LARTIK LETID 28
Rwayom Bondie Inn Etabli!
“Rwayom lemonn finn rant anba pouvwar Bondie nou Segner ek so Mesi.”—REV. 11:15.
KANTIK 22 Rwayom Bondie Inn Etabli—Ki Li Vini!
REZIME *
1. Ki kitsoz nou sir, ek kifer?
KAN to trouv bann problem ki ena dan lemond azordi, eski to trouv sa difisil pou krwar ki bann kitsoz pou ameliore? Konpare ar avan, lafeksion ki ena dan lafami inn bien diminie. Bann dimounn pe vinn deplizanpli violan ek egois. Ek boukou dimounn pena konfians dan bann lotorite. Selman, bann sitiasion koumsa kapav donn twa lespwar ki bann kitsoz pou ameliore. Kifer nou dir sa? Parski bann dimounn pe azir exakteman kouma ti predir dan enn profesi konsernan “bann dernie tan.” (2 Tim. 3:1-5) Personn pa kapav dir ki sa profesi-la pa pe realize azordi! Anplis, parski sa profesi-la pe realize, sa montre ki Zezi Kris inn vinn Lerwa dan Rwayom Bondie. Me sa profesi-la, se zis enn parmi bann profesi ki koz lor Rwayom Bondie. Anou examinn bann lezot profesi ki’nn realize sa bann dernie lane-la, ek anou gete kouma sa kapav fer nou lafwa vinn pli for.
Kan met bann pies enn puzzle sakenn dan so plas, nou trouv enn zimaz. Dan mem fason, kan met bann profesi liv Daniel ek bann profesi liv Revelasion ansam, nou kapav konn plis lor proze Zeova pou lavenir. Kan nou examinn sa bann profesi-la, sa kapav ed nou pou konpran bann levennman ki pou arive biento (Get paragraf 2)
2. Ki nou pou examine dan sa lartik-la, ek kifer? (Get zimaz lor kouvertir.)
2 Dan sa lartik-la, nou pou get (1) enn profesi ki pou ed nou pou kone kan Rwayom Bondie inn etabli, (2) bann profesi ki pou ed nou pou konpran ki Zezi inn vinn Lerwa dan Rwayom Bondie, ek (3) bann profesi ki pou explik nou kouma bann lennmi Bondie pou detrir biento. Nou pou trouve ki, kan nou met sa bann profesi-la ansam parey kouma bann pies enn puzzle, sa pou ed nou pou konn plis lor proze Zeova ek pou konpran bann levennman ki pou arive biento.
RWAYOM BONDIE INN ETABLI
3. Ki kitsoz Daniel 7:13, 14 montre nou konsernan Lerwa Rwayom Bondie?
3 Profesi Daniel 7:13, 14 montre nou ki Zezi Kris limem meyer Dirizan pou Rwayom Bondie. Bann dimounn ki sorti dan tou nasion pou “servi li” avek lazwa, ek pa pou ena enn lot dirizan apre li. Enn lot profesi dan liv Daniel ti predir ki Zezi ti pou vinn Lerwa dan Rwayom Bondie alafin enn peryod set lane. Eski nou kapav kone kan sa finn arive?
4. Explike kouma Daniel 4:10-17 ed nou pou kalkile ki lane Zezi ti pou vinn Lerwa. (Get not.)
4 Lir Daniel 4:10-17. * Sa ‘set lane-la’ reprezant enn peryod 2,520 lane. Sa peryod-la ti koumanse an 607 Avan Nou Lepok, kan bann Babilonien ti tir dernie lerwa ki ti reprezant Zeova dan Zerizalem, ek li ti fini an 1914 dan nou lepok, kan Zeova ti fer Zezi, “sa kikenn ki ena drwa legal la,” vinn Lerwa dan Rwayom Bondie. *—Eze. 21:25-27.
5. Ki bienfe nou kapav gagne gras-a profesi “set lane”?
5 Ki bienfe nou gagne gras-a sa profesi-la? Kan nou konpran profesi “set lane,” sa fer nou ena konfians ki Zeova pou realiz so bann promes dan ler ki bizin. Parey kouma Li ti fixe enn moman pou Li etabli so Rwayom, nou kapav sir ki Li pou realiz tou so bann lezot profesi dan moman ki Li’nn fixe. Wi, nou kapav sir ki zour Zeova “pa pou an-retar!”—Abak. 2:3.
ZEZI INN VINN LERWA DAN RWAYOM BONDIE
6. (a) Ki bann levennman pe arive lor later, ki montre ki Zezi pe regne dan lesiel? (b) Kouma profesi Revelasion 6:2-8 konfirme ki Zezi pe regne dan lesiel?
6 Ver lafin so minister, Zezi ti predir bann levennman ki ti pou arive lor later. Sa bann levennman-la ti pou ed so bann disip pou kone ki li’nn koumans regne dan lesiel. Li ti dir ki ti pou ena bann lager, bann tranbleman-de-ter, ek lafaminn. Li ti osi predir ki ti pou ena bann lepidemi “dan boukou landrwa.” Se seki pe arive azordi avek pandemi COVID-19. Sa bann kitsoz-la form parti seki Labib apel “sign” prezans Zezi Kris. (Mat. 24:3, 7; Lik 21:7, 10, 11) Plis ki 60 an apre ki Zezi ti retourn dan lesiel, li ti donn lapot Zan bann lezot linformasion pou montre ki sa bann levennman-la ti pou arive. (Lir Revelasion 6:2-8.) Tou sa bann kitsoz-la inn arive depi ki Zezi inn vinn Lerwa dan Rwayom Bondie an 1914.
7. Kifer sitiasion dan lemond inn vinn pli pir depi ki Zezi inn vinn Lerwa?
7 Kifer sitiasion dan lemond inn vinn pli pir depi ki Zezi inn vinn Lerwa? Revelasion 6:2 donn enn detay bien inportan. Premie kitsoz ki Zezi inn fer kan li’nn vinn Lerwa dan Rwayom Bondie se ki li’nn al lager kont Satan ek so bann demon. Dapre Revelasion sapit 12, Satan ti perdi sa lager-la. Lerla, ti zet li ek so bann demon lor later. Depi sa zour-la, Satan bien ankoler ek li pe atak bann imin. Se pou sa rezon-la ki Labib dir: “Maler pou later.”—Rev. 12:7-12.
Nou pa kontan bann move nouvel, me kan nou trouv bann profesi ki ena dan Labib pe realize, sa montre ki Rwayom Bondie inn etabli (Get paragraf 8)
8. Ki bienfe nou gagne kan nou trouv bann profesi konsernan Rwayom Bondie pe realize?
8 Ki bienfe nou gagne gras-a sa bann profesi-la? Lemond pe vinn deplizanpli pir, ek latitid bann dimounn inn bien sanze. Sa inn ed nou pou kone ki Zezi inn vinn Lerwa dan lesiel. Alor, olie ki nou trakase kan nou trouv bann dimounn vinn deplizanpli egois ek violan, nou bizin rapel ki zot pe realiz bann profesi Labib. Rwayom Bondie inn etabli! (Ps. 37:1) Plis Armagedon pe koste, nou kapav atann ki lemond pou vinn deplizanpli pir. (Mark 13:8; 2 Tim. 3:13) Nou bien kontan ki nou Papa, ki kontan nou, ed nou pou konpran kifer ena sa kantite problem-la dan lemond!
BANN LENNMI BONDIE POU DETRIR BIENTO
9. Kouma Daniel 2:28, 31-35 dekrir dernie pwisans mondial, ek kan eski li’nn koumans existe?
9 Lir Daniel 2:28, 31-35. * Nou pe trouv sa profesi-la realize azordi. Dan so rev, Naboukodonozor ti trouve seki ti pou arive “dan peryod final bann zour,” setadir apre ki Zezi Kris koumans regne. Labib ti predir ki dernie pwisans mondial ti pou form parti bann lennmi Zezi. Sa pwisans mondial la ti reprezante par “lipie stati ki an feray ek an larzil,” ek li deza pe dirize azordi. Li’nn koumans existe pandan Premie Lager Mondial, kan Grand Bretagn ek Letazini ti fer enn lalians, lalians Anglo-Ameriken. Sa stati-la ed nou pou konpran omwin de kitsoz lor sa pwisans mondial la ek lor kifer li ti diferan ar bann lezot pwisans mondial ki ti avan li.
10. (a) Ki kitsoz Daniel ti predir konsernan Pwisans Anglo-Ameriken? (b) Ki danze nou bizin evite? (Get lankadre “ Fer Atansion ar Larzil!”)
10 Premierman, Pwisans Anglo-Ameriken li diferan ar bann lezot pwisans mondial, parski li pa reprezante par enn metal solid, kouma lor ek larzan, me li reprezante par enn melanz feray ek larzil. Larzil reprezant “bann dimounn.” (Dan. 2:43) Azordi, li kler ki bann dirizan sa pwisans politik la pa pe reisi fer seki zot anvi. Kifer? Akoz linflians ki “bann dimounn” ena pandan bann eleksion, bann kanpagn drwa sivik, bann protestasion, ek bann sindika.
11. Parski Pwisans Mondial Anglo-Ameriken pe dirize, kouma sa fer nou ena plis konfians ki nou pe viv dan lepok lafin?
11 Deziemman, Pwisans Anglo-Ameriken li reprezante par lipie sa gran stati-la, savedir ki li dernie pwisans mondial. Pa pou ena enn lot pwisans mondial apre li. Okontrer, Rwayom Bondie pou detrir sa pwisans mondial la pandan lager Armagedon, ansam ar bann lezot gouvernman imin. *—Rev. 16:13, 14, 16; 19:19, 20.
12. Sit enn lot prev dan profesi Daniel, ki montre ki nou pe viv lepok lafin, ek kouma eski sa rekonfort nou ek donn nou lespwar?
12 Ki bienfe nou gagne gras-a sa profesi-la? Profesi Daniel koz lor enn lot kitsoz ki montre ki nou pe viv lepok lafin. Finn gagn plis ki 2,500 an, Daniel ti predir ki, apre Babilonn, ti pou ena ankor kat lezot pwisans mondial ki ti pou ena enn gran linflians lor pep Bondie. Anplis, Daniel ti dir ki Pwisans Anglo-Ameriken ti pou dernie pwisans mondial. Sa vremem rekonfort nou, ek sa donn nou lespwar ki biento Rwayom Bondie pou detrir tou bann gouvernman imin. Lerla, li pou dirize lor later antie.—Dan. 2:44.
13. Kisannla sa “witiem lerwa” ek sa “dis lerwa” ki mansione dan Revelasion 17:9-12 la, ek kouma sa profesi-la inn realize?
13 Lir Revelasion 17:9-12. Enn lot profesi Labib konsernan bann dernie zour ti realize akoz bann dega ki Premie Lager Mondial ti fer. Bann dirizan sa lemond-la ti anvi fer sir ki ena lape dan lemond. Alor, an Zanvie 1920, zot ti etabli Société des Nations, ki plitar an Oktob 1945, ti vinn l’Organisation des Nations unies (ONU). Labib apel sa lorganizasion-la “enn witiem lerwa.” Selman, li pa enn pwisans mondial parski so pouvwar depann lor bann gouvernman ki soutenir li. Labib apel sa bann gouvernman-la, “dis lerwa.”
14-15. (a) Ki Revelasion 17:3-5 dir konsernan “Gran Babilonn”? (b) Ki pe ariv bann dimounn ki pe soutenir fos relizion?
14 Lir Revelasion 17:3-5. Dan enn vizion, Bondie ti fer lapot Zan trouv enn prostitie, “Gran Babilonn,” ki reprezant lanpir mondial fos relizion. Kouma sa vizion-la inn realize? Pandan bien lontan, bann fos relizion inn soutenir ek inn travay ansam ar bann gouvernman sa lemond-la. Selman, biento Zeova pou met dan leker bann gouvernman sa lemond-la “proze pou realiz so plan.” Ki pou arive lerla? Sa bann gouvernman-la, setadir sa ‘dis lerwa-la,’ pou vir kont bann fos relizion ek li pou detrir zot.—Rev. 17:1, 2, 16, 17.
15 Kouma nou kone ki Gran Babilonn pou detrir biento? Pou reponn sa kestion-la, li bon nou rapel ki ansien lavil Babilonn ti antoure ar delo Larivier Efrat, ek sa ti enn proteksion pou li. Dan liv Revelasion, “bann delo” reprezant bann milyon dimounn ki pe soutenir Gran Babilonn. (Rev. 17:15) Me liv Revelasion dir osi ki sa delo-la ti pou “sek.” Sa montre ki boukou dimounn ti pou aret soutenir lanpir mondial fos relizion. (Rev. 16:12) Sa profesi-la pe realize parski boukou dimounn pe abandonn fos relizion, ek zot pe rod lezot fason pou zot trouv bann repons pou zot bann kestion.
16. Kan nou konpran bann profesi konsernan lexistans l’ONU ek destriksion Gran Babilonn, ki bienfe nou gagne?
16 Ki bienfe nou gagne gras-a sa bann profesi-la? Ena de lezot rezon ki montre ki nou pe viv dan bann dernier zour: lexistans l’ONU ek bann dimounn pe abandonn fos relizion. Mem si boukou dimounn pe abandonn Gran Babilonn, se pa sa ki pou detrir lanpir mondial fos relizion. Kouma nou’nn trouve dan bann paragraf avan, Zeova pou met dan leker sa ‘dis lerwa-la,’ setadir bann gouvernman ki pe soutenir l’ONU, “proze pou realiz so plan.” San ki personn atann, sa bann gouvernman-la pou detrir Gran Babilonn. Sa pou enn sirpriz pou lemond antie! * (Rev. 18:8-10) Kan Gran Babilonn pou detrir, sa pou ena enn lefe lor lemond antie ek kitfwa sa pou kree osi bann difikilte. Me bann serviter Zeova ena omwin de rezon pou zot zwaye. Premierman, sa gran lennmi Bondie la pou disparet net, ek deziemman, biento nou pou libere ar sa move lemond-la!—Lik 21:28.
ENA KONFIANS AN ZEOVA
17-18. (a) Kouma nou kapav kontign fer nou lafwa vinn pli for? (b) Ki nou pou examine dan prosin lartik?
17 Daniel ti predir ki “vre konesans” ti pou “an-abondans.” Ek vremem li an-abondans! Azordi, nou konpran bann profesi konsernan lepok ki nou pe viv. (Dan. 12:4, 9, 10) Sa bann profesi-la telman presi ki zot ogmant nou respe pou Zeova ek so Parol, Labib. (Iza. 46:10; 55:11) Alor, kontign fer to lafwa vinn pli for kan to etidie Labib an profonder ek kan to ed lezot pou devlop enn bon lamitie avek Zeova. Zeova pou protez tou bann ki ena konfians an Li, ek Li pou “donn zot lape ki dire pou touletan.”—Iza. 26:3.
18 Dan prosin lartik, nou pou examinn bann profesi ki konsern lasanble Kretien dan lepok lafin. Sa bann profesi-la pou donn nou bann lezot prev ki nou pe viv dan bann dernie zour. Nou pou trouv osi bann prev ki montre ki nou Lerwa Zezi pe gid bann serviter Zeova azordi.
KANTIK 61 Temwin, Anou Avanse!
^ Nou pe viv enn lepok extraordiner dan listwar! Rwayom Bondie inn etabli, parey kouma plizir profesi Labib ti anonse. Dan sa lartik-la, nou pou examinn sertin parmi sa bann profesi-la, ek sa pou fer nou lafwa an Zeova vinn pli for. Sa lartik-la pou ed nou pou ena konfians an Zeova, ek pou res kalm depi asterla mem ek osi dan lavenir.
^ Daniel 4:10-17: “10 Kan mo ti pe dormi lor mo lili, mo’nn gagn enn vizion. Mo’nn trouv enn pie omilie later, ek li ti bien-bien ot. 11 Pie-la inn pouse ek li’nn vinn for, ek so bout pli lao ti ariv ziska kot lesiel; li ti bien vizib ziska dan bout later. 12 So bann fey ti bien zoli, ek li ti pe donn boukou frwi; lor pie-la ti ena manze pou zot tou. Bann zanimo sovaz ti vinn anba li pou gagn lonbraz, bann zwazo ti fer zot nik lor so bann brans, ek tou bann kreatir ti gagn manze gras-a sa pie-la. 13 Kan mo’nn gagn sa bann vizion-la lor mo lili, mo’nn trouv enn gardien, enn kikenn ki sin, ki ti pe desann depi lesiel. 14 Li ti kriye bien for: ‘Koup pie-la, koup so bann brans, tir so bann fey, ek zet so bann frwi! Ki bann zanimo ki anba li sove, ek ki bann zwazo sove depi so bann brans. 15 Me les tron-la ek so rasinn dan later lor laplenn, ek met enn bag an-feray ek an-kwiv otour tron-la. Les laroze ki sorti dan lesiel mouy li, ek les li res ansam avek bann zanimo dan laplenn. 16 Les so leker sanze, ki li nepli ena enn leker imin, me leker enn zanimo, ek les set lane pas lor li. 17 Se bann gardien ki anons sa desizion-la; se bann ki sin ki anons sa desizion-la, pou ki bann ki vivan kone ki sa Kikenn ki Pli Gran la, Li Sef dan rwayom bann dimounn ek ki Li donn sa ninport kisannla Li anvi. Li kapav mem etabli kouma sef, dimounn ki pli sinp parmi bann zom.’”
^ Get pwin 4 dan leson 32 dan liv Viv Ere pou Touletan! ek get video Rwayom Bondie Inn Koumans Regne Depi 1914, lor jw.org.
^ Daniel 2:28, 31-35: “28 Me ena enn Bondie dan lesiel, Limem ki revel bann sekre. Li’nn fer Lerwa Naboukodonozor kone ki pou arive dan peryod final bann zour. Ala to rev, ek sa se bann vizion ki to’nn gagne kan to ti pe dormi. 31 ‘Twa, A lerwa, to ti pe gete ek to’nn trouv enn stati ki bien-bien gran. Sa stati ki ti extra gran ek ki ti pe bien briye la, ti pe debout devan twa ek so laparans ti fer gagn per. 32 Latet sa stati-la ti fer ar enn bon kalite lor, so ches ek so lebra ti an arzan, so vant ek so lakwis ti an kwiv, 33 so lazam ti an feray, ek so lipie ti enn melanz feray ek larzil. 34 Pandan ki to ti pe gete, finn detas enn ros, me pa lame dimounn ki’nn fer sa. Lerla, ros-la ti tap ar lipie stati ki an feray ek an larzil, ek li ti kraz zot net. 35 Dan sa ler-la, feray-la, larzil-la, kwiv-la, larzan-la, ek lor-la, zot tou ansam, ti kraze net, ek zot ti vinn parey kouma lapay bann sereal ki vane pandan lete. Divan ti pran zot ti ale ek pa ti trouv zot ankor. Me sa ros ki ti tap ar sa stati-la ti vinn enn gran montagn, ek li ti ranpli later antie.’”
^ Pou gagn plis linformasion lor profesi Daniel, get Latour Degard 1e Zin 2012, p. 16-20.
^ Pou gagn plis detay lor seki pou arive dan lavenir, get sapit 21 dan liv Rwayom Bondie Pe Regne!
