1. Tuchan ah Jehovah duhnak cu zeidah a si?

 TUCHAN ah Pathian duhnak a simi Pennak kong thawngṭha cu khuazakip ah chim a si. (Marka 13:10; 1 Tim. 2:3, 4) Mah cu Jehovah rian a si i mah kha hruai dingin a dawtmi a Fapa a thimmi cu a biapi tukmi a si. Jesuh nih lam a kan hruai caah donghnak a phanh hlanah Jehovah duh ningin thawngṭha chimnak rian cu liim a si lai ti kha kan zumh khawh.—Matt. 24:14.

2. Hi capar ah zei kong dah kan i ruah hna lai?

² Hi capar ah Jesuh nih thlarau rawl pek awk le a zultu pawl nih tuanbia ah a ngan bikmi thawngṭha chimnak rian an ṭuanmi lamhruai awkah “zumhawk a tlakmi le a fimmi sal” a hman hna ning kong kan i ruah hna lai. (Matt. 24:45) Cun Jesuh le zumhawk tlak sal bawmh awkah pakhat cio nih kan tuah khawhmi kong zong kan i ruah hna lai.

3. Jesuh cu zei nawlngeihnak dah pek a si?

³ Jesuh nih thawngṭha chimnak rian kha lam a hruai. Zeicah cutin kan chim khawh? Van a kai hlanah Jesuh cu Galilee tlang cungah zumhfekmi a zultu cheukhat he an rak i tong i hitin a ti hna: “Vancung le vawleicung i a ummi nawlngeihnak vialte cu pek ka si cang.” Mah hnuah a chimmi bia hi i cinken: “Cucaah khuazakip ah va kal u law miphun vialte kha ka zultu ah va ser hna u.” (Matt. 28:18, 19) Cucaah Jesuh  cu phungchimnak rian lamhruai awkah nawlngeihnak pek a si.

4. Jesuh nih phungchimnak rian kha a hruai rih tiah zeicah kan chim khawh?

⁴ Jesuh nih phungchimnak le zultu siternak rian cu “khuazakip” ah liim a si lai tiah a ti. Cun a zultu pawl kha “nan sinah a zungzal in caan dongh tiangin ka um lai” tiah a ti hna. (Matt. 28:20) Mah nih tuchan phungchimnak rian cu Jesuh lamhruainak tangah a um ti kha a langhter.

5. Salm 110:3 a tlin nakhnga zeitindah kan bawmh khawh?

⁵ Jesuh nih hi vawlei donghnak caan chungah rianṭuantu a za in an um lai lo timi kongah a thin a phang lo. Salm caṭialtu pa chimmi chimchungbia a tling lai ti kha a hngalh: “Na ral kha na tuk hna ni ah, na mi nih anmah lungtho tein an in chuahhnawh lai.” (Salm 110:3) Phungchim rian ah naa tel ahcun Jesuh le zumhawk tlak sal na bawmhmi hna a si i mah chimchungbia a tlin nakhnga zong na bawmhmi a si. Mah rian cu ṭuan a si peng ko nain zuamcawhnak tampi a um.

6. Tuchan ah Pennak kong a chimtu hna nih an tonmi zuamcawhnak pakhat cu zeidah a si?

⁶ Pennak kong a chimtu hna nih an tonmi zuamcawhnak pakhat cu ralchanhnak a si. Zumhpialmi, biaknaklei hruaitu le nawlngeitu hna nih kan rian kong he aa tlaiin lihbia tampi an chim. Kan rualchan, kan theihhngalh le kan rian ṭuanṭi hawi hna nih mah bia an theih tikah Jehovah biak le thawngṭha chim kha ngol dingin an kan hnek men lai. Ram cheukhat ahcun ralchanhtu hna nih kan unau pawl kha an tlerhkhonh hna, an doh hna asiloah an tlaih hna i thong hmanh an thlak hna. Cutin an tuah ruangah kan khuaruah a har lo. Jesuh nih hitin a chimchung: “Keimah ruangah mi vialte nih an in huat hna lai.” (Matt. 24:9) Cucaah mah bantuk huatnak kan tonmi cu Jehovah mithmai ṭha kan hmu tinak a si. (Matt. 5:11, 12) Mah ralchanhnak hnulei ah a ummi cu Satan a si. Asinain Jesuh cu amah nakin a ṭhawng deuh tukmi a si. Jesuh bawmhnak thawngin thawngṭha cu khuazakip ah a phan. Cutin a si ti a langhtertu thil hna hi ruathmanh.

7. Biathlam 14:6, 7 chimchungbia a tling ti a langhtertu zei thil dah na hmuh?

⁷ Pennak kong thawngṭha a chimtu in holh kong he aa tlai zongin zuamcawhnak kan tong. Asinain Lamkaltu Johan hmuhmi biathlam chungah Jesuh nih tuchan ah thawngṭha chimnak cu a hlawh a tling lai tiah a chimchung. (Biathlam 14:6, 7 rel.) Zeitin in dah? Mi tam khawh chung tam nih Pennak kong thawngṭha an lehrulh khawh nakhnga caanṭha kan pek hna. Tuchan ah, vawleicung pumpi ah a ummi hna nih Baibal hrambunh in chuahmi ca hna kha holh phun 1,000 leng in jw.org website ah an rel khawh. Uktu Bu nih zultu siternak rian ah a bik in hman dingmi Nunnak Kha Zungzal In I Nuamhpi! timi cauk kha holh phun 700 leng in leh awkah an hna a tla. Cun a hna a chet i a holh kho lomi hna caah video pawl le a mit a cawmi hna caah mitcaw ca ti bantuk thlarau rawl zong timhtuah a si. Baibal chimchungbia hna a tlinmi kha kan hmuh. “Holh phun kip a hmangmi miphun kip chungin” mi pawl nih Baibal biatak a simi “a thiangmi holh” kha hman dingin an cawn. (Zek. 8:23; Zef. 3:9, NW) Mah thil vialte a hlawh a tlin khawhmi cu Jesuh Khrih lamhruainak thawngin a si.

8. Phungchimnak rian i a phichuak cu zeidah a si?

⁸ Tuchan ah ram 240 lengah mi 8,000,000 leng cu Jehovah bupi ah an um i kum  fatin mi thong tampi cu tipil an ing. Asinain milu nakin a biapi deuhmi cu mah zultu thar hna nih thlaraulei sining a simi “mithar” an i hrukmi kha a si. (Kol. 3:8-10) Mi tampi nih ziazalei rawhralnak, zaangennak, duhdanhnak le miphun ṭanhnak ti bantuk hna kha an hlawt. “Raldoh zong an i tim ti lai lo” timi Isaiah 2:4 i chimchungbia cu a tling. Mithar i hruk awkah kan i zuammi nih mi pawl kha Pathian bupi ah a hnuh hna i kan hruaitu Jesuh Khrih hnu kan zulh zong a langhter. (Johan 13:35; 1 Pet. 2:12) Zeicah cutin a si? Jesuh nih kan herhmi bawmhnak a kan pek caah a si.

9. Matthai 24:45-47 ningin donghnak caan ah Jesuh nih zeidah a cang lai tiah a chim?

⁹ Matthai 24:45-47 rel. Jesuh nih donghnak caan ah thlarau rawl pek dingin “zumhawk a tlakmi le a fimmi sal” kha rian ka pek hna lai tiah a chimchung. Cucaah tuchan ah mah sal nih an rian kha fakpi in an ṭuan lai tiah kan zumh khawh. Mah cu a hmaanmi a si. Pathian miphun le hngalh duhnak a ngeimi hna nih “a caan hmaan tein” thlarau rawl an hmuh nakhnga chiti thuhmi pa hna in dirhmi phu hmete pakhat kha Jesuh nih a hman hna. Mah pa hna nih midang zumhnak cungah nawlngeitu in an i hmu lo. (2 Kor. 1:24) Mah canah Jesuh Khrih cu a miphun caah “hruaitu le uktu” a si ti kha an hngalh.—Isa. 55:4.

10. Hmanthlak ah langhtermi hna lakin zei cauk nih dah Jehovah biak awkah aan bawmh?

¹⁰ 1919 thawkin zumhawk tlak sal nih hngalh duhnak a ngeimi, mithar pawl nih Baibal biatak an cawn khawh nakhnga a voikhatnak in cauk tampi an chuah. 1921 ah hngalh duhnak a ngeimi hna nih a hrampi Baibal cawnpiaknak kong an cawn khawh nakhnga Pathian Tingtang timi cauk kha an  timhtuah. Chan aa thlen bantukin cauk tampi an chuah chap. Vancung kan Pa hngalh awk le dawt awkah zei cauk nih dah aan bawmh? “Pathian cu Zumhawktlak a Si,” Zungzal Nunnak ah a Hruaimi Biatak, Vawlei Cung Paradis Ah Zungzal Na Nung Kho, Zungzal Nunnak ah a Hruaimi Hngalhnak, Baibal Cawnpiakmi Taktak Cu Zeidah A Si?, Baibal Nih Zeidah A Kan Cawnpiak? asiloah a thar chuah a simi Nunnak Kha Zungzal In I Nuamhpi! timi cauk nih maw? Mah cauk vialte cu zultu siternak rian caah bawmtu in le kan herh lio caante ah chuah an si.

11. Kan dihlak in thlarau rawl ei cu zeicah a biapit?

¹¹ Hngalh duhnak a ngeimi mithar hna lawng nih thlarau rawl taktak kha an herhmi a si lo. Kan dihlak in kan herh. Lamkaltu Paul nih hitin a ti: “Rawl taktak cu upa nih khan an ei khawh.” Cun mah thlarau rawl kan eimi nih “chia le ṭha thleidan khawh” awkah a kan bawmh lai ti zongin a ti. (Heb. 5:14) Mi tampi cu a ziaza a rawkralmi an si caah atu ah Jehovah phunglam ningin nun cu a har tuk ko lai. Asinain kan eimi thlarau rawl nih kan zumhnak a fehter khawh ti kha Jesuh nih a hngalh. Mah thlarau rawl i a hrampi cu Pathian Bia, Baibal kha a si. Mah cu zumhfekmi sal nih Jesuh lamhruainak tangah an timhtuahmi a si.

12. Jesuh bantukin Pathian min kha zeitindah kan thangṭhat?

¹² Jesuh bantukin kannih zong Pathian min kha kan thangṭhat. (Johan 17:6, 26) Tahchunhnak ah, 1931 ah Jehovah Tehte Hna timi min kha kan i lak. Mah nih kan caah Pathian min a biapit ning le vancung kan Pa min in hngalhmi si kan duh ning kha a langhter. (Isa. 43:10-12) Cun mah kum, October thla thawkin mekazin kip i a phaw ah Jehovah min kha langhter a si. Mah lengah, Vawlei Thar Lehnak Baibal ah Pathian min  kha amahle zawnte ah khumh ṭhan a si. Mah cu an lehmi Baibal ah Jehovah min a hlomi Khrihfa ram hna he cun aa thleidang tukmi a si!

13. Tuchan ah Jesuh nih “zumhawk a tlakmi le a fimmi sal” a hman hna ti kha zeinihdah aan zumhter? (Johan 6:68)

¹³ Jesuh nih “zumhawk a tlakmi le a fimmi sal” hmangin a thiangmi biaknak a ṭhancho chin nakhnga vawlei ah aa thleidangmi bu pakhat kha a dirh. Mah bu kong he aa tlaiin zeitindah na ruah? Jesuh sinah hitin a chimmi Peter bantukin na ruah ve men lai: “Bawipa, aho sinah dah kan kal hnga? Zungzal nunnak bia a ngeitu cu nangmah hen pei na si cu.” (Johan 6:68) Jehovah bupi ah rak um hlah u sih law atu khoika ah dah kan um hnga? Pathian cungah zumhfek tein um awkah kan herhmi zei thil paoh kan ngei dih. Cun hmualngei tein phungchim rian ṭuan khawh awk zongah a kan cawnpiak. Mah lengah Jehovah lung kan lawmhter khawh nakhnga “mithar” i hruk dingin a kan bawmh.—Efe. 4:24.

14. COVID-19 pulrai chungah Jehovah Tehte pakhat in zei ṭhatnak dah na hmuh?

¹⁴ Jesuh nih harnak caan chungah a ṭha tukmi lamhruainak a kan pek. COVID-19 pulrai aa thawk tikah mah lamhruainak zeitluk in dah a ṭhat ti kha kan hngalh. Vawleicung mi tampi nih zei tuah awk an hngalh lo lioah Jesuh nih kan him peng nakhnga a fiangmi lamhruainak a kan pek. A leng kan chuah tikah hmai i huh awk le pakhat le pakhat i naih tuk lo awkah thapek kan si. Khrihfa upa zong Khrihfabu i unau dihlak he hmaan tein pehtlaihnak tuah in an herhmi pumsalei le thlaraulei hngalh awkah i zuam dingin thapek an si. (Isa. 32:1, 2) Cun  Uktu Bu thawngpang in a dang lamhruainak le thazaang peknak kan hmu.

15. Pulrai chungah pumhnak le phungchimnak kong he aa tlaiin zei lamhruainak dah pek kan si i a phichuak cu zeidah a si?

¹⁵ Pulrai chungah i pumhnak le phungchimnak kong he aa tlaiin lamhruainak hna kan hmu. Khrihfabu pumhnak, civui le pengkomh civui hna kha internet hmangin fawi tein kan i pum kho. Cun cakuatnak in le phone in thawngṭha kan chim kho. Jehovah nih kan i zuamnak cungah thlua a kan chuah. Thawngthanhtu milu an karhnak kong kha zung ṭengnge tampi nih an thanh. Mah caan chungah thazaang a pemi hmuhtonnak tampi a um.—“ Jehovah Nih Phungchimnak Rian Kha Thlua A Chuah” timi rinli kulh ah zoh.

16. Zeidah kan zumh khawh?

¹⁶ Bupi cu pulrai kong he aa tlaiin a hleihluat tuk in aa ralring tiah mi cheukhat nih an ruah men lai. Asinain atu le atu kan hmuhmi lamhruainak cu a ṭha tukmi a si ti cu a fiang ko. (Matt. 11:19) Cun Jesuh nih dawtnak in a miphun pawl lam a hruai hna ning kong kha ṭha tein kan ruah ahcun hmailei ah zei thil a can hmanhah Jehovah le a dawtmi a Fapa nih a kan umpi lai ti kha kan zumh khawh.—Hebru 13:5, 6 rel.

17. Jesuh lamhruainak tangah rian na ṭuan caah zeitindah na um?

¹⁷ Jesuh lamhruainak tangah rian kan ṭuan khawhmi cu thluachuah taktak a si! Kannih cu nunphung, miphun le holh phun i khah lo ruangah aa ṭhencheu lomi bupi ah kan um. Baibal in lamhruainak kan hmu i phungchim rian ca zongah a herhmi vialte cawnpiak kan si. Cun mithar i hruk awkah cawnpiak kan si i pakhat le pakhat i dawt awk zongah kan cawn. Jesuh cu kan hruaitu a si caah kan i uangthlar tuk!