1. Itthu xeeni siniiraneya moolumwenkuni, ni itthu iyo sinooniherya exeeni?

 OKATHI atthu anceene aniweha aya itthu soohiloka siniiraneya moolumwenkuni, khanikupali wira muhoolo itthu sinooloka. Imusi sinceene khasiniphentana mukina ni mukhwaawe. Nave olelo-va, atthu anceene anootepa okhala oowali, oowiitthuna ni ootakhala murima. Atthu anceene khanaaroromela makhulupale. Itthu iyo soohiloka siniiraneya, sinooniherya wira muhoolo itthu sinooloka. Mwaha wa xeeni? Mwaha woowi ninkhala “mahiku ookiserya”, ntoko Biibiliya aahimmye awe khalai ene. Ti maana aya atthu anceene anitepa aya opaka itthu soohiloka. (2 Tim. 3:1-5) Khula mutthu oniweha ni onivarerya oratteene itthu siniiraneya moolumwenkuni, onimoona wira eprofesia enilavula mahiku ookiserya enniiraneya. Nto eyo ennooniherya wira Yesu Kristu onnilamulela ntoko Mwene a Omwene wa Muluku. Ohiya paahi eprofesia eri 2 Timootheyo 3:1-5, sookhala iprofesia sikina sinilavula Omwene wa Muluku. Okathi ninweha ahu wira iyaakha iya sookiserya iprofesia iyo sinniiraneya, eyo ennilipiha waamini wahu.

2. Mwaha ola, ninrowa othokorerya exeeni ni mwaha wa xeeni?

² Mwaha ola, ninrowa oweha (1) eprofesia ennikhaliherya woona wira Omwene wa Muluku onnilamulela, (2) iprofesia sinnikhaliherya woona wira Yesu onnilamulela wiirimu ntoko Mwene a Omwene wa Muluku ni (3) iprofesia sinooniherya wira awanani a Omwene wa Muluku anoopwetexiwa. Ntoko siisaale alufiati okhanle awe oolupaanya ipetaasu soovirikana sa ekuwo wira opake ekaalasa, epulusa, aahiiso etthu ekina,  iprofesia sinceene sa mBiibiliyani sinninikhaliherya osuwela oratteene opuro niri ahu moovariha ni okathi othanliwe ni Yehova.

3. Eprofesia eri Daniyeli 7:13, 14, ennikupaliha exeeni?

³ Eprofesia eri Daniyeli 7:13, 14, yaahooniherya wira Kristu Yesu taarowa, okhala Mwene oolokexa a Omwene wa Muluku. Atthu a maloko ootheene yaamuhakalala omurumeela Yesu ni khonikhala-khala orantteliwaka ni mwene mukina. Eprofesia ekina eri eliivuru ya Daniyeli yaahihimya khalai ene wira Yesu aarowa opacerya olamulela wanikisa wa okathi 7. Niireke vanniweryaneya osuwela okathi Yesu aakhalihiwe awe mwene?

4. Daniyeli 4:7-14, onnikhaliherya sai osuwela mwaakha Yesu aakhalihiwe awe Mwene a Omwene wa Muluku? (Nwehe enoota.)

⁴ Mmusome Daniyeli 4:7-14. Okathi 7 onithoonyerya iyaakha 2.520. Okathi owo waapacenrye mwaakha wa 607 Kristu Ohinatthi Orwa, okathi yoowo ababilonia yaamukuminhe aya oYerusalemu mwene ookiserya aathanliwe ni Yehova. Okathi owo 7, waamanle silini? Waamanle mwaakha wa 1914, okathi Yehova aamwiirinhe awe Yesu, yoowo ‘omuthanlale awe’ okhala Mwene a Omwene wa Muluku. * — Ezek. 21:30-32.

5. Xeeni eprofesia ya okathi 7, eri aya ya efaita yinceene?

⁵ Xeeni eprofesia ela eri aya ya efaita yinceene? Osuwela oratteene eprofesia ya okathi 7, enninikhaliherya okupali wira Yehova onoomaliherya itthu sootheene oleihenrye awe okathi wooreerela. Yehova aahithanla okathi wooreerela wira Yesu okhale Mwene. Mwa enamuna emosaru, iprofesia sikina sinimwiiraneya okathi wooreerela othanliwe ni Yehova. Nikupaliki ni murima wootheene wira nihiku na Yehova nnoophiya “tthiri, khivaninteya”. — Hab. 2:3.

6. (a) Ninsuwela sai wira Yesu oopacerya olamulela wiirimu? (b) Wiisuupulula 6:2-8, onooniherya sai eyo?

⁶ Ohalaka omala okathi aalaleerya awe valaponi, Yesu aahilavula itthu saarowa wiiraneya valaponi, saarowa waakhaliherya atthareli awe, woona wira aahipacerya olamulela wiirimu. Itthu iyo saahela muhina ikhotto, etala ni itetere. Nave, Yesu aahihimya khalai ene wira saamukhumelela ikwerere, niire so, iretta suulupale “mapuro oovirikana”. Nto oretta ola wa koronaviiru, ntakiheryo nimosa na ikwerere iyo. Itthu iyo sootheene siniirela mpantta ele Biibiliya onihimya awe okhala “ethoonyeryo” ya otthika wa Kristu. (Math. 24:3, 7; Luka 21:7, 10, 11) Nuuvira iyaakha 60, okhuma okathi Yesu iiviwe awe ni ohihimuxiwa, Yesu aahimooniherya murummwa Yohani itthu sikina saarowa wiiraneya. (Mmusome Wiisuupulula 6:2-8.) Itthu iyo sootheene sinniiraneya okhuma okathi Yesu okhalihiwe awe Mwene mwaakha wa 1914.

7. Xeeni itthu valaponi sinitepa aya otakhala nuumala Yesu okhalihiwa Mwene?

⁷ Xeeni itthu valaponi sinitepa aya otakhala nuumala Yesu okhalihiwa Mwene? Wiisuupulula 6:2, onninooniherya itthu sikina sa efaita yinceene. Etthu yoopacerya Yesu aapanke awe, nuumala okhalihiwa Mwene a Omwene wa Muluku, waari owana ekhotto. Owo aawanne naani? Aawanne ni Satana Diabo ni malaikha ootakhala. Wiisuupulula ekapiitulu 12, onnooniherya wira Satana ni malaikha ootakhala yaahixinttiwa ni yaahiriheliwa elapo ela ya vathi. Mwaha waivaavo, “elapo ya  vathi” yootakhaliwa, maana Satana oonanariwa vanceene ni onnaakumiherya mixankiho apinaatamu. — Wiis. 12:7-12.

8. Xeeni nihintepa ahu oxanka, mwaha wa itthu otakhala valaponi?

⁸ Xeeni eprofesia ela eri aya ya efaita yinceene? Itthu siniiraneya moolumwenkuni ni mikhalelo atthu anooniherya aya sinninikhaliherya woona wira Yesu ookhalihiwa Mwene. Nto, ohiya oxanka ni oriipiwa murima mwaha wa atthu okhala ootakhala murima ni oowiitthuna, nihaana wuupuwela wira atthu awo animaliherya iprofesia sa mBiibiliyani. Tthiri Omwene woopacerya olamulela! (Esal. 37:1) Itthu sinrowa otepaka otakhala okathi enaattamela aya ekhotto ya Armagedoni. (Mar. 13:8; 2 Tim. 3:13) Ti voohakalaliha vanceene omukokhorela Muluku oophenta, onnikhaliherya osuwela nthowa naya mixankiho sintepa aya otakhala.

9. Moovarihana ni eprofesia eri Daniyeli 2:28, 31-35, tiivi eri epotensia yookiserya ni okathi xeeni yaapacenrye aya olamulela?

⁹ Mmusome Daniyeli 2:28, 31-35. Olelo-va, ninniweha yiiraneyaka eprofesia ela. Etthu mwene Nabukodonosori aalonhe awe yaahooniherya etthu yaarowa wiiraneya mahiku ookiserya, nuumala Kristu opacerya olamulela. Awanani a Yesu valaponi yaahela muhina epotensia ya olumwenku wootheene yaahimmwale khalai ene mBiibiliyani. Epotensia eyo enithoonyerya inawu sa elatarato “wokina wa yuma, wokina w’oloko”. Epotensia eyo ya olumwenku wootheene yoopacerya olamulela. Eyo yaapacenrye olamulela okathi wa Ekhotto Yoopacerya ya Olumwenku Wootheene, vaavo Grã-Bretanha ni Estados Unidos yaapanke aya nivarihano wira avareke  hoothe, nivarihano nenno naasuweliwa okhala Anglo-Americana. Elatarato mwene Nabukodonosori aalonhe awe, ennooniherya itthu piili epotensia ela ya olumwenku wootheene evirikanne aya ni ipotensia sikina saalamulenle khalai ene.

10. (a) Eprofesia ya Daniyeli enooniherya sai oratteene epotensia Anglo-Americana? (b) Ephoole xeeni ninreerela ahu okhalana? (Nwehe ekaaxa eni: “ Mukhalane Ephoole ni Oloko!”)

¹⁰ Etthu yoopacerya epotensia ela evirikanne aya ni ipotensia sikina Nabukodonosori ooniheriwe awe, okhala wira epotensia Anglo-Americana khenooniheriwa ni eweero ni eparatha, masi eyo etakaaheriwe ni eyuuma ni oloko. Nto oloko onithoonyerya osuulu wa apinaatamu anilamuleliwa, niire so, atthu pure. (Dan. 2:43) Olelo-va, ninniweha ikuru atthu arina aya okathi wa ikampaanya sa mwaathanle, idireitu sa apinaatamu, manifestasau ni mavarihano. Nto itthu iyo sootheene, sinnaakhoottiherya makhulupale a epoliitika orumeela owerya waya wootheene wira apake ele aniphavela aya.

11. Etthu xeeni ennikupaliha wira ninkhala wanikisa?

¹¹ Etthu ya nenli epotensia Aglo-Americana, yeeyo enithoonyerya metto sa elatarato Nabukodonosori aalonhe awe, eyo epotensia yookiserya Biibiliya aahimmye awe. Yamala epotensia Aglo-Americana, khenkhala-tho epotensia ekina. Nto epotensia Anglo-Americana ni ikuvernu sa apinaatamu sinrowa opwetexiwa ni Omwene wa Muluku okathi wa ekhotto ya Armagedoni. * — Wiis. 16:13, 14, 16; 19:19, 20.

12. Etthu xeeni ekina eprofesia ya Daniyeli yaahimmye aya ennimaaliha ni onivaha nlipelelo?

¹² Xeeni eprofesia ela eri aya ya efaita yinceene? Eprofesia ela ya Daniyeli ennihimya itthu sikina sinnikhaliherya osuwela wira ninkhala wanikisa. Iyaakha 2.500 saavinre, eprofesia ya Daniyeli yaahihimya wira nuumala Babilonia saamukhumelela ipotensia 4 saarowa waalamulela atthu a Muluku. Ohiya-vo, eprofesia ya Daniyeli, yaahooniherya wira epotensia Anglo-Americana yaarowa okhala epotensia yookiserya. Nto eyo enninimaaliha ni onivaha nlipelelo, maana moohipisa Omwene wa Muluku onrowa opwetexa ikuvernu sa apinaatamu ni onrowa olamulelaka olumwenku wootheene. — Dan. 2:44.

13. Moovarihana ni Wiisuupulula 17:9-12, “mwene a neethanu neeraru” ni “mamwene 10”, anithoonyerya exeeni? Eprofesia ela eniiraneya sai?

¹³ Mmusome Wiisuupulula 17:9-12. Ekhotto Yoopacerya ya Olumwenku Wootheene yaahihonona itthu sinceene, nto eyo yaahimaliherya eprofesia ekina ya mBiibiliyani enilavula sa mahiku ookiserya. Anamalamulela a olumwenku wootheene yaahiimananiha vanceene wira akumiherye murettele olumwenku wootheene. Nto Janeiro a 1920, awo yaahipaka mutthenkeso wiihaniwa Liga das Nações, yoowo waarantteliwe Outubro a 1945 ni mutthenkeso oniihaniwa Nações Unidas. Mutthenkeso owo onnihimya okhala “mwene a neethanu neeraru”. Masi owo khahiyo epotensia ya olumwenku wootheene. Mwaha wa xeeni? Mwaha woowi, owerya wawe ni ikuru sawe sinlipa ni okhaliheriwa ni ikuvernu sikina. Nto Biibiliya onnihimya ikuvernu iyo okhala “manyaka 10” ni “mamwene 10”.

14-15. (a) Wiisuupulula 17:3-5, oniihimya exeeni sa “Babilonia Muulupale”? (b) Etthu xeeni eniiraneya ni etiini yowootha?

¹⁴ Mmusome Wiisuupulula 17:3-5. Muluku aahimooniherya Yohani, muthiyana namararuwa ori “Babilonia Muulupale”, yoowo onithoonyerya itiini sootheene  soowootha sa olumwenku wootheene. Olelo-va, itthu Yohani ooniheriwe awe, siniiraneya sai? Okhuma khalai itiini soowootha sinivara hoothe ni sinnikhaliherya ikuvernu sa apinaatamu. Moohipisa, Yehova onoohela vamurimani va ahooleli awo a epoliitika “ophavela opaka ele onuupuwela awe”. Etthu xeeni enrowa okhumelela? Ahooleli a epoliitika, aahiiso “mamwene 10” anrowa otuphela ni opwetexa itiini sootheene soowootha. — Wiis. 17:1, 2, 16, 17.

¹⁵ Ninsuwela sai wira opwetexiwa wa Babilonia Muulupale ori vakhiviru? Wira naakhule nikoho nla, nihaana wuupuwela wira epooma ya oBabilonia wa khalai yaakhapeleliwa ni maasi a muro Eufrate. Eliivuru ya Wiisuupulula ennaahimya atthu imilyau sinceene animukhaliherya Babilonia Muulupale, ntoko “maasi”. (Wiis. 17:15) Nave eliivuru ya Wiisuupulula ennihimya wira maasi awo ‘yaamuuma’, eyo enooniherya wira atthu anceene yaamuhiya okhaliherya itiini soowootha. (Wiis. 16:12) Olelo-va, eprofesia ela enniiraneya, mwaha woowi atthu anceene annikhuma itiini soowootha yaavyaka mapuro makina moota woomaliha mixankiho saya.

16. Xeeni vari aya vooloka osuwela okhumelela wa Nações Unidas ni okathi xeeni Babilonia Muulupale onrowa awe opwetexiwa?

 ¹⁶ Xeeni eprofesia ela eri aya ya efaita yinceene? Mwaha woopakiwa mutthenkeso oniihaniwa Nações Unidas ni atthu anceene ohikhaliherya itiini soowootha, eyo enooniherya wira ninkhala mahiku ookiserya. Nave nnaamwi atthu anceene ahimukhaliheryaka Babilonia Muulupale, eyo khenitaphulela wira tanrowa opwetexa itiini soowootha. Ntoko niwenhe ahu wanipacerya, Yehova onrowa ohela vamurimani va “mamwene 10”, eyo piiyo, ahooleli a epoliitika animukhaliherya Nações Unidas, opaka ele Muluku “onuupuwela awe”. Mootutuxerya, mamwene awo anrowa ompwetexa Babilonia Muulupale. Nto eyo, enimwaatikiniha atthu anceene. * (Wiis. 18:8-10) Opwetexiwa wa Babilonia Muulupale onimwaaxankiha atthu anceene ni onookumiherya mixankiho sinceene. Masi aakhala mathowa manli, anrowa owiiriha arumeyi a Muluku ohakalala vanceene. Noopacerya, itiini soowootha seiyo saari awanani a arumeyi a Muluku sinrowa opwetexiwa ni khasinrowa otthikela okhala. Na nenli, nnimoopoliwa olumwenku ola wootakhala! — Luka 21:28.

17-18. (a) Nipakeke exeeni wira nihihiye olipiha waamini wahu? (b) Mwaha onittharelana, ninrowa oweha exeeni?

¹⁷ Daniyeli aahihimya khalai ene wira atthu anceene ‘yamunjererya osuwela waya’. Eyo ti etthu eniiraneya olelo-va! Maana ninniiwexexa iprofesia sinceene siniiraneya mahiku ahu ala. (Dan. 12:4, 9, 10) Iprofesia iyo sinniiraneya oratteene ntoko saahimmwale aya, nto eyo ennincererya omuttittimiha wahu Yehova ni Nuulumo nawe, Biibiliya. (Yes. 46:10; 55:11) Nto muhihiye olipiha waamini wanyu mmusomaka Biibiliya ni waakhaliherya atthu akina okhalana ompatthani wooloka ni Yehova. Khula mutthu onrowa omuroromela Yehova ni murima wootheene, onookhapeleliwa ni ‘onolipihiwa ni murettele’. — Yes. 26:3.

¹⁸ Mwaha onittharelana, ninrowa oweha iprofesia sinaahimya arumeyi a Muluku mahiku ala ookiserya. Nnimwiixutta wira iprofesia iyo, sinnooniherya wira ninkhala mahiku ookiserya. Nave nnooweha wira Mwene ahu Yesu Kristu tonaahoolela arumeyi a Muluku.