1. Äwa waut kjenn wie ons secha sennen, un wuarom?

 FELT ons daut schwoa, doaraun to jleewen, daut daut woat eene bätre Tiet jäwen, wan wie doano kjikjen, woo daut enne Welt dreit? De Famielje es nich mea soo veeent aus ea un de Menschen em auljemeenen brucken emma mea Jewault, denkjen bloos aun sikj un sent leicht doll. Fa väle es daut uk schwoa, opp de Rejierungen to vetruen. Oba aul dit wiest ons, daut doa woat eene bätre Tiet komen. Wuarom? Wiels de Menschen vehoolen sikj krakjt soo, aus daut en eene Profezeiunk aul äwa “de latste Doag” verutjesajcht wort (2. Tim. 3:1-5). Kjeen opprechtja Mensch kaun vestrieden, daut dise Profezeiunk sikj nich erfelt. Daut bewiest, daut Jesus Christus aul aunjefongen haft, aus Kjennich en Gott sien Kjennichrikj to rejieren. Oba daut es mau eene Profezeiunk von väle aundre, waut äwa Gott sien Kjennichrikj räden. Wan wie noch aundre Profezeiungen unjasieekjen, waut sikj de latste Joaren erfelt haben, woat ons daut em Gloowen stoakjen.

2. Waut woa wie en disen Artikjel seenen, un wuarom? (Räd äwa daut Bilt oppe väaschte Sied.)

² En disen Artikjel woa wie (1) äwa eene Profezeiunk räden, waut ons halpt to vestonen, wanea Gott sien Kjennichrikj oppjestalt wort, (2) äwa Profezeiungen, waut ons halpen to vestonen, daut Jesus em Himmel en Gott sien Kjennichrikj aul de Kjennich es, un (3) äwa eene Profezeiunk, waut openboat, woo de Fiend von Gott sien Kjennichrikj woaren venicht woaren. Wie woaren seenen, daut dise Profezeiungen soo tooppaussen aus de Kjlaz von een Posel, wuaderch daut een kloaret Bilt jeft, en waut fa eene Tiet wie nu jroz läwen.

3. Waut vesechat de Profezeiunk en Daniel 7:13-14 ons äwa dän Kjennich en Gott sien Kjennichrikj?

³ De Profezeiunk en Daniel 7:13-14 vesechat ons, daut Jesus Christus woat de basta Kjennich sennen en Gott sien Kjennichrikj. Menschen von aule Velkja woaren am met Freiden deenen un doa woat no am kjeen aundra Kjennich sennen. Eene aundre Profezeiunk en daut Buak Daniel säd verut, daut Jesus wudd de Kjennich en Gott sien Kjennichrikj woaren aum Enj von säwen profeetische Tieden. Kjenn wie daut weeten, wanea dit passieed?

4. Woo wiest Daniel 4:7-14 ons, wanea Christus wudd de Kjennich woaren en Gott sien Kjennichrikj? (See uk de Footnoot.)

⁴ Läs Daniel 4:7-14. De “säwen Joa”, ooda säwen Tieden, stonen fa eene Tiet von 2 520 Joa. Dise Tiet funk aune 607 v. Chr. aun, aus de Babelonia dän latsten Kjennich en Jerusalem raufsaden, dän Jehova enjesat haud. Un dise Tiet wia to Enj aune 1914 n. Chr., aus Jehova Jesus – “wäm daut met rajcht jehieet” – en Gott sien Kjennichrikj toom Kjennich muak (Hes. 21:30-32). *

5. Waut es eene Wajch, woo ons de Profezeiunk äwa de säwen Tieden togood kjemt?

⁵ Woo kjemt ons dise Profezeiunk togood? Wan wie de Profezeiunk äwa de säwen Tieden vestonen, dan jeft ons daut de Sechaheit, daut Jehova siene Vespräakjungen emma enne Tiet erfellen woat. Krakjt soo aus hee bestemd, wanea hee sien Kjennichrikj oppstalen wudd, krakjt soo woat hee doano kjikjen, daut aul de aundre Profezeiungen sikj dan erfellen, soo aus hee daut bestemt haft. Soo, Jehova sien Dach “woat … nich utbliewen”, ooda too lot komen (Hab. 2:3).

6. (a) Waut fa Bewies hab wie, daut Christus aunjefongen haft, em Himmel to rejieren? (b) Woo wiest de Profezeiunk en Openboarunk 6:2-8, daut daut werkjlich soo es?

⁶ Jesus säd meist aum Enj von sienen Deenst hia oppe Ieed eenjet verut, waut siene Nofolja wiesen wudd, daut hee wudd aunfangen, aus Kjennich to rejieren. Hee räd biejlikj von Kjrich, Hungaschnoot un Ieedbäben. Hee säd uk, daut doa wudden “opp veschiedne Städen” Krankheiten sennen – un de COVID-19-Krankheit es een gooda Bewies doafäa. Aul dit nant de Bibel “een Tieekjen”, daut Christus jekomen es (Mat. 24:3, 7; Luk. 21:7, 10-11). Mea aus 60 Joa nodäm daut Jesus wada trigj em Himmel wia, leet hee dän Apostel Johanes eenjet weeten, waut uk een Bewies doafäa wia, daut dise Tieekjens sikj wudden erfellen (läs Openboarunk 6:2-8). Aul dit haft sikj vonne 1914 aun erfelt, aus Jesus de Kjennich en Gott sien Kjennichrikj wort.

7. Wuarom haft daut soo väl schlajchtet jejäft von don, aus Jesus aunfunk to rejieren?

⁷ Wuarom es de Welt von don emma schlajchta jeworden, aus Jesus aunfunk, aus Kjennich to rejieren? Openboarunk 6:2 halpt ons, daut to vestonen. Aus Jesus aunfunk to rejieren, fieed hee daut ieeschte eenen Kjrich. Jäajen wäm? Jäajen dän beesen Fient un siene schlajchte Enjel. No Openboarunk, Kapitel 12 no vespäld de Soton disen Kjrich un hee un siene beese Enjel worden rauf no de Ieed jeschmäten. De Soton lat siene groote Wutt bie  de Menschen rut, un doawäajen sajcht de Schreft: “Wee dee, dee opp de Ieed … wonen” (Opb. 12:7-12).

8. Woo kjemt ons daut togood, wan wie seenen, woo sikj de Profezeiungen äwa Gott sien Kjennichrikj erfellen?

⁸ Woo komen ons dise Profezeiungen togood? Aun daut, waut enne Welt passieet, un aun de Menschen äa Vehoolen, wudd to seenen sennen, daut Jesus haud aus Kjennich aunjefongen to rejieren. Soo, enne Städ sikj doaräwa to oajren, daut de Menschen bloos aun sikj denkjen un soo schlajcht sent, well wie doaraun denkjen, daut sikj doaderch biblische Profezeiungen erfellen, aulsoo daut Gott sien Kjennichrikj aul rejieet! (Psa. 37:1). Un wie kjennen doamet räakjnen, daut daut en dise Welt noch woat väl schlemma woaren, je noda Harmagedon kjemt (Mar. 13:8; 2. Tim. 3:13). Sent wie nich dankboa doafäa, daut ons leeftolja himlischa Voda ons daut weeten lat, wuarom doa soo väl schlemmet en de Welt passieet?

9. Woo beschrift de Profezeiunk en Daniel 2:28, 31-35 de latste Weltmacht, un wanea funk dee aun to rejieren?

⁹ Läs Daniel 2:28, 31-35. Wie seenen, daut dise Profezeiunk sikj vondoag dän Dach erfelt. Daut Bilt von Nebukadnezar sienen Droom wiest, “waut en lotre Doag noch komen woat”, nodäm Christus aunjefongen haft to rejieren. To Jesus siene Fiend hia oppe Ieed wudd uk de latste Weltmacht jehieren, waut en de Bibel verutjesajcht wort, un dee derch “de Feet, dee von Iesa un jebrenden Leem wieren”, väajestalt woat. Dise Weltmacht deit aul rejieren. Dee kjeem en dän Ieeschten  Weltkjrich aun äare Macht, aus Enjlaunt un Stäts sikj toopstunden. Derch daut Bilt von Nebukadnezar sienen Droom wort uk oppet weinichste tweeatlei jewäsen, woo dise Weltmacht aundasch sennen wudd aus de väaje.

10. (a) Waut säd de Profezeiunk von Daniel äwa de Weltmacht von Enjlaunt un Stäts verut? (b) Fa waut sell wie oppaussen? (See dän Kausten “ Paust fa dän jebrenden Leem opp!”)

¹⁰ Daut ieeschte, wuarom de Weltmacht von Enjlaunt un Stäts aundasch es aus de aundre Weltmachten von de Vision, es, wäajen dee nich met soont vejlikjt woat, aus met de reine Golt ooda de reine Selwa, oba met eene Mischunk von Iesa un jebrenden Leem. De jebrenda Leem steit fa daut auljemeene Volkj (Dan. 2:43). Vondoag dän Dach es daut kloa to seenen, woo väl daut auljemeene Volkj to sajen haft bie de Wolen, Menschenrajchten, daut dee sikj toopstonen jäajen de Rejierungen un daut dee fa de Oabeida äa Rajcht kjamfen. Daut moakt dise Weltmacht daut schwoa, daut to doonen, waut see well.

11. Woo wiest ons daut, daut de Weltmacht von Enjlaunt un Stäts aune Macht es, daut wie gaunz aum Enj von de Welt läwen?

¹¹ Tweedens es Enjlaunt un Stäts, waut de Feet von daut Bilt väastalen, no de Schreft no de latste Weltmacht. Doahinja woat daut kjeene menschelje Rejierungen mea jäwen. Dise Weltmacht woat von Gott sien Kjennichrikj en Harmagedon haustich venicht woaren met aule aundre menschelje Rejierungen toop (Opb. 16:13-14, 16; 19:19-20). *

12. Waut fa een Bewies es noch en de Profezeiunk en Daniel, waut ons Troost un Hopninj jeft?

¹² Woo kjemt ons dise Profezeiunk togood? De Profezeiunk en Daniel jeft noch mea Bewies, daut wie en de latste Tiet läwen. Mea aus 2 500 Joa trigj säd Daniel verut, daut no Babel noch wudden vea aundre Weltmachten oppstonen, waut äwa Gott sien Volkj rejieren wudden. Hee openboad uk, daut Enjlaunt un Stäts de latste Weltmacht sennen wudd. Dit jeft ons Troost un Hopninj, daut Gott sien Kjennichrikj aule menschelje Rejierungen venichten woat un dan äwa de gaunze Ieed rejieren (Dan. 2:44).

13. Waut bedieden “de achta [Kjennich]” un de “tieen Kjennichs” no Openboarunk 17:9-12 no, un woo haft dise Profezeiunk sikj erfelt?

¹³ Läs Openboarunk 17:9-12. De groota Schoden von dän Ieeschten Weltkjrich fieed doatoo, daut sikj uk noch eene aundre biblische Profezeiunk äwa de latste Tiet erfeld. De Weltharscha wullen Fräd oppe Welt moaken. Doawäajen stalden dee en Jaunewoa 1920 dän Velkjabunt opp, waut lota dan, en Oktooba 1945, de Veeende Nazionen (UNO) wieren. Dise Organisazion woat uk aus “de achta [Kjennich]” jetalt, oba daut es nich eene Weltmacht. Dee haft bloos Macht, wäajen de Rejierungen dee de Macht jäwen. De Bibel rät biltlich von dise Rejierungen aus de “tieen Kjennichs”.

14-15. (a) Waut sajcht Openboarunk 17:3-5 äwa “daut groote Babel”? (b) Waut doonen väle, dee dän faulschen Gloowen ea unjastetten deeden?

¹⁴ Läs Openboarunk 17:3-5. De Apostel Johanes haud eene Vision von Gott, wua hee eene Hua sach, “daut groote Babel”, waut aule faulsche Gloowes oppe Welt väastalt. Woo haft dise Vision sikj erfelt? De faulsche Gloowes haben aul lang sea met de Rejierungen toopjeschauft un haben dee unjastett. Oba boolt woat Jehova de polietische Machten “daut en daut Hoat [jäwen,] … sienen Wellen  uttofieren”. Waut woat doabie rutkomen? Dise Machten, de “tieen Kjennichs”, woaren sikj jäajen aule faulsche Gloowes oppe Welt stalen un dee venichten (Opb. 17:1-2, 16-17).

¹⁵ Woo weet wie, daut daut Groote Babel boolt woat venicht woaren? Denkj wie doabie mol aun daut ieeschtemmasche Babel, waut een jewesset derch daut Wota von dän Eufrat-Riefa beschizt wort. Daut Buak Openboarunk vejlikjt de Millionende, waut daut Groote Babel unjastetten, met “Wotasch” (Opb. 17:15). Oba daut sajcht uk, daut dise Wotasch soo to sajen utdrieejen wudden, waut auntovestonen jeft, daut väle Menschen dee nich mea wudden unjastetten (Opb. 16:12). Dise Profezeiunk erfelt sikj vondoag dän Dach doaderch, daut väle Menschen nich mea to eenen Gloowen jehieren un daut dee bie äare Trubbels aundatwäajen no Help sieekjen.

16. Woo kjemt ons daut togood, wan wie de Profezeiunk vestonen kjennen, wanea de Veeende Nazionen oppjestalt worden un wanea daut Groote Babel venicht woat?

¹⁶ Woo komen ons dise Profezeiungen togood? Daut de Veeende Nazionen oppjestalt  worden un daut de Menschen de faulsche Gloowes nich mea soo unjastetten, es noch een Bewies, daut wie en de latste Tiet läwen. Daut de Wotasch utdrieejen – ooda daut de Menschen daut Groote Babel nich mea soo unjastetten – es nich de Uasoak, daut dee woaren venicht woaren. Soo aus wie ea säden, woat Jehova de “tieen Kjennichs” – aulsoo de polietische Machten, waut de Veeende Nazionen unjastetten – “daut en daut Hoat [jäwen,] … sienen Wellen uttofieren”. Dise Nazionen woaren daut Groote Babel soo haustich venichten, daut de gaunze Welt woat äwarauscht sennen (Opb. 18:8-10). * De Venichtunk von daut Groote Babel woat de gaunze Welt schedren un väle woat daut sea toosaten, oba Gott siene Deena woaren oppet weinichste twee Jrind haben, sikj to freien: De faulsche Gloowes, waut soo lang Jehova siene Fiend wieren, woat daut nich mea jäwen, un wie woaren boolt gaunz frie sennen von dise beese Welt! (Luk. 21:28).

17-18. (a) Woo kjenn wie wieda onsen Gloowen stoakjen? (b) Von waut haundelt de näakjsta Artikjel sikj?

¹⁷ Daniel säd verut, daut “de Erkjantnis … sich vemieren [woat]”. Un daut haft sikj werkjlich erfelt! Wie kjennen nu de Profezeiungen vestonen, waut fa onse Tiet sent (Dan. 12:4, JHF; 12:9-10). Daut dise Profezeiungen sikj soo krakjt erfelt haben, halpt ons, daut wie Jehova un sien Wuat noch dolla achten (Jes. 46:10; 55:11). Doawäajen studia wieda deep de Schreft un halp aundre, goode Frind met Jehova to woaren, om dienen Gloowen to stoakjen. Hee woat aul deejanje beschitzen, waut sikj opp am veloten, un hee woat dee fa wieda Fräd jäwen (Jes. 26:3).

¹⁸ En dän näakjsten Artikjel woa wie äwa Profezeiungen räden, waut sikj von de Christenvesaumlunk en onse Tiet haundlen. Wie woaren seenen, daut dise Profezeiungen uk bewiesen, daut wie en de latste Tiet läwen. Wie woaren uk noch mea doaräwa lieren, woo Jesus – waut aul aus Kjennich rejieet – siene true Nofolja leiden deit.