NHLOKOMHAKA YA XIDONDZRO 28
Mfumu Wa Xikwembu Nkulukumba Wa Fuma!
‘A mfumu wa misava wu ndzruluki wa Hosi yezru ni wa Kriste wa yone; yi ta fuma hi masiku ni masiku.’—MPF 11:15.
LISIMU 22 Mfumu Wu Le Matilweni—A Wu Te!
NKATSRAKANYU WA LESWI TAKA DONDZRIWA *
1. He xini xiyimu xa misava namunhla nakone leswo swi hi tiyisekisa yini?
LOKO va vona mintxhumu leyi yentxekaka, vhanu swa va kazratela ku pfumela leswaku siku dzrin’wana mintxhumu yi ta yampswa. Phela mindangu ya hahluka. A vhanu va ya va va ni nsele, tihanyi nakone a va na mhaka ni vambeni. Vhanu vanyingi swa va kazratela ku dumba lava nga ni wulawuli. Ku hlaya ntiyiso, leswo swi komba leswaku mintxhumu yi ya ku yampsweni. Ha yini hi hlaya leswo? Hikusa leswi vhanu va swi yentxaka swi hetisisa wuprofeta bya leswi Bibele dzri hlayiki leswaku vhanu a va ta va xiswone a ‘masikwini ya wugamu’. (2Tm 3:1-5) Hinkwavu lava tinyikaka nkama wa ku kambisisa, va swi vona leswaku wuprofeta mayelanu ni masiku ya wugamu bya hetiseka. Leswo i xikombiso xa leswaku Yesu a wa fuma a Mfun’wini wa Xikwembu Nkulukumba. Kambe handle ka wupfofeta lebyi kumekaka ka 2 Timoteo 3:1-5, kuni wuprofeta byin’wana lebyi vulavulaka hi Mfumu wa Xikwembu Nkulukumba. Nakone ku vona ku hetiseka ka wuprofeta lebyo swoswi swi ta tiyisa lipfumelo dzrezru.
Ku fana loko hi tlhavinyetela switlephu swa mufoto wa ku xonga, loko hi yelanisa wuprofeta bya Daniyel ni bya Apfuletelo, hi kota ku twisisa ku yampswa nkama lowu hi hanyaka ka wone ni leswaku hinkwaswu swi yentxeka hi kuya hi nkama lowu Yehovha a wu bekiki (Vona yava 2)
2. Hi ta bula hi yini ka xidondzro lexi, nakone ha yini? (Tlhamuxela xifaniso lexi nga ka kapa.)
2 Ka xidondzro lexi, hi ta vona 1) wuprofeta lebyi hi pfunaka ku twisisa leswaku Mfumu wa Xikwembu Nkulukumba wu sungule nkama muni ku fuma, 2) wuprofeta lebyi hi kombaka leswaku Yesu a sungule ku fuma a Mfun’wini wa Xikwembu Nkulukumba ni 3) wuprofeta lebyi kombisaka ndlela leyi valala va Xikwembu Nkulukumba va taka helisiwa ha yone. Hi ta vona leswaku wuprofeta lebyi bya yelana ku fana ni switlephu swa mufoto lowu tsremeleliwiki, leswi loko swi tlhavinyetiwile swi humesaka mufoto wa ku xonga. Loko hi yelanisa wuprofeta lebyo hi kota ku twisisa ku yampswa nkama lowu hi hanyaka ka wone ni leswaku hinkwaswu swi yentxeka hi kuya hi nkama lowu Yehovha a wu bekiki.
LESWI HI PFUNAKA KU TIVA LESWAKU MFUMU WA XIKWEMBU NKULUKUMBA WU SUNGULE KU FUMA
3. He xini xitiyisekiso lexi wuprofeta bya Daniel 7:13, 14 byi hi nyikaka xone mayelana ni Hosi ya Mfumu wa Xikwembu Nkulukumba?
3 A wuprofeta lebyi kumekaka ka Daniel 7:13, 14 byi kombisa leswaku Yesu Kriste a a ta va Hosi leyi fanelekaka a Mfun’wini wa Xikwembu Nkulukumba. Vhanu lava humaka a matikweni ya ku hambanahambana a va ta nyonxa hi ku va lava ‘mu tizrelaka’ nakone a ku na hosi leyi ta ka mu pfaleta. Nakone wuprofeta byin’wana ka buku dzra Daniel byi hlaya leswaku Yesu a a ta nyikiwa Wuhosi a ku heleni ka 7 wa minkama. Xana swa koteka ku tiva hi ku helela nkama lowu Yesu a sunguliki ha wone ku fuma?
4. Tlhamuxela ndlela lweyi a buku dzra Daniel 4:10-17 dzri hi pfunaka ha yone ku tiva nkama lowu Mfumu wa Xikwembu Nkulukumba wu sunguliki ku fuma ha wone. (Vona ntlhamuxelo wa le hansi.)
4 Dondzra Daniel 4:10-17. A ‘minkama ya ntlhanu na mibidzri [7]’ yi yimela 2.520 wa malembe. A nkama lowo wu sugule ku kontiwa hi 607 M.N.Y. loko Vababilona va suse hosi ya wugamu leyi Yehovha a yi bekiki a Yerusalema. Nakone a nkama lowo wu hele hi 1914 N.Y., loko Yehovha a beke Yesu swanga Hosi ya Mfumu wa Xikwembu Nkulukumba, ‘lwe a mfanelo yi nga yakwe’. *—Ezk 21:25-27.
5. Xana wuprofeta bya ‘minkama ya ntlhanu na mibidzri’ byi hi pfuna hi ndlela yini?
5 Xana wuprofeta lebyi byi hi pfunisa kuyini? Ku twisisa wuprofeta mayelana ni ‘minkama ya ntlhanu na mibidzri’ swi tiyisa lipfumelo dzrezru ka leswaku Yehovha a ta hetisisa swidumbiso swake hi nkama wa kone. Hi lani ku fanaka Yehovha a ta hetisisa wuprofeta hinkwabyu hi nkama lowu a wu bekiki. Xileswo, hi nga tiyiseka leswaku a siku dzra Yehovha dzri nga ka dzri nga hlweli!—Hab 2:3.
HI SWI TIVISA KUYINI LESWAKU YESU A BEKIWE SWANGA HOSI YA MFUMU WA XIKWEMBU NKULUKUMBA
6. a) Hi swi tivisa kuyini leswaku Yesu awa fuma a matilweni? b) Xana Apfuletelo 6:2-8 yi swi kombisa hi ndlela yini leswo?
6 A ku heleni ka wutizreli byake bya lani misaveni, Yesu a profete hi swiyentxakalu leswi a swi ta pfuna vadondzrisiwa vake akuva va tiva leswaku a sungule ku fuma matilweni. A hlaye leswaku a ku ta va ni tiyimpi, ku pfumaleka ka swakuda ni ku tsrekatsreka ka misava. A tlhele a hlaya leswaku a ku ta va ni mintungu kumbe mavabyi “a mimbangwini ya ku siyanasiyana”. A ntungu wa COVID-19 i xin’we xa swikombiso xa leswo. Swiyentxakalu hinkwaswu leswo swi hamba xiyenge xa leswi Bibele dzri swi vitanaka ‘xikombiso’ xa ku ta, kumbe ku fuma ka Kriste. (Mt 24:3, 7; Lk 21:7, 10, 11) Ntsrhaku ka 60 wa malembe na Yesu a file a tlhela a pfuxiwa, a nyike Yohane wutsrhokotsrhoko lebyi yengetelekiki mayelana ni Mfumu wa Xikwembu Nkulukumba. (Dondzra Apfuletelo 6:2-8.) A swiyentxakalo hinkwaswo leswo swi humeleli ntsrhaku ka loko Yesu a sungule ku fuma hi 1914.
7. Ha yini wubihi byi ye byi yengeseleka lani misaveni loko Yesu a sungule ku fuma tilweni?
7 Ha yini wubihi byi ye byi yengeseleka lani misaveni loko Yesu a sungule ku fuma tilweni? Apfuletelo 6:2 yi nyikela dzrungula dzra lisima. Ntxhumu wa ku sungula lowu Yesu a wu yentxiki loko a sungula ku fuma a ve ku lwa yimpi. A a lwa na mani? A a lwa na Sathana ni mademona yake, hi ku ya hi Apfuletelo 12, Sathana ni mademona yake va hluliwile va va va txukumeteliwa lani misaveni. Ntsrhaku ka leswo, Sathana a txhulule mahlundzru yake vhanwini, leswi tisaka ‘khombo ka misava’.—Mpf 12:7-12.
A hi nyonxi loko hi vona mintxhumu ya ku biha na yi yentxeka, kambe leswo swi yengesela ku dumba kwezru ka leswaku Mfumu wa Xikwembu Nkulukumba wa fuma (Vona yava 8)
8. Xana ku vona ku hetiseka ka wuprofeta swi hi pfuna hi ndlela yini?
8 Xana wuprofeta lebyi byi hi pfunisa kuyini? Mintxhumu leyi yentxekaka misaveni ni mahanyela ya ku biha ya vhanu ma swi beka livaleni leswaku Yesu a sungule ku fuma. Xileswo, a matsrhan’wini ya kuva hi hlundzruka hi kola ka mahanyela ya vhanu lava kalaka va nga na mhaka ni vambeni nakone va nga ni nsele, hi fanela ku dzrimuka leswaku swiyentxo swavu hinkwaswu swi le ku hetisiseni ka wuprofeta bya Bibele. A Mfumu wa Xikwembu Nkulukumba wa fuma! (Ps 37:1) Nakone hi nga yimela leswaku mintxhumu yi ya yi bindzra nkama lowu Armagedoni dzri tsrhindzrekelaka. (Mr 13:8; 2Tm 3:13) I tovoko dzrikulu ngopfu ku tizrela Papayi wezru wa le tilweni, lwa nga ni lizrandzru, lweyi a hi pfunaka ku twisisa leswaku ha yini mintxhumu yi bindzra hi ndlela leyi!
NDLELA LEYI VALALA VA XIKWEMBU NKULUKUMBA VA TAKA HELISIWA HA YONE
9. Hi ku ya hi Daniel 2:28, 31-35, he wini mfumu lowu a wu tava kone loko Yesu a sungula ku fuma?
9 Dondzra Daniel 2:28, 31-35. Hi tlhela hi vona ku hetiseka ka wuprofeta lebyi namunhla. A lozro dzra hosi Nebukadinetsara dzri kombise leswi a swi ta yentxeka loko Yesu a sungula ku fuma ‘a minkameni lemi taka’. Valala va Yesu la misaveni va patsra mfumu wa misava hinkwayu wa wugamu lowu hlayiwaka Bibeleni, lowu fanekiseliwaka hi ‘minkondzro ya . . . nhumbu [nsimbi] ni vumba’. A mfumu lowo hi wone wu fumaka nakone wu humelele hi nkama wa Yimpi ya Kusungula ya Misava loko Grã-Bretanha ni Estados Unidos va hambe xipfumelelanu. A xifaniso xa lozro dzra Nebukadinetsara, xi hi komba matsrhamela mabidzri mayelana ni mfumu lowu, lawa ma wu hambanisaka ni mimfumu leyin’wana.
10. a) Xana wuprofeta bya Daniel byi wu tlhamuxelisa kuyini hi ndlela leyi hetisekiki a mfumu wa misava hinkwayu wa Anglo-América? b) Hi fanela ku tivonela ka yini? (Vona bokisi ledzri liki “ Tivonele Ka Vumba!”)
10 A tsrhamela dzra ku sungula hi leswaku ku hambana ni mimfumu yimbeni leyi ku vulavuliwaka ha yone ka wuprofeta bya Daniel, a mfumu wa misava hinkwayu wa Anglo-América a wu fanekiseliwi hi woru kumbe prata, kambe wu fanekiseliwa hi nsimbi leyi patsriwiki ni vumba. A vumba dzri fanekisela ‘tinxaka ta vhanu’ kumbe vhanu lava tolovelekiki. (Dn 2:43) Namunhla hi kota ku vona, minkutxetelo yavu ka mavhotu, matsima ya ku lwela timfanelo ta vhanu, switereka ni mintlhanganu ya ku lwela timfanelo ta vatizri. Hinkwaswu leswi, swi yentxa swi yi kazratela mimfumu ku hetisisa leswi yi swi djulaka.
11. I yini xi hi tiyisekisaka leswaku hi hanya masikwini ya wugamu?
11 Tsrhamela dzra wubidzri dzra mfumu wa misava hinkwayu wa Anglo-América, lowu fanekiseliwaka hi minkondzro ya xifaniso, hi leswaku wone hi wo mfumu wa wugamu lowu hlayiwaka hi Bibele. Handle ka wone a ku nga ha ti va ni wun’wana. Wu ta helisiwa a Armagedoni, loko Mfumu wa Xikwembu Nkulukumba wu helisa mimfumu hinkwayu ya misava. *—Mpf 16:13, 14, 16; 19:19, 20.
12. He xini xitiyisekiso xin’wana lexi buku dzra Daniel dzri hi nyikaka xone nakone xi hi tiyisa hi ndlela yini?
12 Xana wuprofeta lebyi byi hi pfunisa kuyini? A wuprofeta bya Daniel byi nyikela dzrungula dzrinyingi ledzri kombisaka leswaku hi hanya a masikwini ya wugamu. Ku tlula 2.500 wa malembe lama khalutiki, Daniyele a profete leswaku a ku ta va ni mune wa mimfumu ya misava hinkwayu, leyi a yi ta khumba hi ku kongoma vhanu va Xikwembu Nkulukumba. Nakone Daniyele a tlhele a profeta leswaku a mfumu wa misava hinkwayu wa Anglo-América, a wu ta va wone wa wugamu. Leswo swi tiyisa dumbo dzrezru, ni ku hi yentxa hi vona leswaku mimfumu ya misava leyi yi ta helisiwa ku sala ntsena Mfumu wa Xikwembu Nkulukumba wu fuma misava hinkwayu.—Dn 2:44.
13. a) Xana a hosi ya wu 8 ni ‘khume dzra tihosi’ swi fanekisela yini? (Apfuletelo 17:9-12) b) Xana wuprofeta lebyo byi hetiseka hi ndlela yini?
13 Dondzra Apfuletelo 17:9-12. A Yimpi ya Wubidzri ya Misava yi honetele ngopfu swinene, kambe leswo swi hetisise wuprofeta byin’wana bya Bibele mayelana ni masiku ya wugamu. A tihosi ta misava ti sungule ku tikazratela ku beka ku zrula a misaveni hinkwayu. Kutani hi Janeru wa 1920, va vumbe a Ntwananu wa Matiko, lowu ku sukela hi Otubru wa 1945 wu siviwiki hi Ntlhanganu wa Matiko. Ntlhanganu lowo wa matiko wu vitaniwa hosi ya wu 8, kambe wone a hi mfumu wa misava hinkwayu hikusa a nkutxetelo ni ntamu wa wone wu vilela mpfunu wa mimfumu yin’wana. A Bibele dzri vitana mimfumu leyo swanga ‘khume dzra tihosi’.
14-15. a) I yini leswi Apfuletelo 17:3-5 yi swi hlayaka mayelana ni “Babilona Lwenkulu”? b) I yini leswi taka humelela lava seketelaka wukhongoti bya madzrimi?
14 Dondzra Apfuletelo 17:3-5. Xikwembu Nkulukumba a yentxe leswaku Yohane a va ni xivoniso. A vone wansati wa nghwavana ku nga ‘Babilona Lwenkulu’, lweyi a fanekiselaka wukhongoti hinkwabyu bya madzrimi. Xana xivoniso lexo xi hetiseka hi ndlela yini? I khale na wukhongoti bya madzrimi byi seketela mimfumu ya misava. Ku nga li khale, Yehovha a ta beka a timbilwini ta tihosi leto akuva ‘ti hamba makungu yakwe’. Ku ta yentxeka yini? A mimfumu leyo, ku nga ‘khume dzra tihosi’, yi ta helisa wukhongoti hinkwabyu bya madzrimi.—Mpf 17:1, 2, 16, 17.
15 Hi swi tivisa kuyini lewaku ku helisiwa ka Babilona Lwenkulu ku le kusuhi? Akuva hi hlamula xivutiso lexo, hi fanela ku dzrimuka leswaku a doropa dzra Babilona a dzri sizreleliwa ngopfungopfu hi mati ya Nambu wa Ewufrata. A buku dzra Apfuletelo dzri fananisa a ‘nambu’ lowo ni vhanu va ku tala lava seketelaka Babilona Lwenkulu. (Mpf 17:15) A buku dzra Apfuletelo dzri tlhela dzri hlaya leswaku mati lawo a ma ta woma, leswi kombisaka leswaku vhanu va ku tala a va ta tsrhika wukhongoti bya madzrimi. (Mpf 16:12) A wuprofeta lebyi bya hetiseka namunhla, hikusa vhanu va ku tala va huma ka wukhongoti bya madzrimi va ya djula ntlhantlhu wa swikazratu swavu a mimbangwini yimbeni.
16. Xana Ntlhanganu wa Matiko wu vumbiwe nkama muni nakone Babilona Lwenkulu a ta helisiwa siku muni? Xana hi pfunekisa kuyini loko hi twisisa wuprofeta mayelana ni Ntlanganu wa matiko ni ku helisiwa ka Babilona Lwenkulu?
16 Xana wuprofeta lebyi byi hi pfunisa kuyini? A ku vumbiwa ka Ntlhanganu wa Matiko ni kuva vhanu va nga ha byi seketeli wukhongoti bya madzrimi, swi tiyisekisa leswaku hi hanya a masikwini ya wugamu. Nambileswi vhanu vanyingi va kalaka va nga ha mu seketeli Babilona Lwenkulu, ku helisiwa kwake ku ta va hi tindlela timbeni. Hi lani hi swi voniki hakone a kusunguleni, Yehovha a ta yentxa leswaku a ‘khume dzra tihosi’ leti fanekiselaka mimfumu hinkwayu leyi seketelaka Ntlhanganu wa Matiko, ‘ti hamba makungu yakwe’. Mimfumu leyi yi ta helisa Babilona Lwenkulu na vhanu va ku tala va nga swi yimelanga. * (Mpf 18:8-10) A ku helisiwa ka Babilona lwenkulu ku ta vanga mpfilumpfilu a misaveni, ina, ku ta vanga swikazratu swinyingi. Kambe vhanu va Xikwembu Nkulukumba va ta va ni swivangelo swibidzri swa ku nyonxa. Xa ku sungula, a wukhongoti bya madzrimi byi ta helisiwa hi lani ku nga helikiki. Xa wubidzri, ku huluxiwa kwavu ka xiyimu lexi xa ku biha ku tava ku li kusuhi ngopfu swinene!—Lk 21:28.
LAVISELA WUMUDZRUKU HI KU DUMBA
17-18. a) Xana hi nga tama hi dzri tiyisa hi ndlela yini lipfumelo dzrezru? b) I yini leswi hi taka swi kambisisa ka xidondzro lexi landzrelaka?
17 Daniyele a profete leswaku a wutivi bya ntiyiso a byi ta yandzra nakone hi leswi yentxekaka namunhla! Ha byi twisisa wuprofeta lebyi nga ku hetisekeni. (Dn 12:4, 9, 10) Wuprofeta lebyi bya hetiseka hi lani swi hlayiwiki ha kone. Nakone leswo swi hi yentxa hi tala hi ku hlamala ni kuva hi hlonipha Yehovha kun’we ni Zritu dzrake. (Eza 46:10; 55:11) Xileswo tama u tiyisa lipfumelo dzraku hi ku dondzra Bibele, ni hi ku pfuna van’wana akuva va va ni wuxaka lebyi tiyiki na Yehovha. Xikwembu Nkulukumba wezru a ta bekisa hinkwavu lava mu dumbaka, nakone a ta va sizrelela va va va hanya a ku zruleni lokukulu.—Eza 26:3.
18 Ka nhlokomhaka leyi landzrelaka, hi ta dondzra hi wuprofeta lebyi vulavulaka hi malandzra ya Yehovha a masikwini ya wugamu. Hi ta vona leswaku wuprofeta lebyo na byone byi swi beka livaleni leswaku hi hanya a masikwini ya wugamu. Hi ta tlhela hi vona wumboni bya leswaku Hosi yezru Yesu Kriste a kongomisa vhanu va Xikwembu Nkulukumba.
LISIMU 61 Yanani Mahlweni, N’wine Timboni!
^ Hi hanya a minkameni leyi hlamalisaka a matin’wini hinkwawu! A Mfumu wa Xikwembu Nkulukumba wu simekiwile, hi lani swi profetiwiki hakone a Bibeleni. Ka xidondzro lexi, hi ta kambisisa byin’we bya wuprofeta byolebyo, hi vona ndlela leyi byi tiyisaka ha yone lipfumelo dzrezru ka Yehovha ni ku hi pfuna ku tama hi zrula hi dumba Yehovha ku nga li namunhla ntsena kambe ni le nkameni lowu taka.
^ Vona xidondzro 32 mhaka 4 ka buku ledzri liki Hanya Hi Ku Nyonxa Hi La Ku Nga Helikiki!, u tlhela u vona vhidiyu ledzri liki Mfumu Wa Xikwembu Nkulukumba Wu Sungule Ku Fuma Hi 1914.
^ Akuva u kuma dzrungula ledzri yengetelekiki mayelana ni wuprofeta bya Daniel, vona Xihondzo Xo Rindza xa 15 ka Junyu wa 2012, matluka 14-18.
^ Akuva u kuma leswi yengetelekiki mayelana ni swiyentxakalu leswi, vona ndzrima 21 ka buku ledzri liki Mfumo Wa Xikwembu Wa Fuma!
