1. ¿Achkë ruraybʼal Dios komä?

 RI RURAYBʼAL Dios komä ya riʼ chë ttzjöx ri utziläj taq rutzjol chrij ri Ruqʼatbʼäl Tzij chwäch jontir le Ruwachʼulew (Mar. 13:10; 1 Tim. 2:3, 4). Re samaj reʼ rchë Jehová, y kan kowan rejqalen chë yë Jesús xchaʼ rchë nukʼwaj bʼey chqawäch chpan re samaj reʼ. Rma riʼ ütz nqayaʼ chwäch qan chë taq xtchüp ruwäch jontir ri itzelal, ryä kan kiʼ rukʼuʼx xtuʼän rkʼë ri samaj xtqaʼän (Mat. 24:14).

2. ¿Achkë xtqatzʼët chpan re tjonïk reʼ?

² Chpan re tjonïk reʼ xtqatzʼët chë Jesús nuksaj ri «utziläj samajel ri kan kʼo runaʼoj» rchë nuyaʼ pä ri nkʼatzin chqë rchë nkowïr ri qakʼuqbʼäl kʼuʼx chqä rchë nukʼwaj bʼey chqawäch chpan ri mamaʼ samaj najin nbʼan chrij rutzjoxik le Biblia (Mat. 24:45). Chqä xtqatzʼët achkë ütz nqaʼän rchë chqajujnal röj xtqtoʼon rkʼë Jesús chqä rkʼë ri utziläj samajel.

3. ¿Achkë xyaʼöx qa pa ruqʼaʼ Jesús?

³ ¿Achkë rma nqaʼij chë yë Jesús paʼäl pa ruwiʼ ri samaj chrij rutzjoxik le Biblia? Rma taq jbʼaʼ nrajoʼ rchë nbʼä chkaj, ryä xerumöl jojun chkë rutzeqelbʼëy pa ruwiʼ jun juyuʼ ri kʼo Galilea y xuʼij chkë: «Jontir yaʼon qa pa nuqʼaʼ, ri kʼo chkaj chqä ri kʼo chwäch le Ruwachʼulew». Y tqatzʼetaʼ ri xuʼij chrij riʼ: «Jäx kʼa chwäch ronojel le Ruwachʼulew y keʼitjoj ri winäq rchë yeʼok nutzeqelbʼëy» (Mat. 28:18, 19). Achiʼel nqatzʼët, jun chkë ri xyaʼöx qa pa ruqʼaʼ Jesús ya riʼ nukʼwaj bʼey chqawäch chpan ri samaj chrij rutzjoxik le Biblia.

4. ¿Achkë rma ütz nqayaʼ chwäch qan chë Jesús kʼa najin na nukʼwaj bʼey chqawäch komä?

 ⁴ Jesús xuʼij chë ri samaj nbʼan rchë yetjöx ri winäq chrij le Biblia xtbʼan chwäch «ronojel le Ruwachʼulew», y chë ryä xtjeʼ kikʼë rutzeqelbʼëy «ronojel qʼij kʼa taq xtbʼekʼis ri rukʼisbʼäl taq qʼij» (Mat. 28:20). Re tzij reʼ nkikʼüt chë Jesús kʼa rukʼwan na bʼey chqawäch chpan re samaj reʼ chkipan ri qʼij yoj kʼo komä.

5. ¿Achkë rubʼanik nqtoʼon rchë nbʼetzʼaqät ri profecía kʼo chpan Salmo 110:3?

⁵ Jesús kan ruyaʼon wä chwäch ran chë chkipan ri rukʼisbʼäl taq qʼij kan ye kʼïy xkebʼanö ri samaj xchlaʼej qa chqë. Ryä retaman wä chë xkebʼetzʼaqät re tzij reʼ: «Ri atinamit kan rkʼë ronojel ran xttzüj riʼ ri qʼij taq xkeʼakʼwaj pä chʼaʼoj» (Sal. 110:3). We rït yït jun chkë ri nutzjoj ri utziläj taq rutzjol, najin yatoʼon rkʼë Jesús chqä rkʼë ri utziläj samajel, y najin yatoʼon rchë nbʼetzʼaqät re profecía reʼ. Ri samaj chrij rutzjoxik le Biblia najin nbʼan, ye kʼa kʼo jojun kʼayewal nqïl taq nqaʼän re samaj reʼ.

6. ¿Achkë jojun kʼayewal nqaqʼaxaj taq nqatzjoj le Biblia?

⁶ Jun kʼayewal nqïl ya riʼ chë ye kʼïy ma nqä ta chkiwäch ri samaj nqaʼän. Ri apóstatas, ri políticos chqä ri ukʼwäy taq bʼey chkipan ri religiones kan kʼïy tzʼukün taq tzij nkiʼij chrij ri samaj nqaʼän. We ri qa-familiares, ri winäq ri qataman kiwäch o ri qachiʼil pa samaj nkinmaj ri tzʼukün taq tzij riʼ, rkʼë jbʼaʼ xtkitäj kiqʼij chqij rchë ma nqayaʼ ta chik ruqʼij Jehová chqä rchë ma nqatzjoj ta chik le Biblia. Chkipan jojun tinamït, ri itzel nkinaʼ chqë yekixiʼij ri qachʼalal rchë ma nkitzjoj ta chik le Biblia, yekichʼäy, y kïy mul kan yekiyaʼ pacheʼ. Ye kʼa reʼ ma nuʼän ta chë nsach qakʼuʼx, rma Jesús xuʼij qa reʼ: «Rma nbʼiʼ, jontir ri winäq itzel xtkinaʼ chiwä» (Mat. 24:9). Achiʼel nqatzʼët, taq nbʼanatäj ya riʼ qkʼë, nukʼüt chë yoj rutzeqelbʼëy Jesús chqä chë Jehová kiʼ rukʼuʼx rubʼanon qkʼë (Mat. 5:11, 12). Tapeʼ yë ri Diablo nbʼanö chë yeqïl ri kʼayewal riʼ, ri ruchqʼaʼ ma njunmatäj ta rkʼë ruchqʼaʼ Jesús. Rkʼë rutoʼik Cristo, ri utziläj taq rutzjol najin napon chwäch jontir le Ruwachʼulew. 

7. ¿Achkë nkʼutü chawäch rït chë najin ntzʼaqät Apocalipsis 14:6, 7?

⁷ Jun chik kʼayewal ya riʼ ri jalajöj chʼaʼäl ye kʼo. Rkʼë ri xuʼij Jesús che rä ri apóstol Juan chpan ri visión xtzʼët, xqʼalajin chë ya riʼ ma xtqʼät ta rutzjoxik le Biblia (taskʼij ruwäch Apocalipsis 14:6, 7). ¿Achkë qabʼanon chë, tapeʼ kan kʼïy chʼaʼäl kʼo, najin ntzjöx le Biblia chkë jontir winäq? Chpan qa-sitio pa internet, jw.org, kʼo naʼoj ri yeʼelesan pä chpan le Biblia pa más 1,000 chʼaʼäl. Chqä ri Molaj Ukʼwäy Bʼey xyaʼ qʼij chë nqʼaxäx pa más 700 chʼaʼäl ri wuj Nawajoʼ rït yakʼaseʼ ri nqaksaj rchë yeqatjoj ri winäq. Y kʼo publicaciones ri yeqʼaxan pa videos chkë ri tokän y pa braille chkë ri moyiʼ. Reʼ nuʼän chë kan konojel bʼaʼ chkë ri winäq yekowin nkitamaj chrij ri utziläj taq rutzjol chrij ri Ruqʼatbʼäl Tzij Dios. Achiʼel nqatzʼët, ri profecías bíblicas kantzij najin yebʼetzʼaqät: winäq ri jalajöj kichʼaʼäl najin nkitamaj ri kantzij chrij Dios (Zac. 8:23; Sof. 3:9). Jontir reʼ najin nbʼanatäj rma kan yë Jesús paʼäl pa ruwiʼ re samaj reʼ.

8. ¿Achkë bʼanatajnäq chpan rutinamit Jehová rma ri samaj najin nbʼan chrij rutzjoxik le Biblia?

⁸ Komä más 8 millones winäq ri ye kʼo chkipan 240 tinamït ye kʼo chpan rutinamit Jehová. ¡Y ronojel junaʼ más cien mil winäq yeqasäx pa yaʼ! Ye kʼa ri jaruʼ yeqasäx pa yaʼ ma ya riʼ ta kʼo más rejqalen. Ri más rejqalen ya riʼ ri naʼoj nwachin kikʼë re kʼakʼakʼ cristianos reʼ. Chpan le Biblia, chkë re naʼoj reʼ nbʼix «ri kʼakʼakʼ taq naʼoj»  (Col. 3:8-10). Kʼïy chkë ryeʼ kan kijalon kinaʼoj rma ma yekiʼän ta chik tzʼil taq bʼanobʼäl, ma yekitzʼlaʼ ta chqä ma itzel ta chik nkinaʼ chkë ri nkʼaj chik, y ma nkinaʼ ta chik chë kitinamit ryeʼ kʼo más ruqʼij. Najin ntzʼaqät ri profecía kʼo chpan Isaías 2:4 ri nuʼij: «Ma xtkitamaj ta chik achkë rubʼanik nkiʼän chʼaʼoj». Rma nqatäj qaqʼij rchë achiʼel ta nqawäq qiʼ kikʼë ri kʼakʼakʼ taq naʼoj, reʼ nuʼän chë ye kʼïy winäq nkajoʼ yeʼok chpan rutinamit Dios chqä nqakʼüt chë yoj rutzeqelbʼëy Jesucristo, ri ukʼwayon bʼey chqawäch (Juan 13:35; 1 Ped. 2:12). Majun ta chkë reʼ chaq ke riʼ najin nbʼanatäj; kan yë Jesús najin nqtoʼö pä.

9. Rkʼë ri nuʼij chpan Mateo 24:45-47, ¿achkë xuʼij Jesús chë xtbʼanatäj chkipan ri rukʼisbʼäl taq qʼij?

⁹ (Taskʼij ruwäch Mateo 24:45-47). Jesús xuʼij chë chkipan ri rukʼisbʼäl taq qʼij ryä xtuʼän chë jun «utziläj samajel ri kan kʼo runaʼoj» xtyaʼ ri achkë nkʼatzin chqë rchë más kuw nuʼän ri qakʼuqbʼäl kʼuʼx. Rma riʼ re samajel reʼ kʼo ta chë kan kuw najin nsamäj chkipan re qʼij reʼ. Y kan ya riʼ najin nuʼän. Jesús najin nuksaj jun koʼöl molaj cristianos ri yechaʼon rchë yebʼä chkaj rchë yekitoʼ ri rusamajelaʼ Dios chqä ri winäq ri nkajoʼ nkitamaj más rchë más junan nuʼän kiwäch rkʼë Dios. Re achiʼaʼ reʼ ma nkinaʼ ta chë ye ajaw pa ruwiʼ ri kikʼuqbʼäl kʼuʼx ri nkʼaj chik (2 Cor. 1:24). Pa rukʼexel riʼ, ryeʼ kitaman chë yë Jesús ri ukʼwayon bʼey chkiwäch rutzeqelbʼëy (Is. 55:4).

10. ¿Achkë wuj ri yeqʼalajin chkiwäch ri achbʼäl xatoʼö rït rchë xatamaj ruwäch Jehová?

¹⁰ Kan pa junaʼ 1919, ri utziläj samajel rubʼanon pä jalajöj kiwäch wuj rchë yerutoʼ ri winäq rchë nkitamaj chrij Ruchʼaʼäl Dios. Pa junaʼ 1921, ri utziläj samajel xresaj pa chʼaʼäl inglés ri wuj El Arpa de  Dios rchë xerutoʼ ri winäq rchë nkitamaj ri naʼäy taq naʼoj chrij le Biblia. Chkipan ri junaʼ chrij riʼ, xeʼelesäx nkʼaj chik wuj. ¿Achkë wuj xatoʼö rït rchë xatamaj ruwäch ri Qatataʼ kʼo chkaj? Rkʼë jbʼaʼ jun chkë reʼ: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Qué enseña realmente la Biblia? o ¿Qué nos enseña la Biblia? O rkʼë jbʼaʼ najin naksaj ri kʼakʼakʼ wuj Nawajoʼ rït yakʼaseʼ. Re wuj reʼ xeyaʼöx pä rchë yeqatoʼ ri winäq rchë nkitjoj kiʼ chrij le Biblia, y ronojel mul kan pa ruqʼijul yeyaʼon pä chqë.

11. ¿Achkë rma kan kʼo rejqalen chë jontir nqatamaj más chrij Jehová chqä chrij le Biblia?

¹¹ Ma xa xuʼ ta ri winäq ri najin nkitjoj kiʼ chrij le Biblia nkʼatzin kitoʼik rchë nkitamaj más chrij Jehová chqä chrij le Biblia. Jontir nkʼatzin qatoʼik rkʼë riʼ. Ri apóstol Pablo xtzʼibʼaj qa reʼ: «Ri naʼoj ri achiʼel ta kan wäy ya riʼ kichë ri winäq ri kʼuqül chik kikʼuʼx pa ruchʼaʼäl Dios». Ryä chqä xuʼij chë taq yeqasmajij ri naʼoj yeqatamaj, xtqrtoʼ rchë xtqʼax chqawäch «achkë riʼ ri ütz chqä achkë riʼ ri ma ütz ta» (Heb. 5:14). Rma komä kan ye kʼïy winäq kikʼwan jun tzʼil kʼaslemal, rkʼë jbʼaʼ kʼayewal nuʼän chqawäch nqasmajij ri naʼoj yeruyaʼon pä Jehová chqë. Ye kʼa Jesús nuyaʼ pä ri naʼoj ri nkʼatzin chqë rchë kuw nuʼän ri qakʼuqbʼäl kʼuʼx. Ri naʼoj riʼ ye lenäq pä chpan le Biblia, ri Ruchʼaʼäl Dios. Ri utziläj samajel nunukʼuj kij ri naʼoj riʼ chqä yeruqʼalajsaj pä chqawäch rkʼë rutoʼik Cristo.

12. ¿Achkë qabʼanon rchë qayaʼon ruqʼij ri rubʼiʼ Dios kan achiʼel xuʼän Jesús?

¹² Achiʼel xuʼän Jesús, röj chqä kan qayaʼon ruqʼij ri rubʼiʼ Dios (Juan 17:6, 26). Jun tzʼetbʼäl. Pa junaʼ 1931 xqabʼiniʼaj testigos de Jehová, ri kan pa Biblia xesäx wä pä. Ke riʼ xqakʼüt chë kan nqajoʼ nqakʼwaj ri rubʼiʼ ri Qatataʼ kʼo chkaj, rma kan  kowan ruqʼij chqawäch röj (Is. 43:10-12). Y pan octubre rchë ri junaʼ riʼ, ri rubʼiʼ Dios ya xyaʼöx pä chrij ri wuj Ri Chajinel, pan inglés. Chqä ri Traducción del Nuevo Mundo ruyaʼon pä ri rubʼiʼ Dios kan akuchï kʼo chë nbʼä wä chpan ri Ruchʼaʼäl Dios. Reʼ kan ma junan ta rkʼë ri nkiʼän ri nkʼaj chik religiones, ri xa nkesaj qa ri bʼiʼaj Jehová chkipan biblias ri nkesaj chkipan jalajöj chʼaʼäl.

13. ¿Achkë rma anman rït chë Jesús najin nuksaj «ri utziläj samajel ri kan kʼo runaʼoj»? (Juan 6:68).

¹³ Jesús ruksan ri «utziläj samajel ri kan kʼo runaʼoj» rchë yerutoʼon rutzeqelbʼëy rchë yeʼok chpan rutinamit Dios, ri nkitäj kiqʼij rchë kan pa rubʼeyal nkiyaʼ ruqʼij ri Qatataʼ kʼo chkaj. ¿Achkë naquʼ rït chrij rutinamit Dios? Rkʼë jbʼaʼ nanaʼ ri xnaʼ Pedro, ri xuʼij reʼ che rä Jesús: «¿Achoq rkʼë nqbʼä wä? Xa xuʼ rït yatzjü ri kʼaslemal ri majun bʼëy xtkʼis ta» (Juan 6:68). ¿Achkë ta komä qabʼanon röj xa ta ma yoj kʼo ta chpan rutinamit Jehová? Cristo ruksan rutinamit Dios rchë nuyaʼ pä ri nkʼatzin chqë rchë ma nkʼis ta qa ri qakʼuqbʼäl kʼuʼx chqä rchë nqrtjoj pä rchë nq-ok utziläj taq tijonelaʼ. Chqä nqrtoʼ rchë yeqasmajij «ri kʼakʼakʼ taq naʼoj» rchë ke riʼ Jehová kiʼ rukʼuʼx nuʼän qkʼë (Efes. 4:24).

14. ¿Achkë rubʼanik yaturtoʼon rït ri rutinamit Jehová chpan ri tiempo ri kʼo pä ri COVID-19?

¹⁴ Taq yeqaqʼaxaj kʼayewal, Jesús kan pa rubʼeyal nukʼwaj bʼey chqawäch. Ya riʼ kan xqʼalajin taq xchapatäj ri COVID-19. Ye kʼïy winäq ma kitaman ta wä achkë nkiʼän, ye kʼa Jesús kan xkʼüt pä chqawäch achkë rubʼanik nqachajij qiʼ chwäch re yabʼil reʼ. Xbʼix chqë chë tqaksaj mascarilla taq yoj kʼo chkikojöl winäq chqä chë ma kan ta  naqaj qjeʼ wä chkë ri winäq riʼ. Chkë ri ukʼwäy taq bʼey xbʼix chë chaq taqïl tkitzʼetaʼ we ri qachʼalal kʼo nkʼatzin chkë chqä kekitoʼ rchë ma nkʼis ta qa ri kikʼuqbʼäl kʼuʼx (Is. 32:1, 2). Y chkipan ri rutzjol ri kiyaʼon pä ri Molaj Ukʼwäy Bʼey, bʼin pä chqë achkë más nkʼatzin nqaʼän chqä kan kikʼuqbʼan pä qakʼuʼx.

15. ¿Achkë chik nkʼaj bʼin pä chqë chpan ri tiempo ri kʼo pä ri COVID-19, y achkë utzil rukʼamon pä riʼ?

¹⁵ Taq xchapatäj ri COVID-19, xbʼix pä chqë achkë rubʼanik xtqamöl qiʼ chqä xtqatzjoj le Biblia. Rma riʼ xqachäp kibʼanik qamoloj chqä qanimamoloj pa videoconferencia chqä xqachäp rutzjoxik le Biblia chkipan cartas chqä pa teléfono. Jehová kan ruyaʼon pä utzil pa ruwiʼ ri samaj najin nqaʼän. Kʼïy sucursales kibʼin chë kan ye kʼïy winäq najin yeʼok publicadores. Y chpan re tiempo reʼ, kan ye kʼïy qachʼalal kilon utziläj taq experiencias (tatzʼetaʼ ri recuadro « Jehová najin nuyaʼ utzil pa ruwiʼ ri samaj chrij rutzjoxik le Biblia»).

16. ¿Achkë ütz nqayaʼ chwäch qan?

¹⁶ Rkʼë jbʼaʼ ye kʼo jojun qachʼalal kibʼin chë ri rutinamit Jehová kan nqʼax ruwiʼ ri nuʼij pä chqë chrij ri rubʼanik nqachajij qiʼ chwäch ri COVID-19. Ye kʼa kan ronojel mul qatzʼeton pä chë ri nuʼij rutinamit Dios kan ya riʼ ri más ütz nqaʼän (Mat. 11:19). We nqaquʼ rij ri rubʼanik najin nukʼwaj bʼey Jesús chqawäch, ya riʼ xtqrtoʼ rchë xtqayaʼ chwäch qan chë xa bʼa achkë kʼayewal xtpë chqij chqawäch apü, Jehová chqä Jesús majun bʼëy xkojkiyaʼ ta qa (taskʼij ruwäch Hebreos 13:5, 6).

17. ¿Achkë nanaʼ rït rma kan yë Jesús ukʼwayon bʼey chqawäch?

¹⁷ ¡Röj kan kiʼ qakʼuʼx rma yë Jesús ukʼwayon bʼey chqawäch! Röj yoj kʼo chpan rutinamit Dios, ri akuchï kan junan rubʼanon qawäch tapeʼ jalajöj qatinamit, qachʼaʼäl chqä qajatzul. Kan kʼïy qatoʼik qlon rchë nqʼax ri Ruchʼaʼäl Dios pa qajolon y kʼo ri achkë nkʼatzin chqë rchë nqatzjoj ri utziläj taq rutzjol. Y chqajujnal röj najin nqatäj qaqʼij rchë yeqasmajij ri kʼakʼakʼ taq naʼoj chqä rchë yeqajoʼ ri nkʼaj chik. ¡Kan kʼo kʼïy rma chë kiʼ qakʼuʼx nqaʼän rma kan yë Jesucristo najin nekʼwan bʼey chqawäch!