se?

³ Wa di Baibl tel wi se wuda apm iina Daniyel 7:13, 14 mek wi nuo se Jiizas Krais a di bes sumadi fi ruul iina Gad Kindom Govament. Piipl fram evri konchri a-go api fi “sorv im,” an nobadi naa go ron im out a powa an tek uova fram im. An wan neda sitn we di Baibl buk a Daniyel did tel wi se a-go apm, a dat Jiizas a-go ton King wen wan lent a taim we dem kaal sevn ier don. Yu tingk wi kyan riili nuo wen Jiizas did ton King?

4. Tel wi ou Daniyel 4:10-17 mek wi nuo di ier wen Jiizas Krais staat fi ruul iina Gad Kindom. (Luk dong a di batam a di piej fi di ansa tu.)

⁴ Riid Daniyel 4:10-17. Di lent a taim we dem kaal “sevn ier” miin 2,520 ier. Da lent a taim de staat iina 607 B.C.E. wen di piipl dem iina Babilan did get rid a di laas king we Jeuova did pik fi ruul iina Jeruusilem. An da lent a taim de don iina 1914 C.E. wen Jeuova mek Jiizas ton King iina Im Kindom, kaa im a di wan we av di rait fi ruul pan di chuon. *​—Izii. 21:25-27.

5. Di lent a taim we dem kaal “sevn ier” we di Baibl taak bout, wa it mek wi shuor se?

⁵ Ou dis we di Baibl se wuda apm kyan elp wi? Wen wi nuo bout di lent a taim we dem kaal “sevn ier” it mek wi fiil gud fi nuo se eniting we Jeuova se a-go apm a dat a-go apm, an it a-go apm di taim wen im se it a-go apm. Jos laik ou im did av wan taim wen di Kindom fi staat ruul, a siem so fi di ada ting dem we im tel wi se a-go apm, im av wan taim fi dem apm tu. Ye man, Jeuova die naa go liet!​—Aba. 2:3.

6. (a) Wa a som a di sitn dem we wi si a gwaan we mek wi nuo se Jiizas Krais staat ruul iina evn? (b) Ou Revilieshan 6:2-8 pruuv se Jiizas Krais staat ruul iina evn?

⁶ Likl bifuo Jiizas did lef di ort an go baka evn, im tel im falara dem som a di sitn dem we dem fi luk out fa fi nuo wen im staat fi ruul iina evn. Som ada sitn we im se wuda apm a das wol iip a waar wudaana gwaan, an piipl wudn av no fuud fi nyam, an wol iip a ortkwiek wudaana gwaan. Im aal se wol iip a piipl wuda get sik bad an ded aaf iina difrant difrant plies, an a dat apm wid KUOVID. An aal a dem sitn ya a paat a wa di Baibl kaal di “sain” we shuo se Jiizas staat ruul. (Mat. 24:3, 7; Luuk 21:7, 10, 11) Muor dan 60 ier afta Jiizas ded an go bak a evn, im did mek di apasl Jan nuo se dem sitn ya riili wuda gwaan. (Riid Revilieshan 6:2-8.) Aal a dem sitn ya apm sins Jiizas ton King iina 1914.

7. Wa mek a wen Jiizas staat fi ruul wi staat av so moch chobl pan ort?

⁷ Wa mek a wen Jiizas ton King tingz staat fi get wosara pan ort? Revilieshan 6:2 mek wi si se wen Jiizas jos ton King im fait gens Sietan an im diiman dem. An azkaadn tu Revilieshan chapta 12, Sietan an im diiman dem luuz da waar de an get fling dong a ort. So kaa a dat Sietan beks bad an staat kaaz bier ‘chobl fi aal a uu liv pan ort.’​—Rev. 12:7-12.

8. Ou it kyan elp wi wen wi get fi si se di sitn dem we di Baibl se wuda apm wen Jiizas staat ruul, a apm fi chuu?

⁸ Ou dem sitn ya we di Baibl se wuda apm kyan elp wi? Bies pan we wi si a gwaan iina  di worl ya nou, an ou piipl a gwaan mek wi si se Jiizas ton King aredi. So insted-a beks op wiself kaa piipl onggl a tingk bout demself an dem no lov nobadi, wi fi memba se dem sitn ya a mek wi si se wa di Baibl se did a-go apm a apm fi chuu. Ye man, Gad Kindom a ruul ya nou! (Sa. 37:1) An wi kyan ekspek se tingz a-go get wosara kaa Aamagedan suun kom. (Maak 13:8; 2 Tim. 3:13) No chuu se wi glad se wi Faada we op iina evn we lov wi mek wi nuo wa mek dem wikid sitn ya a gwaan!

9. We Daniyel 2:28, 31-35 se di laas govament we a-go ron tingz iina di worl komiin laik, an a wen it did staat fi ron tingz iina di worl?

⁹ Riid Daniyel 2:28, 31-35. Di siem ting dem we Nebikadneza si se wuda apm, a apm nou “iina di laas die dem” wen Jiizas Krais staat fi ruul. Wen Daniyel taak bout di fut paat a di stachu we mek outa aiyan an klie, a tel im did a tel wi bout Jiizas enimi we mek op a tuu govament we kom tugeda laka wan govament fi ron tingz iina di worl. Dis wuda bi di laas wan fi ron tingz iina di worl. An dis apm wen Worl Waar 1 did gwaan wen Britn an Merika jain op tugeda fi ron tingz iina di worl. Di stachu we Nebikadneza did si iina im jriim mek wi nuo tuu ada ting bout da govament ya we a ron tingz iina di worl an we difrant fram di wan dem bifuo it.

10. (a) Wa Daniyel did tel wi se wuda apm we wi si a gwaan wid Britn an Merika we a ron tingz iina di worl ya nou? (b) Wa wi fi mek shuor se wi no du? (Luk pan di paat we niem “ Mek Shuor Fi No Tek Said Wid Di Klie!”)

¹⁰ Di fos ting a das aal a di ada govament dem we did a ron tingz we di vijan  did tel wi bout bifuo, fi dem paat a di stachu did mek op a wan ting laik a guol ar silva, bot Britn an Merika we a ron tingz ya nou a di aiyan miks op wid klie. An di klie miin di naamal piipl dem we no iina govament. (Dan. 2:43) Wi si dis wid di piipl we a fait fi di piipl dem raits, so it mek di govament dem kyaahn get fi du evriting wa dem wuda waahn fi du.

11. Kaa Britn an Merika a ron tingz iina di worl ya nou, ou dis mek wi shuor se wi a liv iina di laas die dem?

¹¹ Di sekan ting a das di fut paat a di stachu, we miin Britn an Merika, dem a di laas wan dem we a-go ron tingz iina di worl. Nobadi els naa go tek uova fram dem. An den wa a-go apm a das Gad Kindom Govament a-go get rid a dem an aal a di res a di govament dem iina di Aamagedan waar. *​—Rev. 16:13, 14, 16; 19:19, 20.

12. Wa els di buk a Daniyel taak bout we mek wi fiil gud an mek wi nuo se tingz suun get beta?

¹² Ou dis we di Baibl se wuda apm kyan elp wi? Di buk a Daniyel tel wi bout som ada tingz we wuda apm we mek wi nuo se wi iina di laas die dem. Laik wa it se uova 2,500 ier ago, se a no onggl Babilan wuda bi wan govament we ron tingz iina di worl bot it se fuor ada govament wuda dwi’it afta dem an dem wuda av sitn fi du wid Gad piipl dem. Pan tap a dat Daniyel mek wi nuo uu wuda bi di laas govament fi ron tingz iina di worl, an dat a Britn an Merika wen dem a wok tugeda laik wan govament fi ron tingz. Dis mek wi fiil gud fi nuo se suun suun Gad Kindom Govament a-go get rid aal a dem govament ya we a ron tingz pan ort.​—Dan. 2:44.

13. Iina Revilieshan 17:9-12, a wa dem kaal “king nomba iet” an wa dem kaal di “ten king” an ou wi si se dis did apm fi chuu?

¹³ Riid Revilieshan 17:9-12. Di Baibl did tel wi bout wan neda sitn we wuda apm iina di laas die dem. An wi si dis wen aal a di liida dem we de iina di worl did du sitn so dat di konchri dem we iina di worl kuda chrai liv iina piis wid dem wan aneda, kaaz a bier bad sitn did apm wen Worl Waar 1 did a gwaan. So iina Janiweri 1920, dem mek op wan aaganaizieshan we niem Liig A Nieshan, an den lietaraan iina Aktuoba 1945 dem mek op wan nyuu wan we niem Yuunaitid Nieshan. Da aaganaizieshan ya we dem set op di Baibl kaal it “king nomba iet,” aalduo it difrant fram di govament dem we ron tingz iina di worl. An it av wol iip a powa kaa it av di bakitiv a aal a di big konchri dem iina di worl. Wen di Baibl a taak bout dem big konchri ya, it kaal dem “ten king.”

14-15. (a) Wa Revilieshan 17:3-5 mek wi nuo bout Powaful Babilan? (b) Wa de apm tu di rilijan dem we naa worship Gad di rait wie?

¹⁴ Riid Revilieshan 17:3-5. Gad did mek di apasl Jan si wan vijan. Iina da vijan de im si wan uor we niem “Powaful Babilan.” Dis av fi du wid aal a di rilijan dem we naa worship Gad di rait wie. Wa da vijan ya a mek wi nuo se a dat di rilijan dem we naa worship Gad di rait wie a miks op iina palitiks fram lang taim, an dem a du tingz fi shuo se dem a bles di difrant difrant govament dem we de iina di worl. Bot suun suun Gad a-go put it iina di aat a di ruula dem fi du wa “im waahn dem fi du” so dat aal a di govament dem​—dat a di “ten king”​—a-go ton pan di rilijan dem we naa du wa Gad waahn dem fi du an get rid a dem.​—Rev. 17:1, 2, 16, 17.

 ¹⁵ Ou wi nuo se dem suun get rid a Powaful Babilan? Fi ansa da kwestiyan ya wi afi memba se Babilan bak iina di diez did av wan big riva we niem di Yuufrietiiz Riva we ron roun it an a so di piipl dem we liv de kuda kip sief. Di Baibl buk a Revilieshan did tel wi se a wol iip a miliyan a piipl wuda a bak Powaful Babilan so notn kyaahn apm tu it. It se dem wuda komiin laik “waata.” (Rev. 17:15) Bot it mek wi nuo se dem sed waata de wuda “jrai op.” So wi si se di wol iip a piipl dem we a bak dem a-go tap bak dem. (Rev. 16:12) Jos laka wa di Baibl se, wol iip a piipl tap go a choch an staat fi du ada tingz fi fain out bout laif an ou fi diil wid dem prablem dem.

16. Wen it kom aan tu ou di Yuunaitid Nieshan wuda kom bout an ou Powaful Babilan a-go get mash op, ou wa di Baibl se wuda apm kyan elp wi?

¹⁶ Ou dem sitn ya we di Baibl se wuda apm kyan elp wi? Wi kyan si se wi liv iina di laas die dem nou kaa di Yuunaitid Nieshan de bout, an di wol iip a piipl we did a bak di rilijan dem we naa worship Gad di rait wie a tek taim tek we demself fram dem. Iivn  duo nof piipl tap go a dem choch ya, a no dis a-go get rid a di choch dem. Jos laik wa wi lorn bifuo a Jeuova a-go put it iina di aat a di “ten king”, dat a di govament dem we a bak di Yuunaitid Nieshan, fi du wa “im waahn dem fi du.” Dem govament de a-go get rid a di rilijan dem we naa worship Gad di rait wie so kwik das piipl a-go shak so til. * (Rev. 18:8-10) Wen dem get rid a Powaful Babilan it a-go kaaz nof prablem fi piipl, bot Gad piipl dem naa go fret, dem a-go api kaa fi wan ting: a lang taim Powaful Babilan a fait gens Jeuova, so Gad piipl a-go api se shi naa go de bout agen. An di sekan ting a das wen wi si se dem gaan wi nuo se Jeuova suun frii wi fram da wikid worl ya!​—Luuk 21:28.

17-18. (a) Wa wi kyan gwaan du fi mek wi fiet get chrangga? (b) Wa wi a-go luk pan iina di neks lesn?

¹⁷ Daniyel did se iina fi wi taim “wol iip a piipl a-go chrai aad fi fain out wa Gad wod a se; an da chuut de we de iina Gad Wod wol iip a piipl a-go get fi nuo it.” An a chuu dat! Kaa nou wi get fi andastan wol iip a tingz bout wa di Baibl se a-go apm iina fi wi taim. (Dan. 12:4, 9, 10) Kaa evriting we di Baibl se a-go apm apm fi chuu it mek wi chos Jeuova an di sitn dem we di Baibl se muor. (Aiz. 46:10; 55:11) So mek wi gwaan stodi Gad Wod an elp ada piipl fi kom worship Jeuova tu, kaa wen wi du dem sitn ya wi fiet a-go get chrangga. An wen wi gwaan put wi chos iina Jeuova, im a-go protek wi an im a-go gi wi piis kyaahn don.​—Aiz. 26:3.

¹⁸ Iina di neks lesn, wi a-go luk pan wa di Baibl se wuda apm tu di chuu Kristiyan dem we a liv iina di laas die dem. Wi a-go si se dem sitn de we di Baibl se wuda apm lain op wid evriting we di Baibl se a-go apm iina di laas die dem. Wi a-go si som ada tingz we shuo wi se fi wi King Jiizas Krais, a liid im piipl dem ya nou.