1. Met Jiowa a mochen lón ach ei fansoun?

 LÓN ach ei fansoun, Kot a mochen pwe kapas allimen an we Mwú epwe chéúfetál wóón unusen fénúfan. (Mark. 13:10; 1 Tim. 2:3, 4) Ei angang án Jiowa me a fókkun aúchea, ina popun a filatá án Néún we mi áchengicheng epwe wisen emmweni. Sia lúkúlúk pwe mwen ewe sópwólóón epwe waroto, epwe weséchúló ei angangen afalafal lón ewe napanap Jiowa a tipeni pokiten Jesus a wisen emmwenikich.​—Mat. 24:14.

2. Met sipwele pwóróus wóón lón ei lesen?

² Lón ei lesen, sipwe káé ifa usun Jesus a néúnéú ewe “chon angang mi allükülük o tipachem” le awora emmwen seni án Kot we Kapas me álisi chókkewe mi tapweló mwirin le féri ewe angangen afalafal mi fókkun aúchea lón uruwo. (Mat. 24:45) Sipwe pwal ppii met emén me emén kich sia tongeni féri pwe sipwe álisatá Jesus me ewe chón angang mi alúkúlúk.

3. Ifa ewe angang a wor án Jesus nemenem wóón?

³ Jesus a emmweni ei angangen afalafal. Pwata sia lúkú ena? Me mwen an we epwele feitá láng, a chuuri fitemén me lein néún kewe chón káé me wóón ewe chuuk Kalilea. A ereniir: “Nemenem meinisin won läng me fanüfan a toriei.” Katol met a pwal erá mwirin: “Oupwe feila o asoulängala chon ekewe mwü meinisin.” (Mat. 28:18, 19) Iwe, ewe angangen afalafal ina eú me lein ekkewe mettóch a wor án Jesus nemenem wóón le emmweni.

4. Pwata sia lúkú pwe Jesus a chúen ekkemmweni ewe angangen afalafal?

 ⁴ Jesus a erá pwe ewe angangen afalafal me álisi aramas ar repwe wiliti Chón Kraist epwe tori iteiten “mwü meinisin,” me epwe eti chókkewe mi tapweló mwirin i “fansoun meinisin tori lesopolan.” (Mat. 28:20) Ekkena itiitin kapas ra áiti ngenikich pwe fán emmwenien Jesus, ewe angangen afalafal epwe sópwósópwóló tori lón ach ei fansoun.

5. Ifa usun sia álisatá pwénútáán Kölfel 110:3?

⁵ Jesus ese lólilen ren an esap naf chókkewe repwe féri ewe angang lesópwólóón ei ótóten fénúfan. A silei pwe epwe pwénúetá met ei ewe soumakken kélfel a apasa: “Lon ränin om kopwe maun ngeni chon oputom noum aramas repwe etuk fän püsin letiper.” (Kölf. 110:3) Ika ka fiti ei angangen afalafal, ka álisi Jesus me ewe chón angang mi alúkúlúk me álisatá pwénútáán ena oesini. Arapakkan chék epwele wes ei angang, iwe nge a wor met mi tongeni eppetikich lón ei angang.

6. Ifa eú mettóch mi eppeti ekkewe chón afalafala pwóróusen ewe Mwú lón ei fansoun?

⁶ Riáfféúmwáál, ina met a eppeti ekkewe chón afalafala pwóróusen ewe Mwú. Chón rikiló, néúwisin lamalam, me néúwisin mwú ra ereni chómmóng aramas pwóróus mi chofona usun ach angang. Ika chón ach famili, chókkewe sia sissileer, me chienach kewe chón angang ra tupuló ren ekkena pwóróus mi chofona, iwe eli repwe etipetipakich ach sipwe úkútiw seni ach angang ngeni Jiowa me seni ach fiti ewe angangen afalafal. Lón ekkóch fénú, chón oputakich ra eniwa chienach kewe, awater, aresiniir, me pwal mwo nge kalapuser. Nge sise máirú ren féfférúr kana ngenikich pún iei met Jesus a fen oesini: “Aramas meinisin repwe oputakemi pokiten itei.” (Mat. 24:9) Ach kúna ekkena esin koput, ina esissillen án Jiowa pwapwa rech. (Mat. 5:11, 12) Ewe Tefil i popun ekkena riáfféúmwáál. Nge Jesus a fókkun manaman lap seni! Ren an álillis, ewe kapas allim a tori aramasen mwú meinisin.

7. Ikkefa ekkewe mettóch mi fiffis ka kúna mi affata pwénútáán Pwärätä 14:6, 7?

⁷ Án aramas eáni eú fós sise sile, ina met a pwal eppeti ach afalafala pwóróusen ewe Mwú. Lón kúnaen aposel Johannes we, Jesus a oesini pwe lón ach ei fansoun ewe kapas allim epwe chéúló ngeni sókkun kapas meinisin. (Álleani Pwärätä 14:6, 7.) Ifa usun? Án Kot we mwicheich a awora ngeni aramas sókkopaten alen ar repwe rong kapas allimen ewe Mwú. Lón ei fansoun, aramas wóón unusen fénúfan ra tongeni álleani néúch kewe puk mi lóngólóng wóón Paipel wóón ach we website jw.org pokiten a kawor lón lap seni 1,000 fósun fénúfan! Ewe Mwichen Soupwúngúpwúng a pwal mutatá afféún ewe puk Eáni Manaw mi Pwapwa Tori Feilfeiló! lón lap seni 700 fós pwe epwe ina met sipwe nénnéúnéú le káé ngeni aramas pwe repwe wiliti Chón Kraist! A pwal kawor ekkewe mwéngé lón pekin lúkú lón video fán iten ekkewe mi selingepúng, me braille fán iten ekkewe mi mesechun. Aramas “seni ekewe mwü mi sokola ar kapas,” ra kákkáé le eáni ewe “fós mi limeliméch,” ina ewe enlet lón Paipel. (Sek. 8:23; Sef. 3:9, NW) Meinisin ekkena mettóch ra pwénúetá pokiten Jesus Kraist ewe chón emmwen mi lipwákéch a emmweni.

8. Met a fis pokiten ewe angangen afalafal?

⁸ Lón ei fansoun, lap seni 8,000,000 aramas seni 240 fénú ra chóni án Jiowa we mwicheich, me iteiten ier fitengeréú ra papatais! Iwe nge, án ekkena minefé chón káé  ámááraatá napanapen Chón Kraist kewe, are eáni ewe “manau mi fö,” ina met a kon aúchea lap seni úkúkún chóchóóch. (Kol. 3:8-10) Chómmóng aramas ra úkú seni ar eáni manaw mi limengaw, féfférún akkachofesá, aapaap, me tongei fénúer. Ewe oesini lón Aisea 2:4 a pwéppwénútá, pwe rese “chüen kaiö maun.” Pokiten sia fókkun achocho le manaweni ewe manaw mi fé, sia álisi aramas ar repwe chóni án Jiowa we mwicheich, me sia pwári pwe sia tapweló mwirin néúch we souemmwen Kraist Jesus. (Joh. 13:35; 1 Pet. 2:12) Meinisin ekkena mettóch rese chék fis ren sereseran. Ra fis pokiten Jesus a awora ewe álillis mi lamot ngenikich.

9. Me ren Mateus 24:45-47, met Jesus a oesini pwe epwe fis lón ekkewe fansoun sópwólóón?

⁹ Álleani Mateus 24:45-47. Jesus a oesini pwe atun ekkewe fansoun sópwólóón, i epwe seikaatá ewe “chon angang mi allükülük o tipachem” pwe epwe awora mwéngé lón pekin ngún. Ina popun, sia lúkúlúk pwe ena chón angang epwe angang weires lón ach ei fansoun. Iwe, ina met a fis. Jesus a néúnéú eú kúkkún kúmiin mwán mi kepit le awora ngeni néún Kot kewe aramas me chókkewe mi mochen káé Paipel ener mwéngé lón pekin ngún “lon fansoun fich.” Ekkena mwán, rese ekieki pwe repwe wisen nemeni án ekkewe ekkóch lúkú. (2 Kor. 1:24) Nge ra fen mirititi pwe Jesus Kraist, i ewe “souemwen me samolun” néún kewe aramas.​—Ais. 55:4.

10. Menni lein ekkeei puk lón ekkeei sasing a álisuk le poputá angang ngeni Jiowa?

¹⁰ Seni ewe ier 1919, ewe chón angang mi alúkúlúk a akkóta fférún sókkopaten puk epwe álisi chókkewe mi mochen káé Paipel ar repwe kerán poputá le káé ewe enlet seni án Kot Kapas. Lón ewe 1921, ena chón  angang a awora ei puk itelapan The Harp of God pwe epwe álisi ekkewe mi mochen káé le káé ekkewe popun afalafal lón Paipel. Mwirin och fansoun, a pwal kawor ekkóch puk. Menni puk a álisuk le silei Semach we lón láng me tongei i? Ewe puk “Let God Be True,” Ewe Enlet mi Emmwenikich Ngeni Manau Esemuch, En Kopwe Tongeni Manau Tori Feilfeilo chok lon Paratis won Fonufan, Sile mi Emmwen Ngeni Manau Esemuch, Met ewe Paipel A Wesewesen Apasa?, What Can the Bible Teach Us?, are néúch we mineféén puk, Eáni Manaw mi Pwapwa Tori Feilfeiló!? Meinisin ekkena puk, ra ffér pwe repwe álisi aramas le wiliti Chón Kraist, me ra katowu lón ewe fansoun mi fich.

11. Pwata a lamot ngenikich meinisin ach sipwe mwémmwéngé ekkewe mwéngé lón pekin ngún?

¹¹ Esap chék ekkewe mi kerán poputá le káé Paipel a lamot ngeniir ewe sile mi alóllóól usun Jiowa me ewe Paipel. A lamot ngenikich meinisin. Ewe aposel Paulus a erá: “Mongo pochokkul a och ngeni aramas asimau.” A pwal erá pwe ach apwénúetá met sia káé seni ewe Paipel, epwe álisikich le “esinna lefilen minne mi murinno o minne mi ingau.” (Ipru 5:14, Testament mi Fö) Lón ei fansoun, a tongeni áweires ach sipwe álleasochisi án Jiowa kewe allúk pokiten a fókkun chómmóng chókkewe mi eáni manaw mi limengaw. Nge Jesus a túmúnú an epwe péchékkúl ach lúkú ren ach mwéngé ekkewe mwéngé lón pekin ngún. Ekkena mwéngé lón pekin ngún ra feito seni án Kot we Kapas, ewe Paipel. Ewe chón angang mi alúkúlúk a ammólnatá me akkawora ekkena mwéngé fán emmwenien Jesus.

12. Ifa usun sia áppirú Jesus le elingaaló iten Kot we?

¹² Kich sia pwal áppirú Jesus ren ach elingaaló iten Kot we, pwe ina met a fich ngeni.  (Joh. 17:6, 26) Áwewe chék, lón ewe ier 1931 sia angei itach we Chón Pwáraatá Jiowa seni lón Paipel. Ach féri ena, a pwári úkúkún ach aúcheani iten Kot we. Me sia mochen án aramas repwe silekich ren iten Semach we lón láng. (Ais. 43:10-12) Iwe, seni October 1931, ena it mi pin Jiowa, a pwá wóón péén néúch ei puk. Pwal och, ena it a pwal liwinlongsefál lón pwúkún leenian me lón ewe New World Translation of the Holy Scriptures. A fókkun sókkóló seni ekkewe tipitipin lamalamen Chón Kraist mi télawu ena it seni me lón chómmóng néúr kewe afféún Paipel!

13. Met a alúkúlúkú ngonuk pwe Jesus a néúnéú ewe “chon angang mi allükülük o tipachem” lón ei fansoun? (Johannes 6:68)

¹³ Jesus a néúnéú ewe “chon angang mi allükülük o tipachem,” le fératá eú mwicheich mi kkóló aúchean wóón ei fénúfan mi álisatá fel mi limeliméch. Met meefiom ren ena mwicheich? Ese mwáál ka pwal meefieni meefien aposel Petrus ei ngeni Jesus: “Iö aipwe feila ren? En ka eäni kapasen manau esemüch.” (Joh. 6:68) Epwe fet manawach lón ei fansoun ika sise chóni án Jiowa na mwicheich? Kraist a áeá ena mwicheich le awora meinisin met mi lamot ngenikich pwe sipwe akkamwéchú ach tuppwél ngeni Kot. A pwal ákkáitikich ach sipwe chón afalafal mi lipwákéch. Pwal och, a álisikich ach sipwe eáni ewe “manau mi fö,” pwe Jiowa epwe pwapwa rech.​—Ef. 4:24.

14. Atun ewe semmwen mi chéú COVID-19, ifa usun ka kúna feiéchún óm chóni án Jiowa we mwicheich?

¹⁴ Jesus a awora kapasen emmwen mi álilliséch lón fansoun weires. Álilliséchún ekkena kapasen emmwen, a pwáló atun ewe semmwen mi chéú COVID-19. Chómmóng  lón ei ótót rese silei met repwe féri, nge Jesus a nochchei an epwe awora emmwen mi fataffatéch fán iten túmúnúch. A kawor ngenikich pesepes ren ach sipwe áeá mask atun sia nóm lein chómmóng aramas me atowauakicheló seniir. A kawor kapasen áchem ngeni ekkewe mwán mi ásimaw ar repwe kan chechcheki chón ewe mwichefel me ppii ifa usur lón pekin aion me pekin ngún. (Ais. 32:1, 2) Sia pwal angei kapasen emmwen me kapasen apéchékkúl seni ekkewe éúréúr ewe Mwichen Soupwúngúpwúng a awora.

15. Atun ewe semmwen mi chéú, ifa ewe éúréúr mi kawor ren ifa usun sipwe féri ach kewe mwich me fiti ewe angangen afalafal, me met mwirilóón?

¹⁵ Atun ewe semmwen mi chéú, sia pwal angei éúréúr mi fataffatéch ren ifa usun sipwe féri ach kewe mwich me fiti ewe angangen afalafal. Ese pwon mwo, nge a poputá fis ach kewe mwich me mwichelap online. Sia pwal chék féri ach angangen afalafal ren ach mak taropwe me kékké wóón phone. Jiowa a efeiéchú ach achocho. Chómmóng ekkewe keangen ofesilap ra repotei lapólóón chóchóón chón afalafal. Ren enletin, a chómmóng pwóróus mi apéchékkúlakich mi fis lón ei fansoun.​—Ppii ewe pwóór “ Jiowa A Efeiéchú Ach Angangen Afalafal.”

16. Met sia tongeni lúkúlúkú?

¹⁶ Ekkóch eli ra ekieki pwe ewe mwicheich a kon tichik atun ewe semmwen mi chéú. Nge iteitan, a ffat pwe ekkewe emmwen ra awora ngenikich ra fókkun álilliséch. (Mat. 11:19) Atun sia ekilonei napanapen án Jesus ekkemmweni néún kewe aramas, sia lúkúlúk pwe ese lifilifil met epwe fis lón ekkan rán mwach, nge iir me Seman we repwe nónnóm rech.​—Álleani Ipru 13:5, 6.

17. Met meefiom ren óm nónnóm fán án Jesus emmwen?

¹⁷ Sia fókkun pwapwa pwe sia nóm fán án Jesus emmwen. Sia chóni eú mwicheich mi tipeeúfengen inaamwo ika sia feito seni sókkopaten fénú, lewo, me a sókkofesen ach fós. Sia angei chómmóng kapasen emmwen seni án Kot we Kapas, me sia angei káit mi lamot pwe sipwe lipwákéch lón ewe angangen afalafal. Emén me emén kich sia káé ifa usun sipwe eáni ewe manaw mi fé, me káé ach sipwe tongfengen lefilach. Pokiten sia nóm fán emmwenien Jesus, iwe a wor chómmóng popun ach sipwe fókkun pwapwa.