1. Bika bituzibuka, co mwafwa bika?

 KUMA byuma byabibi byalisala mu kaye ano matangwa, bikamilingisa mujeneke kukulahela ngweni byuma bikakala mwamubwa kulutwe ndi? Banu mu binaanga kubesi na kulizema umo na mukwabo ngwe mukwafwililile kunima. Bilinga bya banu bya kufwa ngwe bukenya na kulishaka manene bakebo babenya bili na kulibwezelela manene. Banu babangi kukabakaluwila kukulahela baje bali na moko. Oloni ebi bene byuma byasa kumilingisa mukulahele ngweni byuma bikakala mwamubwa kulutwe. Bika twendekela ngoco? Mwafwa bibali na kulinga banu binalitombola na byuma biyapolofwetele Mbimbiliya ngwayo bikebyo bibakalinga mu “matangwa a kukotoka.” (2 Tima 3:1-5) Na umo wahi asa kubyana kulishulisilila kwobu bupolofweto, co kulishulisilila kwabwo, kumwesa ngwabo Yesu Kilistu nashangumuka kuyula mu Bumwene bwa Njambi. Oloni kuli bupolofweto bwabwingi bukwabo buje bwendeka ha Bumwene bwa Njambi. Kusimutwiya ha bupolofweto buje bunalishulisilila, kukanyamesa likulahelo lyetu.

2. Bika bitusimutwiya muno mu cilongesa, co mwafwa bika? (Endekeni ha cikupulo cili ha liputa lya kulibanga.)

² Muno mu cilongesa tusimutwiya ha byuma bitatu (1) bupolofweto buje butukwasa tuzibuke habwashangumukilile kuyula Bumwene bwa Njambi, (2) bupolofweto buje butulingisa tukulahele ngwetu Yesu nashangumuka kuyula mu Bumwene bwa Njambi mwilu, (3) bupolofweto buje bumwesa mubakanyongesela bitozi ba Bumwene bwa Njambi. Tumona mubulitombwelamo obu bupolofweto mangana tuzibuke habyendela byuma byanapolofweta Yehova.

3. Bupolofweto buli ku mukanda wa Ndanyele 7:13, 14 butulingisa tukulahele bika kutalesa ku Mwene wa Bumwene bwa Njambi?

³ Bupolofweto buli ku mukanda wa Ndanyele 7:13, 14 butukwasa tukulahele ngwetu Yesu Kilistu ikeye nafwila kupwa Mwene wa Bumwene bwa Njambi. Banu ba mu mafuti oshe ‘bakamupangela’ mu kubwahelela, co na umo wahi akamwinga. Bupolofweto bukwabo buli ku mukanda wa Ndanyele bwamwesele ngwabwo Yesu akashangumuka kuyula mu Bumwene ku mamaneselelo a bisimbu 7. Kuma twasa kuzibuka simbu yashangumukile Kuyula Yesu ndi?

4. Mukanda wa Ndanyele 4:10-17 utukwasa bati kuzibuka mwaka washangumukile kuyula Kilistu mu Bumwene bwa Njambi (Taleni lalo na majwi a kwinikila.)

⁴ Tandeni Ndanyele 4:10-17, NWT. “Bisimbu 7” bimanena myaka 2,520. Ei simbu yashangumukile mu mwaka wa 607 B.C.E. omwo Bambambilone batundisile mwene wa mamaneselelo ha litanda mu Yelusalema. Co ei simbu yahwile mu 1914 C.E. omwo Yehova walingisile Yesu ‘uje yanangula,’ kupwa Mwene wa Bumwene bwa Njambi. *—Ezeki 21:25-27.

5. Bupolofweto bwa “bisimbu 7” butukwasa mu ngila muka?

⁵ Obu bupolofweto butukwasa bati? Kuzibisisa bupolofweto bwa “bisimbu 7” kutulingisa tukulahele ngwetu Yehova akashulisilila byanakulahesa ha simbu inapande. Ngeci twakulahela ngwetu akashulisila na bupolofweto bukwabo ha simbu yananoneka. Cili bene, Litangwa lya Yehova ‘kulikeshwala embwe.’—Hamba 2:3.

6. (a) Bika bili na kumwesa ngwabyo Kilistu ali na kuyula mwilu? (b) Ebi byuma binalitombola bati na majwi ali ku mukanda wa Kujombolola 6:2-8?

⁶ Kumamaneselelo a buyoye bwendi bwa hano hasi, Yesu wendekele byuma bimo bikalingiwa mu kaye, bije bikakwasa baka-kumukabangeya bazibuke ngwabo nashangumuka kuyula mwilu. Byuma bimo byendekeleko byapwile binzita, njala na mandunduma. Wapolofwetele lalo ngwendi kukakala mishongo ku mitambela ya kuliseza-seza. Cakumwenako, twalimwena mushongo wa COVID-19 muunayandesa banu. Ebi byuma bikebyo biyendeka Mbimbiliya ngwayo “cizibukiso” ca kukalako kwa Kilistu. (Mateo 24:3, 7; Luka 21:7, 10, 11) Co mukwetile myaka ya kutubakana 60 kutunda hatsililile na kwiluka mwilu, Yesu wamwesele kapositolo Yowano bukaleho buje bwamwesele ngwabo ebi byuma bikasholoka. (Tandeni Kujombolola 6:2-8.) Co byashangumukile kusholoka Yesu mwashangumukile kuyula mu 1914.

7. Mwafwa bika kayando kanatumu manene mu kaye kushwa hashangumukilile Yesu kuyula?

⁷ Mwafwa bika byuma binabihya manene mu kaye kushwa hashangumukilile Yesu kuyula? Mukanda wa Kujombolola 6:2 utulekako cuma cimo ca seho manene citukwasa tuzibuke cikumbululo. Umwesa ngwawo cuma cakulibanga calingile Yesu mwapwile Mwene, capwile kulwa nzita. Walwile na beya? Walwile na Liyabolo na Bandemone bendi. Mukanda wa Kujombolola capita 12, umwesa ngwawo Satana bamuhyanene, co bamumbilile hano hasi na bandemone bendi. Satana walubalele  manene, co washangumukile kunena “tuyando hano hasi.”—Kujo 12:7-12.

8. Kulimwena mubuli na kulishulisilila bupolofweto bwa kukundama ku Bumwene kuli na kutukwasa bati?

⁸ Obu bupolofweto butukwasa bati? Byuma bili na kulingiwa mu kaye na bilinga bya banu ano matangwa bimwesa ngwabyo Yesu nashangumuka kuyula. Ngeci, kutwapandele kulubala nga tumona banu balinga byuma byabibi. Oloni tunapande kwanuka ngwetu bali na kushulisilila bupolofweto bwa mu Mbimbiliya. Bumwene buli na kuyula! (Myaso 37:1) Co twakulahela ngwetu bubi bulibwezelela manene omwo tuli na kushwenya ku nzita ya Alamagidoni. (Mako 13:8; 2 Tima 3:13) Twakandelela manene kuli Tate yetu wa mwilu uje watuzema mwafwa natukwasa tuzibuke byuma bili na kulingisa bubi bulibwezelele manene.

9. Ciyulo muka camamaneselelo cibanamwesa ku Ndanyele 2:28, 31-35, co cashangumukile kuyula mwaka uka?

⁹ Tandeni Ndanyele 2:28, 31-35. Tuli na kulimwena mubuli na kulishulisilila obu bupolofweto. Cilota ca Nebukataneza camwesele byuma bikalingiwa “kulutwe” Kilistu mwakashangumuka kuyula. Bitozi ba Yesu ba hano hasi banambateselela bumwene bwa nzili bubapolofwetele mu Mbimbiliya buje bwimanena “mendi a cikubo na buma.” Eci ciyulo cashangumuka kuyula. Cashangumukile kuyula mu Nzita ya Kaye Yamucibali omwo lifuti lya Britain na lifuti lya United States lyashangumukile kulikwatasana na kumunga ciyulo ca Anglo-America. Cilota ca kamponya calotele Nebukataneza casholwele lalo byuma bibali bije bilingisa eci ciyulo ciliseze na biyulo bikwabo.

10. (a) Byuma muka bili na kulingiwa ku ciyulo ca Anglo-America bibapolofwetele ku mukanda wa Ndanyele? (b) Byuma muka bije kutwapandele kulinga? (Taleni cipalo ca “ Keti Mulikwatasane na Buma.”)

 ¹⁰ Cakulibanga, ciyulo ca kaye ca nzili ca Anglo-America caliseze na biyulo bikwabo mwafwa cikeco kubacesekesele ku cikubo, ku ngolinde nambe ku siliba. Oloni banacesekesa ku cikubo ca kulikumbasana na buma. Buma bwimanena “bana ba banu” nambe banu nkala. (Ndanye 2:43, NWT) Cibunga ca kulwila lisesa lya banu, cibunga ca kulwila lisesa lya baka-kupanga, na baka-bupolitiki, bali na kwonowesa eci ciyulo ca kaye ca nzili kushulisilila biyongola byaco.

11. Mwafwa bika ciyulo ca kaye ca nzili ca Anglo-America citulingisa tukulahele ngwetu tuli mu matangwa a kukotoka?

¹¹ Camucibali, mendi a kamponya wakama emanena Anglo-America. Ngeci, eci ciyulo ca nzili ca kaye cikeco camamaneselelo cibapolofwetele mu Mbimbiliya. Kukwesi ciyulo cikwabo ca kaye cikenga ei fulumende ya nzili. Oloni Bumwene bwa Njambi bukebwo bukanyongesa eci ciyulo ca nzili na bifulumende bikwabo ha nzita ya Alamagidoni. *—Kujo 16:13, 14, 16; 19:19, 20.

12. Bupolofweto muka bukwabo buje buli ku mukanda wa Ndanyele buje butuzembeleka na kutwana lilabelelo?

¹² Obu bupolofweto butukwasa bati? Bupolofweto bwa Ndanyele butumwesa byuma bikwabo bije bimwesa ngwabyo tuli na kuyoya mu matangwa a kukotoka. Myaka ya kutubakana 2,500 kunima, Ndanyele wapolofwetele ngwendi munima ya ciyulo ca Mbambilone, kukaija biyulo bya kaye bya nzili biwana bije bikayula banu ba Njambi. Kutundaho, wendekele ngwendi ciyulo ca kaye ca nzili ca Anglo-America cikeco cikapwa ciyulo camamaneselelo. Eci citulingisa tukulahele ngwetu Bumwene bwa Njambi ololo bunyongesa biyulo byoshe bya banu, co bukayula kaye koshe.—Ndanye 2:44.

13. Bimyene batanu na batatu na “bimyene likumi” bibanendeka ku mukanda wa Kujombolola 17:9-12, bemanena bika, co ou mukanda unalishulisilila bati?

¹³ Tandeni Kujombolola 17:9-12. Nzita ya Kaye yakulibanga yabiisile manene byuma. Co oku kunalingisa bupolofweto bukwabo bwa mu Mbimbiliya buje bwendeka ha matangwa a kukotoka bulishulisilile. Bantwama ba mu kaye bashakele ngwabo mu kaye koshe mukale kwoloka. Ngeci mu January 1920, bashimbikile munga ya League of Nations, ije yengile munga ya United Nations mu October 1945. Ei munga ikeyo inapu “mwene wamucitanu na batatu” oloni keti ciyulo ca nzili ca kaye. Ei munga ikawana nzili ku bifulumende. Co ebi bifulumende bikebyo biyendeka Mbimbiliya ngwayo “bimyene likumi.”

14-15. (a) Mukanda wa Kujombolola 17:3-5 wendeka bika hali “Mbambilone Wakama”? (b) Bika bibali na kulinga banu baje banakala na kukundwiya bulombelo bwa makuli?

¹⁴ Tandeni Kujombolola 17:3-5. Njambi wamwesele Yowano cimona, co omwo mu cimona, wamwene cikwizi nambe ngwetu “Mbambilone Wakama” uje emanena bulombelo bwoshe bwa makuli. Bupolofweto bweci cimona buli na kulishulisilila bati? Ha myaka yaingi bulombelo bwa makuli bunalikwatasana na bifulumende bya banu na kubikundwiya. Oloni Yehova ololo alingisa bifulumende bilingeko bimo ha bulombelo bwa makuli mangana bishulisilile “butumbe bwendi.” Bika bikalingiwa? Ebi bifulumende bije bimanena “mambinga likumi” bikatengulukila bulombelo bwa makuli na kubunyongesa.—Kujo 17:1, 2, 16, 17.

¹⁵ Tuzibuka bati ngwetu Mbambilone  Wakama ololo bamunyongesa? Kwanuka ngwetu Ndonga ya Yufuleti yanyungilileko nganda ya Mbambilone kutukwasa tukumbulule eci cihula. Mukanda wa Kujombolola unesekesa maunzi a banu baje bali na kukundwiya Mbambilone Wakama ku “mema” aje anainyungilila. (Kujo 17:15) Oloni umwesa lalo ngwawo aje mema ‘omine cau,’ kumwesa ngwabo obu bulombelo bwa makuli kubukakala na banu babangi bakabukundwiya. (Kujo 16:12) Obu bupolofweto buli na kulishulisilila ano matangwa mwafwa banu babengi bali na kutunda mu bulombelo bwa makuli na kushakezeka bingila byeka bya kumaneselamo bukalu bwabo.

16. Kuzibisisa bupolofweto buje bwendeka ha munga ya United Nations na kunyonga kwa Mbambilone Wakama kutukwasa bati?

¹⁶ Obu bupolofweto butukwasa bati? Kusholoka kwa munga ya United Nations na kutepuluka kwa banu baje bali na kukundwiya bulombelo bwa makuli kumwesa ngwabo tuli mu matangwa a kukotoka. Nameme banu babangi kubesi na kukundwiya Mbambilone Wakama, oku kukulumbununa ngwabo bulombelo bwa makuli bunyonga. Ngwe mutunendekela hakulibanga Yehova akalingisa “bimyene likumi”  nambe ngwetu bifulumende bije bili na kukundwiya United Nations, bashulisilile “butumbe bwendi.” Ebi bifulumende bikanyongesa bulombelo bwa makuli mu kukasumuna, co banu babangi bakalikomokela. * (Kujo 18:8-10) Kunyonga kwa Mbambilone Wakama kukanenela banu babangi tuyando. Oloni kuli byuma bibali bikalingisa banu ba Njambi babwahelele. Bulombelo bwa makuli buje bunapu citozi ca Njambi ha myaka yaingi bakabunyongesa, co munima ya simbu yaindondo tukapatuka ku tuyando twa muno mu kaye kakabi.—Luka 21:28.

17-18. (a) Twasa kutwalelelaho bati kukanyamesa likulahelo lyetu? (b) Bika tukasimutwiya mu cilongesa cinatako?

¹⁷ Ndanyele wapolofwetele ngwendi “mana a busunga akalibwezelela.” Cili bene analibwezelela mwafwa tuli na kuzibisisa mwamubwa bupolofweto buli na kulishulisilila mu simbu yetu. (Ndanye 12:4, 9, 10, NWT) Kulishulisilila kwobu bupolofweto kutulingisa tukulahele manene Yehova na Lijwi lyendi. (Isaya 46:10; 55:11) Ngeci, twaleleleniho kulilongesa Mbimbiliya na kukwasa bakweni balikute busamba na Yehova, co kulinga ngoco kumikwasa mukanyamese likulahelo lyeni. Yehova atwalelelaho kunyungilila baje banamukulahela na bimbunge byabo byoshe na kubakwasa bakale mu kwoloka.—Isaya 26:3.

¹⁸ Mu cilongesa cinatako, tukasimutwiya ha bupolofweto bwendeka ha cikungulukilo ca baka-Kilistu mu matangwa a kukotoka. Obu bupolofweto nabwo bukatukwasa tukulahele ngwetu tuli na kuyoya mu matangwa a kukotoka. Tukasimutwiya ha byuma bikwabo bije bimwesa ngwabyo Yesu Kilistu uje napu Mwene ali na kutwamenena baka-Kilistu ba busunga.