1. მუშა ვორეთ დარწმუნებულ დო მუშენ?

 ᲛᲡᲝᲤᲚᲘᲝ მდგომარეობას გინაჯინეთინ, ხომ ვაიჭირა თიშ დაჯერება, ნამდა ირფელ ჯგირო იჸუაფ? ოჯახიშ წევრეფ შქას ჸოროფა რე დინაფილ, ადამიანეფიშ უმენტაშ უმოსო დო უმოსო გინირთუ ეგოისტო დო უბადოთ, ბრელს დინაფილ აფჷ თინეფიშ ნდობა, მიდგას ძალაუფლება უღჷ. ზუსტას თე მდგომარეობა მარწმუნენა, ნამდა უჯგუშობა იჸუაფ, მუშენდა ადამიანეფ მოქმედენა თეშ, მუჭოთ „ბოლო დღალეფიშ“ გურშენ რდჷ ნაწინასწარმეტყველებ (2 ტიმ. 3:1—5). თე წინასწარმეტყველებაშ გურშენ ნამთინ გულწრფელ ადამიანს ვარაგადე, ვესრულებუნია. თენა ჩქინო თიშ მტკიცება რე, ნამდა იესო ქრისტექ ღორონთიშ სამეფოს მართველობა ქიდიჭყჷ. მარა ბიბლიას ხოლო ბრელ წინასწარმეტყველება რე ღორონთიშ სამეფოშ გურშენ მოჩამილ. ჩქი რწმენას გამმანგარენა თი წინასწარმეტყველებეფიშ გინოჯინა, ნამდგაქ ბოლო წანეფს შისრულ.

2. მუს გუვარჩიენთ თე სტატიას დო მუშენ? (კომენტარ გუკეთით გალენ გვერდის მოჩამილ სურათის)

² თე სტატიას გუვარჩიენთ 1)  წინასწარმეტყველებას, ნამუთ მოხვარნა, ქიგებგათ, მუჟამ დიჭყჷ მართველობა ღორონთიშ სამეფოქ, 2)  წინასწარმეტყველებეფ, ნამუთ მოხვარნა, ქიგებგათ, ნამდა იესო უკვე მართველენს ღორონთიშ სამეფოს დო 3)  წინასწარმეტყველებეფს, ნამუთ მოხვარნა, ქიგებგათ, მუჭო მისპუნა ღორონთიშ სამეფოშ ნტერეფ. მუჭოთ ეიონწყუალ სურათიშ ნაწილეფიშ ართიანშა მეხუნაფათ ქობძირუნთ მთლიან სურათის, თეშ თე წინასწარმეტყველებეფიშ ართიანწკუმა დაკავშირებათ ქობძირუნთ, მუქ ოკო მოხვადას მალას.

3. მუშა მარწმუნენა დანიელიშ 7:13, 14-ის მოჩამილ წინასწარმეტყველება?

³ დანიელიშ 7:13, 14 მარწმუნენა, ნამდა იესო ქრისტე ღორონთიშ სამეფოშ მანგარ ჯგირ მართველ იჸუაფ. არძა ეროვნებაშ ხალხ ხიოლით ემსახურებ თის დო თიშ მართველობა დღას ვეთირუ. ხოლო ართ წინასწარმეტყველება დანიელიშ წიგნშე მეჩიებნა, ნამდა იესო სამეფოს წინასწარმეტყველურ შქვით დროშ უკულ მიღენდჷ. ქორენო შეიოლებერ, ქიგებგათ, მუჟამ მოხვად თექ?

4. გენწყით, მუჭო ოძირანს დანიელიშ 4:10—17, ნამ წანას მიაჩ იესოს სამეფო მართველობაქ. (ქოძირით სქოლიო)

⁴ წეკითხით დანიელიშ 4:10—17. „შქვით დრო“ 2 520 წანას ნიშნენს. თიქ ჯვ. წ. 607 წანას დიჭყჷ, მუჟამსით ბაბილონელეფქ იერუსალიმიშ ბოლო მეფეს მართველობა მიდუღეს. თე დროქ ახ. წ. 1914 წანას ითუ, მუჟამსით იეჰოვაქ იესო, „კანონით უფლება უღუნ ფერ“, გიორინუ ღორონთიშ სამეფოშ მეფეთ b (ეზეკ. 21:25—27).

5. შქვით დროშ გურშენ წინასწარმეტყველებაშ ნამ ართ-ართ მხარეს მოუღ ჩქინდა ჯგირობუა?

⁵ მუ ჯგირობუა მოუღ თე წინასწარმეტყველებას ჩქინდა? შქვით დროშ გურშენ წინასწარმეტყველებაშ ინონჭაფა მარწმუნენა, ნამდა იეჰოვა წინასწარმეტყველებეფს ზუსტას მუშ დროს ასრულენს. ღორონთიშ სამეფოს იესოშ გამეფებაშ წინასწარმეტყველებაქ ზუსტას მუშ დროს შისრულუნ თენა, თის ოძირანს, ნამდა შხვა წინასწარმეტყველებეფ ხოლო ზუსტას თიმწკუმა შისრულებ, მუ დროშოთ თენა იეჰოვას აფჷ გინოჭყვიდილ. თაშ ნამდა, იეჰოვაშ დღა „ვედეგვიანუანს“ (აბაკ. 2:3).

6. ა) დედამიწას მუჭო იძირე, ნამდა იესო ზეცას გამეფებულ რე? ბ)  მუჭო გემანგარ თე მტკიცებულებაქ გამოცხადებაშ 6:2—8-ს მოჩამილ წინასწარმეტყველებაშ საშვალებათ?

⁶ იესოქ, მუშ მიწიერ მსახურებაშ ბოლო მონჭაფილ რდუნ თიმწკუმა, მუსხირენ მოვლენა იწინასწარმეტყველ, მუთ მეხვარებუდ თიშ მიმაჸუნალეფს, ქიგეგესკო, მუჟამ დიჭყანდჷ თინა ზეცას მართველობას. თიშ მოშინაფილ მოვლენეფშა მიშურს ომეფ, შქირენა დო მიწისძვრეფ; თეწკუმა ართო, იესოქ თინა ხოლო თქუ, ნამდა იჸუაფუდ ეპიდემიეფ „მინ ართ დო მინ მაჟია ადგილს“. თეშ მაგალით კოვიდ-19 პანდემია რე. ბიბლია იჩიებ, ნამდა თე მოვლენეფ ქრისტეშ მოულაშ „ნიშან“ იჸუაფუდ (მათ. 24:3, 7; ლუკ. 21:7, 10, 11). ზეცაშა დორთაშე 60 წანაშე მეტ ხანიშ უკულ, იესოქ მოციქულ იოანე ხოლო ართშა დარწმუნ, ნამდა თენეფ ქუმოხვადუდ (წეკითხით გამოცხადებაშ 6:2—8). არძა თე მოვლენაქ თიშ უკულ მოხვად, მუთ 1914 წანას იესოქ სამეფო ძალაუფლება მიღჷ.

7. მუშენ მაჸუნ დედამიწაშო უბედრობაქ იესოშ გამეფებას?

⁷ მუშენ გეუფრაშ მსოფლიო მდგომარეობაქ იესოშ გამეფებათ? მუჭოთ გამოცხადებაშ 6:2 მეჩიებნა, გამეფებულ იესოშ პირველ საქმე რდჷ, ქუმწუჭყაფუდკო ომი სატანა დო დემონეფიშ წინააღმდეგ. გამოცხადებაშ მა-12 დუდშე იძირე, ნამდა სატანა დო დემონეფქ წაგეს თე ომი დო დედამიწაშა იჸუეს გითორღვაფილქ. გაჟღამებულ სატანაქ ადამიანეფს მიკართჷ, მუდგაქ უბედრობაქ იჸუ დედამიწაშო (გამოცხ. 12:7—12).

8. მუ ჯგირობუა მოუღ ჩქინდა სამეფოშ გურშენ წინასწარმეტყველებეფიშ შესრულებაშ ძირაფას?

⁸ მუ ჯგირობუა მოუღ თე წინასწარმეტყველებეფს ჩქინდა? მსოფლიო მოვლენეფ დო ადამიანეფიშ გლახაშა თირუა ხოლო მარწმუნენა, ნამდა იესო გამეფებულ რე.  თაშ ნამდა, გურ ვამმალენა, მუჟამსით ვორწყეთ, მუნერ ეგოისტეფ რენა ადამიანეფ დო მუ გლახათ იქციებნა. თენა გუმოშინანა, ნამდა ბიბლიურ წინასწარმეტყველებეფ ისრულებ დო სამეფო მართველენს! (ფსალმ. 37:1). მუჭოთ მიჩქუნა, სოიშახ არმაგედონ ვა მოურს, მსოფლიო მდგომარეობა უმოსო დო უმოსო გეუფრაშებ (მარ. 13:8; 2 ტიმ. 3:13). ვარეთო მარდულეფ მოჸოროფე ზეციერ მუმაშ თიშ გურშენ, ნამდა გოხვარნა, ქიგეგათ, მუშენ რე მსოფლიოს თეზმა პრობლემა?

9. მუჭო ეჭარუნს დანიელიშ 2:28, 31—35-ის მოჩამილ წინასწარმეტყველება ბოლო მსოფლიო მართველს დო მუჟამ მიკორჩქინდჷ თიქ?

⁹ წეკითხით დანიელიშ 2:28, 31—35. თე წინასწარმეტყველებაშ შესრულებას ამდღა ვორწყეთ. ნაბუქოდონოსორიშ სიზმარ ოძირანს, მუქ ოკო მოხვადკო „ბოლო დღალეფს“ — თიშ უკულ, მუთ იესო გემეფებუდ. იესოშ მიწიერ ნტერეფშა მიშეშკონ იჸიდ ბიბლიას ნაწინასწარმეტყველებ ბოლო მსოფლიო მართველ, ნამუთ მოშინაფილ რე, მუჭოთ „რკინაშ დო თიხაშ ნარჩაკუჩხეფ“. თე მსოფლიო მართველ მიკორჩქინელ რე. თიქ გორჩქინდჷ პირველ მსოფლიო ომიშ დროს, მუჟამსით ბრიტანეთ დო შეერთებულ შტატეფქ საერთო მიზნეფიშ მიოჭირნაფალო გაკოდირთეს დო ინგლის-ამერიკაშ ალიანს ჩამოაყალიბეს. ნაბუქოდონოსორიშ თე წინასწარმეტყველურ სიზმარშე გემკორჩქინდჷ ჟირ მუდგარენქ, მუდგათ თე ბოლო მსოფლიო მართველ იჸუაფუდ განსხვავებულ თიშ წოხლეიან მართველეფშე.

10. ა) მუჭო ეჭარუნს ზუსტას დანიელიშ წინასწარმეტყველება ინგლის-ამერიკაშ მსოფლიო მპყრობელს? ბ) მუ საფრთხეს ოკო ეუჩილითუათ დუდ? (ქოძირით ჩარჩო  „ქარწყეთო საფრთხეს?“)

¹⁰ პირველ, ხილუას მოშინაფილ შხვა მსოფლიო მართველეფშე განსხვავებით,  ინგლის-ამერიკაშ მსოფლიო ალიანს წარმოდგენილ რე ოქრო დო ვარჩხილცალ სუფთა ლითონით ვარინ, რკინას მიშაწყორილ თიხათ. თიხა ასიმბოლოენს უბრალო ხალხის (დან. 2:43). ამდღა არგამათ იძირე, ნამდა ჩვეულებრივ ხალხ მონაწილებას ღებულენს არჩევნეფს, ადამიანეფიშ უფლებეფიშ დაცვას, დიდ საპროტესტო აქციეფს დო გაერთიანებულ რე პროფკავშირეფს, მუთ საშვალებას ვარზენს მსოფლიო მართველს, მუშ გემოშა გაკეთას ირფელ.

11. მუჭო მარწმუნენა ინგლის-ამერიკაშ მართველობა, ნამდა აღსასრულიშ დროს ფცხოვრენთ?

¹¹ მაჟია, ქვერსემ ქანდაკებაშ ნარჩაკუჩხით წარმოდგენილ ინგლის-ამერიკა, ბიბლიურ წინასწარმეტყველებათ, ბოლო მსოფლიო მპყრობელ იჸუაფუდ, თიშ უკულ მეტ ადამიანურ მართველობა ვეჸუაფუდ. თინა თოლიშ გოვალაფაშა გიწიმინდუ არმაგედონს, მუჟამსით ღორონთიშ სამეფო მოსპუნს თის დო არძა ადამიანურ მთავრობას c (გამოცხ. 16:13, 14, 16; 19:19, 20).

12. დანიელიშ წინასწარმეტყველებას მოჩამილ ხოლო ნამ მტკიცებულება ემქექუანა გურშა დო მარზენა იმენდის?

¹² მუ ჯგირობუა მოუღ თე წინასწარმეტყველებას ჩქინდა? დანიელიშ წინასწარმეტყველება თიშ ხოლო ართ მტკიცებულებას მარზენა, ნამდა აღსასრულიშ დროს ფცხოვრენთ. 2 500  წანაშე მეტ ხანიშ წოხოლე დანიელქ იწინასწარმეტყველ, ნამდა ბაბილონიშ უკულ ხოლო ოთხ მსოფლიო მპყრობელ ქეწინააღმდეგებუდ ღორონთიშ ხალხის. თეს გეძინელ, თიქ გეგმაარგამ, ნამდა ინგლის-ამერიკაშ მსოფლიო მართველობა ბოლო იჸუაფუდ. თენა გურშა ემქექუანა დო მარზენა იმენდის, ნამდა მალას ღორონთიშ სამეფო ადამიანურ მართველობაშ ირნერ ნიშანს გადინუანს დო მთელ დედამიწაშა მუ იმართველენს (დან. 2:44).

13. მუშ სიმბოლოეფ რენა გამოცხადებაშ 17:9—12-ს მოშინაფილ „მაბრუო მეფე“ დო „ვით მეფე“ დო მუჭო შისრულ თე წინასწარმეტყველებაქ?

¹³ წეკითხით გამოცხადებაშ 17:9—12. პირველ მსოფლიო ომქ ირფელ დუდგიმე გემნართინუ, მუდგაქ ხე ქეშუნწყუ ბოლო დღალეფიშ გურშენ ხოლო ართ წინასწარმეტყველებაშ შესრულებას. მსოფლიოშ მართველეფს ოკოდეს, მშვიდობაშა ქიმუჭირინუაფდესკო, ათეშენ 1920 წანაშ იანარს თინეფქ ერთა ლიგა ჩამოაყალიბეს, ნამუთ 1945 წანაშ ოქტომბერს გაერთიანებულ ერეფიშ ორგანიზაციაქ დოთირუ. თე ორგანიზაცია ბიბლიას „მაბრუო მეფეთ“ რე მოშინაფილ, მარა თინა ვა რე მსოფლიო მპყრობელ. თის ძალაუფლება პოლიტიკურ მართველეფქ მეჩეს. თე პოლიტიკურ მართველეფშა ბიბლიას „ვით მეფე“ უჯოხო.

14, 15. ა) მუ გიმაარგამ გამოცხადებაშ 17:3—5-იქ დიდ ბაბილონიშ გურშენ? ბ) მუჭო მეურს ტყურარელიგიეფიშ ხუჯიშდაკინებაშ საქმე?

¹⁴ წეკითხით გამოცხადებაშ 17:3—5. მოციქულ იოანექ ღორონთშე ხილუას ძირჷ მეძავ, „დიდ ბაბილონ“, ნამუთ ტყურარელიგიაშ მსოფლიო იმპერიას განასახიერენს. მუჭო შისრულ თე ხილუას მოჩამილ წინასწარმეტყველებაქ? ტყურარელიგიურ ორგანიზაციეფს ბრელ ხან რე, მანგარ ხოლოშიან თანამშრომლობა უღნა მსოფლიოშ პოლიტიკურ მართველეფწკუმა დო ხუჯის უკინენა თინეფს. მალას იეჰოვა გურშა ქალუდვანს პოლიტიკურ მართველეფს, „ნამდა შეასრულან მუშ განზრახვა“. მუ მაჸუნუ თეს შედეგო? თე პოლიტიკურ მართველეფ, „ვით მეფე“, მიკართუნა ტყურარელიგიეფს დო განადგურენა (გამოცხ. 17:1, 2, 16, 17).

¹⁵ სოვრეშე მიჩქუნა, ნამდა „დიდ ბაბილონიშ“ აღსასრულ ხოლოს რე? თე კითხვას პასუხ ქიმეფჩათინ, ქიგიფშინათ, ნამდა ჯვეშ ქალაქ ბაბილონს  შხვა მუდგარენეფწკუმა ართო, ევფრატიშ მალწყარ ხოლო თხილანდჷ. გამოცხადებაშ წიგნ „დიდ ბაბილონიშ“ მილიონობით ხუჯიშდუმაკინებელს ადარენს წყარს (გამოცხ. 17:15). მარა, მუჭოთ თე წინასწარმეტყველება იჩიებ, წყარეფქ „დოსქირ“, მუთ თის ნიშნენს, ნამდა ტყურარელიგიაშ მსოფლიო იმპერია ბრელ ხუჯიშდუმაკინებელს მიოდინუანდჷ (გამოცხ. 16:12). თე წინასწარმეტყველება ამდღა ისრულებ, მუშენდა ბრელ ადამიანქ ქიდიტუ ტყურარელიგია დო მუშ პრობლემეფშე გამოსავალიშ გორუა შხვადო ქიდიჭყჷ.

16. მუ ჯგირობუა მოუღ ჩქინდა გაერთიანებულ ერეფიშ ორგანიზაციაშ მიკორჩქინაშ დო „დიდ ბაბილონიშ“ განადგურებაშ გურშენ წინასწარმეტყველებაშ ენონჭაფას?

¹⁶ მუ ჯგირობუა მოუღ თე წინასწარმეტყველებეფს ჩქინდა? გაერთიანებულ ერეფიშ ორგანიზაციაშ მიკორჩქინა დო თინა, ნამდა ტყურარელიგიეფს ასე ნაკლებო უკინენა ხუჯის, ჩქინო თიშ დამატებით მტკიცებულება რე, ნამდა ბოლო დღალეფს ფცხოვრენთ. მართალ რე, „დიდ ბაბილონიშ“ სიმბოლურ წყარეფ სქირუ, მარა თენა ვა მუღანს თის საბოლა განადგურებას. მუჭოთ ჟიშე მიფშინეთ, იეჰოვა  გურშა ქალუდვანს „ვით მეფეს“, პოლიტიკურ მართველეფს, მით ხუჯის უკინენა გაერთიანებულ ერეფიშ ორგანიზაციას, „ნამდა შეასრულან მუშ განზრახვა“. თე ერეფ ტყურარელიგიეფს მითინ ველუნ თეშ განადგურენა, მუთ მანგარ გასაკვირ იჸუაფ მთელ მსოფლიოშო d (გამოცხ. 18:8—10). „დიდ ბაბილონიშ“ განადგურება მსოფლიოს ქუდუზარზალუანს, მუდგას შილებე ბრელ პრობლემაქ ქუმაჸუნას, მარა ღორონთიშ ხალხის ხიოლიშ არძაშ ნაკლებ ჟირ მიზეზ აღვენუ: ტყურარელიგია, ნამუთ ბრელ ხან რე, იეჰოვა ღორონთის ონტერ, სამუდამოთ გენადგურებ დო მალას თე უბადო ქვეყნიერებაშე გეფთავისფალებუთ! (ლუკ. 21:28).

17, 18. ა) მუჭო შემლებნა გუვაგრძელათ ჩქინ რწმენაშ გამანგარება? ბ) მუს გუვარჩიენთ ანწიან სტატიას?

¹⁷ დანიელქ იწინასწარმეტყველ, ნამდა „ჭეშმარიტ რჩქინა“ მიძინანდჷ. თენა ასე ხვადუ. ქინვანჭით თი წინასწარმეტყველებეფიშ მნიშვნელობას, ნამუთ ჩქინ დროს ოხუ (დან. 12:4, 9, 10). თე წინასწარმეტყველებეფიშ ზუსტას შესრულება დიდ მოწიწებას მირჩქინანა იეჰოვაშ დო თიშ სიტყვაშ მიმართ (ეს. 46:10; 55:11). ათეშენ გამანგარით თქვან რწმენა წმინდა წერილეფიშ გურაფათ დო შხვეფშა მოხვარათ, ნამდა გავითარან იეჰოვაწკუმა ჯგირ ურთიერთობა. თინა დოთხილანს თინეფს, მით სრულას ონდუნა მუს დო ქიმეჩანს მარადიულ მშვიდობას (ეს. 26:3).

¹⁸ ანწიან სტატიას გუვარჩიენთ წინასწარმეტყველებეფს, ნამუთ თე ბოლო დღალეფს ქრისტიანულ კრებას ოხუ. მუჭოთ ბძირუნთ, თე წინასწარმეტყველებეფ ხოლო თიშა დუმარწმუნენა, ნამდა ბოლო დღალეფს ფცხოვრენთ. თიშ ბრელ მტკიცებულებას ქობძირუნთ, ნამდა იესო, ნამუთ ასე მეფენს, ხემძღვანელენს მუშ ართგურ მიმაჸუნალეფს.