UZOẸME UWUHRẸ 29
Romakpotọ kẹ Jesu nọ O Wuzou Mai
“A rehọ udu-esuo kpobi kẹ omẹ no evaọ odhiwu gbe otọakpọ na.”—MAT. 28:18.
OLE AVỌ 13 Kristi O Fi Oriruo Họ Otọ kẹ Omai
EWARE NỌ MA TI WUHRẸ *
1. Iruo vẹ Jihova ọ gwọlọ nọ ma ru nẹnẹ?
NẸNẸ, iruo nọ Ọghẹnẹ ọ gwọlọ nọ ma ru họ re ma ta usi uwoma na nya akpọ na soso duwu. (Mak 13:10; 1 Tim. 2:3, 4) Jihova họ ọnọ o wo iruo na, yọ fiki epanọ iruo na i wuzou te, ọ tẹ rọ Ọmọ riẹ nọ o you gaga na mu ọnọ o wuzou iruo na. Jesu o gine te ọnọ o re wuzou iruo na, yọ o ti ru nọ ma te sae rọ ta usi uwoma na te epanọ Jihova ọ gwọlọ taure urere na u te ti te.—Mat. 24:14.
2. Eme ma te jọ uzoẹme nana ta kpahe?
2 Ma te jọ uzoẹme nana ta kpahe epanọ Jesu ọ be rọ rehọ “ọrigbo nọ a re fievahọ nọ o wo areghẹ na” ro wuhrẹ omai ẹme Ọghẹnẹ, je dhesẹ oghẹrẹ nọ ma re ro ru obọdẹ iruo usi uwoma ota nọ ọ kẹ omai na. (Mat. 24:45) Ma te jẹ ta kpahe epanọ mai omomọvo ma re ro dhesẹ nọ ma be romakpotọ kẹ Jesu gbe ọrigbo nọ a re fievahọ na.
JESU O BI DHESẸ OGHẸRẸ NỌ MA RẸ RỌ TA USI UWOMA NA KẸ OMAI
3. Eme Jihova ọ kẹ Jesu udu nọ o ru?
3 Jesu o bi dhesẹ oghẹrẹ nọ ma rẹ rọ ta usi uwoma na kẹ omai. Ẹvẹ ma rọ riẹ? Taure Jesu o te ti muvrẹ kpobọ odhiwu, nọ avọ ilele riẹ a jọ ugbehru Galili, ọ ta kẹ ae nọ: “A rehọ udu-esuo kpobi kẹ omẹ no evaọ odhiwu gbe otọakpọ na.” Ọ tẹ jẹ vuẹ ae nọ: “Fikiere wha nya, re wha ru ahwo zihe ruọ ilele evaọ udevie ahwo erẹwho na kpobi.” (Mat. 28:18, 19) Onana u dhesẹ nọ u te no eware efa nọ Jihova ọ vuẹ Jesu nọ o ru no, ọ kẹ riẹ udu nọ ọ rẹ rọ vuẹ omai oghẹrẹ nọ ma re ru iruo usi uwoma ota na.
4. Ẹvẹ u ro mu omai ẹro nọ Jesu o gbe bi dhesẹ oghẹrẹ nọ ma re ru iruo usi uwoma ota na kẹ omai nẹnẹ?
4 Jesu ọ ta nọ a te ta usi uwoma je wuhrẹ ahwo re a jọ ilele riẹ evaọ udevie “erẹwho na kpobi.” Ọ tẹ jẹ ta nọ ọ te jọ kugbe ilele riẹ “edẹ na kpobi rite oke urere uyero-akpọ na.” (Mat. 28:19, 20) Ẹme riẹ na o dhesẹ nọ iruo usi uwoma ota na u ti te oke mai na.
5. Ẹvẹ ma bi ro ru eruẹaruẹ nọ e rrọ Olezi 110:3 na gba?
5 Jesu ọ jẹ ruawa epanọ a te rọ ruẹ ahwo nọ a te ta usi uwoma na evaọ edẹ urere na ha. Ọ riẹ nọ a jọ obe Ilezi ruẹaro nọ: “Ahwo ra a te rọ unevaze fialoma via evaọ ẹdẹ nọ egbaẹmo ra a te wọ owọ ẹmo.” (Ol. 110:3) Whọ tẹ rrọ usu ahwo nọ a be ta usi uwoma na, u dhesẹ nọ whọ be romakpotọ kẹ Jesu avọ ọrigbo nọ a re fievahọ na, who te je bi ru eruẹaruẹ yena gba. Iruo na e be nyaharo ziezi, rekọ ebẹbẹ jọ e riẹ.
6. Ẹbẹbẹ jọ vẹ ma bi wo nọ ma be ta usi uwoma na?
6 Ẹbẹbẹ jọ nọ ma bi wo fikinọ ma be ta usi uwoma họ, ahwo a be wọso omai. Ahwo nọ a be wọso ukoko na, isu egagọ, gbe ahwo ologbo egọmeti a bi gu erue buobu fihọ omai uzou, onọ o be lẹliẹ ahwo rehọ ekpehre ubiẹro rri omai. Imoni mai, ahwo iruo mai gbe amọfa nọ a rọwo erue nana a re kpokpo omai re ma siọ Jihova ba ẹgọ jẹ siọ usi uwoma na ba ẹta. Evaọ erẹwho jọ, egọmeti o jie uzi nọ ma gbẹ ta usi uwoma na ha. Ohwo nọ ọ ta usi uwoma a re mu ei je tube fi ei họ uwou-odi. Onana u bi gbe omai unu hu. Jesu ọ ta nọ: “erẹwho na kpobi i ti mukpahe owhai fiki odẹ mẹ.” (Mat. 24:9) Fikiere nọ a te bi kpokpo omai, ma riẹ nọ oreva Jihova ma bi ru na. (Mat. 5:11, 12) Ẹdhọ họ ọnọ o bi ru nọ a bi ro kpokpo omai na. Rekọ Jesu ọ ga vi ei. Jesu o bi fiobọhọ kẹ omai nọ ma be rọ ta usi uwoma na kẹ ahwo erẹwho na kpobi. Joma ta kpahe idhere jọ nọ o ro fiobọhọ kẹ omai no.
7. Eme whọ rọ ẹro ruẹ nọ u dhesẹ nọ eruẹaruẹ nọ e rrọ Eviavia 14:6, 7 i bi rugba nẹnẹ?
7 Ẹbẹbẹ ọfa nọ ma bi wo nọ ma be ta usi uwoma na họ epanọ ma rẹ rọ ta usi uwoma kẹ ahwo nọ a re yo ẹvẹrẹ mai hi. Eruẹaruẹ nọ Jesu o dhesẹ kẹ Jọn ukọ na i dhesẹ nọ ilele riẹ nọ e te ta usi uwoma na evaọ edẹ urere na a ti fi ẹbẹbẹ yena kparobọ. (Se Eviavia 14:6, 7.) Ẹvẹ ma bi ro fi ẹbẹbẹ yena kparobọ nẹnẹ? Ma be ta usi uwoma kẹ ahwo buobu evaọ akpọ na soso. Nẹnẹ, ahwo erẹwho kpobi a rẹ sai se ebe mai je rri ividio nọ ma re ro wuhrẹ ahwo Ebaibol na nọ ma fihọ oria itanẹte mai nọ a re se jw.org. Evẹrẹ nọ ma bi ro kere ebe je ru ividio nana i bu vi odu ọvo (1,000) no. Obe Reawere Uzuazọ Bẹdẹ Bẹdẹ! nọ ma re ro wuhrẹ ahwo Ebaibol na, a fa riẹ fihọ evẹrẹ nọ i bu vi egba ihrẹ (700) no. U te no ere no, ma wo ividio nọ ma re ro wuhrẹ enọ i diezọ gbe ebe nọ ma re ro wuhrẹ enọ i tuaro. Ma ruẹ nọ eruẹaruẹ Ebaibol i bi gine rugba nẹnẹ. Ahwo “evẹrẹ erẹwho na kpobi” a be ta “ẹvẹrẹ ọgbagba” na, koyehọ eme Ebaibol na nọ a bi wuhrẹ. (Zẹk. 8:23; Zẹf. 3:9) Jesu họ ọnọ o bi fiobọhọ kẹ omai ru eware nana kpobi na.
8. Eme usi uwoma nọ ma be ta na o be lẹliẹ ahwo ru?
8 Nẹnẹ, Isẹri Jihova a bu vi ima eree (8,000,000) no, yọ a rrọ erẹwho nọ i bu vi egba ivẹ gbe udhuvẹ (240). Kukpe kukpe, idu ahwo buobu a be họ-ame. Rekọ epanọ ahwo a bi kurẹriẹ te oye o mai wuzou ho, rekọ “uruemu okpokpọ” na nọ a wo. (Kọl. 3:8-10) Ahwo nana jọ a je gbe-ọfariẹ, ru ozighi je mukpahe ahwo erẹwho efa gbe evẹrẹ efa. Rekọ a siọ ekpehre iruemu yena kpobi ba no. Obe Aizaya 2:4 u bi rugba evaọ oma rai. O ta nọ: “A ti gbe wuhrẹ ẹmo-ofio ofa ha.” Ma tẹ daoma wo emamọ uruemu, o te lẹliẹ ahwo kurẹriẹ ziọ ukoko na yọ u re dhesẹ nọ ma bi lele Jesu Kristi nọ o wuzou mai. (Jọn 13:35; 1 Pita 2:12) Orọnikọ ẹgba obọ mai ma sai ro ru onana ha. Jesu họ onọ o bi fiobọhọ kẹ omai.
JESU Ọ REHỌ ỌRIGBO JỌ MU
9. Eme a ruẹaro riẹ evaọ Matiu 24:45-47 inọ o te via evaọ oke urere na?
9 Se Matiu 24:45-47. Jesu ọ ruẹaro nọ evaọ edẹ urere na, ọ te rehọ “ọrigbo nọ a re fievahọ nọ o wo areghẹ” mu re ọ rọ ẹme Ọghẹnẹ wuhrẹ ilele riẹ. Onana u dhesẹ nọ ọrigbo yena o ti ru iruo gaga re ọ sai ru onana gba. Yọ ere o bi gine ru nẹnẹ. Jesu nọ o wuzou mai na ọ rehọ umutho ahwo jọ evaọ usu Ileleikristi nọ a rọ ẹzi wholo na mu re a rehọ ẹme Ọghẹnẹ kuọ idibo riẹ gbe amọfa nọ a gwọlọ wuhrẹ kpahe Ọghẹnẹ. Yọ ọ gwọlọ nọ a hae rọ ẹme Ọghẹnẹ wuhrẹ ai “evaọ ẹruoke.” Ezae nana a be rọ oma ru ilori kẹ amọfa ha. (2 Kọr. 1:24) Ukpoye, a be hae daoma kareghẹhọ inọ Jesu Kristi họ “osu gbe oletu” rọkẹ ahwo riẹ.—Aiz. 55:4.
10. Obe vẹ evaọ usu enọ a dhesẹ evaọ uwoho na u fiobọhọ kẹ owhẹ kurẹriẹ ziọ edhere uzuazọ ebẹdẹ bẹdẹ na?
10 Anwọ 1919 ze, ọrigbo nọ a re fievahọ na o bi ro kere ebe nọ i re fiobọhọ kẹ ahwo wuhrẹ Ebaibol jẹ riẹ Ọghẹnẹ. Evaọ ukpe 1921, ọrigbo na o kere obe jọ nọ a re se The Harp of God re a ro wuhrẹ ahwo Ebaibol na. Nọ eware i bi nwene na, a te kere ebe efa. Obe vẹ whọ kaki wuhrẹ nọ u fiobọhọ kẹ owhẹ riẹ Ọsẹ obọ odhiwu mai je you rie? Kọ obe “Let God Be True,” Uzẹme nọ U re Suohwo kpo Uzuazọ Ebẹdẹbẹdẹ, Whọ Sae Ria Bẹdẹ Bẹdẹ eva Aparadase ọ Otọakpọ, Eriariẹ Nọ I Re Su Kpohọ Uzuazọ Ebẹdẹ Bẹdẹ, Eme Ebaibol na O Gine Wuhrẹ?, Eme Ebaibol na Ọ rẹ Sai Wuhrẹ Omai?, manikọ obe ọkpokpọ mai na, Reawere Uzuazọ Bẹdẹ Bẹdẹ!? U wo oware nọ a rọ fiki riẹ kere ebe nana ọvuọvo.
11. Fikieme o jẹ roja gaga re ma hae rọ ẹme Ọghẹnẹ kuọ oma mai?
11 Orọnikọ ahwo nọ i mu Ọghẹnẹ họ ewuhrẹ kpahe obọ ọvo u fo nọ a rẹ romatotọ wuhrẹ Ebaibol na ha. U fo nọ mai kpobi ma rẹ romatotọ wuhrẹ Ebaibol na. Pọl ukọ na o kere nọ: “Emu ọgaga ọ rrọ kẹ ahwo nọ a kpako.” Ọ tẹ jẹ ta nọ emu nana o re fiobọhọ kẹ omai “vuhu oware uwoma gbe uyoma.” (Hib. 5:14) Enẹna, re ohwo ọ sai koko izi Jihova, ọ rẹ dadawọ muotọ, keme eware etọtọ ọvo ahwo a bi ru. Rekọ Jesu ọ be kuọ omai ziezi re ma sai dikihẹ ga je ru oware nọ o rẹ were Ọghẹnẹ. Ẹme Ọghẹnẹ nọ ọ rrọ Ebaibol na họ emu nọ ọ be rọ kuọ omai na. Jesu ọ be rehọ ọrigbo nọ a re fievahọ na ruẹrẹ emu na kpahe je ru ei te omai obọ.
12. Ẹvẹ ma bi ro dhesẹ odẹ Ọghẹnẹ via wọhọ epanọ Jesu o ru?
12 Ma bi ru re ahwo a riẹ odẹ Ọghẹnẹ wọhọ epanọ Jesu o je ru. (Jọn 17:6, 26) Ẹvẹ ma bi ro ru ei? Evaọ ukpe 1931, ma ta nọ odẹ nọ ma gwọlọ nọ a se omai họ Isẹri Jihova. Ma ru onana keme ma gwọlọ nọ odẹ Ọsẹ obọ odhiwu mai na a rẹ rọ riẹ omai. (Aiz. 43:10-12) Yọ anwọ amara Akpe ukpe yena ze, ahwo a be jọ uke emagazini mai kpobi ruẹ odẹ yena kamara kamara. U te no ere no, ma fi odẹ Ọghẹnẹ họ oria kpobi nọ a si rie no evaọ Ebaibol na. Yọ whọ rẹ jọ Ebaibol Efafa Akpọ Ọkpokpọ ọrọ Ikereakere Efuafo Na ruẹ odẹ na evaọ eria nọ u fo nọ ọ rẹ jọ. Oware nana o lẹliẹ omai wo ohẹriẹ no ichọche buobu nọ i si odẹ Ọghẹnẹ no Ebaibol rai buobu no.
JESU Ọ BE VUẸ ILELE RIẸ OWARE NỌ U FO NỌ A RE RU
13. Ẹvẹ u ro mu owhẹ ẹro nọ Jesu ọ be rehọ “ọrigbo nọ a re fievahọ nọ o wo areghẹ na” wuhrẹ omai nẹnẹ? (Jọn 6:68)
13 Jesu ọ be rehọ “ọrigbo nọ a re fievahọ nọ o wo areghẹ na” fiobọhọ kẹ omai re ma sai ru oware nọ o rẹ were Ọghẹnẹ ẹsikpobi. Ẹvẹ who rri eware nọ a bi wuhrẹ omai evaọ ukoko na? Ẹsejọhọ who te rri epanọ ukoko na u woma te, whọ rẹ kareghẹhọ ẹme nọ Pita ukọ na ọ ta kẹ Jesu inọ: “Ono ma rẹ nyabru? Who wo eme uzuazọ ebẹdẹ bẹdẹ.” (Jọn 6:68) Ẹvẹ uzuazọ mai o hae te jọ ogbẹrọ ukoko Jihova ha? Jesu ọ be rehọ ukoko na wuhrẹ omai eware kpobi nọ Ọghẹnẹ ọ gwọlọ nọ ma ru. O bi wuhrẹ omai epanọ ma sae rọ ta usi uwoma na ziezi. O bi fiobọhọ kẹ omai “whẹ uruemu okpokpọ na họ oma,” re ma sai ru eware nọ e rẹ were Jihova ẹsikpobi.—Ẹf. 4:24.
14. Eme ukoko Jihova u ru nọ u fiobọhọ kẹ owhẹ no anwẹnọ okpẹyao COVID-19 na ọ rọ rrọ otọ na?
14 Jesu ọ kẹ omai ehrẹ nọ i re fiobọhọ kẹ omai evaọ oke obẹbẹ. Ehrẹ jọ nọ ọ kẹ omai nọ okpẹyao COVID-19 na o du lahwe i fiobọhọ kẹ omai gaga. Nọ ẹyao na o du lahwe, ahwo buobu a riẹ oware nọ a re ru hu. Rekọ Jesu ọ rehọ ukoko na vuẹ omai oware nọ ma re ru re ẹyao na o gbe vo ruọ omai oma ha. A vuẹ omai nọ ma hai ku eware ruru unu gbe inwe mai nọ ma tẹ rrọ udevie ahwo, yọ ma du go kẹle ahwo gahrọ họ. A tẹ jẹ vuẹ ekpako na re a hai se inievo na hayo te oria rai re a riẹ sọ a wo emu nọ a rẹ re gbe eware efa nọ e roja. A vẹ jẹ hae nọ inievo na sọ a be hai ru eware nọ i re fiobọhọ kẹ ai kru ẹrọwọ rai. (Aiz. 32:1, 2) U te no ere no, Utu Ẹruorote na a be hae rọ ẹme Ọghẹnẹ tuduhọ omai awọ jẹ vuẹ omai oware nọ ma re ru kẹse kẹse.
15. Oghẹrẹ vẹ ukoko o vuẹ omai nọ ma ro ru ewuhrẹ jẹ ta usi uwoma nọ ẹyao COVID-19 u muhọ evo no, kọ eme u no rie ze?
15 Nọ ẹyao COVID-19 na o muhọ evo no, a raha oke he, a tẹ vuẹ omai oghẹrẹ ofa nọ ma te hai ro kpohọ ewuhrẹ jẹ ta usi uwoma. Enẹna eware wọhọ ifonu gbe ekọmputa ma bi ro ru ewuhrẹ je kpohọ ikokohọ. Yọ ileta gbe ifonu ma be rọ ta usi uwoma. Jihova ọ be ghale eware nana kpobi nọ ma bi ru na. Iyẹrẹ nọ i no iwou ogha buobu ze i dhesẹ nọ ahwo buobu a bi kurẹriẹ yọ inievo buobu a mu amọfa Ebaibol họ ewuhrẹ no.—Rri ẹkpẹti na “ Jihova O bi Fiobọhọ Kẹ Omai Evaọ Usi Uwoma nọ Ma be Ta Na.”
16. Eme u mu omai ẹro?
16 Oke ọsosuọ, ahwo jọ a je roro nọ ukoko na o be nwane dhozọ hrọ, ẹyao na ọ be nwani vo te epanọ a bi rri rie na ha. Rekọ nọ oke o be nyaharo na, ma tẹ te ruẹ nọ eware nọ a vuẹ omai nọ ma ru na e ginẹ roja gaga. (Mat. 11:19) Nọ ma te rri oghẹrẹ nọ Jesu ọ be rọ rehọ ukoko na rẹrote omai, avro ọ rrọ omai udu vievie he inọ Jihova avọ Ọmọ oyoyou riẹ a te jọ kugbe omai nọ ebẹbẹ efa e te ze evaọ obaro.—Se Ahwo Hibru 13:5, 6.
17. Ẹvẹ who rri oghẹrẹ nọ Jesu o bi ro su omai evaọ ukoko na?
17 Oghẹrẹ nọ Jesu o bi ro su ukoko na o were omai kẹhẹ. Eva e be were omai inọ ma rrọ ukoko nọ a rẹ jọ rri erẹwho jọ inọ i woma vi ejọ họ, hayo rri evẹrẹ jọ inọ eye e mai woma ha. A be rọ ẹme Ọghẹnẹ wuhrẹ omai ziezi, yọ a be kẹ omai eware kpobi nọ i re fiobọhọ kẹ omai ta usi uwoma na. U te no ere no, ukoko na u bi wuhrẹ omai epanọ ma sai ro wo uruemu okpokpọ nọ u fo nọ Ileleikristi a re wo na, ma tẹ be jẹ daoma re ma you ohwohwo. A rẹ ruẹ obọ osu mai Jesu Kristi hi!
OLE AVỌ 16 Jiri Jah nọ Ọ rọ Ọmọ Riẹ Mu No
^ Ahwo buobu gbidi gbidi te ezae te eyae, te emaha te ekpako, a be rọ ajọwha ta usi uwoma na nẹnẹ. Kọ whọ rrọ usu rai? O tẹ rrọ ere, kiyọ whọ rrọ usu ahwo nọ a be romakpotọ kẹ Jesu Kristi. Ma te jọ uzoẹme nana ta kpahe oware nọ u dhesẹ nọ Jesu o bi fiobọhọ kẹ omai re ma sai ru iruo usi uwoma ota nọ ọ kẹ omai na nẹnẹ. Eware nana nọ ma te ta kpahe na i ti fiobọhọ kẹ omai gbẹ gọ Jihova je ru oware nọ Kristi ọ gwọlọ.
