1. O le ā ua tatou mautinoa i ai, ma aiseā?

 PE E faigatā iā te oe ona faatumauina se vaaiga saʻo ona o le tulaga ua iai le lalolagi i le taimi lenei? Ua tau leai se alofa i totonu o aiga. O le toʻatele o tagata ua faateteleina le sauā, manatu faapito, ma le ʻinaʻinā. E toʻatele foʻi tagata ua lē maufaatuatuaina taʻitaʻi o malo. Ae e mafai ona tatou maua le mautinoa mai i mea ua tutupu. Aiseā? Talu ai o loo faia e tagata mea tonu ia o loo valoia e le Tusi Paia e faatatau i “aso e gata ai.” (2 Timo. 3:1-5) O le faataunuuina o lenei valoaga, ua faamaonia ai ua amata ona pule Iesu Keriso o le Tupu o le Malo o le Atua, ma e leai se tagata faamaoni e na te teena le faataunuuina o lenei valoaga. Ae e lē na o le pau lenā o le valoaga e faatatau i le Malo. E faamalosia foʻi lo tatou faatuatua, pe a iloiloina isi valoaga e leʻi leva ona faataunuuina.

2. O le ā o le a tatou iloiloina i lenei suʻesuʻega, ma aiseā? (Tali i le ata i le faavaa.)

² O le a tatou iloiloina i lenei suʻesuʻega (1) se valoaga e fesoasoani iā i tatou e iloa ai le taimi na faavaeina ai le Malo, (2) o valoaga e tatou te iloa ai le faatasi mai o Iesu, o le Tupu o le Malo o le Atua e ui ina lē vaaia, ma le (3) o valoaga e faailoa mai ai le auala o le a faaumatiaina ai fili o le Malo o le  Atua. O le a tatou iloa ai foʻi e fesootaʻi lelei nei valoaga e pei o vaega taʻitasi o se paso, ina ia tatou manino lelei ai i le taimi o loo tatou ola ai e tusa ai ma le taimi atofaina a Ieova mo mea e tutupu.

3. O le ā ua faamautinoa mai i le valoaga i le Tanielu 7:13, 14, e faatatau i le Tupu o le Malo o le Atua?

³ Ua faamautinoa mai i le valoaga i le Tanielu 7:13, 14, e leai se isi e sili atu ona agavaa e pei o Iesu Keriso e avea ma Tupu o le Malo o le Atua. O le a matuā olioli tagata mai i atunuu uma e “auauna iā te ia,” ma e leai se isi tupu e suitulaga iā te ia. O loo valoia i se isi valoaga i le tusi o Tanielu, o le a maua e Iesu lona Malo i le iʻuga o taimi faavaloaga e fitu. Pe e mafai ona tatou iloa le taimi e faataunuuina ai lenā valoaga?

4. Ia faamatala pe faapefea ona fesoasoani le Tanielu 4:10-17, e tatou te iloa ai le tausaga na avea ai Keriso ma Tupu o le Malo. (Tagaʻi i le faaopoopoga.)

⁴ Faitau le Tanielu 4:10-17. O “taimi e fitu,” ua faaata mai ai tausaga e 2,520. Na amata taimi e fitu i le 607 T.L.M., ina ua aveesea e le malo o Papelonia le tupu mulimuli na nofo i le nofoālii o Ieova i Ierusalema. Na faaiʻuina i le 1914 T.A. ina ua fai e Ieova Iesu ma Tupu, o “lē ua iai le pule faaletulafono” e avea ai ma Tupu o le Malo o le Atua. *​—Eseki. 21:25-27.

5. O le ā se tasi o auala e aogā ai iā i tatou le valoaga e faatatau i “taimi e fitu”?

⁵ E faapefea ona aogā iā i tatou lenei valoaga? O le malamalama i “taimi e fitu,” ua toe faamautinoa mai ai iā i tatou e faataunuuina e Ieova ana folafolaga i le taimi tonu ua ia faatulagaina. E pei ona faatulagaina e Ieova o le taimi tonu e faavaeina ai lona Malo, o le a ia faataunuuina foʻi isi valoaga i le taimi tonu ua ia atofaina. Ioe, “e lē faatuai mai” le aso o Ieova.​—Sapa. 2:3.

6. (a) O ā ni mea o loo tutupu i le lalolagi e faamaonia ai ua avea Keriso ma Tupu i le lagi? (e) Ua faapefea ona faamaonia i le valoaga o loo i le Faaaliga 6:2-8?

⁶ A o lata ina faaiʻuina le faiva a Iesu i le lalolagi, na ia valoia ai ni mea o le a tutupu i le lalolagi e fesoasoani i ona soo e iloa ai le taimi e amata ona pule ai i le lagi. Na ia taʻua ai nisi o mea e pei o taua, oge ma mafuiʻe. Na ia valoia foʻi o le a iai faamaʻi “i lea mea ma lea mea,” e pei o le faamaʻi ua aafia ai nei le lalolagi o le KOVITI-19. E pei ona taʻua i le Tusi Paia, o na mea o se “faailoga” o le faatasi mai o le Keriso. (Mata. 24:3, 7; Luka 21:7, 10, 11) I le silia ma le 60 tausaga talu ona maliu Iesu ma toe foʻi i le lagi, na ia faamautinoa atili atu i le aposetolo o Ioane o le a tutupu moni na mea. (Faitau le Faaaliga 6:2-8.) Ua tutupu nei mea uma talu ona avea Iesu ma Tupu o le Malo i le 1914.

7. Aiseā ua mafatia ai tagata i le lalolagi talu ona avea Iesu ma Tupu?

⁷ Aiseā ua matuā leaga ai le tulaga o mea i le lalolagi talu ona avea Iesu ma Tupu? O loo taʻua i le Faaaliga 6:2 se faamatalaga tāua. O le matafaioi muamua lava a Iesu ina ua avea ma Tupu, o le tauina lea o se taua. O ai na tau ma Iesu? O le Tiapolo ma ana temoni. O loo taʻua i le Faaaliga mataupu e 12, na toʻilalo Satani i lenā taua ma lafo ifo ai o ia ma ana temoni i le lalolagi. Na matuā lotoa Satani ma sasao faaafi ai lona ita i tagata. O le  iʻuga, na matuā mafatia ai tagata i le lalolagi.​—Faaa. 12:7-12.

8. E faapefea ona aogā iā i tatou le faataunuuina o valoaga e uiga i le Malo?

⁸ E faapefea ona aogā iā i tatou nei valoaga? O mea e tutupu i le lalolagi ma le matilatila o suiga i uiga o tagata, e fesoasoani e tatou te iloa ai ua avea Iesu ma Tupu. Nai lo o le lē fiafia la pe a faaalia e tagata uiga manatu faapito ma le feitagaʻi, e tatau ona tatou manatua o na gaoioiga o loo faataunuuina ai valoaga o le Tusi Paia. Ua pule nei le Malo! (Sala. 37:1) E tatou te faatalitalia o le a faateteleina le leaga o le tulaga o mea i le lalolagi, a o matuā latalata atu iā Amaketo. (Mare. 13:8; 2 Timo. 3:13) Pe e tatou te lē lotofaafetai ai ea i lo tatou Tamā alofa i le lagi, mo lana fesoasoani iā i tatou e malamalama i le māfuaaga ua faateteleina ai le leaga i o tatou aso?

9. Ua faapefea ona faamatalaina i le valoaga o loo i le Tanielu 2:28, 31-35, le malo malosi mulimuli o loo pulea le lalolagi, ma o anafea na amata ai ona iai lenā malo?

⁹ Faitau le Tanielu 2:28, 31-35. Ua tatou vaaia le faataunuuina o lenei valoaga i aso nei. Na faailoa mai i le miti a Nepukanesa mea o le a tutupu “i le faaiʻuga o aso,” pe a amata le pulega a le Keriso. O fili o Iesu i le lalolagi o le a aofia ai le malo malosi mulimuli o loo valoia i le Tusi Paia, lea o loo faaata mai i “vae uʻamea ma le omea.” O loo pulea e lenei malo malosi le lalolagi. Na amata ona iai lenei malo malosi i le taimi o le Taua Muamua a le Lalolagi, ina ua galulue soosootauʻau Amerika ma Peretania. Na valoia foʻi i le miti a Nepukanesa e faatatau i le faatagata, ni mea mataʻina se lua e ese ai lava lenei malo malosi mai i isi malo na pulea le lalolagi.

10. (a) Ua faapefea ona faamatalaina ma le saʻo aʻiaʻi e le valoaga a Tanielu malo fuifuilua o Amerika ma Peretania? (e) O le ā le lamatiaga e tatau ona tatou ʻalofia? (Tagaʻi i le pusa “ Ia Faaeteete i le Omea!”)

 ¹⁰ Muamua, e lē pei lenei malo o isi malo malolosi o loo taʻua i le miti a Nepukanesa. O le malo fuifuilua o Amerika ma Peretania, o loo faaata mai e le uʻamea ma le omea ua fefiloi faatasi. Ua faaata mai e le omea le “fanau a tagata,” po o tagata lautele. (Tani. 2:43, fpl.) E pei ona faamaonia i aso nei, ua faigatā i lenei malo malosi ona faataunuu mea e manaʻo ai, ona ua taaʻina e tagata lautele faiga palota, taulamua i le puipuia o aiā tatau a tagata, solo tetee ma faalapotopotoga a tagata faigaluega.

11. E faapefea i le pulea e Amerika ma Peretania o le lalolagi ona faamalosia ai lo tatou mautinoa ua tatou ola i taimi o le iʻuga?

¹¹ Lona lua, o Amerika ma Peretania o loo faaata mai e vae o le faatagata telē. O lenei malo malosi, o le malo mulimuli lea e pulea le lalolagi o loo valoia e le Tusi Paia. E leai se isi malo malosi faapolotiki e sosoo ai ma lenā malo. Ae o le a faaumatia e le Malo o le Atua iā Amaketo lenā malo ma isi malo uma o tagata. *​—Faaa. 16:13, 14, 16; 19:19, 20.

12. O ā isi faamaoniga o loo i le valoaga a Tanielu e aumaia ai iā i tatou se faamāfanafanaga ma se faamoemoe?

¹² E faapefea ona aogā iā i tatou lenei valoaga? Ua aumaia e le valoaga a Tanielu se isi faamaoniga ua tatou ola i taimi o le iʻuga. I le silia ma le 2,500 tausaga ua mavae, na valoia ai e Tanielu pe a uma le pulega a le malo o Papelonia, e iai isi malo malolosi e fā o le a pule i le lalolagi, ma o le a aafia tagata o le Atua i a latou pulega. Na faailoa mai foʻi e Tanielu, o Amerika ma Peretania le Malo Malosi mulimuli o le a pulea le lalolagi. O lenei faamautinoaga e aumaia ai iā i tatou se faamāfanafanaga ma se faamoemoe, ua toeitiiti ona faaumatia lea e le Malo o le Atua o faigāmalo uma a tagata, ma o le a ia pulea atoatoa le lalolagi.​—Tani. 2:44.

13. O ai o loo faaata mai e le “tupu lona valu” ma “tupu e toʻasefulu” o loo taʻua i le Faaaliga 17:9-12, ma na faapefea ona faataunuuina lenei valoaga?

¹³ Faitau le Faaaliga 17:9-12. O le matuā faaleagaina o mea i le Taua Muamua a le Lalolagi, na faataunuuina ai le isi valoaga a le Tusi Paia e faatatau i aso e gata ai. Na mananaʻo taʻitaʻi o malo uma ia iai se filemu i le lalolagi. O lea iā Ianuari 1920, na latou faavaeina ai Malo Sosoo lea na suia i Malo Aufaatasi iā Oketopa 1945. Ua taʻua lenā faalapotopotoga “o le tupu lona valu,” ae e lē o se malo e pulea le lalolagi. E faalagolago lona malosi ma ana taaʻiga i malo faapolotiki o loo lagolagoina o ia. O loo taʻua na malo i le Tusi Paia i se uiga faafaatusa, o “tupu e toʻasefulu.”

14-15. (a) O le ā ua faailoa mai i le Faaaliga 17:3-5 e faatatau iā “Papelonia le Aai Tele”? (e) O le ā ua tupu iā i latou o loo lagolagoina lotu sesē?

¹⁴ Faitau le Faaaliga 17:3-5. Na faailoa atu e le Atua iā Ioane se vaaiga e faatatau i se fafine talitane e taʻua o “Papelonia le Aai Tele,” lea o loo faaata mai ai lotu sesē uma. O le ā na faailoa mai i lenā vaaiga? Ua leva ona faifaimea faatasi ma lagolagoina e faalapotopotoga o lotu sesē uma malo faapolotiki. Peitaʻi, ua toeitiiti ona tuu lea e Ieova i loto o malo faapolotiki, “ina ia faataunuu lona finagalo.” O le ā le iʻuga? O le a osofaʻia e na malo faapolotiki po o “tupu e toʻasefulu” faalapotopotoga o lotu sesē uma, ma faaumatia i latou.​—Faaa. 17:1, 2, 16, 17.

 ¹⁵ E faapefea ona tatou iloa ua latalata tele mai le faaumatiaga o Papelonia le Aai Tele? E fesoasoani lo tatou manatuaina, o se tasi o mea na puipuia ai Papelonia anamua o le vaitafe tele o Eufirate. I le tusi o Faaaliga, o loo faatusaina ai i “vai” le faitau miliona o tagata e lagolagoina Papelonia le Aai Tele. (Faaa. 17:15) O loo faailoa mai ai foʻi o le a “mātūtū” na vai. O loo faaata mai ai o le a ō ese le toʻatele o tagata e lagolagoina faalapotopotoga o lotu sesē. (Faaa. 16:12) I aso nei, ua faataunuuina lenā valoaga i le toʻatele o tagata ua tuua lotu sesē, ma ua amata ona saʻili atu i nisi faalapotopotoga mo se vaifofō o o latou faafitauli.

16. E faapefea ona aogā iā i tatou le malamalama i valoaga e faatatau i Malo Aufaatasi ma le faaumatiaina o Papelonia le Aai Tele?

¹⁶ E faapefea ona aogā iā i tatou nei valoaga? O le aliaʻe mai o Malo Aufaatasi ma le toʻatele o tagata ua ō ese mai i lotu sesē, o nisi na o faamaoniga e iloa ai ua tatou ola i aso e gata ai. E ui ua mātūtū vai faafaatusa o loo lagolagoina Papelonia le Aai Tele, ae e lē o le auala lenā o le a faaumatia ai faalapotopotoga o lotu sesē uma. E pei ona taʻua muamua,  o le a tuu e Ieova i loto o “tupu e toʻasefulu” po o malo faapolotiki e lagolagoina Malo Aufaatasi, “ina ia faataunuu lona finagalo.” O le a faafuaseʻi ona faaumatia e na malo lotu sesē, ma o le a faateʻia ai le lalolagi. * (Faaa. 18:8-10) O le faaumatiaina o Papelonia le Aai Tele, o le a lūlūina ai le lalolagi uma ma ono oo ai faigatā i tagata. Peitaʻi, e lua māfuaaga o le a olioli ai tagata o le Atua i lenā taimi. O le a faaumatia e faavavau lotu sesē le fili o Ieova le Atua, ma ua toeitiiti ona faasaoina lea o i tatou mai i lenei lalolagi amioleaga!​—Luka 21:28.

17-18. (a) E faapefea ona faamalosia pea lo tatou faatuatua? (e) O le ā o le a tatou talanoaina i le suʻesuʻega o loo sosoo mai?

¹⁷ Na valoia e Tanielu “o le a faatuputeleina” le “poto saʻo,” ma o le mea lenā o loo tupu i aso nei. Ua tatou malamalama i valoaga e faatatau i o tatou taimi. (Tani. 12:4, 9, 10) O le saʻo aʻiaʻi o nei valoaga, ua faatumuina ai i tatou i le lototalisapaia mo Ieova ma lana Afioga faagaeeina. (Isa. 46:10; 55:11) O lea, ia faaauau pea ona faamalosia lou faatuatua e ala i le filigā e suʻesuʻe le Tusi Paia, ma fesoasoani i isi e atiaʻe se faiā vavalalata ma Ieova. O le a leoleomalu e Ieova i latou uma e faalagolago atoatoa atu iā te ia, ma o le a ia foaʻi mai pea iā i latou le “filemu.”​—Isa. 26:3.

¹⁸ O le a tatou talanoaina i le suʻesuʻega e sosoo ai valoaga e faatatau i le faapotopotoga Kerisiano i le taimi o le iʻuga. O le a tatou aʻoaʻoina ai, e fesootaʻi lelei na valoaga ma isi valoaga e faatatau i aso e gata ai. O le a tatou iloa ai foʻi isi faamaoniga, o loo taʻitaʻia e lo tatou Tupu o Iesu ona soo faamaoni i le lalolagi.