1. Jehova sago ye mun lo ye bi?

 BI BI nin na, Ala sago ye ko Masaya kibaro diiman ka fɔ duniɲa kuru bɛɛ la (Mariki 13:10; 1 Tim. 2:3, 4). Jehova ka baara lo. O baara kɔrɔtanin lo kosɔbɛ minkɛ, a y’o kalifa a Dencɛ kanulen ma walisa a k’o ɲɛminɛ. Komi Yezu lo be waajuli baara ɲɛminɛna, an lanin b’a la k’o baara bena kɛ ka ban i ko Jehova b’a fɛ cogo min na, sanni laban loon ka se.—Mat. 24:14.

2. An bena mun lo ye barokun nin na?

² Waajuli baara min be kɛra bi, o ɲɔgɔn ma deli ka kɛ ka ye. Barokun nin na, an bena a ye cogo min na Yezu be tɛmɛna “jɔncɛ kantigiman hakiliman” fɛ k’a ka kalandenw balo Alako ta fan fɛ ani k’u labɛn o waajuli baara kama (Mat. 24:45, NW). An bena a ye fana an kelen kelen bɛɛ be se ka Yezu ni jɔncɛ kantigiman dɛmɛ cogo min na o baara la.

3. Kuntigiya juman lo dira Yezu ma?

³ Yezu lo be waajuli baara ɲɛminɛna. Mun na an be se ka la o la? Dɔɔni sanni Yezu ka taga sankolo la, a ye ɲɔgɔnye kɛ n’a ka kalanden kantigi dɔw ye Galile kulu kan. A y’a fɔ u ye ko: “Ala ye sebagaya bɛɛ di ne ma sankolo la ani dugukolo kan.” O kɔ, a ko: “O la, aw ye taga siyaw bɛɛ kɛ ne ka kalandenw ye.” (Mat. 28:18, 19). O b’a yira ko kuntigiya dira Yezu lo ma a ka waajuli baara ɲɛminɛ.

4. Mun na an be se ka la a la ko Yezu bele be waajuli baara ɲɛminɛna?

 ⁴ Yezu tun ko a ka kalandenw bena waajuli kɛ ani ka mɔgɔw kalan ka bɔ “siyaw bɛɛ” la. A tun y’a fɔ fana ko ale bena kɛ n’u ye “loon o loon fɔɔ ka taga diɲɛ wili.” (Mat. 28:20). O kumaw b’a yira ka gwɛ ko waajuli baara tun bena kɛ fɔɔ ka na se an ka wagati la ani ko Yezu bena to k’o baara ɲɛminɛ.

5. An be dɛmɛ don cogo di Zaburuw 110:3 dafali koo la?

⁵ Yezu tun b’a lɔn ko ale tɛna fɔn baaradenw na duniɲa laban wagati la. A tun b’a lɔn ko Zaburuw 110:3 (NW) ka kiraya kuma bena dafa: “I ka mɔgɔw bena u yɛrɛ di ni diyanye ye i ka kɛlɛdenw lajɛnlon na.” I be Yezu ni jɔncɛ kantigiman dɛmɛ k’o kiraya kuma dafa i kɛtɔ k’i seen don waajuli baara la. O baara be tagara ɲɛ, nka gwɛlɛya dɔw be yen.

6. Gwɛlɛya minw be Masaya waajulikɛlaw kan bi, u dɔ ye juman ye?

⁶ Gwɛlɛyaw be Masaya waajulikɛlaw kan. U dɔ ye ko mɔgɔw b’u kɛlɛ. Kerecɛn murutininw, diinan kuntigiw ani politiki ɲɛmɔgɔw y’a kɛ mɔgɔ caaman b’an ka waajuli baara filɛ ni ɲɛɛ jugu ye. N’an somɔgɔw, an lɔnbagaw wala an baarakɛɲɔgɔnw y’o mɔgɔw ka ngalon kumaw lamɛn, u be se k’an lasun walisa an ka Jehova batoli ni waajuli dabila. Jamana dɔw la, an juguw b’an balimaw bagabaga, k’u minɛ ani k’u don kaso la yɛrɛ! O koo tɛ bari an na sabu Yezu tun kɔnna k’a fɔ ko: “Alalɔnbaliw bɛɛ bena aw kɔniya ne tɔgɔ kosɔn.” (Mat. 24:9). N’an juguw b’an kɔniya o cogo la, o b’a yira ko an koo ka di Jehova ye (Mat. 5:11, 12). Sutana lo b’o mɔgɔw lasunna u k’an kɛlɛ. Nka Yezu ka setigiya tɛmɛna Sutana ta kan fɔɔ ka taga ka na. Yezu ka dɛmɛ barika la, kibaro diiman be fɔra siyaw bɛɛ la. An ka dalilu dɔw lajɛ.

7. Dalilu juman lo b’a yira ko Yirali 14:6, 7 kɔnɔnakumaw be dafara?

⁷ An be gwɛlɛya wɛrɛ min sɔrɔ waajuli baara la, o ye ko kaanw ka ca. Yezu ye yelifɛn min yira ciden Zan na, o yelifɛn na, a tun y’a fɔ ko an ka wagati la, kibaro diiman bena fɔ o gwɛlɛya bɛɛ n’a ta (Yirali 14:6, 7 kalan). Cogo di do? An be sababu dira mɔgɔ caamanba ma u ka sɔn Masaya kibaro diiman na. Sɛbɛw ani videwo minw basiginin lo Bibulu kan, duniɲa kuru bɛɛ mɔgɔw be se k’u sɔrɔ an ka site jw.org kan kaan 1000 ni kɔ la! An be bibulukalan kɛ ni mɔgɔw ye gafe Ɲɛnamaya kɛ hɛɛrɛ la fɔɔ abada! lo kɔnɔ janko u ka kɛ Krista ka kalandenw ye. Ale lo y’an ka kalankɛ gafe jɔnjɔn ye ani sira dira walisa a ka bayɛlɛma kaan 700 ni kɔ la! Videwo minw basiginin lo Bibulu kan, u dɔw labɛnna tulogwerenw kama ani sɛbɛ dɔw fana labɛnna fiyentɔw kama. An ɲɛɛ b’a la ko Bibulu ka kira kumaw be dafara. “Siya wɛrɛw” mɔgɔw b’u jijara ka kaan senuman fɔ, Bibulu b’an kalan o min na (Zak. 8:23; Sof. 3:9). O bɛɛ be sera ka kɛ an Kuntigi Yezu Krista ka setigiya barika la.

8. Fɔɔ ka na se bi ma, an sera ka mun lo kɛ waajuli baara la?

⁸ Bi, mɔgɔ miliyɔn seegi ni kɔ lo be Jehova ka ɔriganisasiyɔn kɔnɔ ani u be jamana 240 na. Mɔgɔ waa caaman be batize ka fara u kan fana saan o saan! Min yɛrɛ kɔrɔtanin lo ka tɛmɛ o mɔgɔ batizenin kuraw hakɛ kan, o ye ko u b’u jijara ka kɛ ni “jogokura” ye, o  kɔrɔ, kerecɛn jogow (Kɔlɔs. 3:8-10). U caaman tun be kakalaya ni fariyakow kɛ ani u tun be mɔgɔ bɔ mɔgɔ la. Nka u y’o dabila. U ‘te kɛlɛkɛcogo dege tugu.’ Tiɲɛn na, Ezayi 2:4 ka kiraya kuma be dafara! Komi an b’an jija kosɔbɛ ka kɛ ni kerecɛn jogow ye, an be mɔgɔw lasun u ka na Ala ka ɔriganisasiyɔn kɔnɔ. O cogo la, an b’a yira ko an ye an Ɲɛminɛbaga Yezu Krista ka kalandenw ye (Zan 13:35; 1 Piyɛri 2:12). O bɛɛ be sera ka kɛ sabu an mako be dɛmɛ min na, Yezu b’o dira an ma.

9. Ka kɛɲɛ ni Matiyo 24:45-47 ka fɔta ye, Yezu tun ko mun lo bena kɛ laban wagati la?

⁹ Matiyo 24:45-47 kalan. Yezu tun kɔnna k’a fɔ ko laban wagati la, ale bena jɔncɛ kantigiman hakiliman dɔ sigi walisa a k’an dɛmɛ ka Ala ka Kuma faamu. O la an ka wagati la, a tɛ bari an na k’a ye k’o jɔncɛ jijanin lo baara la. Yezu be tɛmɛna kerecɛn mɔlenw jɛnkulu dennin dɔ fɛ ka Alako ‘dumuni di . . . a diwaati la’ Ala sagokɛlaw ni makodonmɔgɔw ma. O cɛɛw t’a jati ko u ye an kuntigiw ye lanaya ta fan fɛ (2 Kor. 1: 24). Nka, u be sɔn a ma ko Yezu Krista lo ye “kuntigi ni fangatigi ye” Ala sagokɛlaw kun na.—Ezayi 55:4.

10. Gafe minw yirala jaa kan, u la juman lo ye i dɛmɛ i sɔnna tiɲɛn batoli ma?

¹⁰ Kabi saan 1919, jɔncɛ kantigiman ye gafe caaman labɛn. O gafew ye sababu di makodonmɔgɔw ma, u ye Bibulu ka tiɲɛnkalanw lɔn. Saan 1921 (angilikan), jɔncɛ kantigiman ye gafe La Harpe de Dieu labɛn walisa ka makodonmɔgɔw dɛmɛ u ka Bibulu ka kalan jɔnjɔnw faamu. Saanw tɛmɛtɔ koow tora ka yɛlɛma minkɛ, a ye gafe wɛrɛw bɔ. O gafe dɔw ye nunu ye: “Que Dieu soit reconnu pour vrai !,” La vérité qui  conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Kalan tigitigi juman be Bibulu kɔnɔ?, Bibulu b’an kalan mun lo la?, ani an ka gafe kura Ɲɛnamaya kɛ hɛɛrɛ la fɔɔ abada! U la juman lo ye i dɛmɛ i ye an sankolola Faa lɔn ani k’a kanu? O gafew bɛɛ labɛnna walisa k’an dɛmɛ ka mɔgɔw kɛ Krista ka kalandenw ye. U bɔtuma na, an mako tun b’o lo la jaatika!

11. Mun na a kɔrɔtanin lo an bɛɛ k’a ɲini ka dɔ fara an ka lɔnniya kan Jehova ani Bibulu koo la?

¹¹ An bɛɛ lo ka ɲi k’a ɲini ka dɔ fara an ka lɔnniya kan Jehova ani Bibulu koo la, makodonmɔgɔw dɔrɔn tɛ. Ciden Pol y’a sɛbɛ ko: “Mɔgɔkɔrɔbaw be dumuni gwiliman dumu.” A y’a fɔ fana ko an be min kalan n’an b’o sira tagama, o b’an dɛmɛ ka “ɲumaman ni juguman lɔn ka bɔ ɲɔgɔn na.” (Eburuw 5:14). An be wagati gwɛlɛw lo la, o minw na mɔgɔw tagamacogo b’a la ka nagasi ka taga. O kama, a be se ka gwɛlɛya an ma kosɔbɛ ka Jehova ka sariyaw labato. Nka, Yezu b’a janto walisa an mako be min na janko k’an ka limaniya barika bonya, an ka se k’o sɔrɔ. An be kalan minw sɔrɔ, u basiginin lo Bibulu kan, o min ye Ala ka Kuma ye. Yezu be tɛmɛ jɔncɛ kantigiman lo fɛ k’o dumuni labɛn Alako ta fan fɛ ani k’o lase Ala sagokɛlaw ma.

12. I ko Yezu, an be bonya la Ala tɔgɔ kan cogo di?

¹² Ala tɔgɔ ka kan ni bonya min ye, an b’o la a kan i ko Yezu tun b’a kɛ cogo min na (Zan 17:6, 26). Misali la saan 1931, an basigira Bibulu kan k’an tɔgɔ la ko Jehova Seerew. O cogo la, an y’a yira ko Ala tɔgɔ kɔrɔtanin lo an fɛ ani ko an b’a fɛ u k’an weele an sankolola Faa tɔgɔ la (Ezayi 43:10-12). Kabi ɔkutɔburukalo la o saan na, an y’a daminɛ ka Ala tɔgɔ  bila Kɔrɔsili Sangaso kelen kelen bɛɛ ɲɛɛ fɔlɔ kan. O kɔ, Ala tɔgɔ tun be sɔrɔ yɔrɔ minw na a ka Kuma kɔnɔ, an y’o tɔgɔ bila a nɔɔ na Traduction du monde nouveau kɔnɔ. O b’a yira ka gwɛ ko an ni kerecɛn tɔgɔtigiw tɛ kelen ye. Olu ye Jehova tɔgɔ bɔ u ka Bibulu bayɛlɛmani caaman kɔnɔ!

13. Mun na i lanin b’a la ko Yezu be “jɔncɛ kantigiman hakiliman” ɲɛminɛna bi? (Zan 6:68).

¹³ Yezu tɛmɛna “jɔncɛ kantigiman hakiliman” fɛ janko ka ɔriganisasiyɔn kabakoman dɔ sigi dugukolo kan walisa ka batoli senuman lafasa. Ele be mun lo miiri o ɔriganisasiyɔn koo la? N’a sɔrɔ i ka miiriya ni ciden Piyɛri ta ye kelen ye. Ale y’a fɔ Yezu ye ko: “An bena taga jɔn fɛ? Mɔgɔ be nii banbali sɔrɔ ele ka kuma barika la.” (Zan 6:68). An kelen kelen bɛɛ tun bena kɛ min n’an tun tɛ Jehova ka ɔriganisasiyɔn kɔnɔ? An mako be fɛɛn o fɛɛn na walisa ka to kantigiya la Ala ye, Yezu b’o di an ma o ɔriganisasiyɔn sababu fɛ. A be fɔrɔmasɔn di an ma fana walisa an ka se k’an ka cidenya baara dafa koɲuman. Ka fara o kan, a b’an dɛmɛ ka “jogokura ta” walisa an ka se k’an koo diya Jehova ye.—Efɛz. 4:24.

14. Komi i be Jehova ka ɔriganisasiyɔn kɔnɔ, o y’i nafa cogo di COVID-19 fɔɲɔbana tuma na?

¹⁴ Yezu be cikan ɲumanw di an ma gwɛlɛyaw wagati la. An y’o cikanw nafa ye tuma min na COVID-19 fɔɲɔbana daminɛna. Yezu ye cikan gwɛninw di an ma walisa k’an latanga, k’a sɔrɔ duniɲa kɔnɔ mɔgɔ caaman tun t’a lɔn u ka ɲi ka min kɛ. Jɔncɛ kantigiman y’an jija an ka to ka masikiw don n’an be jama cɛma ani ka furancɛ to an ni tɔɔw cɛ. U ye diinan mɔgɔkɔrɔw jija u ka to ka kaan bɔ  kafoden kelen kelen bɛɛ ma. O la, diinan mɔgɔkɔrɔw bena a lɔn kafodenw mako be min na janko u latanganin ka to, u ka to kɛnɛya la ani u magwɛrɛnin ka to Jehova la (Ezayi 32:1, 2). An ye cikan wɛrɛw ani jijali sɔrɔ Koow Ɲɛnabɔla Jɛnkulu ka rapɔɔriw sababu fɛ.

15. Cikan jumanw lo dira an ma lajɛnw ni waajuli baara koo la fɔɲɔbana tuma na ani nafa jumanw lo sɔrɔla o la?

¹⁵ Fɔɲɔbana tuma na, an ye cikan gwɛninw sɔrɔ fana minw y’a yira an ka ɲi ka lajɛnw ani waajuli baara kɛ cogo min na. An sinna k’a daminɛ ka lajɛnw, kafokulu ka lajɛnbaw ani tile saba lajɛnbaw kɛ vidéoconférence sababu fɛ. An y’a daminɛ fana ka waajuli baara fanba kɛ lɛtɛrɛw ni telefɔni sababu fɛ. Jehova y’an duga an ka jijaliw kosɔn. Tɔnbolo caaman y’a yira ko caaman farala weleweledalaw hakɛ kan. Mɔgɔ caaman ye wale dɔw sɔrɔ fɔɲɔbana tuma na minw b’an jija kosɔbɛ.—Koorilen nin lajɛ: “ Jehova b’an duga an ka waajuli baara la.”

16. An be se ka la mun lo la?

¹⁶ Dɔw be se k’a miiri ko ɔriganisasiyɔn ka cikanw y’a dama tɛmɛ fɔɲɔbana tuma na. Nka siɲɛ caaman na, an y’a ye ka gwɛ ko o cikanw bɛnnin lo (Mat. 11:19). Yezu be Ala sagokɛlaw ɲɛminɛ ni kanuya ye yɛrɛ le! N’an miirila o la, o b’an hakili sigi ko koow mana kɛ cogo o cogo sini ma, Jehova n’a Dencɛ kanulen bena kɛ n’an ye.—Eburuw 13: 5, 6 kalan.

17. Yezu b’i ɲɛminɛna minkɛ, i be mun lo miiri o koo la?

¹⁷ Yezu ye an Ɲɛminɛbaga ye minkɛ, o b’an ninsɔn diya yɛrɛ le! An be ɔriganisasiyɔn min kɔnɔ, an kaan bɛnnin lo, hali k’a sɔrɔ an ka kokɛcogo, an ka jamana, an ka siya tɛ kelen ye ani an tɛ kaan kelen fɔ. An be kalan caaman sɔrɔ ka bɔ Bibulu kɔnɔ ani an be fɔrɔmasɔn sɔrɔ waajuli baara koo la. An be ladili minw sɔrɔ, o b’an kelen kelen bɛɛ dɛmɛ ka jogokura ta ani ka ɲɔgɔn kanu. O kama, an ka ɲi ka waso sabu Yezu ye an Ɲɛminɛbaga ye.