1. Unsay kabubut-on ni Jehova karon?

 KARON, kabubut-on sa Diyos nga ang maayong balita sa Gingharian isangyaw sa tibuok yuta. (Mar. 13:10; 1 Tim. 2:3, 4) Buluhaton kini ni Jehova, ug importante kaayo ni mao nga iya ning gipadumala sa iyang pinalanggang Anak. Kay si Jesus man ang naggiya nato, makasalig ta nga ang buluhatong pagsangyaw molampos sumala sa gusto ni Jehova ug matapos sa dili pa moabot ang kataposan.​—Mat. 24:14.

2. Unsay atong hisgotan niini nga artikulo?

² Niini nga artikulo, atong hisgotan kon giunsa paggamit ni Jesus ang iyang “matinumanon ug maalamong ulipon” sa pagtaganag espirituwal nga pagkaon ug sa pag-organisar sa iyang mga sumusunod para sa kinadak-ang kampanya sa pagsangyaw sukad masukad. (Mat. 24:45) Hisgotan sab nato kon unsay mahimo sa matag usa kanato sa pagsuportar kang Jesus ug sa matinumanong ulipon.

3. Unsa nga awtoridad ang gihatag kang Jesus?

³ Si Jesus ang nagdumala sa buluhatong pagsangyaw. Nganong makaseguro man ta ana? Sa hapit nang mobalik si Jesus sa langit, nakigkita siya sa pipila niya ka matinumanong mga sumusunod sa usa ka bukid sa Galilea. Siya miingon kanila: “Ang tanang awtoridad sa langit ug sa yuta gihatag na kanako.” Matikdi pag-ayo ang sunod niyang giingon: “Busa adtoa ninyo ang mga tawo sa tanang kanasoran ug tudloi sila aron mahimong akong mga tinun-an.” (Mat. 28:18, 19) Busa apil sa awtoridad nga gihatag kang Jesus mao ang pagdumala sa buluhatong pagsangyaw.

4. Nganong makaseguro ta nga padayong gidumala ni Jesus ang buluhatong pagsangyaw?

 ⁴ Si Jesus miingon nga ang pagsangyaw ug paghimog tinun-an himoon diha “sa tanang kanasoran” ug nga siya magauban sa iyang mga sumusunod “sa tanang adlaw hangtod sa hinapos sa sistema sa mga butang.” (Mat. 28:20) Ang maong mga pulong tin-awng nagpakita nga ang pagsangyaw magpadayon hangtod karon ubos sa pagdumala ni Jesus.

5. Sa unsang paagi apil ta sa katumanan sa Salmo 110:3?

⁵ Wala mabalaka si Jesus nga kulang unya ang mga magsasangyaw sa hinapos sa sistema sa mga butang. Nahibalo siya nga matuman ang giingon sa salmista: “Ang imong katawhan kinabubut-ong magtanyag sa ilang kaugalingon sa adlaw nga tigomon nimo ang imong kasundalohan.” (Sal. 110:3) Kon nakigbahin ka sa buluhatong pagsangyaw, imong gisuportaran si Jesus ug ang matinumanong ulipon ug apil ka sa katumanan sa maong tagna. Ang buluhaton nagpadayon, pero naay mga babag.

6. Unsay usa ka babag sa atong pagsangyaw karon?

⁶ Usa ka babag sa atong pagsangyaw mao ang pagsupak. Tungod sa ginasulti sa mga apostata, mga lider sa relihiyon, ug mga politiko, daghan ang dunay sayop nga ideya bahin sa atong buluhaton. Kon ang atong mga paryente, kaila, ug mga katrabaho motuo sa maong sayop nga impormasyon, basig presyuron ta nila nga mohunong sa pag-alagad kang Jehova ug sa pagsangyaw. Sa ubang nasod, ang atong mga igsoon gihulga, giatake, giaresto, ug gipriso pa gani. Dili ta angayng matingala niini, kay si Jesus nagtagna: “Dumtan mo sa tanang kanasoran tungod sa akong ngalan.” (Mat. 24:9) Kay atong naeksperyensiyahan ang maong pagsupak, pamatuod nâ nga giuyonan ta ni Jehova. (Mat. 5:11, 12) Ang Yawa maoy hinungdan niini nga pagsupak. Pero wâ siyay bawot kang Jesus! Sa paggiya ni Jesus, ang maayong balita nakaabot sa tanang kanasoran. Konsideraha ang ebidensiya.

7. Unsay ebidensiya nga nagakatuman ang Pinadayag 14:6, 7?

⁷ Ang usa pa ka babag sa atong pagsangyaw mao ang nagkalainlaing pinulongan. Pero sa panan-awon nga gihatag kang apostol Juan, gitagna ni Jesus nga sa atong panahon, ang nagkalainlaing pinulongan dili na babag sa pagsangyaw sa maayong balita. (Basaha ang Pinadayag 14:6, 7.) Sa unsang paagi nâ natuman? Atong gihatagag kahigayonan ang daghang tawo kutob sa mahimo nga modawat sa mensahe sa Gingharian. Karon ang mga tawo sa tibuok kalibotan makabasa ug mga publikasyon nga binase sa Bibliya diha sa atong jw.org nga website, kay ang impormasyon niini gihubad sa kapig 1,000 ka pinulongan! Ang librong Mabuhi Ka Hangtod sa Hangtod! nga maoy pangunang gigamit nato sa pag-Bible study, giaprobahan nga hubaron sa kapig 700 ka pinulongan! Naa poy mga video para sa mga amang ug braille nga mga publikasyon para sa mga buta aron matagan-an silag espirituwal nga pagkaon. Nakita nato nga nagakatuman ang mga tagna sa Bibliya. Ang mga tawo “gikan sa tanang pinulongan sa mga nasod” nakakat-on sa pagsulti sa “putling pinulongan” sa kamatuoran sa Bibliya. (Zac. 8:23; Sof. 3:9) Kining tanan napalampos tungod sa maayong pagdumala ni Jesu-Kristo.

8. Unsa nay nalampos sa atong buluhatong pagsangyaw?

⁸ Karon, kapin nag 8,000,000 ka tawo diha sa 240 ka kayutaan ang nahimong bahin sa organisasyon ni Jehova ug, kada tuig, linibo ang mabawtismohan! Pero ang pag-uswag sa gidaghanon dili mao ang mas importante, kondili ang Kristohanong mga hiyas, “ang bag-ong  personalidad,” nga naugmad niining bag-ong mga tinun-an. (Col. 3:8-10) Daghan ang mihunong sa pagkahimong imoral, bayolente, mapihigon, ug nasyonalistiko. Ang tagna sa Isaias 2:4 nagakatuman na; wala na sila magkat-on sa pagpakiggubat. Samtang naningkamot ta nga isul-ob ang bag-ong personalidad, ginatabangan nato ang mga tawo nga madani sa organisasyon sa Diyos ug gipamatud-an nato nga nagsunod ta sa atong tigdumala, si Kristo Jesus. (Juan 13:35; 1 Ped. 2:12) Dili ni kay naatol ra. Naposible ni kay ginatabangan ta ni Jesus.

9. Sumala sa Mateo 24:45-47, unsay giingon ni Jesus nga mahitabo panahon sa kataposan?

⁹ Basaha ang Mateo 24:45-47. Gitagna ni Jesus nga sa panahon sa kataposan, magtudlo siyag “matinumanon ug maalamong ulipon” nga magtaganag espirituwal nga pagkaon. Busa makadahom ta nga daghag buluhaton ang maong ulipon sa atong panahon. Ug mao nay nagakahitabo karon. Gigamit sa atong tigdumala ang gamayng grupo sa mga dinihogan aron tagan-an ug espirituwal nga “pagkaon sa hustong panahon” ang katawhan sa Diyos ug ang mga interesado. Wala isipa niini nga mga dinihogan ang ilang kaugalingon ingong mga agalon sa ilang mga igsoon sa pagtuo. (2 Cor. 1:24) Hinuon, ilang giila nga si Jesu-Kristo ang “pangulo ug komandante” sa iyang katawhan.​—Isa. 55:4.

10. Unsa nga publikasyon diha sa hulagway ang nakatabang nimo nga moalagad kang Jehova?

¹⁰ Sukad sa 1919, ang matinumanong ulipon nagtaganag lainlaing publikasyon nga nakatabang sa mga interesado nga matilawan nila sa unang higayon ang espirituwal nga pagkaon. Niadtong 1921, gi-release sa ulipon ang librong The Harp of God aron tabangan ang mga interesado nga makakat-on sa pangunang mga pagtulon-an  sa Bibliya. Paglabay sa panahon, daghan pang publikasyon ang gitagana. Unsa nga publikasyon ang nakatabang nimo nga mailhan ang atong langitnong Amahan ug higugmaon siya? Ang libro bang “Pasagdi Ang Diyos Maminatud-on,” Ang Kamatuoran nga Motultol sa Kinabuhing Dayon, Ikaw Mabuhing Walay Kataposan sa Paraiso sa Yuta, Kahibalo nga Motultol sa Kinabuhing Walay Kataposan, Unsay Tinuod nga Gitudlo sa Bibliya?, Unsay Gitudlo Kanato sa Bibliya?, o Mabuhi Ka Hangtod sa Hangtod!, nga mao ang atong kinabag-ohang publikasyon? Kini nga mga publikasyon giandam aron tabangan ta sa paghimog mga tinun-an, ug mao gyod ni ang atong gikinahanglan sa panahon nga kini gi-release.

11. Nganong importante nga kitang tanan makadawat ug espirituwal nga pagkaon?

¹¹ Dili lang ang mga interesado ang nanginahanglan ug gahing espirituwal nga pagkaon, kondili kitang tanan. Si apostol Pablo misulat: “Ang gahing pagkaon maoy para sa mga tawong hamtong.” Miingon pod si Pablo nga ang pagpadapat sa atong nakat-onan sa Bibliya makatabang nato sa ‘pag-ila sa maayo ug sa daotan.’ (Heb. 5:14) Niining lisod nga panahon nga ubos na kaayo ang moralidad sa mga tawo, usahay lisod kaayo ang pagsunod sa mga sukdanan ni Jehova. Pero gipaneguro ni Jesus nga molig-on ta pinaagig lamiang espirituwal nga pagkaon. Kini nga pagkaon naggikan sa Pulong sa Diyos, ang Bibliya. Ang matinumanong ulipon nag-andam ug nag-apod-apod niini nga pagkaon ubos sa pagdumala ni Jesus.

12. Sama kang Jesus, giunsa nato pagpasidungog ang ngalan sa Diyos?

¹² Sama kang Jesus, gihatagan nato ang ngalan sa Diyos ug pasidungog nga angay gyod niini. (Juan 17:6, 26) Pananglitan, sukad sa 1931, ato nang gitawag ang atong kaugalingon ingong mga Saksi ni Jehova. Pinaagi niana,  gipakita nato kon unsa ka importante kanato ang ngalan sa Diyos ug gusto nato nga mailhan ta sa iyang ngalan. (Isa. 43:10-12) Ug sukad sa Oktubre nianang tuiga, ang ngalan sa Diyos makita na sa atubangan niini nga magasin. Gibalik pod sa Bag-ong Kalibotang Hubad sa Balaang Kasulatan ang ngalan sa Diyos sa kon asa kini angayng makita sa Bibliya. Lahi ra gyod kaayo ta sa mga relihiyon sa Kakristiyanohan, nga nagtangtang sa ngalan ni Jehova diha sa daghan nilang hubad sa Bibliya!

13. Nganong kombinsido ka nga ginagamit ni Jesus ang “matinumanon ug maalamong ulipon”? (Juan 6:68)

¹³ Pinaagi sa “matinumanon ug maalamong ulipon,” si Jesus nag-establisar ug talagsaong organisasyon dinhi sa yuta aron suportahan ang putling pagsimba. Unsay imong gibati sa maong organisasyon? Tingali parehas kang Pedro ang imong gibati, kinsa miingon kang Jesus: “Kang kinsa man mi mangadto? Anaa nimo ang mga pulong nga motultol sa kinabuhing walay kataposan.” (Juan 6:68) Unsa na kaha ta karon kon dili ta bahin sa organisasyon ni Jehova? Pinaagi sa organisasyon, giseguro sa Kristo nga kanunay tang mapakaon sa espirituwal. Gibansay pod ta niya aron mahimong epektibo sa atong ministeryo. Gitabangan sab ta niya nga masul-ob “ang bag-ong personalidad” aron mapalipay nato si Jehova.​—Efe. 4:24.

14. Unsang kaayohan ang imong nadawat kay bahin ka sa organisasyon ni Jehova niining panahon sa COVID-19 nga pandemic?

¹⁴ Si Jesus naghatag ug maalamong giya sa lisod nga mga panahon. Klaro kaayong makita ang mga kaayohan niana nga giya dihang nahitabo ang COVID-19 nga pandemic. Daghang tawo ang naglibog kon unsay buhaton, pero giseguro ni Jesus nga makadawat tag klarong  giya aron maproteksiyonan ta. Gidasig ta nga mag-physical distancing ug magsul-ob ug face mask o face shield dihang mogawas. Ang mga ansiyano gipahinumdoman nga regular nga kontakon ang mga igsoon sa kongregasyon aron mahibalo sila sa pisikal ug espirituwal nga panginahanglan sa mga igsoon. (Isa. 32:1, 2) Nakadawat pod tag dugang giya ug pagdasig pinaagi sa mga update sa Nagamandong Lawas.

15. Unsang instruksiyon ang gihatag bahin sa mga tigom ug pagsangyaw panahon sa pandemic, ug unsay resulta?

¹⁵ Panahon sa pandemic, nakadawat pod tag klarong instruksiyon kon unsaon paghimo ang atong mga tigom ug pagsangyaw. Gihimo dayon nato ang atong mga tigom, asembliya, ug kombensiyon pinaagig videoconference. Ang atong pagsangyaw ginahimo halos pinaagi nag sulat ug telepono. Gipanalanginan ni Jehova ang atong mga paningkamot. Daghang sangang buhatan ang nagreport nga mas midaghan ang mga magmamantala. Gani, daghan ang naay makapadasig nga mga eksperyensiya panahon sa pandemic.—Tan-awa ang kahong “ Gipanalanginan ni Jehova ang Atong Pagsangyaw.”

16. Sa unsa ta makasalig?

¹⁶ Ang uban naghunahuna tingali nga estrikto ra kaayo ang organisasyon kon bahin sa mga safety protocol panahon sa pandemic. Pero balikbalik natong nakita nga sakto gyod ang mga instruksiyon nga atong nadawat. (Mat. 11:19) Kon pamalandongon nato ang mahigugmaong paggiya ni Jesus sa iyang katawhan, makasalig ta nga bisag unsay mahitabo, dili gyod ta pasagdan ni Jehova ug sa iyang pinalanggang Anak.​—Basaha ang Hebreohanon 13:5, 6.

17. Unsay imong gibati nga si Jesus ang atong tigdumala?

¹⁷ Panalangin kaayo nga si Jesus ang atong tigdumala! Apil ta sa organisasyon nga nagkahiusa bisag lainlain tag kultura, nasod, ug pinulongan. Busog kaayo ta sa espirituwal, ug gibansay ta sa pagsangyaw. Ang kada usa nato ginatabangan nga masul-ob ang bag-ong personalidad ug higugmaon ang usag usa. Daghan gyod tag rason nga malipay kay si Jesus ang atong tigdumala!