1. ¿Kasa keeʼireeka naaʼin Maleiwa maaʼulu?

 KEEʼIREESÜ NAAʼIN Maleiwa süküjünüin maaʼulu süchiki Nuluwataainjachin sainküin mmakat (Mar. 13:10; 1 Tim. 2:3, 4). Kojutusü maʼin tia nümüin Jehová, niʼitaainjeseʼe chi Nüchon aikai maʼin nüpüla süpüla nuʼunirüin sukuwaʼipa tü aküjaakat pütchi. Süka niain Jesús oʼunirüin tia, wayaawata aaʼu talateechin Jehová sümaa tü wountakat (Mat. 24:14).

2. ¿Kasa wekirajaajeetka anain sünain ekirajaayakat tüü?

² Sünain ekirajaayakat tüü wekirajaajeerü anain niain Jesús aapüin tü kasa choʼujaakat sümüin wanoula otta niain oʼunirüin sukuwaʼipa tü aküjaakat pütchi sainküin mmakat nükajee «chi achepchiee oonookai otta kekiikai maʼin» (Mat. 24:45, TNM). Otta wekirajaajeerü anain tü waaʼinrajatkat süpüla wakaalinjain Jesús otta chi achepchiee oonookai.

3. ¿Kasa laülawaa aapünaka nümüin Jesús?

³ ¿Jamüsü watüjaaka saaʼu niain Jesús shikiipüʼüin tü aküjaakat pütchi? Shia sükajee tü nümakat süpülapünaa nuʼunuin iipünaamüin. Wanaa sümaa nuutkajaain namaa noʼutku na nikirajüinkana saaʼu wanee uuchi chajatka Galilea, müshi nia: «Laülaashi taya nütüma chi Tashikai Maleiwa saaʼu wayuu süpüshua yaa mmaluʼu ooʼulaka saaʼu tü kasakalüirua süpüshua chakat iipünaa». Jülüja waaʼin tü nümakat süchikijee: «Juʼuna jumaala sainküin mmakat süpüshua süpüla jüküjainjatüin tachiki sümüin wayuu [...]. Jikirajeena naya süpüla nayainjanain na tekirajüinkana» (Mat. 28:18, 19). Sükajee tia wayaawata aaʼu saapünüin laülawaa nümüin Jesús süpüla nuʼunirüin sukuwaʼipa tü aküjaakat pütchi.

4. ¿Jamüsü watüjaaka saaʼu niain Jesús oʼunirüin sukuwaʼipa tü aküjaakat pütchi maaʼulu yaa?

 ⁴ Nüküjain Jesús süküjüneerüin pütchi otta shikirajüneerüin wayuu sainküin mmakat süpüshuaʼa. Nüküjain namüin na nikirajüinkana namaajeechin nia süpüla kaʼikat süpüshuaʼa sünainmüinreʼeya sajaʼttüin tü kasa mojusükat (Mat. 28:20). Müsüjeseʼe watüjaain saaʼu niain Jesús oʼunirüin sukuwaʼipa tü aküjaakat pütchi maaʼulu yaa.

5. ¿Jamüsü watüjaaka saaʼu wakaalinjain süpüla shikeraajüin tü sümakat Salmo 110:3?

⁵ Nütüjaatüjülia aaʼu Jesús wainmeenain na aküjainjanakana pütchi sükalioʼu sajaʼttajatka oʼu kasa mojusü süka shikeraajeerüin pütchikat tüü: «Aʼyataajeena pümüin süka naaʼin namüiwaʼa na aʼwaajakana pia soʼu tü kaʼi puʼunireetkalü oʼu pusurulaatse» (Sal. 110:3). Püküjale tü pütchi anasükat pükaalinjain Jesús otta «chi achepchiee oonookai otta kekiikai maʼin» otta akaalinjashi pia süpüla shikeraajüin tia pütchi aküjünatüjütkalia. Mayaainjeʼe nnojoluin süshaʼwalaain tü aküjaakat pütchi, eesü waneirua kasa kapüleeka atuma shia.

6. ¿Kasa kapüleeka atuma waküjain pütchi?

⁶ Wanee kasa kapüleeka atuma tü aküjaakat pütchi shia sutuma shiyoutuin wayuu. Na ekirajüliikana alawaa, na polítikokana jee na shikiipüʼükana iküleesia aküjashii naya alawaa süchiki tü waʼyataainkat. Nanoujale tia na wapüshikana, na waʼaleewainkana jee na aʼyataajiraakana wamaa, eesü süpüla napüleeruain waaʼin süpüla wooʼulaain suulia aʼyatawaa nümüin Jehová jee suulia waküjain pütchi. Suluʼu waneirua mma neimmolojuin waya na waʼünüükana, ashutushii naya waaʼu, nataʼülüin jee napüreesajirüin waya. Nnojotpejeʼe ponuin waaʼin tia süka nümüin Jesús mayaa: «Saaliijee jünoujain tanain, maalinjeena jia süpüla wayuu» (Mat. 24:9). Sükajee tia atüjaana aaʼu woushikajaain süchiirua nukuwaʼipa Jesús otta talatüin Jehová wamaa (Mat. 5:11, 12). Nia chi Yolujaakai aaʼinraka tia kasa mojusükat, pülapejeʼe maʼin Jesús nuulia. Süka nuʼunirüin Cristo sukuwaʼipa tü aküjaakat pütchi, aküjünüsü sümüin wayuu süpüshuaʼa Nuluwataainjachin Maleiwa.

7. ¿Jamüsü watüjaaka saaʼu shikeraajüin maaʼulu tü sümakat Alateetkat Mapeena 14:6, 7?

⁷ Wanee kasa kapüleeka atuma waküjain pütchi shia süka eein watta saalii anüikii. Mayaainjeʼe müin tia nnojoleerü kasain ataʼülüin sukuwaʼipa tü aküjaakat pütchi. Watüjaa aaʼu tia sükajee tü nümakat Jesús nümüin chi aluwataaushikai Juan (paashajeʼera Alateetkat Mapeena 14:6, 7). Jülüja waaʼin tü waaʼinrakat süpüla wountuin waküjain pütchi suluʼu naata anüikii. Alatüsü suulia 1.000 anüikii tü pütchi aashajaakat süchiki tü Bibliakat eʼitaanaka suluʼu jw.org. Na Laülaashii Jülüjakana Aaʼin na Aküjaliikana pütchi nakumajirüin tü karaloʼutakat Anainjatka atuma pukuwaʼipa waneepia suluʼu wainma anüikii süpüla shikirajünüin wayuu, alatüsü suulia 700 anüikii. Otta eesü video napüla na macheʼesaliikana otta karaloʼuta napüla na moʼusaliikana. Sükajee tia aainjünakat, wainma wayuu eekana süpüla naapaain sümaa tü pütchi anasükat süchiki Nuluwataainjachin Maleiwa. Maaʼulu yaa, weʼrüin shikeraajüin maʼin tü pütchi aküjünatüjütkalia suluʼu tü Bibliakat süchiki shikirajünüinjatüin wayuu maʼleekalia süpüla naashajaainjatüin «tü pütchi wulesükat» suluʼuka tü Bibliakat (Zac. 8:23; Sof. 3:9). Ountunusü tia süka niain Jesús oʼunirüin sukuwaʼipa tü aküjaakat pütchi.

8. ¿Kasa eeka sutuma tü aküjaakat pütchi?

⁸ Maaʼulu yaa, alatüshii suulia 8 miyoone wayuu aʼyataakana nümüin Jehová suluʼu 240 mma, wainma maʼin na wayuu woutiisakana juyawai. Mayaainjeʼe müin tia, tü alanaʼaleekat maʼin sünain anain shia nanouteʼerüin  nakuwaʼipa wanaapünaa sümaa tü sümakat tü Bibliakat (Col. 3:8-10). Wainma naʼakajee ooʼulaakana suulia amaʼüjirawaa akuwaʼipaa, suulia jashiee, suulia alerajaa wayuu otta suulia naʼwaataain suluʼu tü mma kaluʼukat naya. Ekeraajüsü tü sümakat Isaías 2:4, tü makat: «Nnojoleena atkaajiraain otta nnojoleena ekirajaain sünain atkawaa». Sutuma weeʼiratüin wakuwaʼipa wanaapünaa sümaa tü sümakat tü Bibliakat, wainma na wayuu aʼyataweekana nümüin Jehová wanaa wamaa. Sutuma tia atüjaana aaʼu woushikajaain süchiirua nukuwaʼipa Jesucristo, chi Wekiipüʼükai (Juan 13:35; 1 Ped. 2:12). Wountuin tia sükajee nükaalinjain waya Jesús.

9. Saashin Mateo 24:45-47, ¿kasa naaʼinrajatka Jesús süpülapünaa sajaʼttüin tü kasa mojusükat?

⁹ (Paashajeʼera Mateo 24:45-47, TNM). Nüküjatüjülia Jesús niʼitaainjachin wanee «achepchiee oonookai jee kekiikai maʼin» süpüla naapüin tü kasa choʼujaakat sümüin wanoula süpülapünaa sajaʼttüin tü kasa mojusükat. Müsüjeseʼe wayaawatüin saaʼu niʼyataain maʼin maaʼulu chi achepchieekai sünain aaʼinraa tia. Nüneeküin Jesús waneinnua anoujashii chainjanakana iipünaa süpüla naapüin tü kasa choʼujaakat namüin na aʼyataakana nümüin Maleiwa jee namüin na wayuu aapajeekana nüchiki Maleiwa. Wayuukana naainnua nnojoishii alaülaajaain saaʼu wanoula (2 Cor. 1:24). Natüjaa aaʼu niain Jesús chi nekiipüʼükai jee chi oʼunirakai nakuwaʼipa na aʼyataashiikana nümüin Maleiwa (Is. 55:4).

10. Saʼakajee tü karaloʼutairua piʼrakat suluʼu tü ayaakuaakat, ¿jeʼtsü piʼraajaka aka nukuwaʼipa Jehová?

¹⁰ Wainma karaloʼuta nukumajaka «chi achepchiee oonookai jee kekiikai maʼin» soʼujee 1919 süpüla shiʼraajüin wayuu nüchiki Maleiwa. Jamüsüjaʼa soʼu tü juyakat 1921, nukumajirüin chi achepchieekai tü karaloʼutakat  El Arpa de Dios suluʼu inglés süpüla shikirajünüin wayuu sünain tü Bibliakat. Süka suʼwanajaa suʼwanajaa sümüin sukuwaʼipa kasa, aʼwanajaasü tü karaloʼutakalüirua. ¿Jeʼtsü tü karaloʼuta piʼraajakalü akajee otta aika atuma püpüla chi Püshi iipünaajachikai? Eesüjaʼa pikirajaale sükajee karaloʼutakat tüü: «Sea Dios veraz», La verdad que lleva a vida eterna, Usted puede vivir para siempre en el paraíso en la tierra, El conocimiento que lleva a vida eterna, ¿Kasa shikirajaka maʼin tü Wiwüliakat? otta ¿Kasa süküjaka wamüin tü Wiwüliakat? jee shiale tü karaloʼuta jeketükat Anainjatka atuma pukuwaʼipa waneepia. Aainjünüsü karaloʼutakat tüüirua süpüla sunoujain wayuu. Eesü shia soʼu tü kaʼi choʼujaakalü oʼu shia wamüin.

11. ¿Jamüsü choʼujaaka wamüin wapüshuaʼa wekirajünüin nüchiki Maleiwa?

¹¹ Nnojoishii neʼe nayain namüiwaʼa na ekirajaakana sünain tü Bibliakat choʼujaain amüin ekirajünaa nünain Maleiwa, choʼujaasia shia wamüin wapüshuaʼa. Na wayuu laülaakana aaʼin sünain anoujaa choʼujaasü nekirajaain maʼin sünain tü Bibliakat. Tü nekirajaakalü anain müsü aka saaʼin tü eküülü kaʼüsükat naashin chi aluwataaushikai Pablo otta nüküjain nayaawateerüin saaʼu anale jee mojule wanee kasa naaʼinrüle tü sümakat tü Bibliakat (Heb. 5:14). Kapüleesü oonowaa sümaa tü nümakat Maleiwa süka anain namüin na wayuukana yarüttüin nakuwaʼipa. Naapapejeʼe wamüin Jesús tü katchinjatkalü atuma wanoula sükajee tü sümakat tü Bibliakat. Naaʼinrüin tia nükajee «chi achepchiee oonookai jee kekiikai maʼin».

12. ¿Kasa waaʼinraka süpüla kojutuin wamüin tü nünüliakat Maleiwa maʼaka naaʼinrüin shia Jesús?

¹² Maʼaka naaʼinrapuʼuin shia Jesús kojutusia wamüin tü nünüliakat Maleiwa (Juan 17:6, 17: 26, TNM). Jamüsüjaʼa soʼujee juyakat 1931 aküjalii pütchi nüchiki Jehová münüshii waya, ayuʼluushi shia sünainjee tü Bibliakat. Sükajee tia kojutusü maʼin wamüin nünüliamaain  waya chi Washi iipünaajachikai (Is. 43:10-12). Oʼutuupüroʼu soʼu juyakat tia eʼitaanüsü tü nünüliakat Maleiwa sünain süta tü rewiisütakat Aapiria Wayuu suluʼu inglés otta eʼitaanüsü shia suluʼu Traducción del Nuevo Mundo eeinjatüle shia. Tia nnojotsü naaʼinrüin na sulujunakana tü wane iküleesiakalüirua, nasünneʼerüin nünülia Jehová suluʼujee wainma Biblia.

13. ¿Kasa wayaawataka aaʼujee nuʼunirüin Jesús nukuwaʼipa «chi achepchiee oonookai jee kekiikai maʼin»? (Juan 6:68).

¹³ Nükajee «chi achepchiee oonookai jee kekiikai maʼin» nuuntuin Jesús nukotchirüin wainma wayuu süpüla paaʼinwain naya sünain aʼwaajaa Maleiwa maʼaka nücheküin shia Jehová. Eesüjaʼa müle paaʼin maʼaka naaʼin Pedro wanaa sümaa nümüin nümüin Jesús: «Señotkalee, ¿jalainjanakai waya oʼunuin? Pia ekirajaka waya sünain pütchi katüinjatkalü atuma woʼu waneepia» (Juan 6:68, TNM). ¿Jamüsüjeʼe wakuwaʼipa nnojoliire weʼraajüin na aʼwaajakana Jehová? Naʼakajee nayakana naapüin wamüin Jesucristo tü katchinjatkalü atuma wanoula otta nikirajüin waya süpüla watüjainjanain ekirajaa wayuu. Otta nakaalinjain waya süpüla shiiʼiranajaain wakuwaʼipa süpüla talatüin naaʼin Jehová wamaa (Éf. 4:24).

14. ¿Jamüsü anaka pukuwaʼipa süka naʼakain pia na aʼwaajakana Jehová soʼunnaa tü ayuuliikat COVID-19?

¹⁴ Anasü suʼuniria wakuwaʼipa nutuma Jesús sülatalaʼa sümüle wamüin kasa kapüleesü süka kekiin maʼin nia. Weʼrüin maʼin tia suʼttapa tü ayuuliikat COVID-19. Soʼu tia, wainma wayuu sainküin mmakat nnojoliikana atüjaain saaʼu tü naaʼinrajatkat. Anapejeʼe waaʼin süka nuʼunirüin wakuwaʼipa Jesús. Aküjünüsü wamüin anain keʼicheerajanale waya eere wainmain wayuu jee kaʼyatüinjanain waya suulia wayuu. Aküjünüsü namüin na laülaashiikana nayamaajüinjanain  na wawalayuukana otta jülüjainjatüin naaʼin tü kasa choʼujaakat namüin (Is. 32:1, 2). Otta aküjünüsü wamüin wanee pütchi kashiwai natuma na Laülaashii Jülüjakana Aaʼin na Aküjaliikana pütchi süpüla natütülüinjatüin waaʼin.

15. (1) ¿Kasa aküjünaka wamüin süpüla waaʼinrüin soʼunnaa tü ayuuliikat COVID-19? (2) ¿Kasa anasü weʼraka sünainjee tia?

¹⁵ Soʼunnaa tü ayuuliikat COVID-19 aküjünüsü wamüin tü waaʼinrajatkat süpüla woutkajaain jee waküjain pütchi. Oʼttamaatüshii waya sünain outkajawaa suluʼupünaa videoconferencia otta aküjashii waya pütchi süka carta jee suluʼupünaa teleepono. Eʼrüshii waya kasa anasü nutuma Jehová sünainjee wachajaain maʼin sukuwaʼipa süpüla waaʼinrüin tia. Wainma Weteet aküjaka süchiki nakooʼomüinraain na aküjaliikana pütchi. Soʼunnaa tia wainma kasa anasü neʼraka na wawalayuukana atütüleʼeraka waaʼin (paashajeʼera tü pütchikat « Anasü sukuwaʼipa tü aküjaakat pütchi nutuma Jehová»).

16. ¿Kasa weʼitaainjatka maʼin anain waaʼin?

¹⁶ Eesüjaʼa jülüjale naaʼin waneinnua wawalayuu nnojoluin maʼin choʼujaain saainjünüin süpüshuaʼa tü aküjünakat wamüin soʼunnaa tü ayuuliikat COVID-19. Saaʼujee waneirua kasa weʼraka, watüjaa aaʼu anain maʼin süpüla waaʼinrüin tü aküjünakat wamüin (Mat. 11:19). Jülüjale waaʼin anain maʼin tü naaʼinrakat Jesús wapüleerua süpüla nuʼunirüin wakuwaʼipa, weʼitaajeerü maʼin waaʼin sünain naaʼinmajeenain waya Jehová nümaa Jesús soʼunnaa tü alateetkat wamüin mapeena (paashajeʼera Hebreokana 13:5, 6).

17. ¿Jamüsü paaʼin süka nuʼunirüin pukuwaʼipa Jesús sünain aküjaa pütchi?

¹⁷ Talatüsü maʼin waaʼin süka nuʼunirüin wakuwaʼipa Jesús sünain aküjaa pütchi. Kottiraashii waya namaa na aʼwaajakana Jehová mayaainjeʼe naatawalin noumain, nakuwaʼipa jee nanüikipala. Otta aapünüsü tü choʼujaakat sümüin wanoula jee süpüla waküjain pütchi. Otta ayatüshiʼiya waya ekirajaain waneʼewai wakua sünain tü waaʼinrajatkat süpüla anain wakuwaʼipa otta süpüla alinjanain wapüla na waneinnua. Anasü maʼin waaʼin süka niain Jesucristo laülaain waaʼu.