1. Éé ní ea dú bùlà Jìhóvà deè nieí é?

 DEÈ nieí, à dú bùlà Bàrì kọọ̀ lé kpẹ̀a ea kil ló Boǹ Ménéá á iná dénè ketõ̀ò ea di boo kunukẽ̀í. (Máàk 13:10; 1 Tím. 2:​3, 4) Níà tóm Jìhóvà, vaá à palàge dú nágé lé kọọ̀ à tú nvee bá a Sã́áná ea vulè kọ á ẹ̀b nú ea kil ló. Èé láá àgala boo kọọ̀ boo béè kọọ̀ Jíízọ̀s gé túlèi, sìtóm kọ̀ kpẹ̀aí é íná dénè ketõ̀ò belí bé ea dú bùlà Jìhóvà naa besĩ́ kùbmà kálá bã ló bàlà booí.​—⁠Máát. 24:⁠14.

2. Éé ní eé ló bel boo mm̀ nakà togó belí é?

² Mm̀ nakà togó belí, èé mon bé e Jíízọ̀s gé tú “gyóòlo ea nyímá nu vaá bọ́ló dẹ̀lẹ̀ nyíé boo” nèèmà dùùlà bá deè tṍ ea aa mm̀ Kpá Káí nè ge bõònè ló pá a gbò kọbé bà láá sí tóm kọ̀ kpẹ̀a ea bọọ lọ̀l vaá à leeá naa. (Máát. 24:45) Èé mon nagé nú e buù bẹ̀ì é láá naa mm̀ ge nvèè sãa kúm Jíízọ̀s nè gyóòlo ea bọ́ló dẹ̀lẹ̀ nyíé booá.

3. Mókà kpóó lẹ̀ẹ̀là bel ní e Bàrì beè nè Jíízọ̀s e?

³ Jíízọ̀s dì ea gé túlè sìtóm kọ̀ kpẹ̀a. Éé ní ea náa èé láá àgala boo naa vó é? Pọ́ì ńkem̀ tṍó besĩ́ Jíízọ̀s à kalá àà kil káála, a beè ló bel nè sìgà pá a gbò nyòòne nvée e bà bọ́ló dẹ̀lẹ̀ nyíé boo gbẹá boo ene kà gù ea di Gálilì. A beè kọ́ nèva kọọ̀: “Nà Tẹ̀ beè nèm dénè kpóó kọ ḿ lẹ̀ẹ̀là bel ló dénè nu e a di káála nè bàlà boo.” Nvèè kpíi ló nú ea gbóó kpáá kọ̀, à kọ́ọ̀: “Boo bée vó, aalii gé naanii kọ dénè gbò nen á nyooném.” (Máát. 28:​18, 19) Vóà naa, Bàrì beè nè kpóó Jíízọ̀s kọ á tulè sìtóm kọ̀ kpẹ̀a bií ló dõòna kà gbò gbò nu.

4. Éé ní ea náa vaá èé láá àgala boo kọọ̀ Jíízọ̀s dì ea gé túlè sìtóm kọ̀ kpẹ̀aí é?

 ⁴ Jíízọ̀s beè kọọ̀ sìtóm kọ̀ kpẹ̀a nè tóm gè naa kọọ̀ gbò nen á nyoonìèe nvée é íná “dénè” dó, vaá àé diè ló pá a gbò nyòòne nvée “dọ̀ kùbmà nvéè bàlà booí.” (Máát. 28:20) Gbò belá zógè kọọ̀ sìtóm kọ̀ kpẹ̀aí é kilsĩ́ gè siá kèbá tule Jíízọ̀s dọ̀ọ̀mà beélè deeí.

5. Mósĩ́ deè ní e gé ḿm̀-mè nòòtẽ́ ea di mm̀ kpá Psalm 110:3 é?

⁵ Ge kọọ̀ gbò e bàé sí tómá mm̀ dee deè nvéè deeí é dú ńkem náa beè tãagẽ bùlà Jíízọ̀s. A beè nyimá kọọ̀ kọ́ọ̀ bùlà ea di mm̀ kpá psalm é ḿḿ-má, ea kọ́ọ̀: “Pá o gbò é tú ba lóó nè deé eo íè bíi ló gbò bé.” (Ps. 110:⁠3) Be ò ólò kọ́ kpẹ̀a, ò gé nveè sãa kúm Jíízọ̀s nè gyóòlo ea bọ́ló dẹ̀lẹ̀ nyíé boo, vaá ò gé ḿm̀-mè nàgé nakà kọ́ọ̀ bùlà Bàrìí. Tómí gé síá, sõò à íe sìgà gbò nu ànà-ànà ea di ló.

6. Éé ní ea dú ene kà nu ànà-ànà e gbò e bà gé kọ́ kpẹ̀a ea kil ló Boǹ Méné ólò kpeesĩ́ ló deè nieí é?

⁶ Nàà uú boo dú ene kà nu ànà-ànà e gbò e bà gé kọ́ kpẹ̀a ólò kpeesĩ́ ló. Gbò e bà gé bé uú boo nòòmànù Kráìst, gbò tùle fã̀, nè gbò bìlà bẹlbẹ̀l a kpọ́ kyáá bel nè gbò nen kilma ló bẹẹ tóm. Beè pá bẹẹ dúà ló, gbò e nyímà ló, nè gbò e ólò gbá siá tóm zigà gbò kyáá belí, bàé láá kpègii lọl ló gè fã̀ Jìhóvà nè ge kọ́ kpẹ̀a. Gbẹá sìgà dó, bẹẹ gbò ọ́b ólò naa uuí boo, siimài pọ̀, biigèi ló, àbèè ge sii pá vígà nvee kpọ́gọ́lọ́. Gbò lává náa bọọí ló, boo béè kọọ̀ Jíízọ̀s beè kọọ̀: “Dénè nen é ọ́víi boo béè kọ ò gé nyoonei nvéè nda.” (Máát. 24:⁠9) Ge kọ è gé téní bá gbò nàà uú booí zógè kọọ̀ Jìhóvà ténmài. (Máát. 5:​11, 12) Pọ́lọ́ Nyómá ní ea gé tú va siimá gbò tómí ẽ́. Sõò Jíízọ̀s palàge ié kpóó èlie! Boo béè nvèè bá ea aa bá Jíízọ̀s, gbò e bà di dénè dó gé dã́ lé kpẹ̀aí. Bugi togó boo nú ea náa è kọ́ vó.

7. Gbò éé eo monì ní ea zógè kọọ̀ nu ea di mm̀ kpá Kùùà Nù 14:​6, 7 a ḿḿ-má ẽ́?

⁷ Dõòna kà nu ànà-ànà e ólò kpeesĩ́ ló tṍó e gé kọ́ kpẹ̀a dú kọọ̀, gbò e gé kọ́ kpẹ̀a nè ólò ló kele-kele dém bel. Mm̀ mòànù dẽe e Jíízọ̀s beè naa kọọ̀ neǹ tóm Jọ́ọ̀n á mòna, a beè tẹlẹ bàlà kẽ kọọ̀ gbò nen é kilsĩ́ gè kọ́ kpẹ̀a kèbá nàà uú boo mm̀ beélè deeí. (Bugi Kùùà Nù 14:​6, 7.) Mósĩ́ deè e? È gé piigà bé e bẹẹ kpóó sim tùlà naa ge naa kọọ̀ gã́bug nen á dã́ lé kpẹ̀aí. Beeá ló bàlà booí deè nieí, gbò nen é láá bugi bẹẹ gbò kpá ea dẹẹ̀a boo Kpá Káí boo jw.org boo béè kọọ̀ baa émí mm̀ nú ea sígá ló 1,000 dém bel! Gbò Ge Tulè Tóm beè tenmá kọọ̀ bàá tàb kpá ea kọlà Dé Kpéè Ló Dùm Dọ̀ọ̀mà Dè-dè! nvee mm̀ nú ea sígá ló 700 dém bel! ea dú kpá e gé nóòmà gbò nen kátogóí. Baa émí gbò kpá ea dẹẹ̀a boo Kpá Káí e gbò gímá dẽe ólò bugi vaá naa rẹ́kọọ̀d vídiò boo béè gbò káá tṍ. È gé mon gã́bug kọ́ọ̀ bùlà Bàrì ea gé ḿḿ-má. Gbò e “bà aa dénè dó” dì e bà gé nó gè ló “õ̀òa dém bel” ea dú kà kà bel ea di mm̀ Kpá Káí. (Zèk. 8:23; Zèf. 3:⁠9) Dénè gbò nuí a nááá kèbá lé tùle ea aa bá Jíízọ̀s Kráìst.

8. Gbò éé ní ea ni silà aa mm̀ bẹẹ sìtóm kọ̀ kpẹ̀a ẹ́?

⁸ Deè nieí, nú ea sígá 8,000,000 gbò nen e bà di 240 kpò kunukẽ̀ dì e bà gé gbááá ló bõ̀ònatõ̀ò Jìhóvà, vaá nú ea sígá ló òb tõ̀ò gbò nen ólò diia múú buù gbáá! Ní ea palàge bọọ dú kọọ̀, ãa gbò nyòòne nvéè Kráìstí a tónígi gbò kpãà neǹ Kráìst, ea dú gè ‘nvèà ãa nen.’  (Kọ́l. 3:​8-10) Gã́bug ọ̀và a ooà aa ló gbò dùm e bè náa õoà, ge dú gboo-gboo ló, ge gbẹ́ dõòna gbò, nè ge nvèè ka ló áá ba dó. Kọ́ọ̀ bùlà Bàrì ea di mm̀ kpá Àìzáíà 2:4 a ḿḿ-má; bà náa gé ‘nó ná bé.’ Boo béè kọọ̀ è piìga boo gè nvèà ãa nená, e nvèè bá nè gbò nen kọ bàá bã mm̀ bõ̀ònatõ̀ò Bàrì, vaá è zógè kọọ̀ è gé tõó kè kẽè tùle ea aa bá Kráìst Jíízọ̀s. (Jọ́ọ̀n 13:35; 1 Pít. 2:12) Éé ní ea náa vaá gbò nuí à naaá ẽ́? Boo béè kọọ̀ Jíízọ̀s gé nveè bá nèi.

9. Dẹ̀ẹ̀a boo nú ea di mm̀ kpá Máátìù 24:​45-47, éé ní e Jíízọ̀s beè kọọ̀ àé nááá mm̀ dee deè nvéè tṍó ẽ́?

⁹ Bugi Máátìù 24:​45-47. Jíízọ̀s beè gbẹẹ́ sĩ́ kọọ̀ mm̀ dee deè nvéè tṍó, àé íè bá ló “gyóòlo ea nyímá nu vaá bọ́ló dẹ̀lẹ̀ nyíé boo” ea é nóòmài gbò nú ea di mm̀ Kpá Káí. Vóà naa, è ẹbmà dẽe kọọ̀ gyóòloá é sí tóm agẹlẹ bá mm̀ beélè deeí. Vaá níà bé ea nááá naa ẽ́. Jíízọ̀s dì ea gé tú gbò ńkem̀ gã́bug gbò e Bàrì beè tṍ nóo ból siimá tóm mm̀ ge nè ‘gyã́á gbò níí Bàrì boo tṍó.’ Gbòí náa ólò lẹ̀ẹ̀là bel ló zìgà dõòna gbò. (2 Kọ́r. 1:24) Tãa vó, bà nyímá kọọ̀ Jíízọ̀s Kráìst ní ea gé ‘túlè vaá lẹ̀ẹ̀là bel ló’ pá a gbò e.​—⁠Àìz. 55:⁠4.

10. Mókà kpá ea di zẹ̀ẹ̀ gbò kpá ea di mm̀ gbò fùtóí ní ea beè nvèè bá nè ni kọ ó dààmà togó gè fã̀ Jìhóvà ẹ?

¹⁰ Lọl mm̀ gbáá 1919, gyóòlo ea bọ́ló dẹ̀lẹ̀ nyíé boo a émí kele-kele kpá ea nveè bá nè gbò e bà íe lèèma kọ bàá ié tàn ge fã̀ Bàrì. Mm̀ gbáá 1921, gyóòloí beè emí kpá ea kọlà The Harp of God ge nvèèmà bá nè gbò e bà íe lèèma kọ bàá noomá gbò kà kà bel ea di mm̀ Kpá Káí. Tṍó e tṍó téní, ba beè emí nágé dõòna kà gbò kpá. Mókà kpá ní ea beè  nvèè bá nè olo kọ ó nyimá ló vaá vùlè bẹẹ Tẹ̀ ea di káála ẹ́? É kọọ̀ aẹ̀ bèè kpá ea kọlà “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Éé Ní E Kpá Káí É Láá Noòmài Ẽ́?, sẹ̀ bẹẹ ãa kpá kọlà, Dé Kpéè Ló Dùm Dọ̀ọ̀mà Dè-dè! Ba beè emí dénè gbò kpáí kọbé à nveè bá nèi kọ é láá kolí gbò e bàé nyoone nvéè Kráìst. Vaá níà kà lèlà nú e beè ié bíi ló tṍó e ba beè emí ẽ́.

11. Éé ní ea náa à dú bíi kọọ̀ dénè bẹ̀ì é nó nu ea kil ló Jìhóvà nè Kpá Káí é?

¹¹ Níì áá gbò e bà ã́àa fã̀ Jìhóvà ní e bà íe bíi ló nyìmànù ea di mm̀ Kpá Káí é nì. Dénè bẹ̀ì íè bíi ló. Neǹ tóm Pọ́ọ̀l beè emí kọọ̀: “Kpoò gyã́á dì nè gbò kànen.” Pọ́ọ̀l beè kọ nágé kọọ̀ ge tú gbò nú e Kpá Káí nóòmà siimá tóm é nveè bá nèi kọ é “nyimá ló kele ea di gbàà lé nè pọ́lọ́.” (Híb. 5:14) Àé láá dú nu ànà-ànà ge tõó boo gbò nòòkúù Jìhóvà mm̀ nakà tàvàlà tṍó e gbò nen náa tõo ná dùm ea õoàí. Sõò Jíízọ̀s ólò naa kọọ̀ é nó gbò nú ea dúi bíi ló kọbé à agẹlẹ ló bẹẹ zìgà. È ólò ié gbò dùùlà bá deè tṍí lọl mm̀ Kpá Káí ea dú Moǹ Bel Bàrì. Kèbá tùle Jíízọ̀s ní e gyóòlo ea bọ́ló dẹ̀lẹ̀ nyíé boo ólò emí vaá lẹ̀ẹ̀là gbò kpáí é.

12. Dì belí Jíízọ̀s, mósĩ́ deè ní e ólò nvèè ka ló bée Bàrì e?

¹² Dì belí Jíízọ̀s, è ólò nvèè ka ló béè Jìhóvà belí bé ea bọ́ló naa. (Jọ́ọ̀n 17:​6, 26) Dì belí nu dòòmà bá, mm̀ gbáá 1931, e beè kọ̀là bée ea di mm̀ Kpá Káí ea dú Gbò Neǹ Ditõ̀ò Jìhóvà, ge naa vó zógè kọọ̀ béè Bàrì palàge bọọí ló, nè ge kọ e gbĩ́ì kọọ̀ gbò nen á nyimái ló tení dú ló béè bẹẹ Tẹ̀ ea di  káála. (Àìz. 43:​10-12) Lọ̀l gé ló October gbááá, bée ea di káíí ólò di boo kóó kọ̀láá kà Kpá Tọ Kùdẽe Ló e émì. Gbá ló vó, New World Translation of the Holy Scriptures a tú béè Bàrì sẹlẹ́ buù kà kiẽ́e ea bọ́ló kọ á dì. Níí palàge dú kele boo béè kọọ̀ bõ̀ònaló kyáá fã̀ a tú béè Jìhóvà lọl mm̀ gbò Kpá Káí e bà tab!

13. Éé ní ea náa kọ ó àgala boo kọọ̀ Jíízọ̀s gé tú “gyóòlo ea nyímá nu vaá bọ́ló dẹ̀lẹ̀ nyíé boo” siimá tóm deè nieí é? (Jọ́ọ̀n 6:⁠68)

¹³ Tení dú ló “gyóòlo ea nyímá nu vaá bọ́ló dẹ̀lẹ̀ nyíé boo,” Jíízọ̀s beè nvèè ene kà bõ̀ònatõ̀ò e gbò nen nveè kpíi ló ea nveè sãa kúm õ̀òa fã̀ boo kunukẽ̀í. Bõ̀ònatõ̀òí tõó ní ló naa vàẹ? Be à sẹlẹ òó láá aalá belí bé e neǹ tóm Pítà beè aalá nè Jíízọ̀s naaá, tṍó ea kọ́ọ̀: “Vaá èé gbóó má sĩ́ ló mée? Mon bel ea nè dùm e bè náa tá dìní gã́.” (Jọ́ọ̀n 6:68) Ãàe ní e gàẹ̀ beè dì be née beè bã mm̀ bõ̀ònatõ̀ò Jìhóvà ẹ? Tení dú ló bõ̀ònatõ̀òí, Kráìst ólò naa kọ é ié dénè nu ea dúi bíi ló kọbé è láá kilsĩ́ gè fã̀ Bàrì mm̀ bọ́ọ̀ló dẹ̀lẹ̀ nyíé boo. À ólò bumá nái gé kọbé è láá kọ́ kpẹ̀a leevè. Nagé, à ólò nvèè bá nèi kọ é láá nvèà “ãa nen” kọbé è láá naa nú ea é léémà Jìhóvà.​—⁠Ẹ́fẹ. 4:⁠24.

14. Mósĩ́ deè ní e gè dũùnà bõ̀ònatõ̀ò Jìhóvà dọ bélè nè ni tṍó COVID-19 ní ẽ́?

¹⁴ Jíízọ̀s ólò nèi tùle e nyìmànù di m tṍó tã̀àgã̀. Gbò bélè e iè lọl ló gbò tulèí beè dọa bàlà kẽ tṍó e pọ́lọ́ kom ea kọlà COVID-19 beè dààmà togóá. Boo tṍó e gã́bug gbò e bà di bàlà booí náa nyímá ló nu gè naa, Jíízọ̀s beè naa kọ é ié gbò tùle ea náa kọ é kpènà bẹẹ dùm. Ba beè sièi kpóó ló kọ é olòó  uuá nu byṍ nè gã́ vaá tõó kpã́á aa ló dõòna gbò tṍó e di gbàà gbò nen. Ba beè kẽé nyíè gbò kànen kọ bàá olòó kolí pá vígà e bà di ba bõ̀ònatõ̀ò kọbé bà nyímá bé e ba dìtõ̀ò nè ba gbaa ló kilma ló Jìhóvà dì naa. (Àìz. 32:​1, 2) È ólò ié nágé dõòna kà gbò tùle nè sìà kpóó ló tení dú ló gbò ãa kpẹ̀a ea aa bá Gbò Ge Tulè Tóm.

15. Mókà tùle ní e ba beè nè ea kil ló gè sẹlẹ nònù nè ge kọ́ kpẹ̀a tṍó COVID-19 ní ẽ, vaá éé beè sìlà aa m ẽ́?

¹⁵ Tṍó COVID-19 ní, ba beè nè nài gé tùle ea kil ló bé eé sí nònù vaá kọ́ kpẹ̀a naa. Mm̀ gbala-gbala, e beè gbóó dààmà togó gè sí nònù, àsémblì, nè pọ̀bkà bõ̀ònaló tenmá boo videoconference. Nagé, e beè dààmà togó gè kọ́ kpẹ̀a tenmá boo fóòn nè ge emí kpá lẹ̀ẹ̀la tóm má nen. Jìhóvà beè tãanè bá bẹẹ sìà kpóó ló. Gã́bug tọ nàà tóm a ne kpẹ̀a ea kl ló bé e gbò kọ̀ kpẹ̀a gé bọọ dọ ló naa. Mm̀ kà kà, gã́bug nen a íe sìà kpóó ló lọl ló nú e dõòna gbò beè tení bá mm̀ gbò tṍóí.​—⁠Ẹ̀b ńkpó ea kọ́ọ̀ “ Jìhóvà Ólò Tãanè Dee Bá Bẹẹ Sìtóm Kọ̀ Kpẹ̀a.”

16. Éé ní e àgala boo é?

¹⁶ Sìgà gbò é láá ié bùlà kọọ̀ bõ̀ònalóí bọọgẹ̀ ọẹ̀ dẽe zelmá kẽ ea kil ló pọ́lọ́ komí. Sõò bé e tṍó gé téní naa, níà bé e monì kọọ̀ nyìmànù di mm̀ gbò tùle e bà néi naa ẽ́. (Máát. 11:19) Vaá tṍó e bugi togó boo bé e Jíízọ̀s gé túlè pá a gbò deè nieí naa, è agàla boo kọọ̀ kọ̀láá kà nú e ténì bá dì deè sĩ́, Jìhóvà nè a Sã́áná ea vulè é díí ló.​—⁠Bugi Híbrù 13:​5, 6.

17. Ge kọọ̀ Jíízọ̀s dú o neǹ tùle tọ́á ni ló naa vàẹ?

¹⁷ Nyíéi palàge ẹẹ kọọ̀ Jíízọ̀s gé túlè bẹẹ sìtóm! È di mm̀ bõ̀ònaló e bé e ólò naa nu naa, dó e aà, àbèè dém bel náa poói. È ólò ié gbò dùùlà bá deè tṍ ea aa mm̀ Kpá Káí nè gbò búma ea é nveè bá nèi kọ é kilsĩ́ gè kọ́ kpẹ̀a. A nóòmà buù bẹ̀ì kọ é nvèà ãa nen, vaá è gé nó gè vùlè ene. À bọ́ló kọ é ẽegã́ boo béè kọọ̀ Jíízọ̀s dú bẹẹ neǹ tùle!