ALATIKE AKO 28
Kua ʼAfio Te Puleʼaga ʼo Te ʼAtua
“Kua pule ki te malamanei ia te Puleʼaga ʼo totatou ʼAliki pea mo tana Kilisito.”—APK. 11:15.
KATIKO 22 Kua ʼAfio Te Puleʼaga
TE ʼU MANATU FAKANOUNOU *
1. Kotea ʼae ʼe tou tui papau ki ai? Pea kotea tona tupuʼaga?
KA KE sio ki te ʼu aluʼaga ʼe hoko ʼi te malama ʼaeni, ʼe faigataʼa koa kia koe ʼi ʼihi temi tau maʼu he ʼu manatu ʼe lelei? Kua tahitahiga te logo tahi ʼa te ʼu famili. Kua ʼaʼasili kovi age te agamalohi ʼa te hahaʼi, mo tanatou manatu pe kia natou pea mo tanatou agakovi. Pea tokolahi ʼe mole kei natou falala ki te kau taki. Kae meʼa lelei he ʼe ha ʼi te ʼu aluʼaga ʼaia kua ovi mai te ʼaho ʼae ka pulihi anai te ʼu agakovi fuli. Kotea tona tupuʼaga? Kote’uhi kua fai pe e te hahaʼi te ʼu aga ʼae neʼe fakakikite ʼi te Tohi-Tapu “ ʼi te ʼu ʼaho fakamuli.” (2 Tim. 3:1-5) ʼE mole feala ki he tahi ʼe fakamalotoloto ke fakafeagai ki te lolotoga hoko ʼo te lea fakapolofeta ʼaia. Pea ʼe ha ʼi te hoko ʼo te lea fakapolofeta ʼaia kua Hau ia Kilisito Sesu ʼi te Puleʼaga ʼo te ʼAtua. Kae ʼe kau te lea fakapolofeta ʼaia ʼi te ʼu lea fakapolofeta ʼo ʼuhiga mo te Puleʼaga. Kapau ʼe tou fia fakamalohiʼi tatatou tui, ʼe lelei ke tou toe vakaʼi ʼihi lea fakapolofeta ʼe hoko ʼi totatou temi.
2. Kotea ʼae ka tou vakaʼi ʼi te alatike ʼaeni? Pea kotea tona tupuʼaga?
2 ʼI te alatike ʼaeni, ʼe tou vakaʼi anai (1) he lea fakapolofeta ke tou iloʼi ai pe neʼe fakatuʼu ʼanafea ia te Puleʼaga ʼo te ʼAtua, (2) mo he ʼu lea fakapolofeta ke tou mahino ai kua Hau ia Sesu ʼi te Puleʼaga ʼo te ʼAtua ʼi selo, pea (3) he ʼu lea fakapolofeta ʼe ha ai pe ʼe pulihi feafeaʼi anai te ʼu fili ʼo te Puleʼaga ʼaia. Ohage pe ko he ʼu meʼa ʼe fakapikipiki ke tou sio lelei ai ki he pāki, pea ʼe toe feia pe mo te ʼu lea fakapolofeta ʼa Taniela mo Apokalipesi. Ka tou fakatahiʼi te ʼu lea fakapolofeta ʼaia pea ʼe tou mahino lelei ai pe ʼe tou ʼifea ʼi te kaletalio ʼa Sehova.
ʼE TOU ILOʼI FEAFEAʼI PE NEʼE FAKATUʼU ʼANAFEA TE PULEʼAGA?
3. Kotea ʼae ʼe fakaha ia Taniela 7:13, 14 ʼo ʼuhiga mo te Hau ʼo te Puleʼaga ʼo te ʼAtua?
3 ʼE fakaha mai ʼi te lea fakapolofeta ʼae ia Taniela 7:13, 14, neʼe filifili e Sehova ia Kilisito Sesu, ia ia ʼae ʼe tuha ke ina takitaki tona Puleʼaga. ʼE “tauhi ki ai” he ʼu hahaʼi mai te ʼu puleʼaga fuli ʼi te fiafia. Pea ʼe mole fetogi anai e he tahi. Neʼe ʼi ai te tahi lea fakapolofeta ʼi te tohi ʼo Taniela neʼe fakakikite ai ʼe kamata hau anai ia Sesu ʼi te Puleʼaga ʼaia ʼi te fakaʼosi ʼo te ʼu temi ʼe fitu. ʼE feala koa ke tou iloʼi pe neʼe hoko ʼanafea ia te aluʼaga ʼaia?
4. Fakamahino pe ʼe tokoni feafeaʼi mai ia te tohi ʼo Taniela 4:10-17 ke tou iloʼi te taʼu ʼae neʼe Hau ai ia Sesu. (Vakaʼi mo te kiʼi nota.)
4 Lau ia Taniela 4:10-17. ʼE fakaʼuhiga ia te ʼu “temi ʼe fitu” kia taʼu ʼe 2 520. Neʼe kamata te ʼu temi ʼaia ʼi te 607 I.M.T.S. ʼi te temi ʼae neʼe fakahifo ai e te kau Papiloni ia te hau fakamuli, ʼae neʼe heka ʼi te hekaʼaga fakahau ʼo Sehova ʼi Selusalemi. Pea neʼe fakaʼosi te ʼu temi ʼaia ʼi te 1914 H.T.S. ʼi te temi ʼae neʼe fakanofo ai e Sehova ia Sesu, ia ia “ae e ina mau te fakamaau,” ko te Hau ʼo tona Puleʼaga. *—Esk. 21:30-32.
5. He koʼe ʼe fakalotomalohi kia tatou ia te lea fakapolofeta ʼo te ʼu “temi ʼe fitu”?
5 He koʼe ʼe fakalotomalohi kia tatou ia te lea fakapolofeta ʼaia? Koteʼuhi ʼe ha mai ai ʼe fakahoko tuʼumaʼu pe e Sehova ʼana fakapapau ʼi tona temi totonu. Neʼe kua ina fakatuʼutuʼu ke fakatuʼu tona Puleʼaga ʼi te temi ʼae kua ina fakatuʼutuʼu ki ai. Pea ʼe tokaga anai ke hoko fuli ʼana ʼihi lea fakapolofeta ʼo mulimuli pe ki tana kaletalio. Koia, ko te ʼaho ʼo Sehova “ ʼe mole tauhala anai.”—Hap. 2:3.
ʼE TOU ILOʼI FEAFEAʼI KUA HAU IA KILISITO?
6. (1) Kotea te ʼu aluʼaga ʼe tou sio ki ai ʼi te kele ʼe fakamoʼoni ai kua Hau ia Kilisito ʼi selo? (2) Ka tou lau ia Apokalipesi 6:2-8, kotea ʼae neʼe fakaha e Sesu ki te apositolo ko Soane? Pea ʼe hoko feafeaʼi anai?
6 ʼI te kua vave ʼosi ʼo te minisitelio ʼa Sesu ʼi te kele, neʼe ina fakakikite he ʼu aluʼaga ʼe hoko anai ʼi te malamanei. Neʼe feala ai ke iloʼi e ʼana tisipulo kua kamata hau ʼi selo. Neʼe talanoa ki he ʼu tau, mo he ʼu hoge pea mo he ʼu mafuike. Neʼe ina toe fakakikite ʼe ʼi ai anai he ʼu taʼi mahaki “mai he potu ki he tahi age potu,” ohage la ko te taʼi mahaki ʼaeni ko te COVID-19. ʼE kau te ʼu aluʼaga ʼaia ki “te fakailoga” ʼo te ʼi heni ʼa Kilisito, ohage ko tona ui ʼi te Tohi-Tapu. (Mat. 24:3, 7; Luka 21:7, 10, 11) Hili taʼu ʼe 60 ki te mate ʼa Sesu mo tana toe liliu ki selo, neʼe ina fakaha ki te apositolo ko Soane ʼe hoko moʼoni anai te ʼu aluʼaga ʼaia. (Lau ia Apokalipesi 6:2-8.) Pea neʼe hoko moʼoni pe te ʼu aluʼaga ʼaia talu mai te 1914, ʼae neʼe Hau ai ia Sesu.
7. He koʼe kua lahi te ʼu malaʼia ʼe tau mo te hahaʼi talu mai te kua Hau ʼa Sesu?
7 He koʼe kua ʼasili kovi age te ʼu aluʼaga ʼae ʼe hoko ʼi te malamanei talu mai te kua Hau ʼa Sesu? ʼE tou maʼu he manatu maʼuhiga ia Apokalipesi 6:2. ʼE fakaha ai ko te ʼuluaki faʼahi neʼe fai e Sesu ʼi tona ʼuhiga Hau neʼe ko te fakahoko ʼo he tau. Ko ai ʼae neʼe ina tauʼi? Neʼe ina tauʼi ia te Tevolo mo ʼana temonio. Ka tou lau te kapite 12 ʼo Apokalipesi, ʼe ha mai ai neʼe mole malo ia Satana pea neʼe li ifo ia ia mo ʼana temonio ki te kele. Neʼe kovi ʼosi tona ita, ʼo to ai tona ita ki te hahaʼi koia ʼae ʼe tupu ai ‘te ʼu malaʼia ʼae ʼe hoko ʼi te kele.’—Apk. 12:7-12.
8. He koʼe ʼe fakalotomalohi kia tatou tatatou sio ki te hoko ʼo te ʼu lea fakapolofeta ʼo ʼuhiga mo te Puleʼaga?
8 He koʼe ʼe fakalotomalohi kia tatou ia te ʼu lea fakapolofeta ʼaia? Ka tou tokagaʼi ia te ʼu aluʼaga ʼe hoko ʼi te malamanei mo te fetogi ʼa te aga ʼa te hahaʼi, pea ʼe tokoni mai anai ke tou iloʼi kua Hau ia Sesu. Koia, ʼe mole tonu ke tou iita moka manatu pe te hahaʼi kia natou totonu mo agakovi, kae tou manatuʼi ʼe ko he lea fakapolofeta ʼaia ʼe tonu ke hoko. ʼE kua ʼafio ia te Puleʼaga. (Pes. 37:1) Pea tahi, ʼe hoko atu pe anai te ʼaʼasili kovi ʼo te ʼu aluʼaga ʼae ʼi te malamanei ʼo kaku ki te hoko mai ʼo Alamaketone. (Mko. 13:8; 2 Tim. 3:13) ʼE mole koa la ke lotofakafetaʼi ki tatatou Tamai ʼe ʼi selo mo fonu ʼi te ʼofa ʼi tana tokoni mai ke tou mahino pe koʼe ʼe tou maʼuʼuli ʼi he temi maveuveu feia?
ʼE PULIHI FEAFEAʼI ANAI IA TE ʼU FILI ʼO TE PULEʼAGA ʼO TE ʼATUA?
9. Kotea ʼae ʼe ui ʼi te lea fakapolofeta ia Taniela 2:28, 31-35 ʼo ʼuhiga mo te malohi fakamalamanei fakamuli? Pea neʼe tuʼu ʼanafea te malohi fakamalamanei ʼaia?
9 Lau ia Taniela 2:28, 31-35. ʼE tou sio ki te hoko ʼo te lea fakapolofeta ʼaia ia ʼaho nei. Neʼe ha ʼi te moemisi ʼa Nepukanesa ia te aluʼaga ka hoko anai “ ʼi te ʼu ʼaho fakamuli,” hili te kamata ʼafio ʼa Sesu. ʼI te temi ʼaia, ʼe kau ki te ʼu fili ʼo Sesu ʼae ʼi te kele ia te malohi fakamalamanei fakamuli ʼae neʼe fakakikite ʼi te Tohi-Tapu. ʼE fakata e te malohi fakamalamanei ʼaia ia “te ʼu ʼuluʼuluʼi vaʼe ʼae neʼe faʼu ʼaki te ukamea pea mo te kele.” Ko te malohi fakamalamanei ʼaia neʼe kua ʼosi lolotoga pule. Neʼe tuʼu lolotoga te ʼUluaki Tau Fakamalamanei, ʼi te temi ʼae neʼe kamata gaue fakatahi ai ia Pilitania mo Amelika. ʼI te moemisi ʼa Nepukanesa, neʼe toe fakakikite ai ʼe kehe age anai te malohi fakamalamanei ʼaia mai te ʼu puleʼaga ʼae ki muʼa atu ʼuhi ko aluʼaga ʼe lua.
10. (1) Kotea ʼae ʼe tou tokagaʼi ia ʼaho nei ʼo ʼuhiga mo te malohi fakamalamanei ko Pilitania mo Amelika ʼae neʼe fakakikite ʼi te tohi ʼo Taniela?(2) Kotea ʼae ʼe tonu ke tou tokaga ki ai? (Vakaʼi te ʼa takai “ ʼE Fakatupu Tuʼutamaki Kia Tatou Ia Te Kele.”)
10 ʼUluaki, neʼe mole hage ia Pilitania mo Amelika ko te ʼu malohi fakamalamanei ʼae neʼe tou talanoa ki ai ʼi muʼa atu ʼi te meʼa ʼae neʼe ha. Kotea tona tupuʼaga? He neʼe mole ina fakata ʼateaina pe te aulo peʼe ko te siliva kae neʼe ina fakata ia te fefioʼaki ʼo te ukamea mo te kele. ʼE fakata e te kele ia “te hakoga ʼo te tagata,” ʼae ko te faʼahiga hahaʼi fuli pe. (Tan. 2:43, nota.) Ia ʼaho nei, ʼe tou tokagaʼi ʼe faigataʼa ki te kau taki ʼo te malohi fakamalamanei ʼaia ia tanatou fai te meʼa ʼae ʼe natou loloto ki ai. Kotea tona tupuʼaga? ʼUhi pe ko te hahaʼi moka natou vote, mo fai he ʼu laka ʼo ʼuhiga mo te ʼu meʼa ʼe tonu ke natou maʼu tatau pea ke lahi age ʼonatou fealagia ʼi tanatou gaue.
11. He koʼe ʼe tou tui papau ʼe tou maʼuʼuli ʼi te ʼu temi fakamuli?
11 Lua, ko Pilitania mo Amelika, ʼae ʼe ina fakata ia te ʼu ʼuluʼuluʼi vaʼe ʼo te fakatata lahi, ʼe ko te malohi fakamalamanei fakamuli ʼae neʼe fakakikite ʼi te Tohi-Tapu. ʼE mole fetogi anai e he tahi age puleʼaga fakatagata. ʼE pulihi anai e te Puleʼaga ʼo te ʼAtua ʼi Alamaketone ia te malohi fakamalamanei ʼaia fakatahi mo te ʼu puleʼaga fakatagata fuli ʼae. *—Apk. 16:13, 14, 16; 19:19, 20.
12. Kotea te ʼu manatu neʼe fakakikite e Taniela ʼe fakalotomalohi kia tatou pea mo tou maʼu ai he ʼamanaki?
12 He koʼe ʼe fakalotomalohi kia tatou te lea fakapolofeta ʼaia? Koteʼuhi ʼe fakaha ai he ʼu manatu ʼe fakamoʼoni ai ʼe tou maʼuʼuli ʼi te ʼu temi fakamuli. Kua hili ki ai taʼu ʼe 2 500, neʼe fakakikite e Taniela ʼe ʼi ai anai he ʼu malohi fakamalamanei ʼe fa ʼe hoa mai ki te malohi fakamalamanei ko Papiloni. Pea ʼe natou puleʼi anai te ʼu kaugana ʼa te ʼAtua. Pea tahi, neʼe ina toe fakaha ʼe ko Pilitania mo Amelika ia te malohi fakamalamanei fakamuli ʼaia. ʼE fakalotomalohi tatatou iloʼi te ʼu manatu ʼaia pea ʼe tou tui papau ʼe kua vave pulihi e te Puleʼaga ʼo te ʼAtua ia te ʼu puleʼaga fakatagata fuli pea ʼe ina puleʼi anai te kele katoa.—Tan. 2:44.
13. Ko ai ʼae ʼe ina fakata ia “te valu hau” pea mo “te ʼu hau ʼe toko hogofulu” ʼae ʼe talanoa ki ai ia Apokalipesi 17:9-12? Pea neʼe hoko feafeaʼi te lea fakapolofeta ʼaia?
13 Lau ia Apokalipesi 17:9-12. Neʼe lahi te ʼu maumau neʼe hoko ʼi te ʼUluaki Tau Fakamalamanei, koia neʼe hoko ai he tahi lea fakapolofeta ʼo ʼuhiga mo te ʼu ʼaho fakamuli. Tokolahi te kau taki politike neʼe natou fia fakatuʼu te tokalelei ʼi te malamanei. Koia, neʼe natou fakatuʼu ai he Sosiete ʼo te ʼu Puleʼaga ʼi Sanualio 1920. Pea neʼe fetogi leva ʼaki te Kautahi ʼo Te ʼu Puleʼaga (ONU) ʼi Oketopeli 1945. ʼE fakata e te kautahi ʼaia ia “te valu hau.” Kae ʼe mole fakaʼuhiga ia ki he malohi fakamalamanei. ʼE ina maʼu pe te malohi ʼuhi ko te ʼu puleʼaga ʼae ʼe lagolago ki ai. ʼE ui ʼi te Tohi-Tapu ko te ʼu puleʼaga ʼaia ʼe natou fakata “te ʼu tala ʼe hogofulu” peʼe ko “te ʼu hau ʼe toko hogofulu.”
14-15. (1) Kotea ʼe ui ia Apokalipesi 17:3-5 ʼo ʼuhiga mo “Papiloni Lahi”? (2) Kotea ʼae ʼe hoko ia ʼaho nei ki te ʼu lotu hala?
14 Lau ia Apokalipesi 17:3-5. ʼI te meʼa neʼe ha ki te apositolo ko Soane, neʼe sio ai ki he fafine paomutu, ia “Papiloni Lahi.” ʼE ina fakata ia te kautahi ʼo te ʼu lotu hala. Neʼe hoko feafeaʼi te meʼa ʼaia neʼe ha ki te apositolo ko Soane? Talu mai fualoa mo te gaue fakatahi ʼa te ʼu lotu hala mo te ʼu puleʼaga fakatagata pea mo tanatou lagolago ki ai. Kae kua vave ʼai e Sehova ki te loto ʼo te ʼu puleʼaga “te manatu ʼae ke natou fakahoko tana fakatuʼutuʼu.” Kotea anai ka hoko? ʼE ʼohofi mo pulihi anai e te ʼu puleʼaga ʼaia ʼe ina fakata “te ʼu hau ʼe toko hogofulu,” ia te ʼu lotu hala.—Apk. 17:1, 2, 16, 17.
15 ʼE tou iloʼi feafeaʼi kua ovi mai te pulihi ʼo Papiloni Lahi? Ke tou iloʼi tona tali, ʼe lelei ke tou manatuʼi ʼi te temi muʼa neʼe puipui te kolo ko Papiloni e te ʼu vai ʼo te Vai Tafe Efalate. ʼI te tohi ʼo Apokalipesi, ʼe fakatatau ai te toko lauʼi miliona hahaʼi ʼae ʼe lagolago ki Papiloni Lahi ki he ʼu “vai” ʼe puipui ai ia ia. (Apk. 17:15) Kae ʼe toe fakaha ai foki ʼe ‘mamaha’ anai te ʼu vai ʼaia, ko tona fakaʼuhiga ʼe kaugamalie anai natou ʼe mole toe lagolago ki ai. (Apk. 16:12) Pea ko te aluʼaga ʼaia ʼe tou sisio ki ai ia ʼaho nei. Tokolahi ʼe natou mavae mai te ʼu lotu hala ʼo olo ʼo kumi puleʼaki ki ʼonatou fihifihia ʼi he tahi atu faʼahi.
16. Kotea ʼae ʼe tou fakamoʼoni ʼi te fakatuʼu ʼo te Kautahi ʼo Te ʼu Puleʼaga pea mo te mole kei kaugamalie ʼo natou ʼae ʼe lagolago ki te ʼu lotu hala? Pea he koʼe ʼe fakalotomalohi kia tatou?
16 He koʼe ʼe fakalotomalohi kia tatou te ʼu lea fakapolofeta ʼaia? ʼE tou iloʼi neʼe fakatuʼu te Kautahi ʼo Te ʼu Puleʼaga (ONU) pea ʼe mole kei kaugamalie natou ʼe lagolago ki te ʼu lotu hala. Koia, ʼe tou fakamoʼoni ʼe tou maʼuʼuli ʼi te ʼu ʼaho fakamuli. Logo la ʼe mamaha te ʼu vai ʼae ʼe ina fakata ia natou ʼae ʼe lagolago ki Papiloni, kae ʼe mole ko te faʼahi ʼaia ka ina pulihi ia te ʼu lotu hala. Neʼe tou talanoa ki muʼa atu, ʼe fakata e “te ʼu hau ʼe toko hogofulu” ia te ʼu puleʼaga ʼae ʼe lagolago ki te Kautahi ʼo Te ʼu Puleʼaga (ONU). Pea ʼe ʼai anai e Sehova ki te loto ʼo te ʼu hau ʼaia “te manatu ʼae ke natou fakahoko tana fakatuʼutuʼu.” ʼE fakapunamaʼuli anai te pulihi ʼo te ʼu lotu hala e te ʼu puleʼaga ʼaia pea ʼe punamaʼuli anai te kele katoa. * (Apk. 18:8-10) ʼE hoko anai te aluʼaga ʼaia ʼi te malamanei katoa pea ʼe lahi anai te ʼu faigataʼaʼia ka hoko ai. Kae ʼe fiafia anai te ʼu kaugana ʼa te ʼAtua moʼoni ʼuhi ko tupuʼaga ʼe lua. ʼE pulihi anai ʼo talu ai te lotu hala, ia te fili ʼo Sehova ʼAtua pea ʼe kua vave haofaki tatou mai te malama agakovi ʼaeni.—Luka 21:28.
FALALA KI TE PUIPUI ʼA SEHOVA
17-18. (1) ʼE feafeaʼi hatatou haga fakamalohiʼi tatatou tui? (2) Kotea ʼae ka tou talanoa ki ai ʼi te alatike ka hoa mai?
17 Neʼe fakakikite e Taniela “ ʼe mahu anai te ʼatamai malama moʼoni.” Pea ʼe moʼoni te faʼahi ʼaia. Ia ʼaho nei, ʼe tou mahino ki te ʼu lea fakapolofeta ʼo ʼuhiga mo totatou temi. (Tan. 12:4, 9, 10) ʼE moʼoni ia te ʼu lea fakapolofeta ʼaia koia ʼe tou fakaʼapaʼapa ai kia Sehova mo tana Folafola. (Esa. 46:10; 55:11) Koia, haga fakamalohiʼi tau tui ʼo ke ako fakalelei te Tohi-Tapu mo tokoni ki ʼihi ke natou kaumeʼa mo Sehova. ʼE ina puipui anai ia natou ʼae ʼe falala katoa kia te ia pea mo ina foaki age anai “he tokalelei ʼe talu ai.”—Esa. 26:3.
18 ʼI te alatike ka hoa mai, ʼe tou vakaʼi anai he ʼu lea fakapolofeta ʼo ʼuhiga mo te ʼu kokelekasio ʼi te ʼu ʼaho fakamuli. Pea ʼaki te ʼu lea fakapolofeta ʼaia, ʼe toe fakamoʼoni ai ʼe tou maʼuʼuli ʼi te ʼu ʼaho fakamuli. ʼE tou toe vakaʼi anai pe ʼe tokaga feafeaʼi ia Sesu, totatou Hau ki ʼana tisipulo agatonu.
KATIKO 61 Haʼele Ki Muʼa, Kau Fakamoʼoni
^ ʼE tou maʼuʼuli ʼi he ʼu temi maʼuhiga ʼo te hisitolia. Neʼe kua fakatuʼu te Puleʼaga ʼo te ʼAtua, ohage pe ko tona kua fakakikite ʼi te ʼu lea fakapolofeta. ʼI te alatike ʼaeni, ʼe tou vakaʼi anai he ʼu lea fakapolofeta ʼe fakamalohiʼi ai tatatou tui kia Sehova. Pea ʼe tokoni mai anai ke mole tou matataku ʼi te temi nei pea mo te ka haʼu.
^ Vakaʼi te kapite 32 puani 4 ʼo te tohi Ke Ke Fiafia ʼo Heʼe Gata pea mo te ʼata viteo Neʼe Pule Te Puleʼaga ʼo Te ʼAtua ʼi Te 1914 ʼi te jw.org.
^ Kapau ʼe ke fia maʼu he tahi ʼu fakamahino ʼo ʼuhiga mo te lea fakapolofeta ʼaia, vakaʼi Te Tule Leʼo ʼaho 1 ʼo Sunio 2012 p. 16 -19.
^ Kapau ʼe ke fia maʼu he tahi ʼu fakamahino ʼo ʼuhiga mo te ʼu aluʼaga ka hoko mai, vakaʼi te kapite 21 ʼo te tohi Kua Pule Ia Te Puleʼaga ʼo Te ʼAtua!