1. Wat nao iumi sure lo hem, and why nao olsem?

 TAEM iumi lukim olketa nogud samting wea happen lo world distaem, waswe, datwan mekem iumi wari tumas? Maet iumi lukim hao olketa famili no stap gud tugeta, pipol raf tumas and selfish, and tu, staka faendem hem hard for trustim olketa wea garem paoa. Bat iumi shud no warim tumas olketa samting hia. Why nao olsem? Bikos wanfala Bible profesi sei bae hem nao wei blo pipol lo “olketa last day.” (2 Tim. 3:1-5) No eniwan hem fit for denyim hao disfala profesi hem gohed for fulfill distaem, and datwan pruvim Christ Jesus hem King lo Kingdom blo God and start for rul finis. Diswan hem wanfala nomoa lo staka profesi abaotem Kingdom. Bae iumi storyim olketa nara profesi wea gohed for fulfill distaem wea bae strongim faith blo iumi.

2. Wat nao bae iumi storyim lo disfala article, and why nao olsem? (Lukim piksa lo front page.)

² Lo disfala article bae iumi storyim (1) wanfala profesi wea helpem iumi for luksavve lo taem wea Kingdom hem start for rul, (2) wanfala profesi wea helpem iumi for luksavve Jesus hem rul distaem lo Kingdom blo God, and (3) olketa profesi wea showimaot hao gogo olketa wea againstim Kingdom blo God bae distroe. Olketa profesi hia bae helpem iumi for luksavve end blo disfala nogud  world hem klosap nao, olsem Jehovah promisim. Olketa profesi hia olsem olketa pisis insaed wanfala jigsaw puzzle game wea join tugeta for mekem wanfala full piksa.

3. Wat nao profesi lo Daniel 7:13, 14 helpem iumi for sure lo hem?

³ Profesi lo Daniel 7:13, 14 helpem iumi for sure Christ Jesus nao best King for rul lo Kingdom blo God. Pipol lo evri kantri bae hapi for stap anda lo rul blo hem, and hem bae rul for olowe. Nara profesi lo Bible buk Daniel storyim taem wea Jesus bae start for rul lo Kingdom and hem sei datwan bae happen lo end blo sevenfala year. Wat taem nao datwan happen?

4. Hao nao Daniel 4:10-17 helpem iumi for luksavve wanem year nao Christ hem kamap King?

⁴ Readim Daniel 4:10-17. Datfala “sevenfala yia, [“seven taems,” NWT]” hem stand for 2,520 year. Datfala 2,520 year hem start lo 607 B.C.E., taem Babylon aotem last king wea sidaon lo throne blo Jehovah lo Jerusalem. And hem finis lo 1914 C.E. taem Jesus, datfala “man wea [Jehovah] siusim,” hem kamap King lo Kingdom blo God. *—Esikiel 21:25-27.

5. Wat nao disfala profesi helpem iumi for luksavve lo hem?

⁵ Wat nao disfala profesi helpem iumi for luksavve lo hem? Disfala profesi abaotem “sevenfala yia” hem helpem iumi for trustim hao Jehovah hem fulfillim olketa promis blo hem lo barava taem. Profesi hia showimaot Jehovah markem taem for Jesus hem kamap King, and datwan hem happen nao. So iumi savve sure olketa nara profesi tu bae kamap tru lo taem wea Jehovah markem. Tru nao, day blo Jehovah bae kam lo “raet taem” wea hem markem!​—Habakuk 2:3.

6. (a) Wat nao happen lo earth wea showimaot Jesus hem rul lo heven distaem? (b) Hao nao vision blo John lo Revelation 6:2-8 sapotim diswan?

⁶ Taem Jesus stap lo earth, hem storyim samfala samting wea bae happen lo world wea bae helpem olketa follower blo hem for luksavve lo taem wea hem start for rul lo heven. Jesus storyim hao war, bigfala hangre, and olketa earthquake bae happen. Hem storyim tu hao olketa barava nogud sik “bae kasem plande pipol,” and wanfala example lo datwan hem COVID-19 pandemic. Bible sei olketa samting hia hem part lo datfala “saen” wea showimaot Christ hem rul lo Kingdom. (Matt. 24:3, 7; Luke 21:7, 10, 11) Winim 60 year bihaen Jesus go bak lo heven, aposol John kasem wanfala vision tu from hem wea showimaot hao olketa samting hia bae happen. (Readim Revelation 6:2-8.) Evri samting hia start for happen bihaen Jesus kamap King lo 1914.

7. Why nao staka nogud samting happen lo earth bihaen Jesus kamap King?

⁷ Why nao olketa samting lo world kamap worse bihaen Jesus kamap King? Revelation 6:2 helpem iumi for minim datwan. Hem sei first samting wea Jesus duim bihaen hem kamap King hem faet againstim Satan and olketa demon blo hem. Revelation chapter 12 storyim hao Satan lus lo datfala faet, and Jesus and olketa angel blo hem torowem Satan and olketa  demon blo hem kam daon lo earth. From datwan, Satan kros fogud and pipol lo “earth . . . kasem barava nogud samting.”​—Rev. 12:7-12.

8. Taem iumi lukim olketa profesi abaotem Kingdom fulfill distaem, wat nao datwan helpem iumi for luksavve lo hem?

⁸ Wat nao olketa profesi hia helpem iumi for luksavve lo hem? Iumi luksavve Jesus hem King finis from distaem olketa big samting happen lo world and wei blo pipol hem barava nogud. So taem iumi lukim pipol selfish and raf, iumi shud no wari tumas bikos wanem olketa duim hem fulfillim Bible profesi. Datwan pruvim Kingdom hem rul distaem! (Sams 37:1) Taem Armageddon kakam klosap, iumi expectim staka nogud samting moa for happen lo world. (Mark 13:8; 2 Tim. 3:13) Iumi tinghae lo hao Jehovah helpem iumi for minim why olketa nogud samting happen.

9. Olsem Daniel 2:28, 31-35 storyim, which world paoa nao hem rul lo taem wea Christ start for rul lo Kingdom?

⁹ Readim Daniel 2:28, 31-35. Disfala profesi hem fulfill distaem tu. Dream blo Nebuchadnezzar showimaot “olketa samting wea bae hemi happen” bihaen Christ start for rul. Insaed datfala dream “tufala lek [“feet,” NWT] . . . wea olketa wakem long aean wea olketa miksim wetem red graon” hem stand for lastfala world paoa wea Bible profesi abaotem, and datfala world paoa hem enemy blo Jesus lo earth. Disfala world paoa hem start for rul lo taem blo World War I taem Britain and United States start for waka tugeta. Datfala image insaed lo dream blo Nebuchadnezzar showimaot tufala samting  abaotem disfala world paoa wea difren from olketa nara world paoa wea rul firstaem lo hem.

10. (a) Wat nao profesi blo Daniel showimaot abaotem England-America World Paoa? (b) Wat nao iumi shud careful lo hem? (Lukim box “ Careful lo Datfala Red Graon!”)

¹⁰ First samting, olketa pure metal olsem gold or silver lo datfala image hem stand for olketa nara world paoa. Bat England and America World Paoa hem difren bikos iron wea mix witim graon nao stand for hem. Datfala graon hem stand for olketa ordinary pipol. (Daniel 2:43, footnote, NWT) Distaem iumi lukim hao tingting blo pipol savve affectim olketa election, pipol savve campaign for raet blo olketa, protest, and iusim olketa union for kasem raet lo waka blo olketa. Olketa samting hia mekem hem no isi for datfala world paoa for duim wanem hem laekem.

11. From England-America World Paoa hem rul distaem, hao nao datwan mekem iumi sure iumi stap lo olketa last day?

¹¹ Mek-tu samting, feet lo datfala image hem stand for England-America World Paoa and hem last world paoa wea Bible profesi abaotem. No eni nara gavman blo man moa bae changem hem. Bat Kingdom blo God bae distroem England-America World Paoa and evri nara gavman blo man lo Armageddon. *​—Rev. 16:13, 14, 16; 19:19, 20.

12. Wat nao nara samting wea profesi blo Daniel storyim wea givim iumi comfort and hope?

¹² Wat nao disfala profesi helpem iumi for luksavve lo hem? Datfala profesi blo Daniel storyim nara samting wea pruvim iumi stap lo olketa last day. Winim 2,500 year go finis, Daniel profesi abaotem hao bihaen Babylon hem rul, fofala nara world paoa bae kamap wea rul blo olketa bae affectim pipol blo God. And tu, datfala profesi showimaot last wan lo fofala world paoa hia, hem nao England-America World Paoa. Iumi kasem comfort and garem hope from klosap nao datfala Kingdom bae finisim evri gavman blo man and rul ovarem full earth.​—Daniel 2:44.

13. Lo Revelation 17:9-12, wat nao “mek-eit king” and “tenfala king” hem piksarem, and hao nao disfala profesi hem kamap tru?

¹³ Readim Revelation 17:9-12. Bihaen World War I spoelem staka samting, olketa world leader laek for mekem full world for garem peace. And datwan mekem nara profesi lo Bible abaotem olketa last day for kamap tru. So lo January 1920 olketa startim League of Nations wea gogo lo October 1945 hem kamap United Nations. Disfala organization hem nao “mek-eit king,” bat hem no wanfala world paoa. Hem kasem paoa from olketa gavman wea sapotim hem. Bible kolem olketa gavman hia “tenfala king.”

14-15. (a) Wat nao Revelation 17:3-5 showimaot abaotem “Bigfala Babylon”? (b) Wat nao happen lo olketa wea sapotim olketa false religion?

¹⁴ Readim Revelation 17:3-5. Lo disfala vision John lukim wanfala jury woman wea nem blo hem “Bigfala Babylon” wea piksarem evri false religion. Disfala vision showimaot hao olketa false religion waka tugeta witim olketa gavman lo world and sapotim olketa. Bat klosap nao Jehovah bae mekem olketa gavman for “garem tingting for duim samting wea hem laekem.” Datwan bae mekem “tenfala king” wea piksarem olketa gavman,  for attakim olketa false religion and distroem olketa.​—Rev. 17:1, 2, 16, 17.

¹⁵ Hao nao iumi savve Bigfala Babylon hem klosap for distroe? For helpem iumi for savve lo datwan, tingim hao Euphrates River protectim datfala taon blo Babylon bifor. Bible buk Revelation storyim hao “olketa wata” hem piksarem staka million pipol wea sapotim Bigfala Babylon. (Rev. 17:15) Bat hem sei tu olketa wata hia bae kamap “drae,” wea showimaot staka pipol wea sapotim olketa false religion bae lusim olketa. (Rev. 16:12) Distaem disfala profesi kamap tru, bikos staka pipol no interest lo religion and olketa depend lo olketa nara samting for mekem olketa hapi.

16. Wat nao olketa profesi abaotem taem wea United Nations hem start and taem wea Bigfala Babylon bae distroe helpem iumi for luksavve lo hem?

¹⁶ Wat nao olketa profesi hia helpem iumi for luksavve lo hem? Taem olketa startim United Nations and staka pipol no sapotim false religion diswan showimaot iumi stap lo olketa last day. Nomata staka pipol no sapotim Bigfala Babylon  distaem, datwan hem no hao hem bae finis. Jehovah bae mekem “tenfala king,” wea hem nao olketa gavman wea sapotim United Nations, for “garem tingting for duim samting wea hem laekem.” Olketa gavman hia bae seknomoa distroem Bigfala Babylon and pipol bae sapraes tumas lo datwan. * (Rev. 18:8-10) Taem Bigfala Babylon hem distroe, datwan bae affectim full world and maet bae laef hem hard. Bat pipol blo God garem tufala reason for hapi. Disfala enemy blo Jehovah God bae no stap nao, and no longtaem bihaen datwan God bae sevem iumi from disfala nogud world.​—Luke 21:28.

17-18. (a) Hao nao iumi savve gohed strongim faith blo iumi? (b) Wat nao bae iumi storyim lo next article?

¹⁷ Daniel storyim hao “stretfala savve” hem bae “kamap big.” And datwan hem tru distaem! Iumi minim olketa profesi wea gohed for fulfill lo taem blo iumi. (Dan. 12:4, 9, 10, NWT) Olketa samting hia barava happen olsem olketa profesi talem, and datwan mekem iumi tinghae go moa lo Jehovah and Bible. (Aesaea 46:10; 55:11) So gohed studyim Bible for strongim faith blo iumi, and gohed for helpem olketa narawan for fren gud witim Jehovah. Hem bae protectim olketa wea barava trustim hem, and hem bae helpem olketa for ‘stap long pis.’​—Aesaea 26:3.

¹⁸ Lo next article, bae iumi storyim olketa profesi abaotem waka wea iumi olketa Christian duim lo olketa last day. Bae iumi lanem tu hao olketa profesi hia showimaot iumi stap lo olketa last day. Bae iumi lukim tu samfala pruv wea showimaot Jesus, King blo iumi, hem leadim olketa follower blo hem.