1. Καβά πράγμας ντικχίντιβελα μπουτ λατσσές, ντα σόσκε;

 ΙΣΙ τουμένγκε δύσκολος τι πακιάν ότι ο πράγματα κα τζαν πο λατσσές κάνα ντικχένα σαρέ οντουλά σο αβένα-πες κο ντουνιάς; Ο μανγκιπέ αντρέ κι φαμιλί σουρντιόλα! Καζόμ τζάλα, ο τζενέ χολιάνενα πο μπουτ, ντικχένα πο μπουτ πουμαρό νεαυτός ντα χάνα-πες πο μπουτ ι γιαβερέντζαρ. Μπουτ τζενέ να ντένα μπέσα οντουλένγκε σο κερένα κουμάντος. Αλλά ανταλά πράγματα μπορίνενα τι κερέν-αμέν τι μπεκλεντίνας πο λατσσέ ντιβεσένγκε. Σόσκε; Σόσκε ο τζενέ κερένα ντιπ οντουλά σο βακέρντιλε εκχέ σημαντικέ προφητειάτε σο κερέλα λάφι ι “τελευταίε ντιβεσένγκε”. (2 Τιμ. 3:​1-5) Καέκ τζενό σο μανγκέλα ι αλήθεια ναστί βακερέλα ότι ανταγιά προφητεία να νικιόλα μπαγιά. Ανταλέ προφητειάταρ, ντικχίντιβελα μπουτ λατσσές ότι ο Χριστός Ιησούς αρχισάλο τι κερέλ κουμάντος σαρ Βασιλιάς κι Ντεβλέσκι Βασιλεία. Αλλά ανταγιά ισί σάντε εκ κατά μπουτ προφητείες σο τθερένα τι κερέν ι Βασιλειάσαρ. Αμαρί πίστη κα μπαριόλ άμα κα ντικχάς γιαβερά-ντα προφητείες σο νικίστιλε μπαγιά κο τελευταία μπρεσά.

2. Σο κα ντικχάς ανταλέ μαθημάστε, ντα σόσκε; (Βακερέν χάνικ λάφια ι φωτογραφιάκε σο ισί κι ανγκλαϊνί σελίδα)

² Ανταλέ μαθημάστε, κα ντικχάς (1) εκ προφητεία σο βοηθίνελα-αμέν τι αγαβάς κάνα αρχισάλι τι κερέλ κουμάντος η Βασιλεία, (2) προφητείες σο σικαβένα αμένγκε ότι ο Ιησούς αβιλό Βασιλιάς κι Ντεβλέσκι Βασιλεία κο ουρανός ντα (3) προφητείες  σο βακερένα σαρ κα καταστραφίντιβεν ο ντουσμάνια ι Ντεβλέσκε Βασιλειάκε. Κα ντικχάς ότι ανταλά προφητείες ταιριάνενα η εκ ι γιαβεράσαρ σαρ ο κομμάτια σο ισί κο παζλ ντα σικαβένα αμένγκε μπουτ λατσσές ότι ο τέλος ισί πασέ αντικάς σαρ ντινάς πο λάφι ο Ιεχωβά.

3. Καγιά σιγουριά ντέλα-αμέν η προφητεία σο ισί κο εδάφια Δανιήλ 7:​13, 14;

³ Η προφητεία σο ισί κο εδάφια Δανιήλ 7:​13, 14 βακερέλα αμένγκε ότι ο Χριστός Ιησούς κα αβέλ ο πο λατσσό για τι κερέλ κουμάντος κι Ντεβλέσκι Βασιλεία. Τζενέ σαρέ κατά τθεμά κα «υπηρετίνεν-λες» χαράσαρ, ντα καέκ να κα λελ λέσκι θέση ποτές. Εκ γιαβέρ προφητεία κο βιβλίος Δανιήλ βακερντάς ότι ο Ιησούς κα λέλας πι Βασιλεία κάνα κα μπιτίνενας ο συμβολικά εφτά βακίτια. Αβέλα-πες τι τζανάς κάνα αβιλό Βασιλιάς ο Ιησούς Χριστός;

4. Βακερέν σαρ ο εδάφια Δανιήλ 4:​10-17 γκερένα-αμέν κο μπρες σο αβιλό ο Χριστός Βασιλιάς. (Ντικχέν ι υποσημείωση-ντα)

⁴ Διαβάνεν Δανιήλ 4:​10-17. Ο «εφτά βακίτια» μανγκένα τι σικαβέν 2.520 μπρεσά. Ανταλά βακίτια αρχισάλε κο 607 Π.Κ.Χ. κάνα ο Βαβυλώνιοι λιντέ ι τελευταίε βασιλιάς κατά θρόνος ι Ιεχωβάσκο σο ισινέ κι Ιερουσαλήμ. Μπιτισάλε κο 1914 Κ.Χ. κάνα ο Ιεχωβά κερντάς ι Ιησούς, οντουλές «σο τθερέλα ο νόμιμος δικαίωμας», Βασιλιάς κι Ντεβλέσκι Βασιλεία. *​—Ιεζ. 21:​25-27.

5. Σαρ κερέλα αμένγκε λατσσιπέ η προφητεία σο τθερέλα τι κερέλ ι “εφτά βακιτίντζαρ”;

⁵ Σαρ κερέλα αμένγκε λατσσιπέ ανταγιά προφητεία; Οντουλά σο τζανάσα ι “εφτά βακιτίνγκε” ντένα-αμέν ι σιγουριά ότι ο Ιεχωβά κερέλα τι νικιόν οπράλ κο σαάτι οντουλά σο βακερντάς. Ο Ιεχωβά βακερντάς ότι κα κερέλας ι Ιησούς Βασιλιάς εκ συγκεκριμέ βακίτι. Ντα κάνα αβιλό ανταβά βακίτι, ο Ιεχωβά κερντάς-λες. Οτθάρ, τζανάσα ότι κα κερέλ τι νικιόν μπαγιά ο γιαβερά-ντα προφητείες κο βακίτι σο τραμπιντάς Βοβ. Βα, ο ντιβές ι Ιεχωβάσκο «να κα αργίνελ!»​—Αββακ. 2:3.

6. (α) Καλά πράγματα σο ντικχάσα σικαβένα ότι ο Ιησούς ισί Βασιλιάς κο ουρανός; (β) Σαρ σικαβέλα η προφητεία-ντα ι εδαφιόνγκι Αποκάλυψη 6:​2-8 ότι ανταλά πράγματα κα αβένας-πες;

⁶ Κο τελευταία ντιβεσά σο ισινέ ο Ιησούς κι πφουβ, κερντάς λάφι μερικέ πραγματένγκε σο κα αβένας-πες σαρό κο ντουνιάς ντα σο κα βοηθίνενας λέσκε μαθητέν τι αγαβέν ότι αρχισάλο τι κυβερνίνελ κο ουρανός. Κερντάς λάφι τζενγκίνγκε, μποκχάκε, σεισμόνγκε ντα γιαβερέ πραγματένγκε. Επίσης, βακερντάς ότι κα αβένας νασφαλίματα «τθεμ τθεμέστε», ντα ο νασφαλιπέ ι Κορωνοϊόσκο σο αβιλό ακανά τελευταία ισί εκ ανταλένταρ. Σαρέ ανταλά ισί αντρέ κο σημάδι, σαρ βακερέλα-λες η Αγία Γραφή, σο σικαβέλα ότι ο Χριστός αβιλό. (Ματθ. 24:3, 7· Λουκ. 21:7, 10, 11) Αφού νακχλέ 60 ντα πο μπουτ μπρεσά οτθάρ μπερί σο ο Ιησούς μουλό ντα βουρτισάλο κο ουρανός, ντινάς κο απόστολος Ιωάννης γιαβερά-ντα σημάδια σο σικαβένα μπουτ λατσσές ότι ανταλά πράγματα κα αβένας-πες. (Διαβάνεν Αποκάλυψη 6:​2-8) Σαρέ ανταλά αβένα-πες οτθάρ μπερί σο ο Ιησούς αβιλό Βασιλιάς κο 1914.

7. Σόσκε “τσσίντελα τιμωρία” η πφουβ από αζομάν σο αρχισάλο ο Ιησούς τι κερέλ κουμάντος;

⁷ Σόσκε ο πράγματα κο ντουνιάς αβιλέ πο μπέτι κάνα ο Ιησούς αβιλό Βασιλιάς; Ο εδάφιος Αποκάλυψη 6:2 βακερέλα κάτι σημαντικός. Ο πρώτος πράγμας σο κερντάς ο Ιησούς αφού αβιλό Βασιλιάς ισινέ τζένγκι. Κάσαρ κερντάς τζένγκι; Ι Μπενγκέσαρ ντα λέσκε δαιμονέντζαρ. Σαρ βακερέλα η Αποκάλυψη κο κεφάλαιος 12, ο Μπενγκ χασαρντάς, ντα  βοβ γιεκ πι δαιμονέντζαρ φουρτίντιλε τελέ κι πφουβ. Πφερντό χολί, ο Μπενγκ αρχισάλο τι τσσουβέλ-λεν ι τζενέντζαρ. Σο αβιλό-πες ιτιρί ανταλέσταρ; “Η πφουβ τσσίντελα τιμωρία”.​—Αποκ. 12:​7-12.

8. Σόσκε ισί λατσσό αμένγκε σο ντικχάσα τι νικιόν μπαγιά ο προφητείες σο τθερένα τι κερέν ι Βασιλειάσαρ;

⁸ Σαρ κερένα αμένγκε λατσσιπέ ανταλά προφητείες; Οντουλά σο κα αβένας-πες κο ντουνιάς ντα ο τζενέ σο, καζόμ τζάλα, κα αβένας πο γκεραλέ κα ντένας-αμέν τι αγαβάς ότι ο Ιησούς αβιλό Βασιλιάς. Οτθάρ, αντίς τι χολιάνας ι τζενένγκε σο ντικχένα σάντε πουμαρό νεαυτός ντα μισίνενα ο εκ ι γιαβερές, ντάσα-αμέν γκοντί ότι ανταλέντζαρ σο κερένα νικιόνα μπαγιά ο προφητείες ι Γραφιάκε. Η Βασιλεία κερέλα κουμάντος! (Ψαλμ. 37:1) Ντα μπεκλεντίνασα ότι ο ντουνιάς κα αβέλ ατζέ πο γκεραλό καζόμ ο Αρμαγεδδώνας αβέλα πο πασέ. (Μάρκ. 13:8· 2 Τιμ. 3:​13) Να ισινάμ πφερντέ εκτίμηση αμαρέ Νταντέσκε, ι Ιεχωβάσκε, σο βοηθίνελα-αμέν τι αγαβάς σόσκε ισί αζόμ προβλήματα ανταλέ ντουνιάστε;

9. Σαρ βακερέλα η προφητεία κο εδάφια Δανιήλ 2:​28, 31-35 ότι ισί η τελευταία παγκόσμια δύναμη, ντα κάνα αρχισάλι τι κερέλ κουμάντος;

⁹ Διαβάνεν Δανιήλ 2:​28, 31-35. Αντιβές, ντικχάσα τι νικιόλ μπαγιά ανταγιά προφητεία. Ο σουνό σο ντικχλάς ο Ναβουχοδονόσορας σικαβέλας σο κα αβέλας-πες «κο τελευταία ντιβεσά», αφού ο Χριστός κα αρχίνελας τι κερέλ κουμάντος. Αντρέ κι Ιησούσκε ντουσμάνια κι πφουβ, κα αβέλας η τελευταία παγκόσμια δύναμη-ντα σο βακέρντιλι κι Γραφή. Λα μανγκένα τι σικαβέν ο “πιντρέ σο ισί εμ σιδερόσταρ εμ τσικάταρ”. Ανταγιά παγκόσμια δύναμη κερέλα κουμάντος ακανά. Αρχισάλι τι κερέλ κουμάντος κο Πρώτος Παγκόσμιος Πόλεμος κάνα η  Βρετανία ντα ο Ηνωμένες Πολιτείες τθερένας συνεργασία, ντα αντικάς κερντέ ι Αγγλοαμερικανική Παγκόσμια Δύναμη. Ο σουνό ι αγαλμάσαρ σο ντικχλάς ο Ναβουχοδονόσορας βακερντάς ατζέ ντούι πράγματα σο κα κερένας ανταγιά παγκόσμια δύναμη μα τι αβέλ σαρ ο γιαβερά βασιλείες σο ισινέ πο τζανγκλέ λάταρ.

10. (α) Σο ντικχάσα αντιβές κι Αγγλοαμερικανική Παγκόσμια Δύναμη σο βακέρντιλοας κι προφητεία κι Δανιηλίσκι; (β) Καλέ παγιδάταρ πρέπει τι νασάς; (Ντικχέν ο πλαίσιος « Αρακχαβέν-τουμέν Κατά Τσικ!»)

¹⁰ Πρώτον, η Γραφή μοιασκιαρέλα ο παγκόσμιες δυνάμεις σο ισινέ πο τζανγκλέ κατά Αγγλοαμερικανική Παγκόσμια Δύναμη ζουρανέ μεταλλόντζαρ σαρ ισί ο χρυσάφι ντα ο ασήμι. Αλλά η Αγγλοαμερικανική Παγκόσμια Δύναμη νανέ αντικάς. Βόι ισί σαρ σίδερος ανακατουμέ τσικάσαρ. Η τσικ μανγκέλα τι σικαβέλ ι τζενέν, ή γιαβέρτουλους ι λαόν. (Δαν. 2:​43) Αντιβές, ντικχίντιβελα μπουτ λατσσές ότι ο τζενέ σο κερένα εκλογές ντα γκιντίντιβενα για τι αρακχέν πουμαρό δίκιος ή τι κερέν παράπονα να μουκχένα ανταγιά παγκόσμια δύναμη τι κερέλ σαρέ οντουλά σο μανγκέλα.

11. Σο κερέλα-αμέν τι πακιάς ατζέ πο μπουτ ότι τζουβντιάσα κο τελευταία ντιβεσά;

¹¹ Δεύτερον, η Αγγλοαμερικανική Παγκόσμια Δύναμη, σο ισί ο πιντρέ ι μπαρέ αγαλμάσκε, ισί η τελευταία παγκόσμια δύναμη σο βακέρντιλι κι Γραφή. Να κα αβέλ γιαβέρ τζενέσκι κυβέρνηση λάκε θεσιάτε. Κο Αρμαγεδδώνας, η Βασιλεία ι Ντεβλέσκι κα καταστραφίνελ-λα εκ φαρ ντα λατσσές γιεκ σαρέ ι γιαβερέ κυβερνησιέντζαρ σο τθερένα ο τζενέ. *​—Αποκ. 16:​13, 14, 16· 19:​19, 20.

12. Καλά γιαβερά πράγματα σο βακερέλα η προφητεία ι Δανιηλίσκι λοκχιαρένα αμαρό γκι;

¹² Σαρ κερέλα αμένγκε λατσσιπέ ανταγιά προφητεία; Η προφητεία ι Δανιηλίσκι βακερέλα γιαβερά-ντα πράγματα σο σικαβένα ότι τζουβντιάσα κο τελευταία ντιβεσά. Πριν από 2.500 ντα πο μπουτ μπρεσά, ο Δανιήλ βακερντάας ότι, σοράν κατά Βαβυλώνα, ατζέ σταρ παγκόσμιες δυνάμεις κα κερένας κουμάντος ι Ντεβλέσκε λαός ή κα τζάνας λέσαρ κόντρα. Ντα σικαντάς ότι η Αγγλοαμερικανική Παγκόσμια Δύναμη κα αβέλας η τελευταία λένταρ. Ανταβά λοκχιαρέλα αμαρό γκι ντα κερέλα-αμέν τι μπεκλεντίνας ότι ατζεχάνικ η Βασιλεία ι Ντεβλέσκι κα καταστραφίνελ σαρέ ι τζενένγκε κυβερνήσεις ντα βόι κα κερέλ κουμάντος σαρί κι πφουβ.​—Δαν. 2:44.

13. Σο μανγκέλα τι σικαβέλ ο «όγδοος βασιλιάς» ντα ο “10 βασιλιάδες” σο βακέρντιβενα κο εδάφια Αποκάλυψη 17:​9-12, ντα σαρ νικίστιλι μπαγιά ανταγιά προφητεία;

¹³ Διαβάνεν Αποκάλυψη 17:​9-12. Επειδή ο Πρώτος Παγκόσμιος Πόλεμος αντάς καταστροφή, αβιλό-πες κάτι σο κερντάς τι νικιόλ μπαγιά εκ γιαβέρ προφητεία ι Γραφιάκι σο τθερέλα τι κερέλ ι τελευταίε ντιβεσέντζαρ. Ο αρχηγοί ι ντουνιάσκε μανγκένας τι ανέν ειρήνη σαρί κι πφουβ. Οτθάρ, κο Ιανουάριος 1920 κερντέ ι Κοινωνία των Εθνών. Κο Οκτώβριος 1945, λάκε θεσιάτε αβιλό ο Οργανισμός Ηνωμένων Εθνών. Ανταβά οργανισμός βακέρντιβελα «όγδοος βασιλιάς». Αλλά νανέ παγκόσμια δύναμη. Η ζορ σο τθερέλα αβέλα κατά κυβερνήσεις σο τσσίντενα λέσταρ. Συμβολικέ λαφίντζαρ, η Γραφή βακερέλα ότι ανταλά κυβερνήσεις ισί ο “10 βασιλιάδες”.

14, 15. (α) Καβά πράγμας σο τθερέλα τι κερέλ ι “Μπαρέ Βαβυλωνάσαρ” μουτθαβένα αμένγκε ο εδάφια Αποκάλυψη 17:​3-5; (β) Σο κερντέ μπουτ τζενέ σο τσσίντενας κατά ψεύτικη θρησκεία;

¹⁴ Διαβάνεν Αποκάλυψη 17:​3-5. Εκχέ φαντασιάτε σο ντινάς-λες ο Ντεβέλ, ο απόστολος Ιωάννης ντικχλάς εκχέ λουμνιά, ι “Μπαρέ Βαβυλωνά”, σο μανγκέλα τι σικαβέλ σαρέ ο ψεύτικες θρησκείες ι ντουνιάσκε. Σο σικαβέλα ανταγιά φαντασία; Μπουτ βακίτι ακανά, ο ψεύτικες θρησκείες κερένα μπουτί γιεκ ι κυβερνησιέντζαρ ντα ντένα-λεν πουμαρί ζαμ.  Αλλά ατζεχάνικ ο Ιεχωβά κα τσσουβέλ κο γκι κι κυβερνησιένγκο «τι κερέν λέσκι σκέψη». Σο κα αβέλ-πες ιτιρί ανταλέσταρ; Οντουλά κυβερνήσεις, ο “10 βασιλιάδες”, κα τσσουβέν-λεν ι ψεύτικε θρησκειέντζαρ ντα κα καταστραφίνεν-λεν.​—Αποκ. 17:1, 2, 16, 17.

¹⁵ Σαρ τζανάσα ότι ο τέλος ι Μπαρέ Βαβυλωνάκο ισί πασέ; Για τι απαντίνας ανταλέ ερωτησιάτε, ισί λατσσό τι ντας-αμέν γκοντί ότι εκ κατά πράγματα σο αρακχαβένας ι πουρανέ Βαβυλωνά ισινέ ο πανιά ι μπαρέ λενιάκε Ευφράτης. Ο βιβλίος ι Αποκαλυψιάκο μοιασκιαρέλα ι εκατομμύριε τζενέν σο τσσίντενα κατά Μπαρί Βαβυλώνα “πανίντζαρ” σο ντένα αρακχαϊπέ. (Αποκ. 17:​15) Αλλά βακερέλα-ντα ότι ο πανιά κα “σουκιόνας”, ντα ανταβά σικαβέλα ότι ο ψεύτικες θρησκείες ι ντουνιάσκε κα χασαρένας μπουτέ τζενέν σο τσσίντενας λένταρ. (Αποκ. 16:​12) Αντιβές νικιόλα μπαγιά οντιά προφητεία, σόσκε μπουτ τζενέ μουκχλέ ι ψεύτικη θρησκεία ντα ρόντενα γιαβερτθέ βοήθεια πουμαρέ προβληματένγκε.

16. Σαρ κερένα αμένγκε λατσσιπέ ο προφητείες σο τθερένα τι κερέν με το Ηνωμένα Έθνη ντα ι Μπαρέ Βαβυλωνάσαρ;

¹⁶ Σαρ κερένα αμένγκε λατσσιπέ ανταλά προφητείες;  Ο Ηνωμένα Έθνη σο αβιλέ κο ντουνιάς ντα η ψεύτικη θρησκεία σο χασαρέλα πι ζορ σικαβένα ότι τζουβντιάσα κο τελευταία ντιβεσά. Παρόλο σο μπουτ τζενέ τσσιναντέ τι τσσίντεν κατά Μπαρί Βαβυλώνα, ο τέλος ι ψεύτικε θρησκειένγκο κα αβέλ γιαβερέ τροπόσαρ. Σαρ βακερντάμ πο οπρέ, ο Ιεχωβά κα τσσουβέλ κο γκι κι «ντεσέ βασιλιαδένγκο», δηλαδή κι κυβερνησιένγκο σο τσσίντενα κατά Ηνωμένα Έθνη, «τι κερέν λέσκι σκέψη». Η καταστροφή ι ψεύτικε θρησκειάκι ανταλέ βασιλιαδένταρ κα αβέλ αζομάν σο ο τζενέ να κα μπεκλεντίνεν-λα ντα κα κερέλ-λεν τι σαστίνεν. * (Αποκ. 18:​8-10) Ο τέλος ι Μπαρέ Βαβυλωνάκο κα κερέλ ι ντουνιάς τι ατσσόλ πουταρντέ μόσαρ ντα μπορεί τι ανέλ δυσκολίες, αλλά ι Ντεβλέσκο λαός κα χαιρίνελ. Σόσκε; Ανταβά μπαρό ντουσμάνι ι Ιεχωβά Ντεβλέσκο να κα αβέλ πάλι, ντα κα τζανάς ότι ατζεχάνικ κα ελευθερώντιβας ανταλέ πφιρνέ ντουνιάσταρ!​—Λουκ. 21:28.

17, 18. (α) Σαρ μπορίνασα μα τι τσσιναβάς τι μπαριαράς αμαρί πίστη; (β) Σο κα ντικχάς κο γιαβέρ μάθημας;

¹⁷ Ο Δανιήλ βακερντάς ότι «ο αληθινός σικλιαριπέ» κα “αβγατίντιβελας”. Ντα μπαγιά αβιλό-πες ανταβά! Αγαβάσα μπουτ λατσσές ο προφητείες σο τθερένα τι κερέν αμαρέ ντιβεσέντζαρ. (Δαν. 12:4, 9, 10) Ανταλά προφητείες ισί αζόμ αληθινές σο πφερένα-αμέν σεβασμός ι Ιεχωβάσκε ντα λέσκε Λαφίσκε. (Ησ. 46:​10· 55:​11) Οντουλέσκε, για μα τι τσσιναβέν τι μπαριαρέν τουμαρί πίστη, σικλιαρέν-τουμέν λατσσές κατά Γραφή ντα βοηθίνεν γιαβερέν-ντα τι αβέν λατσσέ αμαλά ι Ιεχωβάσαρ. Βοβ κα αρακχαβέλ σαρέ οντουλέν σο ντένα λέσκε μπέσα σαρέ πουμαρέ γκίσαρ, ντα κα ντελ-λεν ι «ειρήνη σο ατσσόλα για πάντα».​—Ησ. 26:3.

¹⁸ Κο γιαβέρ μάθημας, κα σικλιάς προφητειένγκε σο τθερένα τι κερέν ι Χριστιανικέ κχανγκιριάσαρ κο τελευταία ντιβεσά. Κα σικλιάς ότι ανταλά προφητείες ταιριάνενα μπουτ λατσσές σαρέ ι γιαβερέ προφητειέντζαρ σο τθερένα τι κερέν ι τελευταίε ντιβεσέντζαρ. Κα ντικχάς γιαβερά-ντα πράγματα σο σικαβένα ότι ο Ιησούς, αμαρό Βασιλιάς σο ακανά κερέλα κουμάντος, σικαβέλα οντουλένγκε σο τζάνα παλά-λέστε καλέ ντρομέστε τι πφιρέν.