MUSORO WE KUFUNDA 28
Umambo wa Mwari Waakutonga!
“Umambo we nyika wagara Umambo wa Tenzi wedu no wa Kristu wake.”—ZVAK. 11:15.
NGOMA 22 Umambo Wotonga—Ngauuye!
ZVATICAFUNDA *
1. Nyika iri pamugariro upi?
ANHU akawanda paanoringira mugariro we nyika ino, zvinoashupira kutendera kuti zviro zvicacinja. Zvezvirokwazvo, mhuri dziri kuparadzana, anhu ari kubambirira kuita zvecisimba, kudzirangarira uye akawanda anoona kuti zvinoshupha kugonda aya ano masimba. Asi zvese izvi i cipangidzo cekuti zviro zvicada kucinja. Ngei? Ngekuti anhu arikuita zviya kamare zvinobhuiwa no Bhaibheri kuti zvicaitika mu “mazuwa ekupedzesera.” (2 Ti. 3:1-5) Munhu wese unopsvaka nguwa yekuti aongorore zviro zviri kuitika, ucaona kuti uphorofiti we mazuwa ekupedzesera uri kudzadzika uye izvona zvinopangidza kuti Djesu waakutonga mu Umambo wa Mwari. Asi uu ndi umwe we uphorofiti wakawanda unocokuita no Umambo. Kuona uphorofiti unganani wecidzadzika zvingabambisa kutenda kedu.
Kuitawo hingana mapesa e jogo inopisisa musoro anobatana, uphorofiti we ma bhuku e Bhaibheri a Dhanyeri na Zvakapangidzwa anobatana kuti anyase kupanganidza kuti taapapi maererano ne zvicada kuitika (Onai ndima 2)
2. Ticaonei mu fundo ino, uye ngei? (Panganidzai foto ye pa kapa.)
2 Mu fundo ino ticaona (1) uphorofiti ucatibetsera kuzwisisa kuti Umambo wa Mwari wakatanga kutonga rini, (2) uphorofiti ucatibetsera kuzwisisa kuti Djesu agara Mambo we Umambo wa Mwari kudenga, uye (3) uphorofiti ucapangidza kuti azondi e Umambo wa Mwari acatsakatiswa kudini. Ticaona kuti uphorofiti iwona wakaita hingana mapesa e jogo inopisisa musoro. Patinobatanidza mapesa aya, tinokwanisa kuzwisisa zvese uye tonyasa kuziya kuti tiri pa nguwa ipi. Zvese zvirikuitika zvinopangidza kuti taa mu nguwa ya Djehovha.
TINOZIYA KUDINI ZUWA RAKAGADZWA UMAMBO
3. Uphorofiti uri pana Dhanyeri 7:13, 14 unotigondesei?
3 Uphorofiti uri mu bhuku ra Dhanyeri 7:13, 14 wakagara wabhuya kare kuti Djesu Kristu aizogara Mutongi akakwana we Umambo wa Mwari. Anhu e madzinza ese aizogara akapfara “ngekumuseenzera,” uye ayena aazombocinjwi no mutongi umweni. Uphorofiti umweni uri mu bhuku ra Dhanyeri unobhuya kuti Djesu aizotanga kutonga mu masure mekupera nguwa nomwe. Zvinobvira kamare kuziya kuti Djesu akagara mambo riini?
4. Panganidzai kuti bhuku ra Dhanyeri 4:10-17 rinotibetsera kudini pa kuziya gore rakagara Kristu Mambo. (Onai masoko e pasi.)
4 Erengai Dhanyeri 4:10-17. “Nguwa nomwe” inoimirira makore 2520. Nguwa iyona ii, yakatanga mu gore ra 607 K.A.A. pa nguwa yekuti Bhabhironi yakabvisa mambo wekupedzesera wakasanangurhwa na Mwari ku Djerusarema. Hino nguwa nomwe dzakapera muna 1914 K.A. pa nguwa yekuti Djehovha akagadza Djesu—“uyo ano citenderhwa ce pa mutemo”—cekugara Mambo we Umambo wa Mwari. *—Ezek. 21:25-27.
5. Ngei uphorofiti unoreketa nge zve “nguwa nomwe” unokosha katiri?
5 Ngei uphorofiti uu wecikosha katiri? Kuzwisisa uphorofiti unoreketa nge zve “nguwa nomwe” kucabambisa rugondo redu rekuti Djehovha acadzadzisa zvipikirhwa zvake pa nguwa yakasisira. Djehovha akasanangura nguwa yakasisira kuti Djesu agare Mambo, ngo mushobo umwewo, uphorofiti wese umweni ucadzadzika pa nguwa yakasisira. Tingagara no rugondo rekuti zuwa ra Djehovha “arizononoki!”—Abha. 2:3.
TINOZIYA KUDINI KUTI DJESU AGARA MAMBO WE UMAMBO WA MWARI
6. (a) Tinoziya kudini kuti Djesu aakutonga kudenga? (b) Zvakapangidzwa 6:2-8 inopangidza kudini izvona?
6 Paainga oda kupedza basa rake rekuparidzira pasi pano, Djesu akabhuya zviro zvinganani zvaizoitika pasi pano pa nguwa yekuti ayena aakutonga kudenga. Pakati pe zviro izvi, ayena akabhuya nge zve hondo, nzara uye zvigidhi-gidhi. Ayena akabhuyazve kuti kucaoneka nhenda dzakasiyana-siyana “ku mbuto dzakawanda”—uye COVID-19 ndi umwe we muezaniso we nhenda idzi. Zviitiko zvese izvi zvinobatanidzwa pa “cipangidzo” cekuoneka ka Kristu. (Mat. 24:3, 7; Ruka 21:7, 10, 11) Mumasure me makore anodarika 60 Djesu aa afa uye ahwirira kudenga, ayena akabvunza muphostori Juau masoko akadzara nge zve zviitiko izvi. (Erengai Zvakapangidzwa 6:2-8.) Zviitiko zvese zvakatanga kuitika kubvira Djesu paakagara Mambo muna 1914.
7. Ngei zviro zvakabambirira kushata kubvira Djesu paakatanga kutonga?
7 Ngei zviro pasi pano zvakabambirira kushata kubvira Djesu paakagara Mambo? Bhuku ra Zvakapangidzwa 6:2, rinotipasa masoko anokosha—ciro cekutanga cakaizwa na Djesu paakagara Mambo ngecekurhwa hondo. Akarhwisa ani? Akarhwisa Sathani no madhimoni ake. Zvakapangidzwa 12, inobhuya kuti Sathani no madhimoni ake akanyiswa pa hondo iyona uye akakhandirhwa pasi pano. Mu masure me izvona, Sathani unosotsungurira shungu dzake dzese ku anhu zvecibara “matambudziko pa nyika.”—Zvak. 12:7-12.
Isusu atipfari patinozwa masoko akashata, asi izvona zvinobambisa rugondo redu rekuti Umambo wa Mwari waakutonga (Onai ndima 8)
8. Ngei tisikanyanyi kunetseka nge zviro zvakashata zviri kuitika nyamasi uno?
8 Ngei uphorofiti uu wecikosha katiri? Hingana zvataona pekutanga, zviri pamhene kuti Djesu akagara Mambo nge ndaa ye maitiro akashata e anhu nyamasi uno. Ndiyo ndaa, pane kugara takanyangadzwa nge ndaa ye maitiro akashata e anhu, tinodikana kuedzurira kuti awona ari kudzadzisa uphorofiti we mu Bhaibheri. Umambo zvezvirokwazvo waakutonga! (Pis. 37:1) Panguwa ino yekuti Amagedhoni iri kukhwedera, tingaetsera kuti zviro zvicabambirira kushata. (Mark. 13:8; 2 Ti. 3:13) Azvipfadzi here kuseenzera Baba edu ekudenga ano rudo anotibetsera kuziya kuti ngei zviro zvakashata kudai pasi pano?
AZONDI E UMAMBO WA MWARI ACATSAKATISWA KUDINI
9. Maererano na Dhanyeri 2:28, 31-35, utongi upi waizooneka pa nguwa yekuti Djesu aakutanga kutonga?
9 Erengai Dhanyeri 2:28, 31-35. Isusu tiri kuona uphorofiti uu wecidzadzika nyamasi uno. Hope dza Nabhukodhonozori dzakapangidza zviro zvaizoitika mu “mazuwa ekupedzesera,” mumasure mekutonga ka Kristu. Azondi a Djesu e pasi pano aizobatanidzawo utongi wekupedzesera uno simba we nyika yese wakarekethwa mu Bhaibheri, uyo unoimirirhwa no “tsoka dzinombwa no simbi uye ne dongo.” Utongi uu uno simba waakutonga. Uwona wakatanga kutonga pa Hondo Yekutanga ye Nyika Yese panguwa yekuti Grã-Bretanha no Estados Unidos akaita citenderano. Mufananidzo we hope dza Nabhukodhonozori unopangidzawo zvipangidzo zviiri zve utongi uu uno simba waizosiyaniswa no utongi upi hawo wakadarika.
10. (a) Uphorofiti uri mu bhuku ra Dhanyeri unonyasa kupanganidza kudini nge zve umambo we Grã-Bretanha ne América? (b) Tinodikana kungwarirei? (Onai bhokisi rakazwi “ Ngwarirai Dongo!”)
10 Cipangidzo cekutanga nge cekuti kusiyana no utongi umweni uno simba unorekethwa pa ciono ca Dhanyeri, umambo we Grã-Bretanha ne América inofananidzirhwa, haiwa no simbi ino simba kana kuti no sirivha, asi no mubatanidzwa we simbi no dongo. Dongo rinoimirira “mubarirhwana we anhu.” (Dha. 2:43, masoko e pasi) Nyamasi uno, tinokwanisa kuona pamhene maitiro e anhu pa mavhoto, makampanya e kurhwira zvitenderhwa zvawo, paanoita mabongozozo uye anhu anoita kuti zvishuphire anyautongi kuita zviro zvaanonga aronga.
11. Ngei tingagara no cokwadi cekuti taakurarama mu mazuwa ekupedzesera?
11 Cipangidzo cecipiri ce umambo we Grã-Bretanha ne América cinoimirirhwa no tsoka dze mufananidzo wakakura, nge ce kuti utongi uu uno simba we nyika yese ngewekupedzesera wakarekethwa no Bhaibheri. Mu masure mawo, apazoonekizve utongi umweni uno simba. Uwona pamwepo no utongi umweni ucatsakatiswa no Umambo wa Mwari pa Amagedhoni. *—Zvak. 16:13, 14, 16; 19:19, 20.
12. Uphorofiti uri mu bhuku ra Dhanyeri, unotipasazve cipangidzo cipi cinopangidza kuti tirikurarama mu mazuwa ekupedzesera?
12 Ngei uphorofiti uu wecikosha katiri? Uphorofiti uri mu bhuku ra Dhanyeri, unotipasa masoko akadzara ekuti tirikurarama mu mazuwa ekupedzesera. Mumasure me makore anodarika 2500, Dhanyeri wakaphorofita kuti mu masure me Bhabhironi, umambo urongomuna uno simba we nyika yese waizooneka uye aizoshusha anhu a Mwari. Kupinda izvona, Dhanyeri wakapanganidza kuti umambo we Grã-Bretanha ne América waizotonga pa nguwa yekuti Djesu agara Mambo. Izvona zvinoita kuti tigare no kariro yakakura ngekuti tinoziya kuti Umambo wa Mwari ucatsakatisa utongi we anhu uye iwona ndiwo ucatonga nyika yese.—Dha. 2:44.
13. “Mambo wecisere” no “nyanga gumi,” anorekethwa pana Zvakapangidzwa 17:9-12, anoimirirei, uye uphorofiti uwona urikudzadzika kudini?
13 Erengai Zvakapangidzwa 17:9-12. Hondo Yekutanga ye Nyika Yese yakaunza matambudziko akakura, asi izvona zvakadzadzisa uphorofiti umweni we Bhaibheri wakaringana no mazuwa ekupedzesera. Atongi e nyika akatanga kupeta masimba kuti aunzise runyararo mu nyika yese. Asi muna Janero wa 1920, awona akaumba Sangano re Nyika Dzakabatana (Liga das Nações), uye iyona yakatsiiwa no Sangano re Mubatanidzwa we Nyika dze Pasi Rese (Nações Unidas) muna Otubro wa 1945. Sangano iri rinodainzwa kuti “mambo wecisere.” Asi irona aribatanidzwi pa umambo uno simba we nyika yese, ngekuti masimba aro ekutonga anotsamira pa utongi umweni. Bhaibheri rinodainza utongi uwona reciti “madzimambo gumi.”
14-15. (a) Zvakapangidzwa 17:3-5 inoreketei nge zve “Bhabhironi Guru”? (b) Cinyi ciri kuitika nyamasi uno no magereja ekunyepa?
14 Erengai Zvakapangidzwa 17:3-5. Mwari akaita kuti Juau aone ciono. Pa ciono icona, iyena wakaona hure, “Bhabhironi Guru,” rinoimirira magereja ese ekunyepa. Ciono icona cirikudzadzika kudini? Kubvira kare, magereja ekunyepa anosotsigira uye anosoita citenderano no anyautongi e nyika. Mbai-mbai pano, Djehovha acakanda mu mwoyo me atongi aya “cido cekuita zvaanorangarira.” Mugumisiro wakhona ngaupi? Anyautongi aya, kana kuti, “madzimambo gumi,” acarhwisa uye acatsakatisa magereja ese ekunyepa.—Zvak. 17:1, 2, 16, 17.
15 Tinoziya kudini kuti Bhabhironi Guru raakuda kutsakatiswa? Kuti tidaire mubvunzo uu, tinodikana kuedzurira kuti dii rakakura re thaundi rekare re Bhabhironi raidziirirhwa no mvura ye Murambo wa Eufrati. Bhuku ra Zvakapangidzwa rinoezanisa mamirionji e anhu anotsigira Bhabhironi Guru hingana “mvura” ye murambo Eufrati, uye iyona inoseenza hinga cidziiriro. (Zvak. 17:15) Bhuku ra Zvakapangidzwa rinobhuyawo kuti mvura iyona ‘yaizooma,’ zvecipangidza kuti magereja ekunyepa aizoruza aya anoatsigira. (Zvak. 16:12) Uphorofiti uu uri kudzadzika nyamasi uno, ngekuti anhu akawanda ari kusiya magereja uye arikupsvaka mazano ekugadzirisa matambudziko awo ku mbuto dzimweni.
16. Sangano re Mubatanidzwa we Nyika dze Pasi Rese yakaonekepo rini uye Bhabhironi Guru ricaparadzwa rini?
16 Ngei uphorofiti uu wecikosha katiri? Kuoneka ke Sangano re Mubatanidzwa we Nyika dze Pasi Rese (Nações Unidas) uye kusama kutsigira kuri kuita anhu magereja ekunyepa zvinopangidza kuti tiri kurarama mu mazuwa ekupedzesera. Kunyazi anhu akawanda asikacaripi kutsigira Bhabhironi Guru, kutsakatiswa karo kucauya nge makwanza amweni. Hingana zvataona, Djehovha acaita kuti “madzimambo gumi”—awo anoimirira masimba e zve matongerhwo e nyika uye anotsigira Sangano re Mubatanidzwa we Nyika dze Pasi Rese (Nações Unidas)—“aite zvaanorangarira.” Panguwa inonga isikakarirhwi no anhu, masimba aya ezvematongerhwo e nyika acatsakatisa Bhabhironi Guru. * (Zvak. 18:8-10) Kutsakatiswa ke Bhabhironi Guru kucazungunisa nyika yese uye kucaunzisa matambudziko akawanda, asi anhu a Mwari acagara no zvikonzero zviiri zvekuti apfare. Cekutanga, magereja ekunyepa anonga atsakatiswa zvacose uye cecipiri, izvona zvinopangidza kuti taapadhuze pe kununurhwa mu nyika ino yakashata!—Ruka 21:28.
RINGIRAI RAMANGWANA NO RUGONDO
17-18. (a) Tingaitei kuti tirumbwe tecibambisa kutenda kedu? (b) Ticaonei mu fundo inoteera?
17 Dhanyeri wakabhuya kuti “ruziyo recokwadi ricawanda.” Uye ndizvona kamare zvirikuitika! Isusu tinozwisisa uphorofiti iri kudzadzika. (Dha. 12:4, 9, 10) Iwona iri kunyasa kudzadzika uye izvona zvinoita kuti tibambirire kushamiswa uye kureremedza Djehovha no Soko rake. (Isa. 46:10; 55:11) Ndiyo ndaa, rumbwai mecitunhudzira kutenda kenyu nge kufunda Bhaibheri uye kubetsera amweni kuti agare no ushamwari wakabamba na Djehovha. Ayena acadziirira ese aya acagonda naye uye ayena acaita kuti awona “arumbwe ano runyararo.”—Isa. 26:3.
18 Mu fundo inoteera, ticaona nge zve uphorofiti unganani unoreketa nge zve anhu a Mwari mu mazuwa ekupedzesera. Ticaona kuti uphorofiti iwona unopangidzawo kuti tirikurarama mu mazuwa ekupedzesera. Ticaonawo kuti Djesu Kristu—Mambo wedu—ari kutungamirira anhu a Mwari.
NGOMA 61 Shingai Imwimwi Apupuri!
^ Isusu tirikurarama mu nguwa inoshamisa! Hinga zvakarekethwa no uphorofiti we Bhaibheri, Umambo wa Mwari wagadzwa. Mu fundo ino, ticaona fundo dzinganani dze uphorofiti uu uye kuti uwona unobambisa kudini rugondo redu kuna Djehovha, uye mushobo waunotibetsera kuti tirumbwe takaterama uye tecigonda Djehovha haiwa basi mu nguwa ino, asi kutobatanidzawo mu nguwa inoteera.
^ Onai fundo 32 ndima 4 ye bhuku rinozwi Pfadzwai ne Upenyu Nokusikaperi! uye vhidhiyo inozwi, Umambo wa Mwari Wakatanga Kutonga Muna 1914 mu jw.org.
^ Kuti muziye zvakawanda nge zve uphorofiti wa Dhanyeri, onai Murindiri wa 15 ya Junyo ya 2012, mapaji. 14-19, mu ciShona.
