1. Otu na oushili ulipi, nomolwashike?

 NGEENGE hatu tale keenghalo odo di li mounyuni kunena, mbela ohatu mono shidjuu okukala tu na etaleko liwa? Oilyo yomaukwaneumbo kai holafane vali ngaashi nale. Ovanhu mounyuni ova ninga ovahandunhu neenghono, ve lihole vo vene novakwanyanya. Vahapu ohava mono shidjuu okulineekela ovapangeli. Ashike eenghalo edi otadi dulu oku tu pa eteelelo kutya oinima otai ka xwepopala. Omolwashike mbela? Omolwaashi ovanhu ohava katuka naanaa ngaashi sha popiwa mexunganeko lididilikwedi li na sha “nomafiku axuuninwa.” (2 Tim. 3:1-5) Ewanifo lexunganeko olo itali dulu okupatanekwa kovanamitimadiwa, ola yandja oumbangi kutya Kristus Jesus okwa hovela okupangela, e li Ohamba yOuhamba waKalunga. Ndele olo olimwe ashike lomomaxunganeko mahapu e na sha nOuhamba. Eitavelo letu otali ka pamekwa eshi hatu ka kundafana omaxunganeko amwe, oo a kala nokuwanifwa omido opo da di ko.

2. Oshike hatu ka kundafana moshitukulwa eshi, nomolwashike? (Tya sha shi na sha nefano lokombada.)

² Moshitukulwa eshi, ohatu ka kundafana (1) exunganeko olo tali ke tu kwafela tu mone kutya Ouhamba waKalunga owa dikwa po, (2) omaxunganeko oo tae tu kwafele tu mone okukala po kwaJesus, e li Ohamba yOuhamba waKalunga nosho yo (3) omaxunganeko oo taa holola nghee ovatondi vOuhamba waKalunga tava ka xulifwa po. Ohatu ka mona yo kutya omaxunganeko oo otaa tu kumwe filufilu. Ngaashi ashike omuhondji ta dulu okutula kumwe outukulwa voshiyata va yoolokafana, opo a ete po oshikutu she lixwa po, omaxunganeko a yoolokafana, oo hatu ka kundafana, nao otae ke tu  kwafela tu mone filufilu kutya otu li peni mefimbolandulafano laJehova loiningwanima.

3. Exunganeko olo li li muDaniel 7:13, 14, otali tu shilipaleke shike shi na sha nOhamba yOuhamba waKalunga?

³ Exunganeko olo tali hangwa muDaniel 7:13, 14, otali tu shilipaleke kutya Kristus Jesus ota ka ninga Omupangeli wOuhamba waKalunga a denga mbada. Ovanhu vomoiwana aishe otave ke mu ‘longela’ nehafo noke na fiku a pingenwe po e li Omupangeli. Exunganeko likwao, olo li li membo laDaniel, ola xunganeka kutya Jesus ota ka pewa Ouhamba pexulilo lomafimbo aheyali oo a xunganekwa. Ndele mbela ohatu dulu ngoo okushiiva kutya Jesus okwa ninga Ohamba naini?

4. Yelifa nghee Daniel 4:10-17 te tu kwafele tu mone kutya Kristus okwa ninga Ohamba naini. (Tala yo eshangelo lopedu.)

⁴ Lesha Daniel 4:10-17. ‘Omafimbo aheyali’ otaa ulike komido 2 520. Efimbo olo ola hovela momudo 607 K.O.P., eshi Ovababilon va li va umba ko koshipundi ohamba yaxuuninwa kolukalwapangelo laJehova muJerusalem. Efimbo olo ola xulila mo 1914 O.P., eshi Jehova a nangeka po Jesus, oo “a wana,” e li Ohamba yOuhamba waKalunga. * — Hes. 21:25-27.

5. Omonghedi imwe ilipi omo hatu dulu okumona ouwa mexunganeko li na sha “nomafimbo aheyali”?

⁵ Ongahelipi hatu dulu okumona ouwa mexunganeko olo? Okukala tu shii shi na sha “nomafimbo aheyali” otaku tu shilipaleke kutya Jehova ota ka wanifa po omaudaneko aye peufwafimbo. Ngaashi ashike a tula po efimbo la wapala li na sha nokudikwa po kwOuhamba waye, ota ka wanifa po yo omaxunganeko aeshe makwao metwokumwe nefimbolandulafano laye. Onghee efiku laJehova “itali kala ko.” — Hab. 2:3.

6. (a) Oumbangi u liwetikile ulipi tau ulike kutya Jesus okwa ninga Ohamba meulu? (b) Ongahelipi oumbangi oo wa kolekwa kexunganeko olo li li mEhololo 6:2-8?

⁶ Lwopexulilo loukalele waye, Jesus okwa li a xunganeka kombinga yoiningwanima imwe oyo ya li tai ka kwafela ovashikuli vaye va mone kutya okwa hovela okupangela meulu. Imwe yomoinima oyo ongaashi oita, ondjala nosho yo omakakamo edu. Okwa li yo a xunganeka otaku ke uya omikifi dolutapo, odo tadi ka holoka “keembinga neembinga.” Omukifi wekomba o-COVID-19, oo opo wa holoka efimbo opo la di ko, ou li umwe womomikifi odo. Oiningwanima oyo oi li oshitukulwa yaasho sha popiwa mOmbiibeli shi li “edidiliko” lokukala po kwaKristus. (Mat. 24:3, 7; Luk. 21:7, 10, 11) Omido di dulife po 60, okudja eshi Jesus a fya nokwa shuna meulu, okwa li a pa omuyapostoli Johannes eshilipaleko la wedwa po kutya oiningwanima oyo otai ka holoka. (Lesha Ehololo 6:2-8.) Oiningwanima aishe oyo oya li ya holoka okudja eshi Jesus a nangekwa po mo 1914, e li Ohamba yOuhamba waKalunga.

7. Omolwashike oinima ihapu ii ya hapupala kombada yedu okudja eshi Jesus a ninga Ohamba?

⁷ Omolwashike eenghalo da naipala okudja eshi Jesus a ninga Ohamba? Ehololo 6:2 otali tu pe ouyelele wa fimana. Oshinima shotete osho Jesus a ninga, eshi a ninga Ohamba yOuhamba waKalunga, okwa li a lwa oita. Okwa lwifa lyelye? Okwa lwifa Ondiaboli neendemoni dayo. Metwokumwe nEhololo 12, Satana okwa li a findwa molwoodi nokwa umbilwa kombada yedu pamwe neendemoni daye. Omolwehandu laye, Satana okwa handukila  ovanhu naasho osha etifa ‘owoo kedu.’ — Eh. 12:7-12.

8. Ongahelipi hatu dulu okumona ouwa, eshi tu wete omaxunganeko e na sha nOuhamba taa wanifwa?

⁸ Ongahelipi hatu dulu okumona ouwa momaxunganeko aa? Oiningwanima yomounyuni nosho yo elunduluko lididilikwedi li na sha noikala yovanhu otai tu kwafele tu mone kutya Jesus okwa ninga Ohamba. Onghee hano, ponhele yokukala twa nyika oluhodi ngeenge tu wete ovanhu ve lihole vo vene nove na outondwe, natu dimbuluke kutya eenghatu davo otadi wanifa po exunganeko lOmbiibeli. Ouhamba waKalunga owa dikwa po! (Eps. 37:1) Eshi Harmagedon ta ehene popepi elela, otwa teelela eenghalo didjuu di hapupale mounyuni. (Mark. 13:8; 2 Tim. 3:13) Otwa pandula neenghono eshi Tate wetu womeulu omunahole te tu kwafele tu ude ko kutya omolwashike mounyuni ou mu yadi omaupyakadi mahapu.

9. Exunganeko olo li li muDaniel 2:28, 31-35, ola yelifa ngahelipi epangelo laxuuninwa enaenghono mounyuni, nola hovela okupangela naini?

⁹ Lesha Daniel 2:28, 31-35. Otu wete nghee exunganeko olo tali wanifwa kunena. Ondjodi yaNebukadnesar oya ulika osho sha li tashi ka ningwa po “pomafiku axuuninwa,” konima eshi Kristus a hovela okupangela. Ovatondi vaJesus vokombada yedu ova kwatela mo epangelo laxuuninwa enaenghono mounyuni, olo la xunganekwa mOmbiibeli tali ulikwa ‘keemhadi doshivela nodelova.’ Epangelo olo enaenghono lomounyuni otali pangele nale. Ola hovela okupangela pOita yOtete yOunyuni, eshi Britain nosho yo United States ve limanga oukuni kumwe, ovayambididi vEpangelo lOpamuhanga laAmerica. Ondjodi yaNebukadnesar i na sha noshihongwafano  oya xunganeka yo oinima ivali i na sha nepangelo enaenghono mounyuni oyo tai li yoolola ko komauhamba oo a tetekela.

10. (a) Oshike tu wete kunena shi na sha nepangelo laAmerica lopamuhanga osho tashi tu kumwe nexunganeko laDaniel? (b) Oinima ilipi ya nyika oshiponga tu na okulungamena? (Tala oshimhungu “ Kala wa lungamena elova”)

¹⁰ Shotete, mepingafano nomapangelo omanaenghono omounyuni oo a tumbulwa memoniko, ovayambididi vEpangelo lOpamuhanga laAmerica ove li lwe po koshivela sha lumbakanifwa nelova, ndele hakoshingoli, ile koshisilveri. Elova otali ulike ‘kovanhu va lumbakana,’ ile ovanhu vongaho. (Dan. 2:43) Ngaashi shi liwetikile kunena, enwefemo lavo momahoololo, moikonga i na sha noufemba wovanhu, momakangha nosho yo momahangano e na sha noilonga, ola imba Epangelo Enaenghono mOunyuni liha tule moilonga omifindalandu dalo.

11. Ongahelipi okupangela kwEpangelo lOpamuhanga Enaenghono mOunyuni laAmerika naBritain taku pameke elineekelo letu kutya otu li momafiku axuuninwa?

¹¹ Oshitivali, Anglo-America, epangelo olo li lilwe po keemhadi doshihongwafano ola xunganekwa mOmbiibeli kutya olo tali ka kala epangelo laxuuninwa enaenghono mounyuni. Itali ka shikulwa vali kepangelo limwe lopapolotika. Ponhele yaasho, otali ka xulifwa po puHarmagedon, eshi tali ka nyanyaulwa po pamwe nomapangelo makwao aeshe opanhu kOuhamba waKalunga. * — Eh. 16:13, 14, 16; 19:19, 20.

12. Exunganeko laDaniel otali tu pe oumbangi wa wedwa po ulipi, oo tau tu hekeleke noku tu pa eteelelo?

¹² Ongahelipi hatu dulu okumona ouwa mexunganeko olo? Exunganeko laDaniel ola yandja ouyelele wa wedwa po, oo tau ulike kutya otu li pefimbo lexulilo. Omido di dulife 2 500 da ka lupuka, Daniel okwa xunganeka kutya konima yaBabilon, omapangelo makwao ane omanaenghono mounyuni otaa ka hepeka oshiwana shaKalunga. Shikwao vali, okwa holola kutya Epangelo lOpamuhanga lOmounyuni laAmerika, olo tali ka kala laxuuninwa komapangelo oo. Osho otashi tu hekeleke noku tu pa elineekelo kutya mafiku Ouhamba waKalunga otau ka xulifa po omapangelo aeshe opanhu notau ka pangela edu alishe. — Dan. 2:44.

13. “Ohamba onhihetatu” nosho yo “eembinga omulongo,” odo da tumbulwa mEhololo 17:9-12, otadi faneke shike, nongahelipi exunganeko olo la kala nokuwanifwa?

¹³ Lesha Ehololo 17:9-12. Ehanauno olo la li la etwa kOita yOtete yOunyuni ola li la wanifa po vali exunganeko limwe lOmbiibeli li na sha nomafiku axuuninwa. Ovapangeli vomounyuni ova li va hala okweeta ombili mounyuni. Onghee hano, muJanuali 1920, ova li va tota po Oshipandi shOiwana osho sha ka pingenwa po kOiwana ya Hangana muOktoba 1945. Ehangano olo ohali ifanwa “ohamba onhihetatu.” Ashike kali fi epangelo enaenghono lomounyuni. Eenghono dalo nosho yo enwefemo lalo ohali di komapangelo opapolotika, oo hae li yambidida. Ombiibeli oya ifana omapangelo oo e li “eehamba omulongo.”

14-15. (a) Ehololo 17:3-5 ola popya shike shi na sha naBabilon shinene? (b) Oshike tashi ningwa po shi na sha nokuyambidida elongelokalunga loipupulu?

¹⁴ Lesha Ehololo 17:3-5. Memoniko olo Johannes a ulikilwa kuKalunga okwa mona ombwada, ile tu tye “Babilon Shinene,” oyo tai faneke ouhamba womounyuni womalongelokalunga oipupulu. Emoniko olo ola wanifwa ngahelipi? Omahangano e na sha nelongelokalunga loipupulu okwa kala taa longele kumwe filufilu nomapangelo omanaenghono omounyuni noku a yambidida. Ashike mafiku Jehova ote ke linyengifa omapangelo opapolotika, opo a “wanife po elalakano  laye.” Otashi ka eta oidjemo ilipi? Omapangelo opapolotika, ile tu tye “eembinga omulongo,” otaa ka pilukila po omahangano omalongelokalunga oipupulu noku a hanauna po. — Eh. 17:1, 2, 16, 17.

¹⁵ Otu shi shii ngahelipi kutya ehanauno laBabilon Shinene oli li popepi? Opo tu mone enyamukulo olo, oshiwa okudimbuluka kutya oshilando shaBabilon shonale osha li sha amenwa komeva mahapu male omulonga waEufrat. Embo lEhololo ola yelekanifa ovayambididi omamiliyona vaBabilon Shinene ve li ngaashi “omeva” eameno. (Eh. 17:15) Ashike ola popya yo kutya omeva oo otaa ka ‘pwiinina,’ osho tashi ulike kutya ouhamba womounyuni womalongelokalunga oipupulu otau ka kanifa ovayambididi vahapu. (Eh. 16:12) Exunganeko olo otali wanifwa, molwaashi ovanhu vahapu kave na vali ohokwe melongelokalunga loipupulu nohava i keenhele dimwe, opo va ka mone ekandulepo lomaupyakadi avo.

16. Ongahelipi hatu dulu okumona ouwa mokukala neudeko li na sha nomaxunganeko e na sha nokutotwa po kwOiwana ya Hangana nokuxulifwa po kwaBabilon Shinene?

¹⁶ Ongahelipi hatu dulu okumona ouwa momaxunganeko  oo? Okutotwa po kwOiwana ya Hangana nosho yo oushili oo kutya vahapu itava yambidida vali elongelokalunga loipupulu otaku ulike kutya otu li momafiku a xuuninwa. Nonande ovanhu vahapu itava yambidida vali Babilon Shinene, osho hasho tashi ningifa omahangano oo taa yambidida elongelokalunga loipupulu a hanaunwe po. Ngaashi sha popiwa metetekelo, Jehova okwe shi tula momitima ‘deehamba omulongo,’ sha hala okutya momapangelo oo taa yambidida Oiwana ya Hangana, opo a “wanife po elalakano laye.” Oiwana oyo otai ka hanauna po ombaadilila Babilon Shinene naasho otashi ka kumwifa ounyuni. * (Eh. 18:8-10) Ehanauno laBabilon Shinene otali ka kuma neenghono ounyuni aushe notali ka etifa omaudjuu mahapu, ashike oshiwana shaKalunga otashi dulu okukala sha hafa omolwomatomheno opavali. Elongelokalunga loipupulu olo li li omutondi waJehova Kalunga, olo la kala ko nale, itali ka kala po vali. Konima yaasho ohatu ka mangululwa mounyuni ou woukolokoshi. — Luk. 21:28.

17-18. (a)Ongahelipi hatu dulu okutwikila okupameka eitavelo letu? (b) Oshike hatu ka kundafana moshitukulwa tashi shikula ko?

¹⁷ Daniel okwa xunganeka kutya ‘eendunge’ otadi “ka hapupala,” naasho osho tashi ningwa. Paife otu udite ko omaxunganeko oo e na sha nefimbo letu. (Dan. 12:4, 9, 10) Eudeko lashili li na sha nomaxunganeko oo, ole tu ningifa tu fimaneke Jehova nosho yo Eendjovo daye da nwefwa mo. (Jes. 46:10; 55:11) Onghee twikila okupameka eitavelo loye mokukonakona noukeka Omishangwa nokukwafela vamwe va kale ve na ekwatafano lopofingo naJehova. Ota ka amena aveshe ovo ve mu lineekela filufilu note ke va pa “ombili” tai kalelele. — Jes. 26:3.

¹⁸ Moshitukulwa tashi shikula ko, ohatu ka kundafana omaxunganeko e na sha neongalo lopaKriste pefimbo letu momafiku axuuninwa. Ngaashi hatu ke shi mona, omaxunganeko oo otaa tu kumwe filufilu nomaxunganeko e na sha nomafiku axuuninwa. Ohatu ka tala yo koumbangi wa wedwa po, oo tau ulike kutya Jesus, oo e li Ohamba yetu tai pangele, ota wilike ovashikuli vaye ovadiinini.